Owo Emi Akamade Uwem Onyụn̄ Amade Mme Owo

DANIEL SYDLIK, emi akanamde utom ke anyan ini nte owo Otu Ukara Mme Ntiense Jehovah, ama okụre utom esie ke isọn̄ ke Tuesday, April 18, 2006. Enye ekedi isua 87, onyụn̄ edi owo ubon Bethel ke Brooklyn, New York, ke se ikekperede ndisịm isua 60.

Brọda Dan, nte mme ufan esie ẹkesimade ndikot enye, ekedi Bethel ke 1946. Mbemiso enye ekedide Bethel, enye ama edi akpan asiakusụn̄ ke California onyụn̄ aka n̄kpọkọbi ke ini udiana ekọn̄ ererimbot ke ntak emi enye akadade san̄asan̄a sia edide Christian. Enye ama obụk se enye okosobode ini oro in̄wan̄-in̄wan̄ ke mbụk eyouwem esie, emi ẹkemịn̄de ke Enyọn̄-Ukpeme eke December 1, 1985, ke ibuotikọ oro “Itie Ufan Fo Ọsọn̄ Urua Didie, O Abasi!”

Ẹkediọn̄ọ Brọda Sydlik nte owo emi ekenen̄erede osụhọde idem ẹnyụn̄ ẹkemede ndisan̄a n̄kpere. Ke usenubọk emi enye ekesinemede itien̄wed eke usen ye ubon Bethel, ntọn̄ọikọ esie ama esiwụt idotenyịn esie ye ima emi enye akamade uwem, sia enye ekesidọhọ ete: “Imokop inemesịt ndidu uwem man inam n̄kpọ odu-uwem Abasi emi edide ata Abasi.” Enye ama esisịn udọn̄ ọnọ mbon en̄wen ndinyene utọ edu emi ke ini ọnọde utịn̄ikọ; enye ekesima ndinọ utịn̄ikọ ke mme utọ ibuotikọ nte “Ọfọfọn Ọnọ Mbon Oro Jehovah Edide Abasi Mmọ,” “Ndiwụt Idatesịt Jehovah,” “Ẹkûyak Ikan̄ Spirit Abasi Onịme,” “Mfọnn̄kan Idaha ke Edi.”

Ke 1970, Brọda Sydlik ama ọdọ Marina, emi otode England, onyụn̄ okot enye “un̄wam emi Abasi ọnọde.” Mmọ ẹma ẹdiana kiet ẹnam n̄kpọ Abasi ke se ibede isua 35.

Brọda Sydlik ama anam utom ke nsio nsio itieutom ke Bethel, ndien emi ama esịne itie umịn̄n̄wed ye Itieutom Uwetn̄wed. Enye ama anam utom n̄ko ke itie usuanetop ekebe utịn̄ikọ esop Abasi oro ẹkekotde WBBR. Ekem, ke November 1974, ẹma ẹmek enye ẹsịn ke Otu Ukara, enye onyụn̄ anam utom ke Kọmiti Mbonutom ye Kọmiti Uwetn̄wed.

Akwa ima oro Brọda Sydlik akamade mme owo ama ana ata in̄wan̄-in̄wan̄ ke se ibede isua 30 oro enye akanamde utom ke Kọmiti Mbonutom. Enye ama esida ndodobi uyo esie esịn udọn̄ ọnọ ediwak owo, odụri ntịn̄enyịn kpukpru ini owụt ọsọn̄urua ifet oro inyenede ndinam n̄kpọ Jehovah. Enye ama esisọn̄ọ etịn̄ kpukpru ini ete ke inemesịt itoho ke se ikụtde ke enyịn, edi ke oto itie ebuana nnyịn ye Jehovah ye nte nnyịn isede uwem.

Okposụkedi ubon Bethel mîkopke inemesịt sia mmọ mîdikwe enye aba, mmọ ẹyeka iso ndikpebe uwụtn̄kpọ esie nte owo emi akamade uwem onyụn̄ amade mme owo. Nnyịn imetịm inịm ke enye esịne ke otu mbon oro ẹtịn̄de ẹban̄a ke Ediyarade 14:13, ẹte: “Inemesịt edi eke mbon oro ẹkpade ke ebuana ye Ọbọn̄ ọtọn̄ọde ke ini emi. Ntre ke spirit ọdọhọ, ih, yak mmọ ẹduọk odudu ke ọkpọsọn̄ utom mmọ, koro mme n̄kpọ emi mmọ ẹkenamde ẹtiene mmọ nnennen.”