Kpep Mme Owo Se Bible Enen̄erede Ekpep
Kpep Mme Owo Se Bible Enen̄erede Ekpep
“Ẹkenam mme owo ke kpukpru idụt ẹdi mbet . . . ẹkpep mmọ.”—MATTHEW 28:19, 20.
1. Nso ke ikeme nditịn̄ mban̄a adan̄a nte mme owo ẹnyenede Bible?
IKỌ JEHOVAH, kpa Edisana Bible, edi kiet ke otu n̄wed oro ẹbịghide ẹnyụn̄ ẹsuande ẹkan. Ke nsụhọde n̄kaha, ẹkabarede ubak esie ẹsịn ke se ibede usem 2,300. Se iwakde ibe owo 90 ke otu kpukpru owo ikie oro ẹdude ke isọn̄ ẹnyene Bible ke usem emana mmọ.
2, 3. (a) Ntak emi ndutịme odude kaban̄a mme ukpepn̄kpọ Bible? (b) Mme mbụme ewe ke iyom ndineme?
2 Ediwak miliọn owo ẹsikot Bible kpukpru usen. Ndusụk owo ẹkot enye ẹkụre ediwak ini. Ediwak tọsịn ido ukpono ẹdọhọ ke ukpepn̄kpọ mmimọ ọkọn̄ọ ke Bible, edi idịghe kpukpru mmọ ẹnyịme ye kiet eken ke se Bible ekpepde. N̄kpọsọn̄ mfan̄a ke ufọt mbon oro ẹkade ukem ufọkabasi ẹtetịm ẹsịn ndutịme. Ndusụk mmọ ẹnyene eyịghe ẹban̄a Bible, ntọn̄ọ esie, ye ufọn esie. Ediwak owo ẹda enye n̄kukụre nte edisana n̄wed emi ẹsidade ẹnam akan̄a m̀mê ẹsidade ẹta un̄wọn̄ọ man owo etịn̄ akpanikọ ke esopikpe.
3 Ke nditịm ntịn̄, Bible esịne okopodudu ikọ, m̀mê etop, emi Abasi ọnọde ubonowo. (Mme Hebrew 4:12) Ke ntem, nnyịn Mme Ntiense Jehovah iyom mme owo ẹfiọk se Bible ekpepde. Adat nnyịn esịt ndinam utom oro Jesus Christ ọkọnọde mme anditiene enye ke ini enye ọkọdọhọde ete: “Ẹka ẹkenam mme owo ke kpukpru idụt ẹdi mbet mi,. . . ẹkpep mmọ.” (Matthew 28:19, 20) Ke an̄wan̄wa utom ukwọrọikọ nnyịn, nnyịn imesisobo mbon oro ẹnyenede esịt akpanikọ oro ẹsikopde editịmede esịt ẹban̄a ndutịme ido ukpono emi odude ke ererimbot. Mmọ ẹyom ndifiọk utọ owo oro Andibot edide ẹnyụn̄ ẹyom ndifiọk se Bible ekpepde aban̄a se uwem ọwọrọde. Ẹyak ineme mbụme ita oro ẹsifịnade ediwak owo. Ke idaha kiet kiet, iyodụn̄ọde se mme adaiso ido ukpono ẹduede ẹtịn̄, ekem idụn̄ọrede se Bible enen̄erede ekpep. Mme mbụme emi ẹdi (1) Ndi Abasi ekere aban̄a nnyịn? (2) Ntak emi nnyịn idude mi ke isọn̄? (3) Nso isitịbe inọ nnyịn ke ini nnyịn ikpade?
Ndi Abasi Ekere Aban̄a Nnyịn?
4, 5. Ntak emi mme owo ẹsikerede ke Abasi ikereke iban̄a nnyịn?
4 Ẹyak itọn̄ọ ye akpa mbụme: Ndi Abasi ekere aban̄a nnyịn? Edi n̄kpọ mfụhọ nditịn̄ nte ke ediwak owo ẹkere ke ibọrọ mbụme oro edi ihih. Ntak emi mmọ ẹkerede ntre? Ntak kiet edi ke mmọ ẹdu ke ererimbot emi ekọn̄, usua, ye ndutụhọ ẹyọhọde. Mmọ ndien ẹkere ẹte: ‘Edieke Abasi enen̄erede ekere aban̄a nnyịn, enye ikpayakke utọ ndiọi n̄kpọ emi ẹtịbe.’
5 Ntak efen emi anamde mme owo ẹkere ke Abasi ikereke iban̄a nnyịn edi ke mme adaiso ido ukpono ẹnam mmọ ẹkere ntre. Nso ke mme ọkwọrọ ederi ẹsiwak nditịn̄ ke ini n̄kpọ mmọn̄eyet etịbede? Ke ini mma kiet akatabade n̄kpri nditọ esie iba ke unọmọ ubomisọn̄, ọkwọrọikọ mmọ ọkọdọhọ ete: “Uduak Abasi ke edi. Abasi okoyom angel iba en̄wen.” Ke ini mme ọkwọrọ ederi ẹtịn̄de utọ ikọ oro, mmọ ẹsinen̄ede ẹduọhọ Abasi ẹban̄a ndiọi n̄kpọ oro ẹtịbede. Edi, mbet oro James ekewet ete: “Ke ini owo odude ke idomo, yak enye okûdọhọ ete: ‘Edi Abasi odomo mi.’ Koro owo ikemeke ndida idiọkn̄kpọ ndomo Abasi, enye ke idemesie inyụn̄ idomoke owo ekededi.” (James 1:13) Akananam Jehovah Abasi idịghe ntak idiọkn̄kpọ. “Nsa Abasi, enye idiọkke.”—Job 34:10
6. Anie edi ntak idiọkido ye ndutụhọ ke ererimbot emi?
6 Ntak ndien emi ibak ye ndutụhọ ẹwakde ntem-e? Akpa ntak edi koro ubonowo ke ofụri ofụri ẹmesịn Abasi nte Andikara, inyụn̄ iyomke ndisụk idem nnịm ndinen ibet ye mme edumbet esie. Ubonowo ikam ifiọkke ke mmimọ isụk ibuot inọ Asua Abasi, Satan kpa Devil, koro “ofụri ererimbot esịne ke idak odudu andidiọk.” (1 John 5:19) Ndifiọk emi anam inen̄ede ifiọk ntak emi ndiọi idaha ẹdude. Satan edi owo usua, owo abian̄a, ye owo ibak. Ntre, ererimbot enyene edu andikara enye. Ntak edi oro idiọkido ẹwakde ntem!
7. Nso idi ndusụk ntak emi nnyịn isikụtde ndutụhọ?
7 Unana mfọnmma ubonowo edi ntak efen emi nnyịn ikụtde ndutụhọ. Mme anana-mfọnmma owo ẹsin̄wana ẹyom ukara, ndien emi esisụn̄ọ ke ekọn̄, ufịk, ye ndutụhọ. Ecclesiastes 8:9 (NW) etịn̄ enye nte odotde ete: ‘Owo akara owo tutu ọnọ enye unan.’ N̄ko-n̄ko, “ini ye unọmọ” edi ntak efen oro anamde ndutụhọ odu. (Ecclesiastes 9:11) Ediwak ini mme owo ẹsikụt ndutụhọ koro mmọ ẹdude ke idiọk itie ke idiọk ini.
8, 9. Nnyịn isan̄a didie ifiọk ke Jehovah enen̄ede ekere aban̄a nnyịn?
8 Edi n̄kpọ ndọn̄esịt ndifiọk ke idịghe Jehovah edi ntak ndutụhọ. Edi ndi Abasi enen̄ede ekere aban̄a se itịbede inọ nnyịn? Edi n̄kpọ inemesịt ndifiọk ke enye ekere aban̄a! Nnyịn imọfiọk emi koro enye asian nnyịn ke Ikọ esie aban̄a ntak emi imọ iyakde ubonowo ẹdụk idiọk usụn̄. Eneni aban̄ade ukara esie ye nsọn̄ọnda ubonowo edi ntak. Sia Jehovah edide Ata Ọkpọsọn̄ Andibot, ibiomoke enye ndisian nnyịn ntak oro enye anamde n̄kpọ. Kpa ye oro, enye asian nnyịn sia enye ekerede aban̄a nnyịn.
9 Kere ban̄a mme uyarade efen oro ẹwụtde ke Abasi ekere aban̄a nnyịn. ‘Esịt ama ayat enye’ ke ini idiọkido ọkọyọhọde isọn̄ ke eyo Noah. (Genesis 6:5, 6) Ndi esịt iyatke enye n̄ko mfịn? Ayat koro enye ikpụhọkede. (Malachi 3:6) Enye asasua kpukpru orụk ukwan̄ikpe inyụn̄ inemke esịt ndikụt mme owo ẹkụtde ndutụhọ. Bible ekpep nnyịn ete ke ibịghike enye eyetre kpukpru ndutịme oro ukara owo ye odudu Devil ẹdade ẹdi. Ndi oro inen̄ekede isọn̄ọ ke Abasi ekere aban̄a nnyịn?
10. Esitie Jehovah didie ke idem ndikụt mme owo ẹbọde ndutụhọ?
10 Mme adaiso ido ukpono ẹnen̄ede ẹsu nsu ẹdian Abasi ke ndidọhọ ke mme n̄kpọ mmọn̄eyet emi ẹtịbede ẹnọ nnyịn ẹdi uduak Abasi. Ke akpanikọ, ọdọn̄ Jehovah nditre ndutụhọ ubonowo. Akpa Peter 5:7 ọdọhọ ke ‘enye ekere aban̄a mbufo.’ Se Bible enen̄erede ekpep edi oro!
Ntak Emi Nnyịn Idude Mi ke Isọn̄?
11. Nso ke mme ido ukpono ererimbot ẹsitịn̄ ẹban̄a uwem owo mi ke isọn̄?
11 Ẹyak idụn̄ọde ọyọhọ mbụme iba oro esifịnade ediwak owo: Ntak emi nnyịn idude mi ke isọn̄? Mme ido ukpono ererimbot ẹsiwak ndibọrọ ke mme owo ẹdu ke isọn̄ ke ibio ini. Mmọ ẹda ererimbot nte urua, anyam ama ọnyọn̄. Ndusụk mme ọkwọrọ ederi ẹkpep ke Abasi oyosobo ekondo emi usen kiet. Utọ ukpepn̄kpọ oro anam ediwak owo ẹbiere ke ana mmimọ inọ uwem se uwem oyomde sia ke oro ebede mmimọ iyakpa. Edi nso ke Bible enen̄erede ekpep aban̄a ntak emi nnyịn idude mi ke isọn̄?
12-14. Nso ke Bible ekpep aban̄a uduak Abasi kaban̄a isọn̄ ye kaban̄a ubonowo?
12 Abasi enyene utịbe utịbe uduak kaban̄a isọn̄ ye ubonowo. Enye “ibotke [isọn̄] ke ikpîkpu,” edi “obot enye man ẹdụn̄ ke esịt.” (Isaiah 45:18) Akan oro, Jehovah “odori isọn̄ ke itie esie, idisehekede ke nsinsi-nsinsi.” (Psalm 104:5) Ndifiọk uduak Abasi kaban̄a isọn̄ ye kaban̄a ubonowo ekeme ndin̄wam nnyịn ifiọk ntak emi idude mi ke isọn̄.
13 Genesis ibuot 1 ye 2 ẹwụt ke Jehovah ama etịm ọdiọn̄ isọn̄ ọnọ ubonowo ndidụn̄. Ke enye ama okobot ekondo nnyịn okụre, kpukpru n̄kpọ ẹma “ẹfọn eti eti.” (Genesis 1:31) Abasi ama esịn akpa eren ye n̄wan, Adam ye Eve, ke ediye In̄wan̄ Eden onyụn̄ ọnọ mmọ akpakịp nti udia. Ẹma ẹsian akpa eren ye n̄wan oro ẹte: “Ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye.” Akana mmọ ẹnyene mfọnmma nditọ, ẹtat in̄wan̄ oro mmọ ẹkedụn̄de ẹsịm ofụri isọn̄, ẹnyụn̄ ẹkara mme unam.—Genesis 1:26-28.
14 Abasi aduak mfọnmma ubonowo ẹdụn̄ ke isọn̄ ke nsinsi. Ikọ Abasi ọdọhọ ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) Ih, akana ubonowo ẹdu uwem ke nsinsi ke Paradise ke isọn̄. Uduak Abasi edi oro, ndien se Bible enen̄erede ekpep edi oro!
Nso Isitịbe Inọ Nnyịn ke Ini Nnyịn Ikpade?
15. Nso ke ata ediwak ido ukpono ererimbot ẹkpep ẹban̄a se isitịbede inọ nnyịn ke ini nnyịn ikpade?
15 Ẹyak ineme ndien ọyọhọ mbụme ita oro esifịnade ediwak owo: Nso isitịbe inọ nnyịn ke ini nnyịn ikpade? Ata ediwak ido ukpono ererimbot ẹkpep ke odu n̄kpọ ke esịt idemowo emi esikade iso odu uwem ke ikpọkidem ama akakpa. Ndusụk ido ukpono ẹsụk ẹsọsọn̄ọ ẹyịre ke ekikere oro ẹdọhọde ke Abasi ayamia mme anamidiọk ufen ke nsinsi ke hell ikan̄. Ndi akpanikọ edi oro? Nso ke Bible enen̄erede ekpep aban̄a n̄kpa?
16, 17. Bible ọdọhọ ke nso idi idaha mme akpan̄kpa?
16 Ikọ Abasi ọdọhọ ete: “Koro mme odu-uwem ẹfiọkde ẹte ke mmimọ inyene ndikpa: edi ama edi mme akpa-n̄kpa, mmọ ifiọkke baba n̄kpọ kiet: mmọ inyụn̄ inyeneke aba n̄kpọ-eyen-utom.” Sia mme akpan̄kpa ‘mîfiọkke baba n̄kpọ kiet,’ mmọ ikemeke ndikop, ndikụt, nditụk, ndikere n̄kpọ, m̀mê nditịn̄ ikọ. Mmọ inyeneke aba n̄kpọ eyenutom. Mmọ ẹkpesasan̄a didie ẹnyene? Mmọ ikemeke ndinam n̄kpọ ndomokiet! N̄ko-n̄ko, “ima mmọ, ye usua mmọ, ye ufụp mmọ ẹmetak ẹma,” sia mmọ mîkemeke aba ndinam mme n̄kpọ emi.—Ecclesiastes 9:5, 6, 10.
17 Se Bible etịn̄de aban̄a n̄kpọ emi emem onyụn̄ an̄wan̄a—mme akpan̄kpa idụhe uwem ke ebiet ekededi. N̄kpọ ndomokiet isiwọrọke owo ke idem inyụn̄ ika iso idu uwem ke ini owo akpade man afiak akamana ke idem en̄wen, nte mbon oro ẹnịmde edifiak mmana ẹdọhọde. Imekeme ndinam enye an̄wan̄a ntem: Uwem nnyịn etie nte edemeikan̄ tiande. Ke ini edemeikan̄ enịmede, enye isikaha ebiet ndomokiet. Enye n̄kukụre idụhe aba.
18. Ke ini eyen ukpepn̄kpọ Bible ọfiọkde ke mme akpan̄kpa ifiọkke n̄kpọ, nso ikpedi ubiere esie?
18 Kere se in̄wan̄-in̄wan̄ akpanikọ oro okopde odudu mi ọwọrọde. Ke ini eyen ukpepn̄kpọ Bible ọfiọkde ke mme akpan̄kpa ifiọkke baba n̄kpọ kiet, enye ekpenyene ndisọsọp nnịm ke ekpedi mme ete ete esie ẹkeyat esịt nte ẹyeyat ke eyouwem mmọ, mmọ ikemeke ndinam imọ n̄kpọ ke ini mmọ ẹma ẹkekpa. Enye ekpenyene ndisọp mfiọk n̄ko nte ke iman ye mme ufan imọ oro ẹma ẹkekpa ikemeke ndikop, ndikụt, nditụk, ndikere n̄kpọ, m̀mê nditịn̄ ikọ. Ke ntre, mmọ ikemeke ndikop enyene-ndịk ndobo ke purgatory m̀mê ndikụt ndutụhọ ke hell ikan̄. Nte ededi, Bible ekpep ke ẹyenam mme akpan̄kpa emi ẹdude ke ibuot uti n̄kpọ Abasi ẹset. Nso utịbe utịbe idotenyịn ke emi edi ntem!—John 5:28, 29.
Obufa N̄wed Oro Ẹnọde Ida Inam Utom
19, 20. Nso mbiomo ke inyene ke ntak emi idide mme Christian, ndien ewe n̄wed ke ẹsio san̄asan̄a ẹnọ nnyịn ida inam utom ukwọrọikọ nnyịn?
19 Nnyịn ineme mbụme ita kpọt ke otu mbụme oro ediwak owo ẹsikerede ẹban̄a. Ke mbụme emi kiet kiet, nnyịn imokụt ke se Bible ekpepde ana ata in̄wan̄-in̄wan̄. Esinem didie ntem ndibuana utọ akpanikọ oro ye mbon oro ẹyomde ndifiọk se Bible ekpepde! Edi ediwak akpan mbụme en̄wen ẹdu oro mbon oro ẹnyenede esịt akpanikọ ẹyomde ibọrọ oro ẹnọde uyụhọ. Nnyịn mme Christian imenyene mbiomo ndin̄wam mme owo ẹnyene ibọrọ mme utọ mbụme oro.
20 Esisọn̄ ndikpep akpanikọ Bible ke usụn̄ oro ememde, an̄wan̄ade, onyụn̄ otụkde esịt mme owo. Man ikeme ndinam emi, “ofụn emi anamde akpanikọ onyụn̄ enyenede ọniọn̄” ama osio n̄wed emi ẹnamde san̄asan̄a ẹnọ nnyịn ndida nnam utom ukwọrọikọ. (Matthew 24:45-47) Ẹkot n̄wed ukpep Bible oro enyenede page 224 mi Nso ke Bible Enen̄ede Ekpep?
21, 22. Nso idi mme akpan ikpehe n̄wed Nso ke Bible Enen̄ede Ekpep?
21 N̄wed emi ẹkesiode ke Mbono District “N̄kopuyo Abasi” eke Mme Ntiense Jehovah ke 2005-2006 mi enyene nsio nsio n̄wọrọnda ikpehe. Ke uwụtn̄kpọ, enye enyene ebemiso ikọ emi edide page ition, ndien emi enen̄ede an̄wam ndida ntọn̄ọ ukpepn̄kpọ Bible. Anaedi eyemem fi utom ndineme mme ndise ye mme itie N̄wed Abasi oro ẹdude ke ebemiso ikọ oro. Emekeme ndida ikpehe emi n̄ko n̄wụt nditọ ukpepn̄kpọ nte ẹkemede ndikụt mme ibuot ye mme ufan̄ikọ Bible.
22 Ẹwet enye ke usụn̄ oro ememde onyụn̄ an̄wan̄ade. Ẹnen̄ede ẹsịn ukeme ke nte ẹwetde n̄wed emi man ẹsịm esịt eyen ukpepn̄kpọ ke ndibụp enye mbụme ini ekededi oro ẹkemede. Ibuot kiet kiet ẹnyene mme mbụme ntọn̄ọikọ ye ekebe ke utịt emi ẹkotde “Se Bible Ekpepde.” Ekebe emi ọdọn̄ọ mme ibọrọ N̄wed Abasi ọnọ mme mbụme ntọn̄ọikọ oro. Ndiye ndise ye se ẹwetde ẹban̄a mmọ, ọkọrọ ye nti uwụtn̄kpọ oro ẹdude ke n̄wed emi ẹyenam se ẹnemede ọsọp an̄wan̄a eyen ukpepn̄kpọ. Okposụkedi ẹwetde ibuot 19 oro ẹdude ke n̄wed emi ke ata mmemmem usụn̄, enye enyene se ẹwetde ẹdian, emi ekemede ndida nneme mme akpan ibuot nneme 14 ntotụn̄ọ ntotụn̄ọ ye eyen ukpepn̄kpọ edieke oyomde anam ntre.
23. Mme ekikere ewe ke enọ kaban̄a nte ẹkpedade n̄wed Bible Ekpep ẹnọ ukpep?
23 Ẹnam n̄wed Bible Ekpep man an̄wam nnyịn ikpep mme owo oro ẹnyenede nsio nsio ifiọkn̄wed ẹnyụn̄ ẹkade nsio nsio ido ukpono. Edieke eyen ukpepn̄kpọ mînyeneke ifiọk iban̄a Bible, ẹkeme ndikpep n̄kpọ mbe ini kiet mbemiso ẹkụrede ibuot kiet. Kûkpep itọk itọk, edi domo ndisịm esịt eyen ukpepn̄kpọ. Edieke uwụtn̄kpọ oro ẹnọde ke n̄wed emi mîn̄wan̄ake enye, nam an̄wan̄a enye mîdịghe da uwụtn̄kpọ en̄wen. Tịm idem edifọn edifọn, sịn ofụri ukeme fo ndida n̄wed emi nnam n̄kpọ uforo uforo, nyụn̄ bọn̄ akam ben̄e un̄wam Abasi man ekpekeme ‘nditịm nsiak ikọ akpanikọ.’—2 Timothy 2:15.
Wụt Esịtekọm Ban̄a Anana-Mbiet Ifet Oro Enyenede
24, 25. Nso anana-mbiet ifet ke Jehovah ọnọ ikọt esie?
24 Jehovah ọmọnọ ikọt esie anana-mbiet ifet. Enye an̄wam nnyịn ikpep akpanikọ aban̄ade enye. Inaha ida ifet emi didie didie. Ke nditịm ntịn̄, Abasi emedịp mbon iseri mme uduak esie edi ayararede ọnọ mbon nsụhọdeidem. Jesus eketịn̄ ntem aban̄a emi: “Mmọnọ fi itoro an̄wan̄wa, Ete, Ọbọn̄ enyọn̄ ye isọn̄, koro afo emedịp mbon ọniọn̄ ye mbon ikike mme n̄kpọ emi onyụn̄ ayarade mmọ ọnọ nseknditọ.” (Matthew 11:25) Edi ata akwa ukpono ndisịne ke otu mbon nsụhọdeidem emi ẹnamde n̄kpọ ẹnọ Andikara Ekondo, kpa Jehovah.
25 Abasi ọmọnọ nnyịn ifet n̄ko ndikpep mbon en̄wen mban̄a enye. Ti ete ke mbon oro ẹkpepde nsu ẹban̄a Jehovah iyakke mme owo ẹfiọk enye. Oro anam ediwak owo ẹnyene ata ukwan̄ ekikere ẹban̄a Jehovah, ẹnyụn̄ ẹkere ke enye isikereke iban̄a owo onyụn̄ ọsọn̄ esịt akaha. Ndi amaduak, mîdịghe ndi enen̄ede ọdọn̄ fi, ndinen̄ede mme ukwan̄ ekikere emi? Ndi omoyom mbon oro ẹnyenede esịt akpanikọ ke kpukpru ebiet ẹfiọk utọ owo emi Abasi edide? Ke edide ntre, sịn ofụri ukeme wụt ke imokop uyo Abasi ke ndisịn ifịk n̄kwọrọ nnyụn̄ n̄kpep mbon en̄wen mme akpan n̄kpọ oro N̄wed Abasi ekpepde. Ana mbon oro ẹyomde akpanikọ ẹfiọk se Bible enen̄erede ekpep.
Nso Idi Ibọrọ Fo?
• Nnyịn isan̄a didie ifiọk ke Abasi ekere aban̄a nnyịn?
• Ntak emi nnyịn idude mi ke isọn̄?
• Nso isitịbe inọ owo ke ini enye akpade?
• Mme ikpehe ewe ke n̄wed Bible Ekpep ke afo enen̄ede ama?
[Mme Mbụme Ukpepn̄kpọ]
[Mme ndise ke page 22]
Bible ekpep ke ndutụhọ eyetre
[Mme Ebiet Ẹdade N̄kpọ Ẹto]
Enyọn̄ enyọn̄ nnasia, ekpri eyenan̄wan: Ẹbọ ẹto © Bruno Morandi/age fotostock; ufien, n̄wan: Ẹbọ ẹto AP Photo/Gemunu Amarasinghe; isọn̄ isọn̄, mbon itọkekọn̄: Ẹbọ ẹto © Sven Torfinn/Panos Pictures
[Ndise ke page 23]
Nti owo ẹyedu uwem ke nsinsi ke Paradise