Ndi Ebiereikpe Ekeme Ndikop Item?

ẸKEKOT Sladjana, n̄wan emi edide kiet ke otu Mme Ntiense Jehovah ke Croatia ẹte edi esop kaban̄a ikpe okụk. Enye ama ababak ekesịm esop. Edi owo enye eken oro eketienede abuana ke ikpe oro ikedịghe idisịm ke ini. Ama ọdọn̄ Sladjana ndinọ ikọ ntiense, ntre ke ini kpukpru owo ẹketiede ẹbet adaidaha ufọkesop, enye ama adaha uko uko ekenyene nneme ye ebiereikpe.

Enye ama obụp ebiereikpe ete: “Ete, ndi ọmọfiọk ke mîbịghike mme ebiereikpe ye ufọkesop ididụhe aba ke isọn̄ emi?” Nte ededi, enye eketịn̄ aban̄a mme ebiereikpe oro ẹdude idahaemi.

Idem ama akpa ebiereikpe oro anam enye ikemeke ndisioro uyo, edi osụk esese enye. Ekem, esop ama odụk. Ke esop ama akasuana, Sladjana ama atuak ada man esịn ubọk ke n̄wed; ebiereikpe oro ama esịn enye inua ke utọn̄ ete: “Ndi enen̄ede etịn̄ akpanikọ ke mîbịghike mme ebiereikpe ye ufọkesop ididụhe aba ke isọn̄?”

Sladjana ama ọbọrọ ete: “Edi ntre Ete, ntịn̄ ata akpanikọ!”

Ebiereikpe oro ama obụp enye ete: “Ndi emenyene n̄kpọ ndisọn̄ọ se etịn̄de?”

Sladjana ama ọbọrọ ete: “Ih, Bible ọdọhọ ntre.”

Ebiereikpe oro ama ọdọhọ ke ikpama ndikot utọ itie oro, edi enye ikenyeneke Bible. Ntre, Sladjana ama ọdọhọ ke iyanam enye enyene Bible. Mme Ntiense ẹma ẹka edem ebiereikpe oro ẹkenyene nneme ye enye, ẹnọ enye Bible, ẹnyụn̄ ẹsịn udọn̄ ẹnọ enye ẹte ekpep Bible kpukpru urua. Ebiereikpe oro ama enyịme, ndien ikebịghike, enye ama akabade edi kiet ke otu Mme Ntiense Jehovah.

Ntịn̄nnịm ikọ Psalm 2:10 ọdọhọ ete: “Mbufo ndidem ẹdi ọniọn̄, ndien: mbufo, mme ebiereikpe ererimbot, ẹkop item.” Esinem didie ntem ndikụt nte utọ mbon emi ẹsụhọrede idem ẹnyịme ima ima item Jehovah!

[Ndise ke page 32]

Sladjana ye ebiereikpe oro