Emem Utom Ndikot, Edi Ndi Enen?

KE September 2005, Ufọkabasi England ẹma ẹsọsọp ẹnyịme ẹsio The 100-Minute Bible. Sia ẹwetde enye ke usụn̄ oro ẹkemede ndida hour kiet ye minit 40 n̄kot, ẹda page 17 ẹwet ofụri se idude ke N̄wed Abasi Usem Hebrew ẹnyụn̄ ẹda page 33 ẹwet ofụri se idude ke N̄wed Abasi Usem Greek ke obufa edikabade emi, ke ntem, nte owo emi odụn̄ọrede edikabade emi ọdọhọde, ẹsio kpukpru “mbụk oro ẹsifekde owo ẹfep.” Edi akpanikọ ke enye emem utom ndikot, edi ndi enye enen?

Ata nditọ ukpepn̄kpọ Bible ẹyekụt ke ẹsio enyịn̄ Abasi, Jehovah, ẹfep ke edikabade emi ẹnyụn̄ ẹkụt ediwak n̄kpọ eken oro mînenke. (Psalm 83:18) Ke uwụtn̄kpọ, akpa ikpehe ọdọhọ ke Abasi “okobot enyọn̄ ye isọn̄ ke usen itiokiet.” Nte ededi, Genesis 1:1 ọdọhọ: “Ke editọn̄ọ Abasi okobot enyọn̄ ye isọn̄.” Ke oro ebede, akpasarade uwetn̄kpọ etịn̄ aban̄a mme n̄kpọ en̄wen oro Abasi akanamde ke isọn̄, emi akadade “usen” m̀mê iduọk ini itiokiet. Ekem, Genesis 2:4 etịn̄ ibio ibio aban̄a ofụri iduọk ini oro ẹkedade ẹbot n̄kpọ, ete ke edi “usen emi Jehovah Abasi anamde isọn̄ ye enyọn̄.”

The 100-Minute Bible ọdọhọ ke “Satan, kiet ke otu mme asan̄autom [Abasi], . . . emi utom esie ekedide ndidori ubonowo ikọ,” ama ọnọmọ Job emi ọkọsọn̄ọde ada. Ndi omokụt ntuaha oro odude ke ikọ emi? Ikọ oro “Satan” ọwọrọ “Andibiọn̄ọ.” Utu ke ndidi asan̄autom Abasi, Satan akam edi akwa asua Abasi emi emekde ke idemesie ndidori ubonowo ikọ.—Ediyarade 12:7-10.

Nso kaban̄a N̄wed Abasi Christian Usem Greek? Ke n̄ke erọn̄ ye ebot, obufa edikabade emi ọdọhọ ke Jesus ama mbon oro ẹn̄wamde “owo ekededi, inamke n̄kpọ m̀mê ekpri didie,” ke adan̄aemi Jesus ọkọdọhọde ke idiọn̄ mbon oro ẹfọnde ido ye mme anditiene imọ—oro edi “nditọete” imọ. (Matthew 25:40) Ediyarade oro ẹkabarede ibio ibio ọdọhọ ke “ẹyesobo Rome, kpa akwa Babylon ofụri ofụri.” Nte ededi, nditọ ukpepn̄kpọ Bible ẹdiọn̄ọ ke idụhe n̄kpọ ndomokiet ke akpasarade uwetn̄kpọ oro owụtde ke se “Akwa Babylon” edide edi oro.—Ediyarade 17:15–18:24.

Ana mbon oro ẹyomde ndifiọk Andibot ye uduak esie ẹkpep ofụri Bible. Edi akpanikọ ke ayada se ikande hour kiet ye minit 40 ndikot ofụri Bible, edi nti utịp ẹdu ke ndinam oro. (John 17:3) Afo akpakam enyịme ndida ini n̄kot ofụri Bible onyụn̄ ọbọ ediwak edidiọn̄.—2 Timothy 3:16, 17.