Amos Ndi Enye Ekedi Ekịbi m̀mê Etịbi Fig?

KO KE edem ke ọyọhọ isua ikie usụkkiet M.E.N., idiọk Amaziah, oku emi akatuakde ibuot ọnọ eyenenan̄, ama owụk prọfet Amos ete etre nditịn̄ ntịn̄nnịm ikọ ke Israel. Amos ama afan̄a ete: “Ami [ndi] ekpeme-erọn̄ ye ekịbi mfri eto sycamore: ndien Jehovah ada mi ke ini ntienede n̄kpri ufene, Jehovah onyụn̄ ọdọhọ mi, ete, Ka ketịn̄ prophecy nọ ikọt mi Israel.” (Amos 7:14, 15) Ih, Jehovah ekemek Amos nte prọfet; idịghe enye ekemek idem esiemmọ. Edi nso ke ikọ Amos ọkọwọrọ ke ini enye ọkọdọhọde ke imọ ikedi “ekịbi” mfri eto sycamore?

Ikọ Hebrew emi Edisana Ŋwed Abasi Ibom akabarede ntre ke New World Translation akabarede “etịbi” fig, ndien enye odu ini kiet kpọt. Mme edikabade Bible eken ẹkabarede ikọ Hebrew oro nte “etet,” “ọbọk,” “ọdiọn̄,” “ọtọ,” utu ke “etịbi,” mfri eto sycamore. Nte ededi, n̄wed oro Economic Botany ọdọhọ ke nnennen edikabade ikọ oro ekpedi “ekịm,” koro ikọ emi aban̄a akpan utom owo emi esitọde sycamore.

Ẹma ẹmehe ye editịbi, m̀mê edikịm, oro edi, editịbi n̄kpri ndudu ke mfri eto sycamore toto ke ata eset ke Egypt ye Cyprus. Owo isikịmke m̀mê nditịbi aba fig ke Israel eyomfịn koro nsio nsio orụk fig ẹdu do. Nte ededi, ẹma ẹsitịbi fig ke eyo Amos sia ẹkedade sycamore oro ẹkesitọde ini oro ẹto Egypt.

Etie nte ndikịm fig esinam mmọn̄ odụk mmọ, ke ntem anamde mmọ ẹnyene ediwak mmọn̄. Emi esinam mmọ ẹsọp ẹdat n̄ko, onyụn̄ anam mmọ ẹkponi ẹnyụn̄ ẹnịn̄e. Ke adianade do, atat isibiatke mfri emi sia mmọ ẹsisọp ẹdat.

Kpa ye usụhọde itie Amos nte ekpemerọn̄ ye etịbi fig, enye ikefeheke mme asua esie. Utu ke oro, enye ama atan̄a ikpe oro Jehovah okobiomde Israel uko uko. Nso eti uwụtn̄kpọ ke enye ekenịm ntem ọnọ ikọt Abasi mfịn, emi anade ẹtan̄a etop emi mme owo mîmaha n̄ko!—Matthew 5:11, 12; 10:22.