Jehovah Ayanam “Ẹnyene Unenikpe”

“Nte Abasi idinamke ndimek ikọt esie emi ẹsemede ẹnọ enye uwemeyo ye okoneyo ẹnyene unenikpe?”—LUKE 18:7.

1. Mmanie ẹsisịn udọn̄ ẹnọ fi, ndien ntak-a?

 MME NTIENSE JEHOVAH ke ofụri ererimbot ẹnyene ata ediwak nditọete eke spirit oro ẹma ẹkenam n̄kpọ Jehovah ke ediwak isua. Ndi ọmọfiọk ndusụk ndima nditọete emi? Ekeme ndidi emeti eyenete an̄wan oro ọsọn̄de, emi akanade baptism ke ediwak isua emi ẹkebede edi oro mîsiwakke ndifiak mbono esop ke Ufọkmbono Obio Ubọn̄. Mîdịghe, ọmọfiọk eyenete eren oro ọsọn̄de, emi esibuanade ye esop ke utom ukwọrọikọ kpukpru urua ke ata ediwak isua idahaemi. Ke akpanikọ, ediwak mme anam-akpanikọ nditọete emi ẹkekere ke etisịm idahaemi, ekọn̄ Armageddon ama an̄wan̄wana. Okposụkedi idiọk ererimbot emi osụk akade iso odu tutu esịm emi, oro inamke mbuọtidem oro mmọ ẹkenyenede ke mme un̄wọn̄ọ Jehovah emem m̀mê ndinam mmọ ẹtre ‘ndiyọ tutu esịm utịt.’ (Matthew 24:13) Ke akpanikọ, ọkpọsọn̄ mbuọtidem oro mme anam-akpanikọ asan̄autom Jehovah emi ẹnyenede esinen̄ede esịn udọn̄ ọnọ ofụri esop.—Psalm 147:11.

2. Nso isinam nnyịn ifụhọ?

² Nte ededi, nnyịn imekeme ndikụt ke idịghe kpukpru owo ẹtie ntre. Ndusụk Ntiense ẹmenam utom ke ediwak isua, edi nte ini akade, mbuọtidem mmọ ke Jehovah ọtọn̄ọ ndimem, mmọ ẹnyụn̄ ẹtre ndibuana ke esop Christian. Esidi n̄kpọ mfụhọ ke ini n̄kani nsan̄a nnyịn ẹkpọn̄de Jehovah, ndien esinen̄ede ọdọn̄ nnyịn ndin̄wam “erọn̄” kiet kiet oro ‘oyode ọkpọn̄ usụn̄’ afiak edidụk otuerọn̄. (Psalm 119:176; Rome 15:1) Ndusụk owo ndisọn̄ọ nda ke adan̄aemi mbuọtidem mbon eken akpade edemede mme mbụme. Nso isinam ata ediwak Ntiense ẹka iso ẹnyene mbuọtidem ke mme un̄wọn̄ọ Jehovah ke adan̄aemi mbon eken mînyeneke? Nso ke nnyịn owo kiet kiet ikpanam man iwụt ke imenen̄ede inịm ke “akwa usen Jehovah” ke asan̄a ekpere? (Zephaniah 1:14) Ẹyak ineme uwụtn̄kpọ oro odude ke Gospel Luke.

Ntọt Ẹnọde Mbon Oro Ẹdude “ke Ini Eyen Owo Edidide”

3. Mmanie akpan akpan ẹkeme ndibọ ufọn nto uwụtn̄kpọ aban̄ade ebeakpa ye ebiereikpe, ndien ntak-a?

³ Ke Luke ibuot 18, nnyịn imokot uwụtn̄kpọ aban̄ade ebeakpa ye ebiereikpe. Uwụtn̄kpọ emi ebiet enye oro aban̄ade owo oro ekeyịrede ọkọn̄ usụn̄, oro ikenemede ke ibuotikọ oro ekebede. (Luke 11:5-13) Nte ededi, se ẹnemede ke itien̄wed emi owụt ke uwụtn̄kpọ emi enen̄ede ebehe mbon oro ẹdude ‘ke ini Eyen owo edide’ nte Edidem Obio Ubọn̄, kpa ini emi ọkọtọn̄ọde ke 1914.—Luke 18:8. *

4. Nso ke Jesus eketịn̄ mbemiso ọnọde uwụtn̄kpọ oro ẹkụtde ke Luke ibuot 18?

⁴ Mbemiso Jesus ọkọnọde uwụtn̄kpọ emi, enye ama ọdọhọ ke ẹyenen̄ede ẹkụt uyarade oro owụtde ke imọ imọtọn̄ọ ndikara nte Edidem Obio Ubọn̄ ukem nte esikụtde “emịnen̄mịnen̄ ọwọrọde ke n̄kan̄ ikpaenyọn̄ kiet, ayama esịm n̄kan̄ ikpaenyọn̄ eken.” (Luke 17:24; 21:10, 29-33) Kpa ye oro, ata ediwak  mbon oro ẹdude ke “utịt ini” iditịn̄ke enyịn ke in̄wan̄-in̄wan̄ uyarade oro. (Daniel 12:4) Ntak-a? Ukem nte mbon eyo Noah ye Lot, mmọ idikpan̄ke utọn̄ ke ntọt Jehovah. Ke eyo Noah ye Lot, mme owo ‘ẹma ẹdia n̄kpọ, ẹn̄wọn̄ n̄kpọ, ẹdep n̄kpọ, ẹnyam n̄kpọ, ẹtọ n̄kpọ, ẹnyụn̄ ẹbọp ufọk tutu esịm usen emi ẹkesobode mmọ.’ (Luke 17:26-29) Mmọ ẹma ẹtaba uwem mmọ sia mmọ ẹkenen̄erede ẹsịn idem ke mbubehe idemmọ tutu mmọ idọn̄ke enyịn ke uduak Abasi. (Matthew 24:39) Kpasụk ntre mfịn, mme owo ẹduọ enyịne ke mbubehe idemmọ tutu emi iyakke mmọ ẹkụt uyarade oro owụtde ke idiọk ererimbot emi ọmọn̄ esịm utịt.—Luke 17:30.

5. (a) Mmanie ke Jesus ọkọnọ ntọt, ndien ntak-a? (b) Nso inam mbuọtidem ndusụk owo akpa?

⁵ Nte an̄wan̄ade, Jesus ama ekere ke ererimbot Satan ekeme ndiwọn̄ọde ntịn̄enyịn mbet imọ, idem anamde mmọ ẹyom ‘ndifiak mbịne mme n̄kpọ oro mmọ ẹkekpọn̄de.’ (Luke 17:22, 31) Ke akpanikọ, emi etịbe ọnọ ndusụk Christian. Utọ mbon oro ẹma ẹtie ke ediwak isua ẹbet ini oro Jehovah edidade utịt ọsọk idiọk ererimbot emi. Nte ededi, sia Armageddon mîn̄wanake ke ini oro mmọ ẹkekerede, mmọ ẹduọk idotenyịn. Mbuọtidem oro akanamde mmọ ẹnịm ke usen Jehovah enen̄ede ekpere ọtọn̄ọ ndimem. Emi anam mmọ ẹtehede ube ke utom ukwọrọikọ ẹnyụn̄ ẹtọn̄ọ ndinen̄ede nsịn idem ke mme n̄kpọ eke obụk tutu emi ọbọ mmọ ini oro ẹkpedade ẹnam mme n̄kpọ eke spirit. (Luke 8:11, 13, 14) Nte ini akade mmọ ‘ẹsifiak ẹbịne mme n̄kpọ oro mmọ ẹkekpọn̄de’—nso n̄kpọ mmọn̄eyet ke emi esidi ntem!

Oyom ‘Isibọn̄ Akam Kpukpru Ini’

6-8. (a) Bụk uwụtn̄kpọ oro aban̄ade ebeakpa ye ebiereikpe. (b) Didie ke Jesus akanam uwụtn̄kpọ emi an̄wan̄a?

⁶ Nso ke ikpanam man ika iso inyene mbuọtidem nte ke mme un̄wọn̄ọ Jehovah ẹyesu? (Mme Hebrew 3:14) Jesus ama ọbọrọ mbụme oro ke ndondo oro okụrede ndidụri mbet esie utọn̄ ete ẹkûfiak ẹwọn̄ọde ẹbịne idiọk ererimbot Satan.

⁷ Luke ọdọhọ ke Jesus ama “ọnọ mmọ uwụtn̄kpọ kiet ndiwụt nte ke oyom mmọ ẹbọn̄ akam kpukpru ini, ẹkûnyụn̄ ẹkpa mba.” Jesus ọkọdọhọ ete: “Ebiereikpe emi mîbakke Abasi mînyụn̄ ikponoke owo okodu ke obio kiet. Edi ebeakpa kiet ama odu ke obio oro onyụn̄ esidọdiọn̄ aka ebịne enye, ete, ‘Biere ikpe enen ke ufọt mi ye owo emi enyenede ikọ ye ami.’ Edi, enye inyịmeke ke ndusụk ini, ekem enye ọdọhọ ke esịt esie ete, ‘Okposụkedi nte mmembakke Abasi, mmennyụn̄ n̄kponoke owo, edi, sia ebeakpa emi afịnade mi ndien ndien, nyanam enye enyene unenikpe, mbak enye edidọdiọn̄ edi onyụn̄ edifịna mi akaha.’”

⁸ Ke Jesus ama ọkọnọ uwụtn̄kpọ emi ama, enye ama anam ikọ esie an̄wan̄a ke ndidọhọ ete: “Ẹkop se ukwan̄ ebiereikpe oro ọkọdọhọde! Ke akpanikọ, ndien, nte Abasi  idinamke ndimek ikọt esie emi ẹsemede ẹnọ enye uwemeyo ye okoneyo ẹnyene unenikpe, idem okposụkedi enye enyenede anyanime ye mmọ? Ndọhọ mbufo nte, Enye ayawara anam mmọ ẹnyene unenikpe. Edi, ke ini Eyen owo edidide, nte enye ayakam okụt mbuọtidem ke isọn̄?”—Luke 18:1-8.

‘Biere Ikpe Mi Enen’

9. Ewe akpan n̄kpọ ke ẹsio ẹwụt ke uwụtn̄kpọ aban̄ade ebeakpa ye ebiereikpe?

⁹ Ata akpan n̄kpọ oro uwụtn̄kpọ emi okosiode owụt ama ọwọrọ ada in̄wan̄-in̄wan̄. Ebeakpa, ebiereikpe ye Jesus ke idemesie ẹma ẹnam se idide akpan n̄kpọ ke uwụtn̄kpọ oro ẹnen̄ede ẹn̄wan̄a. Ebeakpa oro ekeben̄e ete: “Biere ikpe enen ke ufọt mi ye owo emi enyenede ikọ ye ami.” Ebiereikpe ama ọdọhọ ete: “Nyanam enye enyene unenikpe.” Mmọdo, Jesus ama obụp ete: ‘Nte Abasi idinamke ẹnyene unenikpe?’ Ndien Jesus ama ọbọrọ ke Jehovah ‘ayawara anam ẹnyene unenikpe.’ (Luke 18:3, 5, 7, 8) Ini ewe ke Abasi ‘edinam ẹnyene unenikpe’?

10. (a) Ini ewe ke ẹkebiere ikpe nte enende ke akpa isua ikie? (b) Ini ewe, ndien didie ke ẹdinam ndinen ikọt Abasi ẹnyene unenikpe mfịn?

¹⁰ Ke akpa isua ikie, “mme usen eke ẹbierede ikpe nte enende” (m̀mê “mme usen usiene,” Kingdom Interlinear) ẹkedisịm ke isua 70 E.N. ke ini ẹkesobode Jerusalem ye temple esie. (Luke 21:22) Ke eyo nnyịn, ẹdibiere edinen ikpe ẹnọ ikọt Abasi ke “akwa usen Jehovah.” (Zephaniah 1:14; Matthew 24:21) Ke ini oro, Jehovah ‘ayada ukụt osio usiene ọnọ mbon oro ẹsịnde ikọt esie ẹkụt ukụt, ndien Jesus Christ ayada usiene ọsọk mmọ eke mîfiọkke Abasi ye mmọ eke mîsụkke ibuot inọ eti mbụk Ọbọn̄ nnyịn Jesus.’—2 Thessalonica 1:6-8; Rome 12:19.

11. Didie ke unenikpe ‘ediwara’ ndidi?

¹¹ Nte ededi, didie ke nsọn̄ọ oro Jesus ọkọnọde nte ke Jehovah “ayawara” ndinam ẹnyene unenikpe akpan̄wan̄a nnyịn? Ikọ Abasi owụt ete ke “okposụkedi [Jehovah] enyenede anyanime,” enye ayawara anam ẹnyene unenikpe ke ini ama ekem. (Luke 18:7, 8; 2 Peter 3:9, 10) Ẹma ẹsọsọp ẹsobo mme idiọkowo ẹfep ke ini Ukwọ ekedide ke eyo Noah. Kpasụk ntre ke ekedi ke eyo Lot, ikan̄ ama oto heaven edep ata mme idiọkowo owot. Jesus ọkọdọhọ ete: “Kpasụk ntre ke edidi ke usen oro Eyen owo ediyararede idem.” (Luke 17:27-30) “Mbabuat nsobo” ọyọtọn̄ọ ntak esịm mme idiọkowo. (1 Thessalonica 5:2, 3) Ke akpanikọ, nnyịn imekeme ndinen̄ede nnịm ke Jehovah idibiatke ini ndisobo ererimbot Satan emi ke usen oro enye enịmde ama ekem.

‘Enye Ayanam Ẹnyene Unenikpe’

12, 13. (a) Didie ke uwụtn̄kpọ Jesus aban̄ade ebeakpa ye ebiereikpe ekpep nnyịn n̄kpọ? (b) Ntak emi ikpenịmde ke Jehovah oyokop akam nnyịn onyụn̄ anam inyene unenikpe?

¹² Uwụtn̄kpọ Jesus aban̄ade ebeakpa ye ebiereikpe osio mme akpan n̄kpọ en̄wen owụt. Jesus ama anam uwụtn̄kpọ esie an̄wan̄a ke ndidọhọ ete: “Ẹkop se ukwan̄ ebiereikpe oro ọkọdọhọde! Ke akpanikọ, ndien, nte Abasi idinamke ndimek ikọt esie . . . ẹnyene unenikpe?” Nte ededi, Jesus ikemenke Jehovah idomo ye ebiereikpe oro nte emi ẹkpedọhọde ke Abasi edinyụn̄ anam n̄kpọ ye mme andinịm ke akpanikọ ke ukem usụn̄ oro. Utu ke oro, Jesus ekekpep mme anditiene enye ete ke Abasi itiehe nte ebiereikpe oro. Ke mme usụn̄ ewe ke Abasi okpụhọde ye ebiereikpe oro?

¹³ Ebiereikpe oro ke uwụtn̄kpọ Jesus, ekedi “ukwan̄ ebiereikpe,” edi Abasi edi ekpe “edinen ikpe.” (Psalm 33:5) Ebiereikpe oro ikekereke iban̄a ebeakpa oro ke usụn̄ baba kiet, edi Jehovah ekere aban̄a nnyịn owo kiet kiet. (2 Chronicles 6:29, 30) Ebiereikpe oro ikenyịmeke ndin̄wam ebeakpa oro, edi Jehovah enyịme; ke nditịm ntịn̄, Enye eben̄e idem ndin̄wam mbon oro ẹnamde n̄kpọ Esie. (Isaiah 30:18, 19) Nso ke ikpep ito emi? Edieke ukwan̄ ebiereikpe oro akakpan̄de utọn̄  okop eben̄e ebeakpa oro onyụn̄ anam enye enyene unenikpe, adan̄a didie akan oro ke Jehovah edikop akam ikọt esie onyụn̄ anam mmọ ẹnyene unenikpe!—Mme N̄ke 15:29.

14. Ntak emi ikpakade iso inịm ke usen ubiereikpe Abasi eyedi?

¹⁴ Mmọdo, mbon oro mînịmke ke usen ubiereikpe Abasi eyedi ẹnam ata akamba ndudue. Ntak-a? Ke nditịm ntịn̄, sia mmọ mînịmke ke “akwa usen Jehovah” emekpere, oro ọwọrọ ke mmọ ẹyịk m̀mê Jehovah akam ekeme ndinam se enye ọkọn̄wọn̄ọde. Mmọn̄ọ, ndi owo ekededi ẹkeme ndiyịk Abasi? (Job 9:12) Ata akpan mbụme oro ikpobụpde edi m̀mê nnyịn owo kiet kiet iyakam ika iso inam akpanikọ? Ndien oro akam edi akpan mbụme oro Jesus okobụpde ke utịt utịt uwụtn̄kpọ aban̄ade ebeakpa ye ebiereikpe oro.

‘Nte Enye Ayakam Okụt Orụk Mbuọtidem Emi ke Isọn̄?’

15. (a) Ewe mbụme ke Jesus okobụp, ndien ntak-a? (b) Nso ke nnyịn ikpobụp idem nnyịn?

¹⁵ Jesus ama obụp edemede-owo-udọn̄ mbụme emi, ete: ‘Ke ini Eyen owo edidide, nte enye ayakam okụt orụk mbuọtidem emi ke isọn̄?’ (Luke 18:8) Jesus iketịn̄ke iban̄a ikpîkpu mbuọtidem, edi eketịn̄ aban̄a ata akpan mbuọtidem, nte enye oro ebeakpa oro ekenyenede. Jesus ikọbọrọke mbụme emi. Enye okobụp mbụme oro man mbet esie ẹkere ẹban̄a orụk mbuọtidem oro mmọ ẹnyenede. Ndi mbuọtidem mmọ ama ọtọn̄ọ ndimem, anamde mmọ ẹyom ndifiak mbịne mme n̄kpọ oro mmọ ẹma ẹkekpọn̄? Mîdịghe, ndi mmọ ẹma ẹnyene orụk mbuọtidem oro ebeakpa oro ekenyenede? Nnyịn n̄ko imekeme ndibụp idem nnyịn mfịn ite, ‘Nso orụk mbuọtidem ke “Eyen owo” okụt ke esịt mi?’

16. Nso orụk mbuọtidem ke ebeakpa oro ekenyene?

¹⁶ Oyom inyene orụk mbuọtidem oro ebeakpa oro ekenyenede man itiene idu ke otu mbon oro ẹdinyenede unenikpe Jehovah. Nso orụk mbuọtidem ke enye ekenyene? Enye ama owụt mbuọtidem esie ke ndikọdọdiọn̄ ‘n̄ka mbịne ebiereikpe oro’, nnyụn̄ n̄kọdọhọ enye ‘ebiere ikpe imọ enen.’ Ebeakpa oro ama ọdọdiọn̄ aka ebịne ukwan̄ ebiereikpe oro man enyene unenikpe. Kpasụk ntre n̄ko, ikọt Abasi mfịn ẹkeme nditịm nnịm nte ke Jehovah ayanam mmimọ inyene unenikpe, idem edieke oro ebịghide akan nte mmimọ ikekerede. Ke adianade do, ikọt Abasi ẹwụt mbuọtidem oro mmọ ẹnyenede ke Abasi ebe ke ndikọbọ ke akam, oro edi, ‘ndiseme nnọ Jehovah uwemeyo ye okoneyo.’ (Luke 18:7) Ke akpanikọ, edieke Christian ekpetrede ndibọn̄ akam nyom unenikpe, oro okpowụt ke enye inịmke aba ke Jehovah ayanam mme asan̄autom esie ẹnyene unenikpe.

17. Ntak oro nnyịn ikpọkọbọde ke akam inyụn̄ inyene mbuọtidem ke usen ubiereikpe Jehovah eyedi?

¹⁷ Se iketịbede inọ ebeakpa oro owụt ke nnyịn imenyene mme ntak efen oro akpanamde ikọbọ ke akam. Kam kere ban̄a nte mme idaha esie ẹkpụhọrede ye eke nnyịn. Ebeakpa oro ama esika ebịne ebiereikpe oro okposụkedi owo ndomokiet mîkesịnke udọn̄ inọ enye ndinam ntre, edi Ikọ Abasi enen̄ede esịn udọn̄ ọnọ nnyịn ete ‘ikọbọ ke akam.’ (Rome 12:12) Ebeakpa oro ikọfiọkke m̀mê ẹyenam eben̄e imọ, edi Jehovah ọn̄wọn̄ọ ke iyanam nnyịn inyene unenikpe. Jehovah ama ada prọfet esie etịn̄ ete: “Enye ama ebịghi, bet enye; koro enye mîditreke ndidi, mîdinyụn̄ ibehe ini.” (Habakkuk 2:3; Psalm 97:10) Owo ndomokiet iketieneke ebeakpa  oro ikpe ebiereikpe emi ubọk man n̄kpeubọk esie enyene udop. Edi nnyịn imenyene Jesus emi edide okopodudu andin̄wam “emi odude ke ubọk nnasia Abasi, emi n̄ko anamde n̄kpeubọk ọnọ nnyịn.” (Rome 8:34; Mme Hebrew 7:25) Mmọdo, edieke ebeakpa oro, kpa ye mme mfịna oro enye ekenyenede, ekesikade ebịne ebiereikpe oro onyụn̄ enyene idotenyịn ke enye eyebiere ikpe imọ nte enende, adan̄a didie akan oro ke nnyịn ikpaka iso inyene mbuọtidem nte ke usen ubiereikpe Jehovah eyedi!

18. Didie ke akam edisọn̄ọ mbuọtidem nnyịn onyụn̄ anam inyene unenikpe?

¹⁸ Uwụtn̄kpọ emi ekpep nnyịn ke akam ye mbuọtidem ẹdi itai ye aban̄, n̄ko ke ndikọbọ ke akam ekeme ndibiọn̄ọ mme odudu oro ẹkemede ndinam mbuọtidem nnyịn emem. Nte ededi, emi iwọrọke ke akam n̄wụtidem ekeme ndinam inyene mbuọtidem. (Matthew 6:7, 8) Ke ini ibọn̄de akam sia ifiọkde ke imoyom un̄wam Abasi, oro ayanam nnyịn isan̄a ikpere enye onyụn̄ ọsọn̄ọ mbuọtidem nnyịn. Sia oyomde inyene mbuọtidem man ẹnyan̄a nnyịn, idịghe n̄kpọ n̄kpaidem ndifiọk ntak oro Jesus ekesịnde udọn̄ ọnọ mbet esie ete, “ẹbọn̄ akam kpukpru ini, ẹkûnyụn̄ ẹkpa mba”! (Luke 18:1; 2 Thessalonica 3:13) Edi akpanikọ, idịghe ntak akam nnyịn edinam “akwa usen Jehovah” edi—enye eyedi, edide imọbọn̄ akam ite edi m̀mê ibọn̄ke. Edi mbuọtidem, akam, ọkọrọ ye edinen ido nnyịn ẹdiwụt m̀mê iyenyene unenikpe inyụn̄ ibọhọ ekọn̄ Abasi.

19. Didie ke nnyịn ikpowụt ke imenen̄ede inịm ke Abasi ‘ayanam ẹnyene unenikpe?’

¹⁹ Nnyịn imeti ke Jesus ama obụp ete: ‘Ke ini Eyen owo edidide, nte enye ayakam okụt orụk mbuọtidem emi ke isọn̄?’ Nso idi ibọrọ mbụme emi? Nnyịn imenen̄ede inem esịt ndikụt ke ediwak miliọn mme anam-akpanikọ asan̄autom Jehovah ke ofụri ererimbot ẹwụt ke mmimọ imenyene orụk mbuọtidem emi sia mmọ ẹkọbọde ke akam, ẹmede ime, ẹnyụn̄ ẹsịnde ifịk ẹnam utom Abasi. Ih, Jesus oyokụt orụk mbuọtidem emi ke isọn̄. Ke akpanikọ, okposụkedi isobode ukwan̄ikpe ke ererimbot Satan emi, nnyịn imenen̄ede inịm ke Abasi ayanam ‘ndimek ikọt esie ẹnyene unenikpe.’

[Ikọ idakisọn̄]

Nte Afo Emeti?

• Nso inam mbuọtidem ndusụk Christian akpa?

• Ntak oro ikemede ndinen̄ede nnịm ke usen ubiereikpe Jehovah eyedi?

• Ntak oro ikpọkọbọde ke akam?

• Didie ke edika iso mbọn̄ akam mîdiyakke itaba mbuọtidem nnyịn?

[Mme Mbụme Ukpepn̄kpọ]

[Ndise ke page 26]

Nso idi akpan n̄kpọ oro ẹsiode ẹwụt ke uwụtn̄kpọ aban̄ade ebeakpa ye ebiereikpe?

[Mme ndise ke page 29]

Ediwak miliọn owo mfịn ẹnen̄ede ẹnịm ke Abasi ‘ayanam ẹnyene unenikpe’