Ntak Ọfọnde Ifiọk Andibiọn̄ọ Christ?

“Mbufo [ẹma ẹkop] ẹte andibiọn̄ọ Christ ke edi,” ntre ke spirit Abasi akanam apostle kiet ewet anyan ini ko. (1 John 2:18) Nso edemede-owo-udọn̄ ikọ ke emi edi ntem! Ediwak owo ẹkere se ikọ emi ọwọrọde ke ediwak isua ikie idahaemi. Anie ededi andibiọn̄ọ Christ emi? Ini ewe ke enye edidi? Nso ke enye edinam ke ama edisịm?

MBON oro ẹdade nte mme andibiọn̄ọ Christ ẹwak etieti. Ke eset, mbon oro ẹkedade nte mme “andibiọn̄ọ Christ” ẹma ẹsịne mme Jew, mme Pope, ye mme akwa edidem Rome. Ke uwụtn̄kpọ, ke ini Akwa Edidem Frederick II (emi okodude uwem ke isua 1194 esịm 1250) mîkamaha ndibuana ke ekọn̄ oro mbon Catholic ẹken̄wanade ye mbon Muslim, Pope Gregory IX okokot enye andibiọn̄ọ Christ onyụn̄ osio enye efep ke ufọkabasi. Innocent IV, emi akadade itie Gregory ama afiak osio enye efep. Frederick ọkọdọhọ ke Innocent akakam edi andibiọn̄ọ Christ.

Apostle John edi n̄kukụre andiwet Bible oro ewetde ikọ oro “andibiọn̄ọ Christ,” m̀mê “mme andibiọn̄ọ Christ.” Ikọ emi ẹdu utịm ikotion ke akpa ye udiana N̄wed John oro John ekewetde. Ẹsion̄o mme ufan̄ikọ oro enye ọdọn̄ọde ẹwet ke ekebe oro odude ke page oro etienede. Mme ufan̄ikọ emi ẹwụt ke andibiọn̄ọ Christ edi osu nsu ye andibian̄a, oro oyomde ndibiat itie ebuana oro owo enyenede ye Christ ye Abasi. Ntak edi oro apostle John etemede ekemmọ mme Christian ete: “Ndima, ẹkûnịm kpukpru ikọ odudu spirit ke akpanikọ, edi ẹdomo mme ikọ odudu spirit ẹse man ẹkụt m̀mê mmọ ẹtọn̄ọ ẹto Abasi, koro ediwak prọfet nsu ẹwọn̄ọ ẹdụk ke ererimbot.”—1 John 4:1.

Jesus n̄ko ama odụri owo utọn̄ aban̄a mbon abian̄a, m̀mê mme prọfet nsu, ete: ‘Mmọ ẹyefọrọ ikpa erọn̄ ẹdi ke ọtọ mbufo, edi ke esịt esịt ẹdi ndiọi wolf. Mbufo ẹyeda mfri [m̀mê ubọkutom] mmọ ẹfiọk mmọ.’ (Matthew 7:15, 16) Ndi Jesus ama odụri mme anditiene enye utọn̄ n̄ko aban̄a ndamban̄a andibiọn̄ọ Christ? Ẹyak ise nte ikemede ndifiọk ubi ubi owo abian̄a emi.