N̄wam Mbon En̄wen Ẹnam Se Bible Ekpepde
N̄wam Mbon En̄wen Ẹnam Se Bible Ekpepde
“Amaedi mmọ eke ẹduọn̄ọde ke eti isọn̄, emi ẹdi mmọ oro ẹkopde ikọ ye eti esịt eke ọfọnde, ẹmụm ẹkama ẹnyụn̄ ẹn̄wụm mfri ke ime.”—LUKE 8:15.
1, 2. (a) Ntak emi ẹsiode n̄wed Nso ke Bible Enen̄ede Ekpep? (b) Didie ke Jehovah ọdiọn̄ ukeme oro ikọt esie ẹsịnde ke mme isua ndondo emi ndinam mme mbet?
“N̄WED emi edi ata eti n̄wed. Nditọ ukpepn̄kpọ mi ẹma enye etieti. Mmama enye-e. N̄wed emi anam emem utom nditọn̄ọ ukpepn̄kpọ ye mme owo ke enyịnusụn̄ mmọ.” Ntre ke asan̄autom uyọhọ ini Mme Ntiense Jehovah emi ẹkotde asiakusụn̄, eketịn̄ aban̄a n̄wed oro Nso ke Bible Enen̄ede Ekpep? * Akanieren kiet emi edide asuanetop Obio Ubọn̄ eketịn̄ ntem aban̄a n̄wed oro: “Mman̄wam ediwak owo ẹdi ẹdifiọk Jehovah ke isua 50 oro nnamde utom ukwọrọikọ. Edi n̄wed ukpepn̄kpọ enye emi edi n̄wọrọnda. Ndinem uwụtn̄kpọ ye ndise esie ẹye ẹsọn̄.” Ndi nte afo adade n̄wed Bible Ekpep edi oro? Ẹwet n̄wed ukpep Bible emi man an̄wam fi anam ewụhọ Jesus emi: “Mmọdo ẹka ẹkenam mme owo ke kpukpru idụt ẹdi mbet mi, . . . ẹkpep mmọ ẹnam kpukpru n̄kpọ eke n̄ketemede mbufo.”—Matthew 28:19, 20.
2 Eyịghe idụhe ke esịt esidat Jehovah ke ini enye okụtde n̄kpọ nte Mme Ntiense esie miliọn itiokiet ye ubak ẹnyịmede ndinam mme mbet nte Jesus eketemede. (Mme N̄ke 27:11) Ke akpanikọ, Jehovah ke ọdiọn̄ ukeme oro mmọ ẹsịnde. Ke uwụtn̄kpọ, ke isua utom 2005, ẹkekwọrọ eti mbụk ke idụt 235, ndien ke ẹbaharede ukem ukem, ẹkenịm ukpepn̄kpọ Bible 6,061,500. Emi ama anam ediwak owo ‘ẹkop ẹnyụn̄ ẹbọ eti mbụk kpa nte enye ke akpanikọ edide, nte ikọ Abasi.’ (1 Thessalonica 2:13) Ke ufan̄ isua iba emi ẹkebede, se ibede owo 500,000 ẹma ẹdu uwem ekekem ye mme edumbet Jehovah ẹnyụn̄ ẹyak idem mmọ ẹnọ Abasi.
3. Mme mbụme ewe ẹban̄ade nte ẹkpedade n̄wed Bible Ekpep ẹnam n̄kpọ ke idineme ke ibuotikọ emi?
3 Ndi afo emenịm ukpepn̄kpọ Bible ye owo ke ndondo emi? Mme owo ẹsụk ẹdodu ke ofụri ererimbot emi ẹnyenede “eti esịt eke ọfọnde,” emi ke ini ẹkopde ikọ Abasi “ẹmụm ẹkama ẹnyụn̄ ẹn̄wụm mfri ke ime.” (Luke 8:11-15) Ẹyak ineme idahaemi nte afo ekemede ndida n̄wed Bible Ekpep nnam mme mbet. Nneme nnyịn edibọrọ mbụme ita: (1) Didie ke afo ekeme nditọn̄ọ ukpepn̄kpọ Bible? (2) Mme usụn̄ ewe ke afo ekeme ndida n̄kpep owo n̄kpọ uforo uforo? (3) Didie ke afo ekeme ndin̄wam owo akabade edi eyen ukpepn̄kpọ ye andikpep Ikọ Abasi, kpa Bible?
Nte Afo Ekemede Nditọn̄ọ Ukpepn̄kpọ Bible
4. Ntak emi ndusụk owo ẹkemede ndimen̄e ndikpep Bible, ndien didie ke afo ekeme ndin̄wam mmọ ẹkan mfịna emi?
4 Edieke ẹkpedọhọde fi ọfrọ ukot kiet kpọt ebe ata akamba idịm, ukpedehedei unyịme. Edi edieke ẹkpebonde itiat ke nsio nsio ebiet ndida ndori ukot mbe, ekeme ndidi ekpenyịme ndibe idịm oro. Kpasụk ntre, owo emi mînyeneke ini ekeme ndimen̄e ndikpep Bible. Enyeneufọk ekeme ndikere ke ayada ini ye ukeme akaha ndikpep Bible. Didie ke afo ekeme ndin̄wam enye okụt ke idịghe ntre? Afo emekeme ndida n̄wed Bible Ekpep nnam owo emi ama ndikpep Ikọ Abasi kpukpru ini edieke ekpepde akpan n̄kpọ ifan̄ mbio mbio ye enye. Edieke afo etịmde idem edifọn edifọn, kpukpru ini oro afo afiakde aka ebịne owo emi ekeme ndin̄wam enye nsịtnsịt akabade edi ufan Jehovah.
5. Ntak oyomde fi okot n̄wed Bible Ekpep?
5 Nte ededi, mbemiso afo ekemede ndin̄wam owo en̄wen ọbọ ufọn oto n̄wed Bible Ekpep, ana afo ke idemfo enen̄ede emehe ye n̄wed emi. Ndi afo omokot n̄wed emi okụre? Enyene ebe ye n̄wan emi ẹkemende n̄wed emi ẹka nduọkodudu ẹnyụn̄ ẹtọn̄ọ ndikot ke ini ẹkebọde ofụm ke esụk. Nte n̄wan obio oro, emi esinyamde n̄kpọ ọnọ mme akaisan̄, akasan̄ade ekpere mmọ, enye ama okụt enyịn̄ n̄wed oro Nso ke Bible Enen̄ede Ekpep? Enye ama asian ebe ye n̄wan oro ete ke hour ifan̄ emi ẹbede ke imọ ima ibọn̄ akam iban̄a mbụme oro, inyụn̄ iben̄e Abasi ọnọ imọ ibọrọ. Mmọ ẹma ẹkpọn̄ n̄wed oro kiet ẹnọ enye. Ndi afo ‘emedep ifet’ okot n̄wed emi, edieke ekemede, ọyọhọ utịm ikaba, ke adan̄aemi etiede ebet owo m̀mê ke ini nduọkodudu ke itieutom m̀mê ke ufọkn̄wed? (Ephesus 5:15, 16) Ke anamde ntre, afo eyemehe ye n̄wed ukpep Bible emi, ndien emi ekeme ndinyụn̄ nnọ fi ifet ndineme se isịnede ke enye nnọ mbon en̄wen.
6, 7. Didie ke afo ekeme ndida n̄wed Bible Ekpep ntọn̄ọ ukpepn̄kpọ Bible?
6 Da mme ndise, itie N̄wed Abasi, ye mme mbụme oro ẹdude ke page 4, 5, ye 6 nam n̄kpọ ke ini ọnọde owo n̄wed emi ke an̄wautom. Ke uwụtn̄kpọ, afo emekeme nditọn̄ọ nneme ke ndidọhọ ete, “Afo ekere ke nnyịn ikeme ndida m̀mọ̀n̄ eti item ikọk kpukpru mfịna oro ubonowo ẹsobode mfịn?” Ke ama ekenen̄ede akpan̄ utọn̄ okop ibọrọ esie, kot 2 Timothy 3:16, 17, nyụn̄ dọhọ ke Bible etịn̄ nte ẹdimende mme mfịna ubonowo ẹfep. Ke oro ebede, wụt enye page 4 ye 5 nyụn̄ bụp enye ete: “Ke otu kpukpru mfịna oro ẹwụtde ke mme page emi, ewe afịna fi akan?” Ke ini enyeneufọk owụtde kiet, dọhọ enye omụm n̄wed oro akama ke adan̄aemi afo okotde itie N̄wed Abasi emi ẹsiakde ke itie oro enye okowụtde, ke Bible fo. Ekem kot page 6 nyụn̄ dọhọ enyeneufọk ete, “Ke otu mbụme itiokiet oro ẹbụpde ke isọn̄ isọn̄ page emi, ewe ke afo akpama ẹbọrọ?” Ke ini enye emekde kiet, wụt enye ibuot oro ọbọrọde mbụme oro, yak n̄wed oro nọ enye, nyụn̄ diomi ndifiak ndi ndibọrọ mbụme oro.
7 Se itịn̄de emi edida n̄kpọ nte minit ition ndineme. Nte ededi, ke minit ifan̄ oro, afo ọyọfiọk se ibehede enyeneufọk, okot onyụn̄ eneme itie N̄wed Abasi iba, onyụn̄ anam ndutịm ndifiak n̄ka. Ibio ibio nneme oro afo enyenede ye enyeneufọk ekeme ndidi nsịnudọn̄ oro edide ebịghi etieti enye ọkọbọ orụk nsịnudọn̄ oro. Emi ekeme ndinam idem owo emi ananade ini etieti etetie ebet ndibiat minit ifan̄ efen efen ye afo nte afo an̄wamde enye anam usio-ukot efen ndidụk ‘usụn̄ oro adade aka nsinsi uwem.’ (Matthew 7:14) Nte ini akade, nte enyeneufọk enen̄erede enyene udọn̄, emekeme ndinam ini ukpepn̄kpọ amana ọniọn̄ esịt. Emekeme ndinam emi ke ndidọhọ ẹtetie ẹkpep n̄kpọ ke akpan udomo ini.
Mme Usụn̄ Ndida N̄kpep Owo N̄kpọ Uforo Uforo
8, 9. (a) Didie ke afo ekeme nditịm eyen ukpepn̄kpọ fo idem man akan ubiọn̄ọ ye idomo oro enye ekemede ndisobo? (b) M̀mọ̀n̄ ke ẹkeme ndikụt mme ọsọn̄urua n̄kpọ oro ikan̄ mîkemeke ndita nda nnam owo enyene ọkpọsọn̄ mbuọtidem?
8 Ke ndondo oro owo ọtọn̄ọde ndinam se Bible ekpepde, enye ekeme ndisobo mme n̄kpọ oro ẹkemede ndibiọn̄ọ enye ndinam n̄kọri. Apostle Paul ọkọdọhọ ete: “Kpukpru owo eke ẹyomde ndidu uwem uten̄e Abasi ke ebuana ye Christ Jesus ẹyesobo ukọbọ n̄ko.” (2 Timothy 3:12) Paul ekemen mme idomo emi odomo ye ikan̄ emi ekemede ndita ndiọi n̄kpọ ubọpufọk edi mîtaha mme utọ n̄kpọ nte gold, silver, ye ọsọn̄urua itiat. (1 Corinth 3:10-13; 1 Peter 1:6, 7) Man an̄wam eyen ukpepn̄kpọ Bible fo enyene mme edu emi ẹyomde man ọsọn̄ọ ada ke ini osobode idomo, ana afo ada mme n̄kpọ ubọpufọk oro ikan̄ mîkemeke ndita anam enye enyene ọkpọsọn̄ mbuọtidem.
9 Andiwet psalm ekemen “ikọ Jehovah” odomo ye “silver eke ẹtarade ke eso mbat, eke ẹdụhọde utịm ikatiaba.” (Psalm 12:6) Ke nditịm ntịn̄, Bible ọdọn̄ọ kpukpru ọsọn̄urua n̄kpọ oro ẹkemede ndida nnam owo enyene ọkpọsọn̄ mbuọtidem. (Psalm 19:7-11; Mme N̄ke 2:1-6) Ndien n̄wed Bible Ekpep owụt fi nte ekemede ndida N̄wed Abasi nnam emi uforo uforo.
10. Didie ke afo ekeme ndinam eyen ukpepn̄kpọ etịn̄ enyịn ke Bible?
10 Ke ini ukpepn̄kpọ, nam eyen ukpepn̄kpọ etịn̄ enyịn ke mme itie N̄wed Abasi oro ẹnemede ke ibuot kiet kiet. Da mbụme n̄wam eyen ukpepn̄kpọ ọfiọk mme itien̄wed Bible onyụn̄ ada esịn ke edinam ke idemesie. Kpeme mbak edidi afo ọdọhọ enye se enye akpanamde. Utu ke oro, kpebe uwụtn̄kpọ Jesus. Ke ini owo emi ọfiọkde Ibet okobụpde enye mbụme, enye ọkọbọrọ ete: “Ẹwet nso ke Ibet? Afo okot didie?” Eren oro ama ọbọrọ nte ẹwetde ke N̄wed Abasi, ndien Jesus ama an̄wam enye okụt nte enye akpadade edumbet oro esịn ke edinam ke idemesie. Jesus ama ada uwụtn̄kpọ n̄ko an̄wam eren oro okụt nte enye akpadade ukpepn̄kpọ oro esịn ke edinam. (Luke 10:25-37) Mmemmem uwụtn̄kpọ ẹyọyọhọ n̄wed Bible Ekpep emi afo ekemede ndida n̄n̄wam eyen ukpepn̄kpọ ada mme edumbet N̄wed Abasi esịn ke edinam ke idemesie.
11. Ekpekpep n̄kpọ awak adan̄a didie ke ini ukpepn̄kpọ kiet kiet?
11 N̄wed emi ada mmemmem usem eneme Ikọ Abasi, kpa nte Jesus akadade mmemmem ikọ anam n̄kpọ oro ọsọn̄de an̄wan̄a. (Matthew 7:28, 29) Kpebe uwụtn̄kpọ Jesus. Tịn̄ se ẹnemede ke mmemmem usụn̄ oro an̄wan̄ade onyụn̄ enende. Kûkpep itọk itọk. Utu ke oro, yak idaha ye ukeme eyen ukpepn̄kpọ ẹbiere ibat ikpehe ekikere oro enemede ke ini ukpepn̄kpọ kiet kiet. Jesus ama ọfiọk ukeme mbet esie, ndien enye ikekpepke mmọ se mîdin̄wan̄ake mmọ ini oro.—John 16:12.
12. Didie ke ẹkpeda se ẹwetde ẹdian ẹnam n̄kpọ?
12 N̄wed Bible Ekpep enyene se ẹwetde ẹdian emi enyenede ibuotikọ 14. Afo emi edide andikpep enyene ndibiere ntiene udọn̄ eyen ukpepn̄kpọ nte akpadade enye anam n̄kpọ. Ke uwụtn̄kpọ, edieke ibuotikọ mîn̄wan̄ake eyen ukpepn̄kpọ m̀mê edieke enye enyenede mbụme ke ntak se enye ekesinịmde ke akpanikọ, emekeme ndiwụt enye ikpehe emi enemede n̄kpọ oro ke se ẹwetde ẹdian onyụn̄ ọdọhọ enye okot ke idemesie. Mîdịghe, idaha eyen ukpepn̄kpọ oro ekeme ndiyom eneme ikpehe oro ye enye. Se ẹwetde ẹdian esịne mme ibuotikọ N̄wed Abasi nte “‘Ukpọn̄’ ye ‘Spirit’—Nso ke Mme Ikọ Emi Ẹnen̄ede Ẹwọrọ?” ye “Ndidiọn̄ọ ‘Akwa Babylon.’” Afo emekeme ndineme mme ibuotikọ emi ye eyen ukpepn̄kpọ fo. Sia mbụme mîdụhe ke mme ibuotikọ oro ẹnemede ke se ẹwetde ẹdian, oyom afo enen̄ede emehe ye se ẹnemede man ekeme ndibụp ata nti mbụme.
13. Didie ke akam ekeme ndisọn̄ọ mbuọtidem?
13 Psalm 127:1 ọdọhọ ete: “Ke mîbọhọke Jehovah ọbọp ufọk, mmọ eke ẹbọpde ẹkpa utom ikpîkpu ke esịt.” Ke ntre, ke ini etịmde idem ndinịm ukpepn̄kpọ Bible, bọn̄ akam yom un̄wam Jehovah. Nam akam oro afo ọbọn̄de ke ntọn̄ọ ye ke utịt ukpepn̄kpọ ẹwụt ke emen̄ede ekpere Jehovah idem. Sịn udọn̄ nọ eyen ukpepn̄kpọ fo ọbọn̄ akam eben̄e Jehovah ọniọn̄ man Ikọ Esie ekeme ndin̄wan̄a enye, onyụn̄ eben̄e ukeme ndida item Esie nsịn ke edinam. (James 1:5) Edieke enye anamde oro, enye eyenyene odudu ndiyọ idomo nnyụn̄ n̄ka iso n̄kọri ke mbuọtidem.
N̄wam Eyen Ukpepn̄kpọ Akabade Edi Andikpep
14. Nso n̄kọri ke oyom nditọ ukpepn̄kpọ Bible ẹnam?
14 Edieke anade eyen ukpepn̄kpọ fo anam “kpukpru n̄kpọ” eke Jesus okowụkde mme mbet esie, ana mmọ ẹkọri ẹbe ndidi nditọ ukpepn̄kpọ Ikọ Abasi ẹkabade ẹdi mme andikpep. (Matthew 28:19, 20; Utom 1:6-8) Nso ke afo ekeme ndinam man an̄wam eyen ukpepn̄kpọ anam utọ n̄kọri oro?
15. Ntak emi afo ekpesịnde udọn̄ ọnọ eyen ukpepn̄kpọ fo esidụk mme mbono esop?
15 Toto ke ata akpa ukpepn̄kpọ, kot eyen ukpepn̄kpọ etiene fi edidụk mbono esop. Nam enye ọfiọk ke afo emi edide andikpep Ikọ Abasi esibọ ukpep ke mme mbono esop emi. Ke ufan̄ ediwak urua, da minit ifan̄ ke utịt ukpepn̄kpọ kiet kiet neme ndutịm ukpep eke spirit oro afo esibọde ke nsio nsio mbono esop ye mme mbono. Tịn̄ inem inem ban̄a ufọn oro esibọde ke mme mbono emi. (Mme Hebrew 10:24, 25) Ke ndondo oro eyen ukpepn̄kpọ ọtọn̄ọde ndidụk mbono esop kpukpru ini, etie nte enye ayakabade edi andikpep Ikọ Abasi.
16, 17. Siak ndusụk utịtmbuba oro eyen ukpepn̄kpọ Bible ekemede ndinịm nnyụn̄ nsịm.
16 N̄wam eyen ukpepn̄kpọ Bible enịm mme utịtmbuba oro enye ekemede ndisịm. Ke uwụtn̄kpọ, sịn udọn̄ nọ enye etịn̄ se enye ekpepde ọnọ ufan m̀mê iman esie. N̄ko-n̄ko, dọhọ enye enịm utịtmbuba edikot ofụri Bible. Edieke afo an̄wamde enye ọtọn̄ọ ndutịm edikot Bible kpukpru ini nnyụn̄ n̄ka iso ke ndutịm oro, enye ayaka iso anam emi anyan ini ke ama akana baptism. Ke adianade do, dọhọ enye enịm utịtmbuba editi ke nsụhọde n̄kaha itien̄wed Bible kiet emi ọbọrọde akpan mbụme kiet ke ibuot kiet kiet ke n̄wed Bible Ekpep. Edieke enye anamde emi, enye ayakabade edi “anamutom emi mînyeneke n̄kpọ eke anamde enye okop bụt, etịmde asiak ikọ akpanikọ.”—2 Timothy 2:15.
17 Utu ke ndikpep eyen ukpepn̄kpọ afiak etịn̄ se mme itie N̄wed Abasi ẹtịn̄de, sịn udọn̄ nọ enye etịn̄ ebuana oro mme itie N̄wed Abasi ẹnyenede ye se ẹnemede ke ini enye owụtde owo ekededi eke oyomde ntak idotenyịn emi enye enyenede. Ekeme ndiyom anam ibio ibio ndomonse ye enye; afo emekeme ndinam nte idi iman m̀mê nsan̄autom emi oyomde ndifiọk se enye enịmde ke akpanikọ. Nte enye anamde n̄kọri, wụt enye nte ẹkemede ndinam ntre ke “ifụre ifụre ido ye ntotụn̄ọ ukpono.”—1 Peter 3:15.
18. Ke ini eyen ukpepn̄kpọ Bible odotde nte asuanetop oro mînaha kan̄a baptism, didie ke afo ekeme ndika iso n̄n̄wam enye?
18 Nte ini akade, eyen ukpepn̄kpọ oro ekeme ndidot ndiwọrọ an̄wautom. Nen̄ede nam enye ọfiọk ke edi akwa ifet ndiyak owo ọwọrọ an̄wautom. (2 Corinth 4:1, 7) Ke ndondo oro mbiowo ẹdọhọde ke eyen ukpepn̄kpọ oro odot ndidi asuanetop oro mînaha kan̄a baptism, n̄wam enye tịm ibio ibio nneme nyụn̄ san̄a ye enye ke an̄wautom. Ka iso san̄a ye enye kpukpru ini ke nsio nsio ikpehe utom ukwọrọikọ, nyụn̄ kpep enye nte ẹkemede nditịm idem nnọ nnyụn̄ nnam mme mfiakn̄ka uforo uforo. Eti uwụtn̄kpọ fo eyenen̄ede an̄wam enye.—Luke 6:40.
‘Nyan̄a Idemfo ye Mmọ Eke Ẹkopde Uyo Fo’
19, 20. Nso utịtmbuba ke ikpenịm, ndien ntak-a?
19 Edi akpanikọ ke ndin̄wam owo enyene “nnennen ifiọk akpanikọ” idịghe ifia ubọk kiet. (1 Timothy 2:4) Nte ededi, iwakke n̄kpọ oro adatde owo esịt nte ndin̄wam owo anam se Bible ekpepde. (1 Thessalonica 2:19, 20) Nso akwa ifet ke edi ntem ndidi “nsan̄autom Abasi” ke utom unọ ukpep ofụri ererimbot emi!—1 Corinth 3:9.
20 Jehovah ọyọsọp ada Jesus Christ ye mme okopodudu angel osobo “mmọ eke mîfiọkke Abasi ye mmọ eke mîsụkke ibuot inọ eti mbụk Ọbọn̄ nnyịn Jesus.” (2 Thessalonica 1:6-8) Mme owo ẹkeme nditaba uwem mmọ. Ndi afo emekeme ndinịm utịtmbuba edinịm ke nsụhọde n̄kaha ukpepn̄kpọ kiet ke n̄wed Nso ke Bible Enen̄ede Ekpep? Nte afo anamde utom emi, afo emenyene ifet ‘ndinyan̄a idemfo ye mmọ eke ẹkopde uyo fo.’ (1 Timothy 4:16) Enen̄ede oyom in̄wam mbon en̄wen ẹnam se Bible ekpepde idahaemi.
[Ikọ idakisọn̄]
^ ikp. 1 Mme Ntiense Jehovah ẹsio.
Nso ke Afo Ekekpep?
• Ntak emi ẹsiode n̄wed Bible Ekpep?
• Didie ke afo ekeme ndida n̄wed Bible Ekpep ntọn̄ọ ukpepn̄kpọ Bible?
• Mme usụn̄ unọ ukpep ewe ẹfọn ẹkan?
• Didie ke afo ekeme ndin̄wam eyen ukpepn̄kpọ akabade edi andikpep Ikọ Abasi?
[Mme Mbụme Ukpepn̄kpọ]
[Ndise ke page 26]
Ndi afo ke ada n̄wed emi anam n̄kpọ edifọn edifọn?
[Ndise ke page 27]
Ibio ibio nneme ekeme ndidemede owo udọn̄ ndinyene ifiọk Bible
[Ndise ke page 29]
Nso ke afo ekeme ndinam man anam eyen ukpepn̄kpọ Bible etịn̄ enyịn ke Bible?
[Ndise ke page 30]
N̄wam eyen ukpepn̄kpọ anam n̄kọri