“Akpa Ediset ke N̄kpa”—Ama Ọtọtọn̄ọ!

“Mbon oro ẹkpan̄ade ke ebuana ye Christ ẹyebem iso ẹset.”—1 THESSALONICA 4:16.

1, 2. (a) Nso idotenyịn odu ọnọ mbon oro ẹma ẹkekpan̄a? (b) Nso inam fi enịm ke ẹyenam mme akpan̄kpa ẹset? (Se ikọ idakisọn̄.)

 ‘MME odu-uwem ẹfiọk ẹte ke mmimọ inyene ndikpa.’ Oro edi akpanikọ toto ke ini emi Adam akanamde idiọkn̄kpọ. Toto ke eset, kpukpru owo oro ẹmanade ẹfiọk ke mmimọ iyakpa, ndien ediwak owo ẹsibụp ẹte: ‘Nso isitịbe ke owo ama akakpa? Nso idi idaha mme akpan̄kpa?’ Bible ọbọrọ ete: “Ama edi mme akpan̄kpa, mmọ ifiọkke baba n̄kpọ kiet.”—Ecclesiastes 9:5.

² Do, nte idotenyịn ndomokiet odu ọnọ mme akpan̄kpa? Ih. Ke akpanikọ, ana idotenyịn odu ọnọ mme akpan̄kpa edieke anade se Abasi akaduakde ọnọ ubonowo toto ke editọn̄ọ, osu. Ke ediwak isua ikie emi ẹbede, mme asan̄autom Abasi oro ẹsọn̄ọde ẹda ye  enye ẹbuọt idem ke un̄wọn̄ọ Jehovah kaban̄a “Mfri” oro edisobode Satan onyụn̄ etre mme mfịna oro enye ọkọtọn̄ọde. (Genesis 3:15, NW) Ediwak mmọ ẹkpan̄a. Ẹnyene ndinam mmọ ẹset edieke anade mmọ ẹkụt nte un̄wọn̄ọ emi ye mme un̄wọn̄ọ eken oro Jehovah ọkọn̄wọn̄ọde, ẹsude. (Mme Hebrew 11:13) Ndi oro ekeme nditịbe? Ih, ekeme nditịbe. Apostle Paul ọkọdọhọ ete: “Ndinen owo ye mme anam ukwan̄n̄kpọ ẹyeset ke n̄kpa.” (Utom 24:15) Ini kiet, Paul ama anam akparawa oro ekekerede Eutychus eset, emi okotode window ọyọhọ enyọn̄ ita ediduọ, “ndien ke ini ẹmende enye, enye ama akpa.” Emi edi akpatre ke otu ediset ke n̄kpa usụkkiet oro ẹwetde ke Bible.—Utom 20:7-12 *

3. Didie ke ikọ Jesus oro ẹwetde ke John 5:28, 29 ọdọn̄ fi esịt, ndien ntak-a?

³ Ediset ke n̄kpa usụkkiet oro ẹnam inyene mbuọtidem ke ikọ Paul. Mmọ ẹnam nnyịn inen̄ede ibuọt idem ke ikọ Jesus emi: “Ini ke edi eke kpukpru mme andidu ke udi editi ẹdikopde [Jesus] uyo ẹnyụn̄ ẹwọn̄ọ ẹdi.” (John 5:28, 29) Nso inem inem ikọ ke emi edi ntem! Ndien nso ndọn̄esịt ke emi edi ntem ọnọ ata ediwak owo oro mme ufan ye iman mmọ ẹma ẹkekpan̄a!

4, 5. Mme ediset ke n̄kpa ewe ke Bible etịn̄ aban̄a, ndien ewe ke idineme ke ibuotikọ emi?

⁴ Ata ediwak ke otu owo oro ẹdinamde ẹset ẹdifiak ẹdidu uwem mi ke isọn̄ oro emem edidude ke idak Obio Ubọn̄ Abasi. (Psalm 37:10, 11, 29; Isaiah 11:6-9; 35:5, 6; 65:21-23) Nte ededi, odu mbon oro akanade ẹset mbemiso ediset ke n̄kpa enye emi. Akpa, akana Jesus Christ eset ke n̄kpa man enye ọkpọnọ Abasi ekọmurua uwa esie ke ibuot nnyịn. Jesus ama akpa onyụn̄ eset ke isua 33 E.N.

⁵ Ekem, “Israel Abasi” oro ẹyetde aran ẹnyene ndika n̄kadiana ye Ọbọn̄ Jesus Christ ke heaven, kpa do ke mmọ ẹdidu “ye Ọbọn̄ kpukpru ini.” (Galatia 6:16;  1 Thessalonica 4:17) Emi ke ẹkot “akpa ediset.” (Philippi 3:10, 11; Ediyarade 20:6) Ke kpukpru mbon oro ẹnyenede udeme ke akpa ediset ẹma ẹkeset, ẹyenam ata ediwak owo ẹset ye idotenyịn edidu nsinsi uwem ke Paradise isọn̄. Mmọdo, edide idori enyịn ndika heaven m̀mê ndidu uwem ke isọn̄, enen̄ede ọdọn̄ nnyịn ndifiọk se idide “akpa ediset ke n̄kpa.” Nso orụk ediset ke n̄kpa ke enye edi? Ini ewe ke emi etịbe?

“Nso Orụk Ikpọkidem?”

6, 7. (a) Nso inyene nditịbe mbemiso mme Christian oro ẹyetde aran ẹkade heaven? (b) Ẹdinam mmọ ẹset ye nso orụk ikpọkidem?

⁶ Ke akpa leta oro Paul ekewetde ọnọ ẹsọk mbon Corinth, enye ama obụp mbụme aban̄a akpa ediset ke n̄kpa ete: “Didie ke ẹdinam mme akpan̄kpa ẹset? Ih, nso orụk ikpọkidem ke mmọ ẹdida ẹwọn̄ọ ẹdi?” Ekem enye ama ọbọrọ mbụme oro ete: “Owo inamke se afo ọtọde odu uwem ibọhọke enye ebem iso akpa . . . edi Abasi ọnọ enye idem kpa nte enemde enye esịt . . . Ubọn̄ idem eke heaven edi orụk ubọn̄ kiet, ndien eke isọn̄ edi orụk efen.”—1 Corinth 15:35-40.

⁷ Ikọ Paul owụt ke ana mme Christian oro ẹyetde aran ẹkpan̄a mbemiso mmọ ẹkade heaven. Ke mmọ ẹma ẹkekpan̄a, ikpọkidem mmọ afiak ke ntan. (Genesis 3:19) Ke edikem ini Abasi, ẹyenam mmọ ẹset ye “orụk” idem mbon oro ẹdude ke heaven. (1 John 3:2) Abasi onyụn̄ ọnọ mmọ uwem unana n̄kpa. Mmọ idaha-da oro imana, nte n̄kpọ eke edide ke ẹkesesịn mmọ ukpọn̄ eke mîkemeke ndikpa ke nsinsi ke idem. Paul ọdọhọ ke “ana se ikemede ndikpa esịne se mîkemeke ndikpa.” Uwem unana n̄kpa edi enọ Abasi, ndien mbon oro ẹnyenede udeme ke akpa ediset ke n̄kpa “ẹsịne” uwem emi.—1 Corinth 15:50, 53; Genesis 2:7; 2 Corinth 5:1, 2, 8.

8. Nnyịn isan̄a didie ifiọk ke Abasi imekke owo 144,000 ito nsio nsio ido ukpono?

⁸ Owo 144,000 kpọt ẹnyene udeme ke akpa ediset. Jehovah ọkọtọn̄ọ ndimek mmọ ke Pentecost 33 E.N., esisịt ini ke enye ama akanam Jesus eset. Ẹwet “enyịn̄ [Jesus] ye enyịn̄ Ete esie ke ọkpọiso [kpukpru] mmọ.” (Ediyarade 14:1, 3) Ntem, owo imekke mmọ ito nsio nsio ido ukpono. Kpukpru mmọ ẹdi mme Christian, ndien edi n̄kpọ inemesịt ye ukpono ọnọ mmọ ndikere enyịn̄ ndian Ete—kpa Jehovah. Ke ini ẹnamde mmọ ẹset, ẹdinọ mmọ utom ke heaven. Mmọ ẹnen̄ede ẹkop nduaidem ke idotenyịn oro mmọ ẹnyenede ndinam n̄kpọ Abasi ke heaven.

Ndi Akpa Ediset ke N̄kpa Ama Ọtọtọn̄ọ?

9. Didie ke Ediyarade 12:7 ye 17:14 ẹn̄wam nnyịn ikere ini emi akpa ediset ke n̄kpa ọkọtọn̄ọde?

⁹ Ini ewe ke akpa ediset ke n̄kpa editọn̄ọ? Akwa uyarade odu ke emi ama ọtọtọn̄ọ. Ke uwụtn̄kpọ, da nsio nsio ibuot iba ke Ediyarade domo. Akpa, se Ediyarade ibuot 12. Itien̄wed oro ọdọhọ ke Jesus Christ oro ẹsụk ẹyaride ntinya, ọkọrọ ye mme angel esie, ẹn̄wana ekọn̄ ye Satan ye mme demon esie. (Ediyarade 12:7-9) Nte magazine emi esiwakde ndiwụt, ekọn̄ oro ọkọtọn̄ọ ke 1914. * Nte ededi, tịm fiọk ete ke idụhe anditiene Christ oro ẹyetde aran, oro ẹdọhọde ke ama odu ye Jesus ke ini ekọn̄ oro ke heaven. Se ndien Ediyarade ibuot 17. Do nnyịn ikot ite ke ẹma ẹkesobo “Akwa Babylon,” Eyenerọn̄ ayakan mme idụt. Itien̄wed oro adian do ete: “N̄ko, mbon oro ẹkotde ẹnyụn̄ ẹmekde emi enyụn̄ ẹnamde akpanikọ ye enye ẹyekan.” (Ediyarade 17:5, 14) Anaedi ẹma ẹnam “mbon oro ẹkotde ẹnyụn̄ ẹmekde ẹnyụn̄ ẹnamde akpanikọ” ẹset, edieke edide mmọ ẹyedu ye Jesus ke ini ẹdisobode ererimbot Satan ofụri ofụri. Do, owụt ifiọk ndinịm ke mbon oro ẹyetde aran, emi ẹkpan̄ade mbemiso Armageddon ẹset ke 1914 ama ekebe, edi mbemiso Armageddon.

10, 11. (a) Mmanie ẹdi mbiowo 24, ndien nso ke owo mmọ kiet asian John? (b) Nso ke emi anam nnyịn ifiọk?

 ¹⁰ Ndi imekeme nditịn̄ nnennen ini oro akpa ediset ke n̄kpa ọkọtọn̄ọde? Ediyarade 7:9-15 enen̄ede ọnọ nnyịn ndausụn̄, koro do ke apostle John etịn̄ aban̄a n̄kukụt emi enye okụtde “akwa otuowo, emi baba owo kiet mîkemeke ndibat.” Owo kiet ke otu mbiowo 24 asian John mme owo emi akwa otuowo ẹdide, ndien mbiowo emi ẹda ẹban̄a owo 144,000 ke ini mmọ ẹtienede Jesus ẹkara ke heaven. * (Luke 22:28-30; Ediyarade 4:4) John ke idemesie okodori enyịn ndika heaven, edi sia enye okosụk edide owo mi ke isọn̄ ke ini ebiowo oro eketịn̄de ikọ ye enye ke n̄kukụt oro, anaedi enye ada aban̄a mme Christian oro ẹyetde aran emi mîkaha kan̄a heaven.

¹¹ Nso ndien ke kiet ke otu mbiowo 24 oro ndisian John mme owo emi akwa otuowo ẹdide anam nnyịn ifiọk? Anam ifiọk ke enen̄ede etie nte ke mbon oro ẹsịnede ke otu mbiowo 24 oro ẹma ẹkeset, ẹtiene ẹbuana mfịn ke ndinam ẹfiọk akpanikọ oro otode Abasi. Ntak oro edide akpan n̄kpọ? Koro ke 1935 ke ẹkenam mme Christian oro ẹyetde aran ẹfiọk mbon emi akwa otuowo ẹnen̄erede ẹdi. Edieke edide ẹkeda kiet ke otu mbiowo 24 ẹnam ẹfiọk akpanikọ oro, anaedi ke ẹma ẹnanam enye eset aka heaven mbemiso 1935 m̀mê ke isua oro. Oro owụt ke akpa ediset ke n̄kpa ọkọtọn̄ọ ke ufọt 1914 ye 1935. Ndi imekeme ndisiak ata nnennen isua?

12. Tịn̄ ntak emi ẹkemede ndidọhọ ke ekeme ndidi akpa ediset ke n̄kpa ọkọtọn̄ọ ke ini utọ eke isua 1918?

¹² Ke ọtọ emi, ọyọfọn idụn̄ọde mme n̄kpọntịbe oro ẹbietde kiet eken ke Bible. Ẹkeyet Jesus Christ aran ke ini idọk eke isua 29 E.N. nte Edidem oro edikarade ke Obio Ubọn̄ Abasi ke ini iso. Ke isua ita ye ubak ẹma ẹkebe, oro edi ke ini utọ eke isua 33 E.N., ẹma ẹnam enye eset nte ọkpọsọn̄ owo eke spirit. Ke ntre, ndi imekeme ndidọhọ sia Jesus akadade ubọn̄ ke ini idọk eke 1914, ke ẹketọn̄ọ ndinam mme anam-akpanikọ anditiene enye oro ẹyetde aran ẹset ke isua ita ẹma ẹkebe, oro edi, ke ini utọ eke 1918? Ekeme ndidi se iketịbede edi oro. Okposụkedi owo mîkwe emi ke Bible, oro iwọrọke ke emi inenke sia mme itie N̄wed Abasi en̄wen ẹwụt ke akpa ediset ke n̄kpa ọkọtọn̄ọ esisịt ini ke Christ ama ọkọtọn̄ọ ndikara.

13. Didie ke 1 Thessalonica 4:15-17 ọnọ ekikere ke akpa ediset ke n̄kpa ama ọtọn̄ọ ke ntọn̄ọ ntọn̄ọ ini edidu Christ?

¹³ Ke uwụtn̄kpọ, Paul ekewet ete: “Nnyịn mme odu-uwem emi idude isịm edidu Ọbọn̄ [idịghe utịt edidu esie] idibemke mbon oro ẹdede ke n̄kpa ke baba usụn̄ kiet; koro Ọbọn̄ ke idemesie oyoto ke heaven osụhọde ye ọkpọsọn̄ n̄kpo, ye uyo etubom mme angel ye ukotowo Abasi, ndien mbon oro ẹkpan̄ade ke ebuana ye Christ ẹyebem iso ẹset. Ekem ẹyemen nnyịn emi idude uwem emi isụhọde, ẹdọk ọtọkiet ye mmọ ke obubịt enyọn̄, man ikosobo ye Ọbọn̄ ke enyọn̄; ndien ntem ke nnyịn ididu ye Ọbọn̄ kpukpru ini.” (1 Thessalonica 4:15-17) Ke ntre, ẹma ẹnam mme Christian oro ẹyetde aran emi ẹkpan̄ade mbemiso edidu Christ ẹset ẹka heaven mbemiso mbon oro ẹsụk ẹdude uwem mi ke isọn̄ ke ini edidu Christ. Emi ọwọrọ ke anaedi akpa ediset ke n̄kpa ama ọtọn̄ọ ke ntọn̄ọ ntọn̄ọ ini edidu Christ, onyụn̄ aka iso “ke ini edidu esie.” (1 Corinth 15:23) Utu ke kpukpru mbon oro ẹnyenede udeme ke akpa ediset ndiset ini kiet, emi ada anyan ini.

“Ẹma Ẹnọ Owo Mmọ Kiet Kiet Afia Ekụra”

14. (a) Ini ewe ke mme n̄kukụt oro ẹwetde ke Ediyarade ibuot 6 ẹsu? (b) Nso ke ẹtịn̄ ẹban̄a ke Ediyarade 6:9?

¹⁴ Kere n̄ko ban̄a uyarade oro odude ke Ediyarade ibuot 6. Ẹdọhọ do ke Jesus awat  nte edidem oro akande. (Ediyarade 6:2) Mme idụt ẹn̄wana akwa ekọn̄ oro akanam mîn̄wanake. (Ediyarade 6:4) Akan̄ enen̄ede odu. (Ediyarade 6:5, 6) Udọn̄ọ n̄kpa ọnọmọ ubonowo. (Ediyarade 6:8) Ana in̄wan̄-in̄wan̄ ke kpukpru n̄kpọ emi ẹtịbe toto ke 1914. Edi n̄kpọ en̄wen etịbe. Ẹdụri ntịn̄enyịn nnyịn ẹka itieuwa. “Mme ukpọn̄ mbon oro ẹkewotde ke ntak ikọ Abasi ye ke ntak utom ikọ ntiense oro mmọ ẹkesinamde” ẹdu ke idak itieuwa oro. (Ediyarade 6:9) Sia “uwem [m̀mê ukpọn̄] unam odude ke iyịp,” se idude ke idak itieuwa oro ada aban̄a iyịp mme anam-akpanikọ asan̄autom Jesus oro ẹkewotde ke ntak emi mmọ ẹkenọde ikọ ntiense uko uko.—Leviticus 17:11.

15, 16. Nam an̄wan̄a ntak emi ikọ Ediyarade 6:10, 11 etịn̄de aban̄a akpa ediset ke n̄kpa.

¹⁵ Iyịp mme Christian oro ẹkewotde do ke ofiori oyom ẹsio usiene kpa nte eke edinen Abel. (Genesis 4:10) “Mmọ ẹfiori ke ọkpọsọn̄ uyo, ẹte: ‘Ọbọn̄ Andikara emi edide edisana ye akpanikọ, adan̄a didie ke afo editre ndikpe ikpe nnyụn̄ nsio usiene iyịp nnyịn ke idem mme andidụn̄ isọn̄?’” Ndien nso itịbe ke oro ebede? “Ẹnọ mmọ kiet kiet afia ekụra; ẹnyụn̄ ẹdọhọ mmọ ẹte ẹduọk odudu esisịt, tutu ibat ekemmọ ifịn ye nditọete mmọ eke ẹdiwotde, kpa nte ẹkewotde mmọ n̄ko, ekem.”—Ediyarade 6:10, 11.

¹⁶ Ndi ẹkenọ iyịp oro ọkọdiọhọde ke idak itieuwa, afia ekụra emi? Baba-o! Ẹkekam ẹnọ mbon oro ẹkeduọkde iyịp mmọ ke itieuwa oro ke ndamban̄a usụn̄. Mmọ ẹketaba uwem mmọ ke ntak enyịn̄ Jesus ndien ẹma ẹnam mmọ ẹset nte mme owo eke spirit. Nnyịn isan̄a didie ifiọk emi? Nnyịn ima ikot ke ntọn̄ọ ntọn̄ọ Ediyarade ite: “Owo eke akande eyesịne afia ekụra; ndinyụn̄ nsọhike enyịn̄ esie ke n̄wed uwem.” Ti n̄ko ete ke mbiowo 24 ‘ẹkesịne mfia ekụra ẹnyụn̄ ẹyara anyanya o-gold ke ibuot mmọ.’ (Ediyarade 3:5; 4:4) Ntre, ke ekọn̄, akan̄, ye idiọk udọn̄ọ ẹma ẹketọn̄ọ ndinọmọ isọn̄, ẹma ẹnam mbon oro ẹsịnede ke otu 144,000 emi ẹma ẹkekpan̄a, emi iyịp oro odude ke idak itieuwa adade aban̄a, ẹset ẹka heaven ẹnyụn̄ ẹsịne mfia ekụra ke ndamban̄a usụn̄.

17. Didie ke mbon oro ẹsịnede mfia ekụra “ẹduọk odudu”?

¹⁷ Ana mbon oro ẹnamde ẹset ke n̄kpa do “ẹduọk odudu.” Ana mmọ ẹnyene ime ẹtie ẹbet usen usio usiene Abasi. “Ekemmọ ifịn,” oro edi, mme Christian oro ẹyetde aran, emi ẹsụk ẹdude ke isọn̄, iwụtke kan̄a ke mmimọ imọsọn̄ọ ida ke idomo isịm akpatre. Ini  ubiereikpe Abasi ama ekem, ‘nduọkodudu’ oro eyetre. (Ediyarade 7:3) Ini oro, mbon oro ẹnamde ẹset do ẹyediana ye Ọbọn̄ Jesus Christ ẹsobo mme idiọkowo, esịnede mbon oro ẹkeduọkde iyịp mme Christian oro mîduehe.— 2 Thessalonica 1:7-10.

Se Emi Ọwọrọde Ọnọ Nnyịn

18, 19. (a) Mme ntak ewe ẹnam fi enịm ke akpa ediset ke n̄kpa ama ọtọtọn̄ọ? (b) Etie fi didie ke idem ndifiọk se akpa ediset ke n̄kpa edide?

¹⁸ N̄wed Abasi itịn̄ke ata usen emi akpa ediset ke n̄kpa emi ọtọn̄ọde inọ nnyịn, edi anam nnyịn ifiọk ke emi ayada ini, oro edi ke ini edidu Christ. Mme Christian oro ẹyetde aran, emi ẹkekpan̄ade mbemiso edidu Christ, ẹdibem iso ẹset. Ke ini edidu Christ, ẹyenam mme Christian oro ẹyetde aran, emi ẹsọn̄ọde ẹda tutu ẹkpa, ẹkpụhọde “ke ediyịp enyịn” ẹkabade mme okop-odudu owo eke spirit. (1 Corinth 15:52) Ndi kpukpru mbon oro ẹyetde aran ẹyeka heaven mbemiso ekọn̄ Armageddon? Nnyịn ifiọkke. Edi imọfiọk ke ini Abasi ama ekem, kpukpru owo 144,000 ẹyekem ibat ke Obot Zion, oro edi ke heaven.

¹⁹ Nnyịn imọfiọk n̄ko ke ediwak ke otu owo 144,000 ẹdodu idahaemi ye Christ. Ibat ibat owo ke otu mmọ ẹsụhọ mi ke isọn̄. Nso akwa uyarade ke emi edi ntem nte ke Abasi ọyọsọp osobo ererimbot Satan emi! Ẹyekọbi Satan ke idemesie. Ekem, ẹyenam kpukpru owo eken ẹset, ndien ẹyeda uwa ufak Jesus ẹnam mme owo oro ẹsọn̄ọde ẹda ẹnam akpanikọ ẹfọn ẹma—kpa se Adam ọkọduọkde. Ntịn̄nnịm ikọ Jehovah oro ẹwetde ke Genesis 3:15 ke osu ke utịbe utịbe usụn̄. Nso akwa ifet ke inyene ntem ndidu uwem idahaemi!

[Mme Ikọ idakisọn̄]

Nte Afo Emekeme Ndinam An̄wan̄a?

Didie ke mme itie N̄wed Abasi emi ẹtienede mi ẹn̄wam nnyịn ifiọk ini “akpa ediset ke n̄kpa”?

• Ediyarade 12:7; 17:14

• Ediyarade 7:13, 14

• 1 Corinth 15:23; 1 Thessalonica 4:15-17

• Ediyarade 6:2, 9-11

[Mme Mbụme Ukpepn̄kpọ]

[Mme ndise ke page 26]

Mmanie ke ẹnam ẹset ke n̄kpa mbemiso ẹnamde mbon eken ẹset?

[Ndise ke page 29]

Didie ke ẹnọ ndusụk owo oro ẹma ẹkekpan̄a afia ekụra?