Nte Afo Ekemede Ndikụt Unen
Nte Afo Ekemede Ndikụt Unen
ETE nnyịn eke heaven esitịm ekpeme nnyịn onyụn̄ oyom nnyịn ikụt unen ukem nte mme ete ye eka ẹsikpemede nditọ mmọ ẹnyụn̄ ẹyom mmọ ẹkụt unen. Man owụt ke imama nnyịn, enye etịn̄ ekese ọnọ nnyịn aban̄a nte ikemede ndikụt unen m̀mê ntakurua. Ke nditịm ntịn̄, Bible etịn̄ ye nsọn̄uyo aban̄a owo oro anamde item Abasi ete: “Kpukpru se enye anamde ọwọrọ usụn̄ [“okụt unen,” NW].”—Psalm 1:3.
Ke edide ntre, ntak emi ediwak owo mîkwe unen inyụn̄ ikop inemesịt ye uyụhọ? Ndinen̄ede ndụn̄ọde ufan̄ikọ emi ke psalm ọyọbọrọ mbụme nnyịn onyụn̄ owụt nte nnyịn ikemede ndikụt unen.
“Item Mme Idiọk Owo”
Andiwet Psalm odụri nnyịn utọn̄ ete ikûsan̄a ke “item mme idiọk owo.” (Psalm 1:1) Satan kpa Devil edi akpan “idiọk owo.” (Matthew 6:13) Ikọ Abasi anam nnyịn ifiọk ke enye edi “andikara ererimbot emi,” n̄ko ke “ofụri ererimbot esịne ke idak odudu” esie. (John 16:11; 1 John 5:19) Mmọdo, idịghe n̄kpọ n̄kpaidem nte ediwak item oro ẹdude ke ererimbot ẹwụtde ekikere andidiọk emi.
Nso orụk item ke mme idiọkowo ẹsinọ? Ke ofụri ofụri, mme idiọkowo “ẹsịn Abasi ke ndek.” (Psalm 10:13) Mmọ ẹda item mmọ ẹsuene Abasi ẹnyụn̄ ẹsuan item emi ke kpukpru ebiet. Ererimbot mfịn esịn udọn̄ ọnọ “mbumek obụkidem ye mbumek enyịn ye n̄wụtidem ke n̄kpọ eke owo adade odu uwem.” (1 John 2:16) Ẹda ndutịm usuanetop ẹsịn udọn̄ ẹnọ uma inyene ye ekikere ‘edinyene kpukpru se ẹkemede ke uwem.’ Mme usiakifia ke ofụri ererimbot ẹsibiat se ibede biliọn dollar 500 kpukpru isua ke ndisuan etop n̄kpọurua nnyụn̄ nsịn udọn̄ nnọ mme owo ẹdep n̄kpọurua mmọ, edide mme owo ẹyom mme n̄kpọ emi m̀mê iyomke. Ndien etop emi enen̄ede anam mme owo ẹdep n̄kpọ ẹkan nte ẹkesidepde. Enye okpụhọde se mme owo ẹdade nte edikụt unen.
Ke ntak emi, mme owo isụk ikopke ata uyụhọ kpa ye oro ediwak mmọ ẹnyenede mme n̄kpọ oro mmọ mîkenyeneke. Edikam etie nte edieke mûnyeneke mme n̄kpọ emi ke udukopke inemesịt, ke udunyụn̄ ukwe unen. Ekikere emi inenke, inyụn̄ “itọn̄ọke ito Ete, edi ọtọn̄ọ oto ererimbot.”—1 John 2:16.
Andibot nnyịn ọfiọk se idinamde nnyịn inen̄ede ikụt unen. Item esie itiehe nte “item mme idiọk owo.” Ntre, ndidomo ndinyene edidiọn̄ Abasi ke adan̄aemi isịnde idem iyom mme n̄kpọ ererimbot etie nte ndidomo ndisan̄a ke nsio nsio usụn̄ iba ke ukem ini. Idụhe owo oro ekemede ndinam oro. Eyịghe idụhe ndien Bible odụride nnyịn utọn̄ ete ‘ikûbiet editịm n̄kpọ emi.’—Rome 12:2.
Ẹkûbiet Ererimbot
Ererimbot Satan anam nte imama nnyịn. Ntre, oyom nnyịn idu ke ukpeme. Ti ete ke Satan ama abian̄a Eve anam se imọ imade. Ekem enye ama ada Eve anam Adam anam idiọkn̄kpọ. Mfịn, Satan esinyụn̄ ada mme owo ọnọ idiọk item.
Ke uwụtn̄kpọ, ẹma ẹyom David oro iketịn̄de iban̄a ke ibuotikọ oro ekebede esinam utom ebe ini onyụn̄ aka isan̄ mbubehe ke ubọk ke ubọk. David ọkọdọhọ ete: “N̄kesikpọn̄ ufọk tụhi-tụhi usenubọk Monday nnyụn̄ nnyọn̄ ndi ke mbubịteyo Thursday.” Mme ufan, iman, ye nsan̄autom ẹkekere ke oro ayanam David okụt unen ke ererimbot, ntre mmọ ẹma ẹdọhọ enye ẹte: “Nam utom emi ke ntak ubon fo.” Mmọ ẹkedọhọ ke enye idinamke ke nsinsi, ke onyụn̄ oyom ndidi ke ekpri ini, ndien ke enye oyoforo. David ọkọdọhọ ete: “Mmọ ẹkedọhọ ke emi eyenen̄ede ọfọn ye ubon mi koro nyenen̄ede nnyene okụk, oro edi ke nyenen̄ede n̄kụt unen ke uwem. Okposụkedi mmen̄kodụhe ye ubon mi, mme ufan mi ẹma ẹnam mi nnịm ke idahaemi ke n̄kam nnen̄ede nnọ ubon mi n̄kpọ n̄kan.” Ukem nte David, ediwak owo ẹsinen̄ede ẹsịn idem ẹnam utom man ẹkeme ndinọ ubon mmọ se mmọ ẹyomde. Edi, ndi ndinam ntre ekeme ndinam owo okụt unen? Nso ke ubon ẹnen̄ede ẹyom?
David ama edifiọk se ubon esie ẹkenen̄erede ẹyom ke ini enye akakade isan̄ mbubehe. Enye ọdọhọ ete: “Mma ntịn̄ ikọ ke urụk ukopikọ ye Angelica eyen mi, enye ama obụp mi ete: ‘Papa, ntak mûsumaha nditie ye nnyịn ke ufọk?’ Mbụme oro ama etịmede mi.” Mbụme Angelica ama anam David esịn n̄wed ọkpọn̄ utom. Enye ama ebiere ndinọ ubon esie se mmọ ẹkenen̄erede ẹyom, oro edi, enye ndidu ye mmọ.
Ndida Item Abasi Nsịn ke Edinam Anam Owo Okụt Unen
Didie ke afo ekeme ndisịn nsunsu ekikere oro ọyọhọde ererimbot emi? Andiwet psalm etịn̄ ọnọ nnyịn ete ke owo oro okụtde unen onyụn̄ okopde inemesịt edi owo oro ‘mbet Jehovah adatde enye esịt, emi osụk ekerede mbet esie ke uwemeyo ye ke okoneyo.’—Psalm 1:2.
Ke ini Abasi ekemekde Joshua nte adausụn̄ nditọ Israel, ẹma ẹdọhọ enye ẹte: “Kere [Ikọ Abasi] ke uwemeyo ye ke okoneyo.” Ke akpanikọ, Joshua ekenyene ndikot nnyụn̄ ntie n̄kere se enye okotde ke Ikọ Abasi, edi ama oyom enye n̄ko “ekpeme ndinam kpukpru se ẹwetde ke esịt.” Nte ededi, idịghe ndikokot Bible kpọt edinam okụt unen, ana ada se okotde esịn ke edinam. Abasi ama ọdọhọ Joshua ete: “Ntem ke afo edikụt unen ke usụn̄ fo, onyụn̄ etịm anam.”—Joshua 1:8.
Kere ban̄a nte ekpri eyen oro etiede ke ukot ete esie atuakde inua imam ke ntak inem inem mbụk oro mmọ ẹkotde. Inamke n̄kpọ m̀mê ikafan̄ ke mmọ ẹkot mbụk oro, mmọ ẹyenen̄ede ẹkop inemesịt ke utọ ini oro. Kpasụk ntre, owo oro amade Abasi ayama ndikot Bible ke usen ke usen—enye ada emi nte ata ọsọn̄urua ifet oro imọ inyenede ye Ete imọ eke heaven. Owo oro anamde item Jehovah onyụn̄ etienede ndausụn̄ esie “ebiet eto eke ẹtọde ke mben akpa mmọn̄, eke osion̄ode mfri esie ke ekem ini; ikọn̄ esie inyụn̄ iken̄eke; ndien kpukpru se enye anamde ọwọrọ usụn̄.”—Psalm 1:3.
Eto oro andiwet psalm eketịn̄de aban̄a mi, iketịbeke ikpọn̄ ke idemesie. Enyene in̄wan̄ oro ọkọfọfiọk ọtọ enye ekpere mben mmọn̄ onyụn̄ etịm ekpeme enye. Kpasụk ntre, Ete nnyịn eke heaven esida item N̄wed Abasi enen̄ede ekikere nnyịn. Emi esinam nnyịn inyene mme edu Abasi inyụn̄ itiene ndausụn̄ esie.
Edi “mme idiọk owo itiehe ntem.” Ndusụk ini, ekeme nditie nte mmọ ẹkụt unen, edi ke akpatre mmọ ẹyedọk ndiọi utịp. Mmọ ‘ididaha ke ikpe.’ Utu ke oro, “usụn̄ mme idiọk owo ayabiara.”—Psalm 1:4-6.
Mmọdo, kûyak ererimbot ebiere mme utịtmbuba fo ye mme edumbet oro adade odu uwem. Okposụkedi enyenede ndammana ukeme ndinam n̄kpọ, onyụn̄ enyenede ifet ndiforo ke ererimbot emi, kpeme nte adade ukeme fo anam n̄kpọ, m̀mê nte ayakde ererimbot ẹda mmọ ẹnam n̄kpọ. Edisịn idem nyom mme n̄kpọ obụkidem ekeme ndinam idem emem owo. Edi ndinyene eti itie ebuana ye Jehovah Abasi ayanam fi enen̄ede okụt unen onyụn̄ okop inemesịt.
Nte Afo Ekemede Ndikụt Unen
Ntak ẹdọhọde ke owo oro anamde item Abasi oyokụt unen ke kpukpru edinam esie? Andiwet psalm iketịn̄ke iban̄a edikụt unen ke ererimbot emi. Unen enye emi enyene n̄kpọ ndinam ye edinam uduak Abasi, ndien uduak Abasi esikụt unen kpukpru ini. Ẹyak ise nte edida item Bible nsịn ke edinam ekemede ndinam fi okụt unen.
Ubon: N̄wed Abasi eteme mme ebe ete ‘ẹma iban mmọ nte idem mmọ,’ onyụn̄ eteme n̄wanndọ emi edide Christian ete “enyene ntotụn̄ọ ukpono ọnọ ebe esie.” (Ephesus 5:28, 33) Ẹsịn udọn̄ ẹnọ mme ete ye eka ẹte ẹbiat ini ye nditọ mmọ, ẹsak ye mmọ, ẹnyụn̄ ẹkpep mmọ mme akpan n̄kpọ ke uwem. (Deuteronomy 6:6, 7; Ecclesiastes 3:4) Ikọ Abasi eteme mme ete ye eka n̄ko ete: “Ẹkûfiomo nditọ mbufo.” Ke ini ẹdade item emi ẹsịn ke edinam, esimem utom ọnọ nditọ ‘ndikop uyo nnọ mme ete ye eka mmọ’ nnyụn̄ ‘n̄kpono ete ye eka mmọ.’ (Ephesus 6:1-4) Ndinam item Abasi emi ekeme ndinam ubon okụt unen.
Mme Ufan: Ediwak owo ẹyom ndinyene mme ufan. Nnyịn imenyene ukeme ndima owo nnyụn̄ ndi se ẹmade. Jesus ama eteme mbet esie ete “ẹma kiet eken.” (John 13:34, 35) Mme ufan oro ikemede ndima nnyụn̄ nnen̄ede mbuọt idem ẹdu ke otu mbet Jesus. (Mme N̄ke 18:24) Ke akam edide akpan n̄kpọ akan, ndida item Bible nsịn ke edinam ayanam nnyịn ‘isan̄a ikpere Abasi,’ ndien ukem nte Abraham, ẹdikot nnyịn mme “ufan Jehovah.”—James 2:23; 4:8.
Ndinyene Uduak ke Uwem: Utu ke ndidu uwem oro mînyeneke uduak, mbon oro ẹnen̄erede ẹkụt unen ẹnyene uduak ke uwem. Uwem mmọ ikọn̄ọke ke anana-iwụk editịm n̄kpọ emi. Mme utịtmbuba mmọ ẹsida ẹsịm ata inemesịt oro ebighịde, sia mmọ ẹnyene ata akpan uduak ke uwem. Nso idi oro? Ecclesiastes 12:13 ọdọhọ ete: “Bak Abasi, nyụn̄ nịm mbet esie: koro emi edi eke kpukpru owo.”
Idotenyịn: Ndinam ufan ye Abasi anam nnyịn inyene idotenyịn iban̄a ini iso. Apostle Paul ama esịn udọn̄ ọnọ mme Christian ete ‘ẹkûkọn̄ idotenyịn mmọ ke mme inyene oro mînyeneke iwụk, edi ẹkọn̄ ke Abasi.’ Emi ayanam mmọ “ẹtịm ẹnịm eti itiat idakisọn̄ nte n̄kpọuto ẹnọ idemmọ kaban̄a ini iso, man mmọ ẹkpesọn̄ọ ẹmụm ata uwem ẹkama.” (1 Timothy 6:17-19) Ata uwem emi edidi ke ini Obio Ubọn̄ Abasi ke heaven anamde ẹfiak ẹnyene Paradise ke isọn̄.—Luke 23:43.
Ndida mme item Bible nsịn ke edinam iwọrọke ke udunyeneke mfịna, edi ọyọbọhọ ọkpọsọn̄ ubiak ye iduọesịt oro mme idiọkowo ẹsidade ẹsọk idemmọ. David oro iketịn̄de iban̄a ke ibuotikọ oro ekebede, ye ediwak miliọn mbon eken ẹkụt ke ọfọn ndida item Bible nsịn ke edinam. Ke ama okokụt utom oro ọnọde enye ini, David ọkọdọhọ ete: “Mmenem esịt ndinen̄ede n̄kpere n̄wan ye nditọ mi, ọkọrọ ye ifet oro nnyenede ndinam n̄kpọ Jehovah Abasi nte ebiowo ke esop.” Eyịghe idụhe andiwet psalm eketịn̄de aban̄a owo oro anamde item Abasi ete: “Kpukpru se enye anamde [“okụt unen,” NW].”
[Chart ke page 6]
N̄KPỌ ITION ORO ẸKEMEDE NDINAM ẸKỤT UNEN
1 Fep mme usụn̄ uwem ererimbot emi.
2 Kot nyụn̄ tie kere Ikọ Abasi ke usen ke usen.
3 Da item Bible sịn ke edinam.
4 Nam ufan ye Abasi.
5 Bak Abasi nyụn̄ nịm mbet esie.
[Mme ndise ke page 7]
Nte afo ke anam mme n̄kpọ oro ẹdinamde fi okụt unen?