Ẹkebot Eren ye N̄wan Ẹnọ Kiet Eken

ESIDỌN̄ eren ye n̄wan ndidu ọtọkiet. Abasi ọkọnọ mmọ udọn̄ emi. Jehovah ama okụt ete ke ifọnke akpa owo oro, Adam, ndidu ikpọn̄. Ntre Abasi ama ọnọ enye ‘andinyan̄a oro ekemde ye enye.’

Jehovah ama anam ọkpọsọn̄ idap omụm Adam, ndien osio ọkpọ n̄kan̄ esie kiet “anam n̄wan kiet, onyụn̄ ada enye ọsọk Adam.” Adam ama adat esịt etieti ndikụt ediye an̄wan oro Jehovah okobotde mi tutu enye ọdọhọ ete: “N̄wan emi ndien edi ọkpọ eke otode ke ọkpọ mi, ye obụk eke otode ke obụk mi.” Adam ama enen̄ede ama Eve, mfọnmma n̄wan esie, ke ntak ndinem edu oro n̄wan emi ekenyenede. Mfọnmma owo oro, Adam, ama onyụn̄ odot ukpono nte erenowo oro enyenede uku. Ẹkenam mmọ ẹnọ kiet eken. Bible ọdọhọ ete: “Mmọdo owo edikpọn̄de ete esie ye eka esie, edinyụn̄ adiana ye n̄wan esiemmọ; ndien mmọ ẹyekabade ẹdi obụk kiet.”—Genesis 2:18-24.

Nte ededi, mfịn, mme ubon ke ẹwụre, ndien iren ye iban ẹsiwak ndifiomo kiet eken m̀mê ndiyom ufọn idem mmọ kpọt. Edu umia mbuba oro odude ke ufọt eren ye n̄wan esida utọk edi. Kpukpru emi idịghe se Abasi akaduakde ọnọ eren ye n̄wan. Ẹkebot eren ndinam akpan utom ke isọn̄. Ẹkebot n̄wan man an̄wam ebe esie. Mmọ ẹkenyene ndinam utom ọtọkiet ke n̄kemuyo. Toto ke ini oro ẹkebotde owo, iren ye iban oro ẹkponode Abasi ẹsidomo ke ofụri esịt ndinam utom oro Jehovah okobotde mmọ ọnọ, ndien emi esinọ mmọ inemesịt. Nso idi mme utom emi, ndien didie ke nnyịn ikeme ndinam mmọ?

[Ndise ke page 3]

Abasi okobot eren ye n̄wan ndinam utom oro ọnọde uku