Jehovah Ayak “Edisana Spirit Ọnọ Mbon Oro Ẹben̄ede Enye”

“Edieke mbufo, emi ẹdiọkde ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak edisana spirit ọnọ mbon oro ẹben̄ede enye!”—LUKE 11:13.

1. Ini ewe ke nnyịn isinen̄ede iyom un̄wam edisana spirit?

 ‘ENYE emi ikpọn̄ akak mi. Edisana spirit kpọt ekeme ndin̄wam mi nyọ idomo emi.’ Ndi akanam emetịn̄ ikọ eke etiede ntre? Ata ediwak mme Christian ẹsitịn̄. Ekeme ndidi eketịn̄ ikọ oro ke ama ekedifiọk ke emenyene idiọk udọn̄ọ. Mîdịghe eyedi ama etịn̄ ikọ emi ke ini nsan̄a ndọ fo oro ẹma ẹkedụn̄ kiet ẹbịghi, akakpade. Onyụn̄ ekeme ndidi eketịn̄ ikọ emi ke ini ọkpọsọn̄ mfụhọ ekemende idara idara uwem fo emen. Ekeme nditie fi nte ke n̄kukụre se ikanamde ekeme ndiyọ n̄kpọsọn̄ idaha ke uwem ekedi “odudu eke ebede ukeme owo” oro edisana spirit Jehovah ọkọnọde fi.—2 Corinth 4:7-9; Psalm 40:1, 2.

2. (a) Mme n̄kpo-ata ewe ke ata mme Christian ẹsobo? (b) Mme mbụme ewe ke nnyịn idineme ke ibuotikọ emi?

² Ata mme Christian ẹnyene ndiyọ ọkpọsọn̄ mfịghe ye ubiọn̄ọ ke ererimbot unana uten̄e Abasi emi. (1 John 5:19) Ke adianade do, Satan kpa Devil ke an̄wana ọkpọsọn̄ ekọn̄ ye mme anditiene Christ, kpa mbon emi “ẹnịmde ibet Abasi ẹnyụn̄ ẹnyenede utom editie ntiense nnọ Jesus.” (Ediyarade 12:12, 17) Ntak edi oro nnyịn inen̄erede iyom un̄wam spirit Abasi ikan nte akanam iyomde. Nso ke nnyịn ikeme ndinam man ikụt ke imaka iso ibọ edisana spirit Abasi ọyọhọ ọyọhọ? Ntak emi nnyịn ikemede ndinịm ke Jehovah iditreke ndinọ nnyịn odudu oro iyomde ke mme ini idomo? Uwụtn̄kpọ iba emi Jesus ọkọnọde ọyọnọ nnyịn ibọrọ mbụme emi.

Yịre ke Edibọn̄ Akam

3, 4. Ewe uwụtn̄kpọ ke Jesus ọkọnọ, ndien didie ke enye ekemen uwụtn̄kpọ emi akabuan ye akam?

³ Ini kiet ko, kiet ke otu mbet Jesus ama eben̄e ete: “Ọbọn̄, kpep nnyịn ndibọn̄ akam.” (Luke 11:1) Jesus akada uwụtn̄kpọ iba emi ẹkebietde kiet eken ọnọ mbet esie ibọrọ. Akpa uwụtn̄kpọ aban̄a owo emi enyenede esenowo, ndien ọyọhọ iba aban̄a ete emi akpan̄de utọn̄ ọnọ eyen esie. Ẹyak nnyịn ineme uwụtn̄kpọ mbiba emi.

⁴ Jesus ọkọdọhọ ete: “Anie ke otu mbufo edinyene ufan, edinyụn̄ aka ebịne enye ke ufọt okoneyo onyụn̄ ọkọdọhọ enye ete, ‘Ufan, buọt mi uyo ita, koro ufan mi kiet osụk ọnyọn̄ isan̄ edi idahaemi, ndien nnyeneke n̄kpọ eke nnịmde enye ke iso’? Ndien owo emi odu ke esịt ufọk ọbọrọ ete, ‘Kûfịna mi. Mmọkọkọbi usụn̄, ndien ami ye n̄kpri nditọ mi imododụk idap; n̄kemeke ndidaha nda nnọ fi n̄kpọ ndomokiet.’ Ndọhọ mbufo nte, Okposụkedi nte enye mîdidahake ida inọ enye n̄kpọ ke ntak edide ufan esie, ke akpanikọ ke ntak emi enye ọsọn̄ọde eyịre, enye ayadaha ke enyọn̄ ọnọ enye n̄kpọ eke enye oyomde.” Do ndien ke Jesus ekemen uwụtn̄kpọ emi akabuan ye ndiyịre mbọn̄ akam, ke ini enye ọdọhọde ete: “Mmọdo ndọhọ mbufo  nte, Ẹka iso ẹben̄e, ndien ẹyenọ mbufo; ẹka iso ẹyom, ndien mbufo ẹyekụt; ẹka iso ẹkọn̄, ndien ẹyeberede ẹnọ mbufo. Koro kpukpru owo eke ẹben̄ede ẹbọde, kpukpru owo eke ẹnyụn̄ ẹyomde ẹkụtde, ẹyenyụn̄ ẹberede ẹnọ kpukpru owo eke ẹkọn̄de.”—Luke 11:5-10.

5. Nso ke uwụtn̄kpọ aban̄ade owo oro ekeyịrede ọkọn̄ usụn̄ do ekpep nnyịn aban̄a edu emi ikpenyenede ke ini ibọn̄de akam?

⁵ In̄wan̄-in̄wan̄ uwụtn̄kpọ emi aban̄ade owo oro ekeyịrede ọkọn̄ usụn̄ do, owụt edu emi ikpenyenede ke ini ibọn̄de akam. Tịm fiọk ke Jesus ọkọdọhọ ke ẹma ẹnọ owo oro se enye okoyomde ke ‘ntak emi enye ọkọsọn̄ọde eyịre.’ (Luke 11:8) Ikọ oro ẹkabarede nte “ọsọn̄ọde eyịre” odu ini kiet kpọt ke Bible. Ẹkabade enye ẹto ikọ Greek oro ọwọrọde ke ata ata usụn̄, “ndinana iso o-bụt.” Ẹsiwak ndida owo emi ananade iso o-bụt nte owo oro mînyeneke ido. Edi, edieke owo mîkopke bụt ke ntak emi enye eyịrede anam eti n̄kpọ, oro iwọrọke ke enye inyeneke ido. Ntre ke ekedi ye owo oro esenowo ekemende enye ke uwụtn̄kpọ oro. Bụt ndomokiet ikanamke enye ndiyịre nyom se inanade enye. Sia Jesus ọdọhọde nnyịn ikpebe owo emi, do nnyịn n̄ko ikpenyene ndiyịre mbọn̄ akam. Jehovah oyom nnyịn ‘ika iso iben̄e, ika iso iyom, ika iso ikọn̄.’ Ndien enye ọyọbọrọ onyụn̄ ayak “edisana spirit ọnọ mbon oro ẹben̄ede enye.”

6. Ke eyo Jesus, didie ke mme owo ẹkeda edikama owo esen?

⁶ Jesus owụt ke akpana isọn̄ọ iyịre ke edibọn̄ akam onyụn̄ ọnọ ntak ikpanamde ntre. Man ukpepn̄kpọ emi etịm an̄wan̄a, nnyịn inyene ndikere mban̄a nte mbon oro ẹkekopde uwụtn̄kpọ Jesus emi ẹkesidade edikama owo esen. Ediwak mbụk ke N̄wed Abasi ẹwụt ke ini ẹkewetde Bible, ekedi ido mme owo—akpan akpan mme asan̄autom Abasi—ndikama owo esen. (Genesis 18:2-5; Mme Hebrew 13:2) Ekedi n̄kpọ esuene edieke owo etrede ndikama esenowo. (Luke 7:36-38, 44-46) Ẹyak ifiak ibịne mbụk Jesus ye emi ke ekikere.

7. Ntak emi owo oro ke uwụtn̄kpọ Jesus mîkokopke bụt ndikedemede ufan esie ke idap?

⁷ Ke uwụtn̄kpọ oro, esenowo abuat owo oro ke ufọt okoneyo. Enye ọfiọk ke obiomo imọ ndinọ esenowo imọ udia, edi enye ‘inyeneke n̄kpọ eke enịmde enye ke iso.’ Enye akada emi nte mbabuat idaha. Ana enye oyom uyo, inamke n̄kpọ m̀mê nso ke oro edikpa enye. Ntre, enye aka ufọk ufan esie inyụn̄ ikopke bụt ndidemede enye ke idap. Enye ofiori ete, “Ufan, buọt mi uyo ita.” Enye ọsọn̄ọ eyịre ke eben̄e esie emi tutu enye enyene se enye oyomde. Do ndien, enye ekeme ndida uyo oro enye ọbọde ntịm n̄kama esenowo esie.

Nen̄ede Ben̄e N̄kpọ Oro Enen̄erede Oyom

8. Nso idinam nnyịn isọn̄ọ iyịre ibọn̄ akam iben̄e edisana spirit?

⁸ Nso ke uwụtn̄kpọ emi owụt aban̄a ntak oro anade isọn̄ọ iyịre ke akam? Owo oro ama  aka iso eben̄e uyo emi koro enye ama ọfiọk ke imọ mînyeneke uyo oro, imọ idikemeke ndikama esenowo imọ. (Isaiah 58:5-7) Kpasụk ntre, sia nnyịn imọdiọn̄ọ ke imenen̄ede iyom spirit Abasi man ikeme ndinam utom nnyịn nte ata mme Christian, ntak edi oro ikade iso iben̄e Abasi ọnọ nnyịn spirit esie. (Zechariah 4:6) Ke ẹsiode oro ẹfep, nnyịn idikwe unen. (Matthew 26:41) Ndi omokụt akpan n̄kpọ oro nnyịn ikemede ndikpep nto uwụtn̄kpọ emi? Edieke ifiọkke ke imenen̄ede iyom spirit Abasi, nnyịn iditreke ndisọn̄ọ nyịre mben̄e enye.

9, 10. (a) Nọ uwụtn̄kpọ oro owụtde ntak anade isọn̄ọ iyịre iben̄e Abasi ọnọ nnyịn spirit esie. (b) Nso mbụme ke nnyịn ikpobụp idem nnyịn, ndien ntak-a?

⁹ Man imen ukpepn̄kpọ emi ikabuan ye se isitịbede mfịn, yak idọhọ ke owo kiet ke ubon mbufo ọdọn̄ọ ke ufọt okoneyo. Nte afo akpaka ekedemede abiausọbọ ke idap oyom un̄wam? Ukpakaha edieke udọn̄ọ oro mîsọn̄ke ubọk. Edi, edieke enye enyenede ifehesịt, bụt idinamke fi ndibịne abiausọbọ. Ntak-a? Koro oyom ẹnam n̄kpọ usọp usọp. Afo ọmọfiọk ke emenen̄ede oyom un̄wam abiausọbọ. Ọdọn̄ọ udọn̄ọ oro ekeme ndikpa edieke mûsọpke uyom un̄wam. Kpasụk ntre, ke ndamban̄a usụn̄, ata mme Christian ẹka isọ ndisobo idaha oro oyomde ẹnam n̄kpọ usọp usọp. Kamse, Satan ke oyoyo nte “ekpe eke okụnide” oyom usụn̄ ndita nnyịn. (1 Peter 5:8) Nnyịn imenen̄ede iyom un̄wam spirit Abasi man ika iso idu ke eti idaha ke n̄kan̄ eke spirit. Nditre ndiyom un̄wam Abasi ekeme ndida n̄kosụn̄ọ ke n̄kpa. Ntem, ana nnyịn isọn̄ọ iyịre iben̄e Abasi edisana spirit esie. (Ephesus 3:14-16) Emi edi n̄kukụre se idin̄wamde nnyịn inyene ukeme ‘ndiyọ tutu esịm utịt.’—Matthew 10:22; 24:13.

¹⁰ Mmọdo, ọfọn ndisibụp idem nnyịn ndusụk ini ite, ‘Adan̄a didie ke ami nsisọn̄ọ nyịre mbọn̄ akam?’ Ti ete ke edieke itịmde ifiọk ke imoyom un̄wam Abasi, nnyịn iyeyịre iben̄e enye edisana spirit.

Nso Isinam Nnyịn Ibọn̄ Akam ye Mbuọtidem?

11. Didie ke Jesus ekemen uwụtn̄kpọ ete ye eyen akabuan ye akam?

¹¹ Uwụtn̄kpọ Jesus aban̄ade owo oro ekeyịrede ọkọn̄ usụn̄ owụt edu oro andinịm ke akpanikọ esinyenede ke ini enye ọbọn̄de akam. Ọyọhọ uwụtn̄kpọ iba owụt nte Jehovah Abasi, kpa andikop akam esinamde n̄kpọ. Jesus okobụp ete: “Ke akpanikọ, ewe ete odu ke otu mbufo eke edinọde eyen urụkikọt utu ke iyak ke ini eyen esie eben̄ede enye iyak? M̀mê edinọde eyen ikpeyen ke ini eyen eben̄ede enye nsenunen?” Jesus ama ada emi akabuan ye akam ke ini ọkọdọhọde ete: “Ke ntre, edieke mbufo, emi ẹdiọkde, ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak edisana spirit ọnọ mbon oro ẹben̄ede enye!”—Luke 11:11-13.

12. Didie ke uwụtn̄kpọ ete oro ọnọde eyen esie se enye eben̄ede owụt ke Jehovah enyịme ndikop akam nnyịn?

¹² Jesus ada uwụtn̄kpọ ete emi ọnọde eyen esie se enye eben̄ede owụt nte Jehovah esede mbon oro ẹbọn̄de akam ẹnọ enye. (Luke  10:22) Akpa kan̄a, tịm fiọk ukpụhọde oro odude. Jehovah ibietke owo oro mîkenyịmeke ndisọp n̄n̄wam ufan esie ke akpa uwụtn̄kpọ oro, edi enye ebiet edima ete emi enen̄erede oyom ndinam se eyen esie eben̄ede enye. (Psalm 50:15) N̄ko, Jesus ada ete nnyịn eke isọn̄ odomo ye Ete nnyịn eke heaven man owụt nte Jehovah enyịmede ndin̄wam nnyịn. Enye ọdọhọ ke edieke ete eke isọn̄, okposụkedi ‘ọdiọkde’ ke ntak ndammana idiọkn̄kpọ, ọnọde eyen esie eti enọ, adan̄a didie akan oro ke nnyịn ikpodori enyịn ke Ete nnyịn eke heaven emi edide Abasi ntatubọk, ọyọnọ ubon esie emi ẹtuakde ibuot ẹnọ enye edisana spirit!—James 1:17.

13. Nso nsọn̄ọ ke nnyịn ikeme ndinyene ke ini ibọn̄de akam inọ Jehovah?

¹³ Nso ke nnyịn ikpep ito emi? Nnyịn imekeme ndinyene mbuọtidem nte ke ini iben̄ede Ete nnyịn eke heaven edisana spirit, enye iditreke ndinọ nnyịn. (1 John 5:14) Ke ini ibọn̄de akam inọ Jehovah ndien ndien, enye ididọhọke ite, “Kûfịna mi. Mmọkọkọbi usụn̄.” (Luke 11:7) Utu ke oro, Jesus ọkọdọhọ ete: “Ẹka iso ẹben̄e, ndien ẹyenọ mbufo; ẹka iso ẹyom, ndien mbufo ẹyekụt; ẹka iso ẹkọn̄, ndien ẹyeberede ẹnọ mbufo.” (Luke 11:9, 10) Ke akpanikọ, Jehovah ‘eyeyere nnyịn ke usen eke nnyịn isemede.’—Psalm 20:9; 145:18.

14. (a) Nso ukwan̄ ekikere esifịna ndusụk mbon oro ẹsobode idomo? (b) Ke ini isobode idomo, ntak emi nnyịn ikpọbọn̄de akam inọ Jehovah ye mbuọtidem?

¹⁴ Uwụtn̄kpọ Jesus aban̄ade edima ete oro owụt in̄wan̄-in̄wan̄ nte ke mfọnido Jehovah enen̄ede okpon akan mfọnido ete nnyịn eke isọn̄. Ntem, inaha nnyịn owo ndomokiet idedei ikere ke mme idomo oro ẹsịmde nnyịn edi ke ntak emi Abasi ayatde esịt ye nnyịn. Satan, kpa akwa asua nnyịn esisịn utọ ekikere oro ke esịt nnyịn. (Job 4:1, 7, 8; John 8:44) Nditie mbiom idem ikpe ke utọ usụn̄ oro ikemke ye N̄wed Abasi. Jehovah isidaha “idiọkn̄kpọ” idomo nnyịn. (James 1:13) Enye isiyakke idomo oro ekemede ndinọmọ owo nte urụkikọt m̀mê nte ikpeyen esịm nnyịn. Ete nnyịn eke heaven esinọ “mbon oro ẹben̄ede enye nti n̄kpọ.” (Matthew 7:11; Luke 11:13) Ke akpanikọ, adan̄a nte nnyịn ifiọkde mfọnido Jehovah ye nte ọdọn̄de enye ndin̄wam nnyịn, ntre n̄ko ke nnyịn idibọn̄ akam ye mbuọtidem. Ke inamde emi, nnyịn n̄ko iyekeme nditịn̄ nte andiwet psalm ekewetde ete: “Abasi omokop ke akpanikọ; omonyụn̄ akpan̄ utọn̄ ke uyo n̄kpe-ubọk mi.”—Psalm 10:17; 66:19.

Nte Edisana Spirit Edide Andin̄wam Nnyịn

15. (a) Nso un̄wọn̄ọ ke Jesus ọkọn̄wọn̄ọ aban̄a edisana spirit? (b) Nso idi usụn̄ kiet emi edisana spirit esin̄wamde nnyịn?

¹⁵ Esisịt ini mbemiso Jesus akakpade, enye ama afiak ọsọn̄ọ se enye eketịn̄de ke uwụtn̄kpọ esie. Kop se enye eketịn̄de aban̄a  edisana spirit mi: “Ami nyeben̄e Ete ndien enye ọyọnọ mbufo andin̄wam efen edidu ye mbufo ke nsinsi.” (John 14:16) Ntem Jesus ọkọn̄wọn̄ọ ke andin̄wam m̀mê edisana spirit, oyodu ye mme anditiene imọ ke ini iso, emi esịnede eyo nnyịn. Nso idi akpan usụn̄ kiet emi nnyịn ibọde un̄wam emi mfịn? Edisana spirit esin̄wam nnyịn iyọ nsio nsio idomo. Didie? Apostle Paul, emi ke idemesie okosobode idomo, ama anam an̄wan̄a ke leta oro enye ekewetde ọnọ ẹsọk mme Christian ke Corinth nte spirit Abasi akan̄wamde imọ. Ẹyak ineme ibio ibio se enye ekewetde.

16. Didie ke idaha nnyịn ekeme ndibiet eke Paul?

¹⁶ Akpa kan̄a, Paul ama etịn̄ in̄wan̄-in̄wan̄ ọnọ ekemmọ mme andinịm ke akpanikọ ke imọ ikọyọ “n̄kukịm ke obụkidem,” emi edide kiet ke otu idomo emi enye okosobode. Ekem, enye ama ọdọhọ ete: “Mma n̄kpe Ọbọn̄ [Jehovah] ubọk utịm ikata nte [n̄kukịm oro] adaha ọkpọn̄ mi.” (2 Corinth 12:7, 8) Okposụkedi Paul ekekpede Abasi ubọk ete emen mfịna imọ efep, mfịna oro okosụk ododu. Ekeme ndidi afo odu ke ukem idaha oro mfịn. Ukem nte Paul, ekeme ndidi afo emeyịre ọbọn̄ akam ye mbuọtidem, eben̄e Jehovah emen idomo fo efep. Edi, kpa ye ọkpọsọn̄ n̄kpeubọk fo, mfịna fo osụk akaka iso. Ndi oro ọwọrọ ke Jehovah ikopke akam fo ye nte ke spirit esie in̄wamke fi? Baba-o! (Psalm 10:1, 17) Kere ban̄a se apostle Paul eketịn̄de adian do ke ufan̄ikọ oro etienede.

17. Didie ke Jehovah ọkọbọrọ akam Paul?

¹⁷ Abasi ọkọdọhọ Paul ke ibọrọ akam esie ete: “Mfọnido mi oro owo mîdotke ekem fi; koro ẹnam odudu mi ọfọn ama ke mmemidem.” Paul ọkọdọhọ ete: “Ke ntre, nyetịm n̄kop idatesịt ndibụre mbụre mban̄a mmemidem mi, man odudu Christ akpaka iso ofụk mi nte ataya.” (2 Corinth 12:9; Psalm 147:5) Ntem, Paul ama edifiọk ke Abasi akada Christ enen̄ede ekpeme imọ nte n̄kpọ eke akatatde ataya ofụk imọ. Mfịn, Jehovah esibọrọ akam nnyịn ke ukem usụn̄ oro. Enye esikpeme mme asan̄autom esie nte n̄kpọ eke atatde ataya ofụk mmọ.

18. Ntak emi nnyịn ikemede ndiyọ mme idomo?

¹⁸ Nte ededi, ataya isinamke edịm etre ndidep, isinyụn̄ inamke ofụm etre ndifụme, edi enye esifụk owo ke ini edịm edepde m̀mê ofụm ofụmede. Ukem ntre, ukpeme oro “odudu Christ” ọnọde ikpanke idomo ndisịm nnyịn, inyụn̄ imenke nsọn̄ọn̄kpọ ifep. Edi ekpeme nnyịn ọbiọn̄ọ mme n̄kpọ ererimbot emi ẹnọde unan ke n̄kan̄ eke spirit ye andikara ererimbot emi, kpa Satan. (Ediyarade 7:9, 15, 16) Mmọdo, idem ọkpọkọm ọyọ idomo emi mînyịmeke ‘ndidaha n̄kpọn̄ fi,’ afo emekeme ndinịm ke Jehovah okụt ukeme oro afo esịnde ye nte ke enye ke anam n̄kpọ aban̄a “uyo eseme fo.” (Isaiah 30:19; 2 Corinth 1:3, 4) Paul ekewet ete: “Abasi edi akpanikọ, idinyụn̄ iyakke ẹdomo mbufo ẹbe se mbufo ẹkemede ndiyọ, edi enye oyosio usụn̄ ubọhọ ke ufọt idomo man mbufo ẹkeme ndiyọ enye.”—1 Corinth 10:13; Philippi 4:6, 7.

19. Nso ke afo ebiere ndinam, ndien ntak-a?

¹⁹ Edi akpanikọ ke “ndiọkeyo” ẹdu ke “mme akpatre usen” ererimbot unana uten̄e Abasi emi. (2 Timothy 3:1) Kpa ye oro, mme asan̄autom Abasi ẹkeme ndiyọ ndiọkeyo emi. Ntak-a? Koro mmọ ẹnyenede un̄wam ye ukpeme edisana spirit Abasi, emi Jehovah atatde ubọk ọnọ kpukpru mbon oro ẹyịrede ẹben̄e enye ye mbuọtidem. Ke ntre, ẹyak nnyịn ibiere ndika iso mben̄e edisana spirit kpukpru usen.—Psalm 34:6; 1 John 5:14, 15.

Didie ke Afo Ọkpọbọrọ?

• Nso ke inyene ndinam man ibọ edisana spirit Abasi?

• Ntak emi nnyịn ikemede ndinyene mbuọtidem ke Jehovah ọyọbọrọ nnyịn ke ini iben̄ede enye edisana spirit?

• Didie ke edisana spirit esin̄wam nnyịn iyọ mme idomo?

[Mme Mbụme Ukpepn̄kpọ]

[Ndise ke page 21]

Nso ke nnyịn ikeme ndikpep nto uwụtn̄kpọ Jesus aban̄ade owo oro ekeyịrede ọkọn̄ usụn̄?

[Ndise ke page 22]

Ndi afo emesiyịre eben̄e edisana spirit Abasi?

[Ndise ke page 23]

Nso ke uwụtn̄kpọ edima ete ekpep nnyịn aban̄a Jehovah?