Nte Afo Emeti?

Nte afo ama ọbọ ufọn ndikot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:

• Nso ikeme ndin̄wam ata Christian edieke iman esie ọkpọn̄de Jehovah?

Sọn̄ọ mbuọtidem fo ye eke mbonubon fo oro ẹsụk ẹsọn̄ọde ẹda. Buana ọyọhọ ọyọhọ ke mme edinam eke spirit. N̄wam mbon en̄wen ke esop. Kûdedei uduọk idotenyịn ke owo ima fo oro ayafiak edikpono Jehovah. Kûduọhọ idemfo. Kpono ndutịm oro Abasi anamde man ẹnọ ntụnọ nyụn̄ tịn̄ nte etiede fi ke idem nọ mme ufan fo.—9/1, page 18-21.

• Nso idi usụn̄ iba emi N̄wed Abasi an̄wamde nnyịn ifiọk “mme akpatre usen”?

Bible ama ebem iso etịn̄ mme n̄kpọ oro ẹditịbede ke “utịt editịm n̄kpọ emi.” (Matthew 24:3, 7, 8; Luke 21:11) Enye etịn̄ n̄ko ete ke edu ye edinam mme owo oro ẹdude ke “mme akpatre usen” ẹyekpụhọde. (2 Timothy 3:1-5) Odot itịm ifiọk ke ẹkenyene ndikwọrọ eti mbụk obio ubọn̄ ke mme akpatre usen emi.—9/15, page 4-6.

• Nso ke esop ẹkpenam edieke Christian awatde ubomisọn̄ ekenyene mbabuat unọmọ ndien mme owo ẹkpan̄a?

Mbiowo oro ẹdụn̄ọrede n̄kpọ emi ẹkeme ndikụt ke owo oro akawatde ubomisọn̄ oro inyeneke ubiomikpe iyịp koro idụhe se enye akpakanamde mbak mme owo ẹdikpan̄a. Edi edieke Christian oro enyenede ubiomikpe iyịp onyụn̄ akabarede esịt, ẹyeda N̄wed Abasi ẹnọ enye nsuannọ oro odotde ẹnyụn̄ ẹbọ enye mme ifetutom oro enye akakamade ke esop.—9/15, page 30.

• Ntak emi nsinsi uwem mîkọn̄ọke ke n̄kọri oro ntaifiọk ẹnamde?

Ntaifiọk ke ẹsịn ukeme ndinam owo odu uwem enen̄ede ebịghi, utọ nte ndidomo ndinam mme nsen ẹbaharede idemmọ ediwak ini m̀mê ke usụn̄ usọbọidem oro ẹnọde ọdọn̄ọ udọn̄ọ mbufa ndido emi edide ukem ukem ye esie. Edi Bible owụt ke ufak Jesus edi n̄kukụre usụn̄ oro mme owo ẹkemede ndinyene nsinsi uwem.—10/1, page 3-5.

• Ndi uyere mme Jew ekedi ntọn̄ọ baptism Christian?

Ikedịghe. Mme Jew ẹkesinam idemmọ asana, edi idịghe se ẹkeyomde ẹnam edi oro mbemiso John enịmde owo baptism. Ke Ibet Moses, ẹkesinyene ndinam idem asana ke ini ke ini, edi Christian esina baptism ini kiet kpọt.—10/15, page 12-13.

• Nso idi Ufọkn̄wed Unọ Mme Asan̄autom Ukpep?

Enye edi ufọkn̄wed emi mbiowo ye mme asan̄autom unamutom oro mîdọhọ ndọ ẹsikade, ndien ẹsinọ mmọ ẹka ẹkenam utom ke ebiet oro udọn̄ okponde. Ẹkeme ndinọ mmọ ẹka esop oro mmọ ẹketode ẹdi, esop en̄wen ke idụt mmọ, m̀mê ke idụt en̄wen.—11/15, page 10-11.

• Nso, mîdịghe anie edi andibiọn̄ọ Christ oro ẹtịn̄de ẹban̄a ke 1 John 2:18; 4:3?

Ke nditịm ntịn̄, “andibiọn̄ọ Christ” edi owo ekededi oro an̄wanade ye Christ, m̀mê abian̄ade owo ete ke idi Christ, m̀mê ọdọhọde ke ida ke ibuot Christ. Se Jesus ye John ẹketịn̄de ẹwụt in̄wan̄-in̄wan̄ ke andibiọn̄ọ Christ idịghe owo kiet, edi ẹdi otu emi ẹsuande nsunsu ukpepn̄kpọ mînyụn̄ imaha Obio Ubọn̄ Abasi.—12/1, page 4-6.