Mme Mbụme Ẹtode Mme Andikot

Didie ke Ọkwọrọikọ okokụt “erenowo kiet ke otu tọsịn” edi ikwe “baba n̄wan kiet ke otu mmọ emi kpukpru”?—Ecclesiastes 7:28.

Man inen̄ede ifiọk se ikọ oro ẹkedade odudu spirit Abasi ẹwet mi ọwọrọde, ana ibem iso ifiọk nte Abasi esede iban. Bible okot Ruth, n̄wan eyen Naomi oro ebe akakpade, “enyene ido an̄wan.” (Ruth 3:11) Mme N̄ke 31:10 ọdọhọ ke ekọmurua eti an̄wan “akan pearl anyan usụn̄.” Nso ndien ke ikọ edidem Solomon eke Israel eset ọkọwọrọ ke ini enye ọkọdọhọde ete: “Mma n̄kụt . . . eti eren kiet ke otu tọsịn, edi n̄kekwe baba eti an̄wan kiet”?—Moffatt.

Ofụri se ẹnemede ke ibuotn̄wed emi owụt ke iban ẹma ẹsidu oburobụt uwem ke eyo Solomon. (Ecclesiastes 7:26) Ekeme ndidi isen iban oro ẹkekponode nsunsu abasi Baal ẹkenen̄ede ẹnam n̄kpọ etie ntre. Ediwak isen iban Edidem Solomon ẹma ẹkam ẹtap enye ke idemesie ẹsịn ke ukpono nsunsu abasi. Bible ọdọhọ ete: “Ndien enye enyene iban eke ẹdide nditọ mbọn̄ ikie itiaba, ye iban esa ikie ita: ndien iban esie ẹyụt enye esịt” ndikpono nsunsu abasi. (1 Ndidem 11:1-4) Irenowo n̄ko ẹma ẹdu oburobụt uwem—ndikụt edinen erenowo kiet kpọt ke otu tọsịn ama ekpri akaha, eketie nte n̄kpọ eke ndomokiet mîkodụhe. Solomon ada ikọ esie ekeberi ke ndidọhọ ete: “Mma n̄kụt n̄kpọ emi ikpọn̄ ikpọn̄, nte ke Abasi ama anam owo edinen; ndien mmọ ẹma ẹyom ediwak idiọk usụn̄.” (Ecclesiastes 7:29) Akpatre ikọ Solomon emi owụt ke idịghe iban kpọt ẹdiọk, edi ke kpukpru owo ẹdiọk—oro edi iren ye iban. Ntem, se idude ke Ecclesiastes 7:28 owụt nte mme owo ke ofụri ofụri ẹkedude uwem ke eyo Solomon.

Nte ededi, etie nte ufan̄ikọ emi enyene n̄kpọ efen emi enye etịn̄de aban̄a. Enye n̄ko ekeme ndidi ntịn̄nnịm ikọ oro owụtde ke akanam n̄wan ndomokiet isụkke ibuot inọ Jehovah ke mfọnmma usụn̄, edi eren kiet—oro edi Jesus Christ, ama anam oro.—Rome 5:15-17.

[Ndise ke page 31]

“Erenowo kiet ke otu tọsịn”