Nte Ẹsiwụt Edu Christmas Kpukpru Ini?

“Ubọn̄ enyene Abasi ke ata enyọn̄, emem onyụn̄ odu ke isọn̄ ke otu mme owo emi enye enyịmede.”—Luke 2:14.

 EDIWAK miliọn owo ẹmehe ye mme ikọ oro mme angel Abasi ẹketịn̄de ke ini ẹkesiande mme ekpemerọn̄ oro ẹkekpemede erọn̄ mmọ ke okoneyo ẹte ke Jesus amana. Ke ekperede usenọfiọn̄ emi mme ufọkabasi ẹdọhọde nte Jesus akamanade, inua-okot mme Christian ẹsinen̄ede ẹsịn ukeme ndinyene nti edu uwem. Ẹsiwak ndidọhọ ke mme edu oro mme angel ẹketịn̄de ẹban̄a—oro edi idatesịt, emem, ye mfọnido—emi ẹsiwụtde ke ini usọrọ emi, ẹdi edu Christmas.

Mme owo oro mîdaha Christmas nte edinam ido ukpono ẹsikam ẹma mme utọ nti edu emi, oro ẹtiede nte ke usọrọ emi esida edi. Ke ebiet emi ẹsitrede ufọkn̄wed ye utom ke ini Christmas, mme owo ẹsinyene ifet ndiduọk odudu, ndidu ye mbonubon ye mme ufan mmọ, m̀mê ndidia uwem. Nte ededi, ediwak mbon oro ẹnyenede esịt akpanikọ ẹsida Christmas akpan akpan nte ini ndikpono Jesus Christ.

Inamke n̄kpọ m̀mê mmọ ẹda Christmas nte nso, ediwak owo ẹnyịme ke nti edu ekededi oro ini nduọkodudu emi esidade edi isibịghike. Mme owo ẹsisọp ẹfiak ẹbịne n̄kani edu uwem mmọ. Uwetn̄kpọ Royal Bank of Canada oro ibuotikọ edide “Edu Christmas,” ọkọdọhọ ete: “Urua ifan̄ kpọt ke isua ke ata ediwak owo ẹsidomo ndinam n̄kpọ nte idi mme ‘Christian.’ Ini oro ke mmọ ẹsifọn ido ye ekemmọ owo tutu Obufa Isua ebe, ekem ẹfiak ẹkedu uwem ibụk ye unana edikere mban̄a mbon efen.” Leta oro aka iso ọdọhọ ete ke se “inen̄erede idiọk” ye edu Christmas emi edi nte ke mme owo isiwụtke edu emi “kpukpru ini.”

Edide emenyịme ye ikọ oro m̀mê unyịmeke, enye edemede mme akpan mbụme. Ndi tutu amama mme owo ẹyekeme nditat ubọk nnyụn̄ n̄kere mban̄a kiet eken kpukpru ini? Nte idotenyịn enen̄ede odu ke se mme angel oro ẹketịn̄de okoneyo oro Jesus akamanade oyosu? Mîdịghe ndi idotenyịn ndinyene ata emem edi ikpîkpu ndap?