Mme Mbụme Ẹtode Mme Andikot

Nso idi edifịk idiọn̄ọ oro ẹtịn̄de ẹban̄a ke Ediyarade 7:3?

Ediyarade 7:1-3 ọdọhọ ete: “[Ekem] n̄kụt angel inan̄ nte ẹdade ke inụk isọn̄ mbinan̄, ẹsọn̄ọ ẹmụm ofụm isọn̄ mbinan̄ ẹkama, man ofụm baba kiet okûfịme ke isọn̄ m̀mê ke inyan̄ m̀mê ke eto ekededi. Ndien n̄kụt angel efen otode ke edem usiahautịn ọdọk edi, emi enyenede ufịkn̄kpọ odu-uwem Abasi; ndien enye ofiori ke ọkpọsọn̄ uyo ọnọ angel inan̄ emi ẹkenọde odudu ndibiat isọn̄ ye inyan̄, ete: ‘Ẹkûbiat isọn̄ m̀mê inyan̄ m̀mê mme eto, tutu nnyịn ifịk ifịn Abasi nnyịn idiọn̄ọ ke ọkpọiso mmọ.’”

Ke ini ẹsanade “ofụm isọn̄ mbinan̄” ẹyak, emi edisụn̄ọ ke “akwa ukụt,” kpa nsobo nsunsu ido ukpono ye kpukpru ikpehe eken eke idiọk ererimbot emi. (Ediyarade 7:14) “Ifịn Abasi” ẹdi nditọete Christ oro ẹyetde aran, emi ẹsụk ẹdude ke isọn̄. (1 Peter 2:9, 16) Ntem, ntịn̄nnịm ikọ emi owụt ke ẹyefịk nditọete Christ idiọn̄ọ ẹkụre mbemiso akwa ukụt ọtọn̄ọde. Nte ededi, mme ufan̄ikọ Bible en̄wen ẹwụt ke ẹfịk mbon oro ẹyetde aran akpa idiọn̄ọ. Mmọdo, ndusụk ini nnyịn imesitịn̄ iban̄a edifịk akpa ye akpatre idiọn̄ọ. Didie ke edifịk akpa idiọn̄ọ okpụhọde ye akpatre?

Ẹyak ikere iban̄a se ikọ oro ‘edifịk idiọn̄ọ’ ọwọrọde. Ke eset, ẹkesida ufịkn̄kpọ m̀mê ufịkn̄wed ẹfịk idiọn̄ọ ke n̄kpọ oro ẹwetde. Ikọ oro ekeme n̄ko ndida mban̄a idiọn̄ọ oro ke idemesie. Ekedi ọsọ n̄kpọ ini oro ndifịk idiọn̄ọ ke n̄kpọ oro ẹwetde m̀mê mme n̄kpọ eken man ẹsọn̄ọ ke se ẹwetde edi akpanikọ m̀mê ẹwụt andinyene.—1 Ndidem 21:8; Job 14:17.

 Paul ekemen edisana spirit odomo ye ufịkn̄kpọ ke ini enye ọkọdọhọde ete: “Enye emi ọnọde nsọn̄ọ ete ke mbufo ye nnyịn inyene Christ ye enye emi ekeyetde nnyịn aran edi Abasi. Enye n̄ko emefịk nnyịn idiọn̄ọ esie omonyụn̄ ọnọ nnyịn idiọn̄ọ n̄kpọ eke edidide, oro edi, spirit, ke esịt nnyịn.” (2 Corinth 1:21, 22) Ọwọrọ ke Jehovah eyet mme Christian emi aran ke spirit man owụt ke mmọ ẹdi inyene imọ.

Nte ededi, ẹfịk mbon oro ẹyetde aran idiọn̄ọ ke usụn̄ iba. Edifịk akpa idiọn̄ọ okpụhọde ye edifịk akpatre idiọn̄ọ, (1) ntak emi ẹfịkde (2) ini emi ẹfịkde. Ẹfịk owo akpa idiọn̄ọ akpa ini oro ẹmekde enye obufa nte Christian oro ẹyetde aran. Ẹfịk owo emi ẹyetde aran akpatre idiọn̄ọ ke enye ama ọkọsọn̄ọ ada anam akpanikọ ọyọhọ ọyọhọ. Ini oro ndien, ke ẹfịk enye idiọn̄ọ taktak “ke ọkpọiso” anamde ẹfiọk enye nte ‘ofụn Abasi nnyịn’ oro ẹma ẹkedomo ẹse ẹnyụn̄ ẹkụt ke anam akpanikọ. Akpatre edifịk idiọn̄ọ emi ke ẹtịn̄ ẹban̄a ke Ediyarade ibuot 7.—Ediyarade 7:3.

Apostle Paul ekewet ntem ọnọ mme Christian oro ẹyetde aran aban̄a ini edifịk akpa idiọn̄ọ oro ete: “Mbufo n̄ko ẹma ẹdori enyịn ke enye ke mbufo ẹma ẹkekop ikọ akpanikọ, kpa eti mbụk aban̄ade edinyan̄a mbufo. N̄ko ebede ke enye, ke mbufo ẹma ẹkenịm ke akpanikọ, ẹma ẹfịk mbufo idiọn̄ọ ke edisana spirit oro ẹken̄wọn̄ọde.” (Ephesus 1:13, 14) Ke ediwak idaha, Bible owụt ke ẹma ẹsifịk mme akpa Christian idiọn̄ọ esisịt ini ke mmọ ẹma ẹkekop eti mbụk ẹnyụn̄ ẹnịm Christ ke akpanikọ. (Utom 8:15-17; 10:44) Orụk idiọn̄ọ oro okowụt ke Abasi enyịme mmọ. Nte ededi, oro ikowụtke ke Abasi enyịme mmọ ofụri ofụri. Ntak-a?

Paul ọkọdọhọ ke “ẹfịk [mme Christian oro ẹyetde aran] idiọn̄ọ ẹnịm ẹnọ usen eke ẹdisiode [mmọ] ke ufụn.” (Ephesus 4:30) Emi owụt ke ndusụk ini, emi esidide ediwak isua, ẹsibe ke ẹma ẹkefịk akpa idiọn̄ọ. Ana mbon oro ẹyetde aran ẹsọn̄ọ ẹda ẹnam akpanikọ toto ke usen oro ẹkefịkde mmọ akpa idiọn̄ọ ke edisana spirit tutu esịm ‘usen eke ẹdisiode mmọ ke ufụn’ idem eke obụk—oro edi, tutu mmọ ẹkpa. (Rome 8:23; Philippi 1:23; 2 Peter 1:10) Mmọdo, ekedi ke ini emi Paul ekekperede n̄kpa ke enye ekekeme ndidọhọ ete: “Mmefehe mbuba nsịm utịt, mmomụm mbuọtidem n̄kama. Ọtọn̄ọde ke emi ẹnịm anyanya edinen ido ẹnọ mi.” (2 Timothy 4:6-8) Akan oro, Jesus ọkọdọhọ mme Christian oro ẹyetde aran ete: “Wụt idem nte anam-akpanikọ idem tutu esịm n̄kpa, ndien nyọnọ fi anyanya uwem.”—Ediyarade 2:10; 17:14.

Ikọ oro “anyanya” ọnọ uyarade efen efen ke ini esibe ọtọn̄ọde ke ini emi ẹfịkde akpa idiọn̄ọ tutu esịm ini emi ẹfịkde akpatre idiọn̄ọ. Ntak-a? Ekedi ọsọ n̄kpọ ke eset ndisinọ andikan ke mbuba itọk anyanya. Ikedịghe ikpîkpu edifehe mbuba oro akanam enye ọbọ anyanya. Enye ekenyene ndifehe nsịm utịt. Kpasụk ntre, ẹdinọ mme Christian oro ẹyetde aran anyanya uwem unana n̄kpa ke heaven edieke mmọ ẹsọn̄ọde ẹda tutu esịm akpatre—oro edi, ọtọn̄ọde ke ini emi ẹfịkde mmọ akpa idiọn̄ọ tutu esịm ini emi ẹfịkde mmọ akpatre idiọn̄ọ.—Matthew 10:22; James 1:12.

Ini ewe ke ẹdifịk nsụhọ mme christian oro ẹyetde aran akpatre idiọn̄ọ emi? Ẹyefịk owo mmọ ekededi emi osụk odude ke isọn̄ idiọn̄ọ “ke ọkpọiso” mbemiso akwa ukụt ọtọn̄ọde. Ẹtisana ofụm akwa ukụt isọn̄ mbinan̄ ẹyak, ẹma ẹfefịk kpukpru Israel Abasi akpatre idiọn̄ọ, okposụkedi ndusụk mmọ ẹdisụk ẹdude uwem ke isọn̄ ini oro.