Afo Emekeme Ndiyọ Afanikọn̄

EDIWAK owo ke ẹyọ afanikọn̄ emi ẹbietde oyobio ke mme akpatre usen emi. Amaedi mme Christian, ima Abasi ye edisọn̄ọ nyịre ke mme edumbet esie ẹn̄wam mmọ ẹyọ. Didie ke edi ntre? Ẹkeme ndikụt ibọrọ ke uwụtn̄kpọ oro Jesus Christ ọkọnọde. Enye ekemen mme mbet esie oro ẹkopde item odomo ye “owo ọniọn̄, emi ọkọbọpde ufọk esie odori ke enyọn̄ akamba itiat.” Jesus ọkọdọhọ ete: “Edịm onyụn̄ edep, ukwọ edi, ofụm abara onyụn̄ eberi ufọk oro edi enye iduọhọ, koro ẹkebọpde enye ẹdori ke enyọn̄ akamba itiat.”—Matthew 7:24, 25.

N̄kọ omokụt ke okposụkedi owo oro ke uwụtn̄kpọ oro edide owo ọniọn̄, afanikọn̄—emi edịm, ukwọ, ye oyobio ẹdade ẹban̄a—ẹsụk ẹsesịm enye. Mmọdo, Jesus ikọdọhọke ke afanikọn̄ ndomokiet idisịmke mme mbet imọ ye nte ke mmọ ẹyenyene emem ye ifụre kpukpru ini. (Psalm 34:19; James 4:13-15) Edi enye ọkọdọhọ ke mme anam-akpanikọ asan̄autom Abasi ẹkeme nditịm idem nnọ nnyụn̄ nyọ mme utọ ikpọ afanikọn̄ oro.

Jesus ọkọtọn̄ọ uwụtn̄kpọ emi ke ndidọhọ ete: “Ẹyemen kpukpru owo eke ẹkopde ẹnyụn̄ ẹnamde mme ikọ mi emi ẹdomo ye owo ọniọn̄, emi ọkọbọpde ufọk esie odori ke enyọn̄ akamba itiat.” Nte ededi, Jesus iketịn̄ke iban̄a edibọp ata ata ufọk, edi eketịn̄ aban̄a edinyene nti edu Christian. Mbon oro ẹnamde ikọ Jesus emi ẹsida ọniọn̄ ye mbufiọk ẹnam n̄kpọ. Mmọ ẹyak mme ukpepn̄kpọ Jesus ẹkara mme uduak ye edinam mmọ ebe ke ndida se ẹkpepde mmọ nsịn ke edinam. Edi ndamban̄a akamba itiat emi esịne ke esịt isọn̄. Owo oro Jesus eketịn̄de aban̄a ke uwụtn̄kpọ esie ekenyene nditịbi “isọn̄ otụn̄ọ.” (Luke 6:48) Ukem ntre, mme mbet Jesus ẹka iso ndisịn ọkpọsọn̄ ukeme nnyene nti edu oro ẹnamde mmọ ẹnen̄ede ẹsan̄a ẹkpere Abasi.—Matthew 5:5-7; 6:33.

Nso iditịbe ke ini afanikọn̄ emi ẹbietde oyobio ẹnyen̄ede nti edu ye ukpepn̄kpọ Christian oro mme anditiene Christ ẹdade ẹdu uwem? Mmọ ndisụk ibuot nnyịme mme ukpepn̄kpọ Christ nnyụn̄ nnyene nti edu Christian ọyọnọ mmọ odudu ke utọ ini afanikọn̄ oro, ndien ke akande kpukpru, an̄wam mmọ ke Armageddon oro edide. (Matthew 5:10-12; Ediyarade 16:15, 16) Ke akpanikọ, ediwak owo ke ẹyọ n̄kpọsọn̄ idomo uforo uforo ebe ke ndida mme ukpepn̄kpọ Jesus nsịn ke edinam. Afo n̄ko emekeme ndinam ntre.—1 Peter 2:21-23.