Ka Iso Wụt Esịtekọm
Ka Iso Wụt Esịtekọm
“O Abasi, mme ekikere fo ẹsọn̄ mi urua didie! Ibat mmọ okpon didie!”—PSALM 139:17, 18a.
1, 2. Ntak emi ikpowụtde esịtekọm iban̄a Ikọ Abasi, ndien didie ke andiwet psalm okowụt esịtekọm?
NSO adua-owo-idem ẹfiọhọ ke emi ekedi ntem! Nte ẹkesụk ẹdiọn̄de temple Jehovah ke Jerusalem, Hilkiah ọbọn̄ oku ama okụt “n̄wed ewụhọ Jehovah emi okotode Moses ke ubọk,” eyedi ata akpasarade esie oro ẹkewetde ẹkụre ke n̄kpọ nte isua 800 oro ẹkebede mbemiso ẹkefiọhọde enye. Afo ekere ke eketie Edidem Josiah, emi ekedide owo Abasi, didie ke idem ke ini ẹkemende n̄wed ibet emi ẹdinịm enye ke iso? Enye akada n̄wed emi nte ata ọsọn̄urua n̄kpọ onyụn̄ ọsọsọp ọdọhọ Shaphan ewetn̄wed, okot enye uyo ọwọrọ.—2 Chronicles 34:14-18.
2 Mfịn, ata ediwak owo ẹkeme ndikot Ikọ Abasi, edide ubak ubak, m̀mê ofụri ofụri. Edi ndi oro anam N̄wed Abasi akabade n̄kpọ mbubru? Baba! Kamse, enye ọdọn̄ọ mme ekikere Ata Ọkpọsọn̄ Abasi, oro ẹwetde ke ufọn nnyịn. (2 Timothy 3:16) Andiwet psalm ama etịn̄ nte imọ idade Ikọ Abasi ete: “O Abasi, mme ekikere fo ẹsọn̄ mi urua didie! Ibat mmọ okpon didie!”—Psalm 139:17, 18a.
3. Nso iwụt ke David ekedi ata owo Abasi?
3 David ama aka iso enyene esịtekọm ọnọ Jehovah, Ikọ Esie, ye ndutịm edisana utuakibuot Esie. Ediwak ndinem psalm oro David ekewetde ẹma ẹwụt nte eketiede enye ke idem. Ke uwụtn̄kpọ, enye ekewet ke Psalm 27:4 ete: “Mmeben̄e Jehovah n̄kpọ kiet, ndien nyoyom enye; nte ndụn̄ ke ufọk Jehovah ke ofụri uwem mi, man nse uyai Jehovah, nnyụn̄ ntịm mbụp ke temple esie.” Ikọ Hebrew oro ẹkabarede “nnyụn̄ ntịm mbụp” ọwọrọ nditie n̄kere n̄kpọ mbịghi, ndidụn̄ọde, ndiwụt esịtekọm, ndidara, ndima. Ke akpanikọ, David ekedi ata owo Abasi oro ekenen̄erede owụt esịtekọm aban̄a mme enọ eke spirit oro Jehovah ọkọnọde, onyụn̄ enen̄ede adat esịt ndida kpukpru ikọ akpanikọ oro Abasi ayararede ndu uwem. Akpana iwụt ukem esịtekọm oro enye okowụtde.—Psalm 19:7-11.
Wụt Esịtekọm Ban̄a Ifet Oro Enyenede Ndifiọk Akpanikọ Bible
4. Nso ikanam Jesus “okop idatesịt etieti ke edisana spirit”?
4 Idịghe ọkpọsọn̄ ifiọk owo m̀mê ifiọk n̄wed ererimbot oro esinamde owo atan̄ idem, ke ẹda ẹfiọk Ikọ Abasi. Edi akam edi mfọnido Jehovah oro owo mîdotke, emi enye ọnọde mbon nsụhọdeidem oro ẹnyenede esịt akpanikọ, kpa mbon oro ẹkerede ẹban̄a unana mmọ ke n̄kan̄ eke spirit. (Matthew 5:3; 1 John 5:20) Ke ini Jesus ekekerede aban̄a nte ẹwetde enyịn̄ ndusụk mme anana-mfọnmma owo ke heaven, “enye [ama] okop idatesịt etieti ke edisana spirit onyụn̄ ọdọhọ ete: ‘Mmotoro fi an̄wan̄wa, Ete, Ọbọn̄ enyọn̄ ye isọn̄, koro afo etịmde edịp mbon ọniọn̄ ye mbon ikike mme n̄kpọ emi, onyụn̄ ayarade mmọ ọnọ nditọwọn̄.’”—Luke 10:17-21.
5. Ntak emi mîkanaha mme mbet Jesus ẹda akpanikọ ye ifiọk Obio Ubọn̄ oro ẹkeyararede ẹnọ mmọ ke mbio?
5 Ke ama ọkọbọn̄ akam ofụri esịt oro okụre, Jesus ama ọwọn̄ọde ebịne mme mbet esie onyụn̄ ọdọhọ ete: “Inemesịt edi eke mmọ emi enyịn mmọ ẹkụtde mme n̄kpọ eke mbufo ẹkụtde. Koro ndọhọ mbufo nte, Ediwak mme prọfet ye ndidem ẹma ẹyom ndikụt mme n̄kpọ emi mbufo ẹkụtde edi ikekwe, ndinyụn̄ n̄kop mme n̄kpọ emi mbufo ẹkopde edi ikokopke.” Ih, Jesus ekesịn udọn̄ ọnọ mme anam-akpanikọ mbet esie ete ẹkûda ọsọn̄urua akpanikọ ye ifiọk Obio Ubọn̄ oro ẹkeyararede ẹnọ mmọ ke mbio. Owo ikayarakede akpanikọ emi inọ mme asan̄autom Abasi oro ẹkedude uwem mbemiso mmọ, owo ikonyụn̄ iyarakede inọ “mbon ọniọn̄ ye mbon ikike” oro ẹkedude ke eyo Jesus!—Luke 10:23, 24.
6, 7. (a) Ntak emi ikpowụtde esịtekọm iban̄a akpanikọ oro Abasi ayararede ọnọ nnyịn? (b) Nso ukpụhọde idu ke ufọt ido ukpono akpanikọ ye nsunsu ido ukpono?
6 Mfịn, nnyịn imakam inen̄ede inyene ekese ntak ndiwụt esịtekọm mban̄a akpanikọ oro Abasi ayararede ọnọ nnyịn, koro Jehovah adade “ofụn emi anamde akpanikọ onyụn̄ enyenede ọniọn̄” anam ikọt esie ẹnen̄ede ẹfiọk Ikọ esie. (Matthew 24:45; Daniel 12:10) Prọfet Daniel ekewet aban̄a utịt ini ete: “Ediwak owo ẹyeyọrọ ẹdi, ẹyọrọ ẹka, ndien ifiọk oyokpon aka iso.” (Daniel 12:4) Ndi afo unyịmeke ke ifiọk Abasi ‘okpon aka iso’ mfịn, ndien nte ke ikọt Jehovah ke ẹdia ẹyụhọ ke n̄kan̄ eke spirit?
7 Nnyịn imokụt ke adan̄aemi ikọt Abasi ẹnen̄erede ẹforo ke n̄kan̄ eke spirit, mme ido ukpono Akwa Babylon ẹdu ke ata ndutịme. Oro anam ediwak owo oro ẹkụtde edikpu m̀mê oro ẹkopde itekesịt ẹban̄a se ikade iso ke nsunsu ido ukpono ẹwọn̄ọde ẹdụk ido ukpono akpanikọ. Mmọ ẹdi mbon mbieterọn̄ oro “mîyomke nditiene [Akwa Babylon] mbuana ke mme idiọkn̄kpọ esie,” m̀mê “nditiene mbọ mme ufen esie.” Jehovah ye mme asan̄autom esie ẹkot kpukpru utọ mbon oro ẹte ẹdụk ẹdi esop ata mme Christian.—Ediyarade 18:2-4; 22:17.
Mbon Oro Ẹwụtde Esịtekọm Ẹbụn̄ọ Ẹtiene Abasi
8, 9. Didie ke Haggai 2:7 osu mfịn?
8 Jehovah ama ebem iso etịn̄ aban̄a se imọ idinamde ke ufọk utuakibuot eke spirit imọ ete: “Nyonyụn̄ nnyen̄e kpukpru mme idụt, ndien [“n̄kpọuto emi ẹtode kpukpru mme idụt,” NW] ẹyedi: ndien nyesịn ubọn̄ ke ufọk emi nyọhọ.” (Haggai 2:7) N̄wọrọnda ntịn̄nnịm ikọ emi ama osu ke eyo Haggai ke ini nsụhọ ikọt Abasi oro ẹkenyọn̄ọde ntan̄mfep ẹdi ẹkefiakde ẹbọp temple ke Jerusalem. Ikọ Haggai afiak osu ke akwa temple Jehovah eke spirit oro odude mfịn.
9 Ediwak miliọn owo ẹbọbụn̄ọ ẹdụk ndamban̄a temple emi man ẹkpono Abasi “ke spirit ye ke akpanikọ,” ndien kpukpru isua, ediwak tọsịn “n̄kpọuto emi ẹtode kpukpru mme idụt” ke ẹbụn̄ọ ẹdụk. (John 4:23, 24) Ke uwụtn̄kpọ, ibatutom ofụri ererimbot eke isua utom 2006 owụt ke owo 248,327 ẹkena baptism ndiwụt ke imayak idem inọ Jehovah. Oro owụt ke n̄kpọ nte mbufa owo 680 ẹkena baptism kpukpru usen! Ima oro mmọ ẹmade akpanikọ ye udọn̄ oro mmọ ẹnyenede ndinam n̄kpọ Jehovah nte mme anditan̄a Obio Ubọn̄ ẹwụt ke akpanikọ ke Abasi okodụri mmọ ọnọ idemesie.—John 6:44, 65.
10, 11. Nọ ifiọkutom oro owụtde nte mme owo ẹwụtde esịtekọm ẹban̄a akpanikọ Bible.
10 Ekese ke otu mbon oro ẹnyenede esịt akpanikọ mi ẹma akpanikọ sia mmọ ẹkekụtde “nte eti ye idiọk ẹsan̄ade isio, ye nte anam n̄kpọ Abasi ye owo eke mînamke n̄kpọ esie ẹsan̄ade isio.” (Malachi 3:18) Kere ban̄a ifiọkutom Wayne ye Virginia, n̄wan ye ebe emi ẹkesikade ufọkabasi Protestant, edi oro owo mîkọbọrọke ekese mbụme oro ẹkefịnade mmọ. Mmọ ẹma ẹsua ekọn̄ ẹnyụn̄ ẹkop editịmede esịt ye idiọkesịt ke ini mmọ ẹkekụtde ọkwọrọ ederi ọdiọn̄de mbonekọn̄ ye mme n̄kpọekọn̄. Nte ebe ye n̄wan emi ẹkekọride ẹsọn̄, mmọ ẹma ẹkụt ke ufọkabasi mmimọ ikọdọn̄ke mmimọ enyịn, okposụkedi oro Virginia ekesikpepde ederi nditọwọn̄ ke ediwak isua. Mmọ ẹkedọhọ ẹte: “Owo baba kiet ikedịghe idise nnyịn, ikonyụn̄ idọn̄ke enyịn m̀mê n̄kpọ eketie didie ye nnyịn ke n̄kan̄ eke spirit. N̄kukụre se ufọkabasi ẹkeyomde ẹto nnyịn ekedi okụk nnyịn.” Esịt ama ọdiọk mmọ etieti. Esịt ama etetịm ọdiọk mmọ ke ini ufọkabasi mîkekwe se idiọkde ye idan̄ ukemuduot.
11 Ini oro, adiaha adiaha mmọ ama akabade edi kiet ke otu Mme Ntiense Jehovah, ekem adiaha mmọ ama adiana. Okposụkedi Wayne ye Virginia mîkenemke esịt iban̄a emi, nte ini akakade, mmọ ẹma ẹkpụhọde ekikere ẹnyụn̄ ẹnyịme ẹkpep mmimọ Bible. Wayne ọdọhọ ete: “Se ikedide idifiọk ke Bible ke n̄kpasịp ọfiọn̄ ita kpọt ama akan se ikọfiọkde ke ofụri isua 70 oro ẹkebede! Nnyịn ikọfiọkke ke enyịn̄ Abasi edi Jehovah, m̀mê ndifiọk n̄kpọ ndomokiet mban̄a Obio Ubọn̄ ye Paradise isọn̄.” Ikebịghike, ebe ye n̄wan oro ẹnyenede esịt akpanikọ mi ẹma ẹtọn̄ọ ndidụk mme mbono esop Christian ẹnyụn̄ ẹtọn̄ọ ndibuana ke an̄wautom. Virginia ọdọhọ ete: “Nnyịn iyom kpukpru owo ẹfiọk akpanikọ.” Mmọ mbiba, emi ẹdude ke iduọk isua 80, ẹma ẹna baptism ke 2005. Mmọ ẹdọhọ ẹte: “Nnyịn imedikụt ata mme Christian oro ẹkerede ẹban̄a nnyịn.”
Wụt Esịtekọm Ban̄a nte ‘Ẹben̄ede Fi Idem Ndinam Eti Utom Ekededi’
12. Nso ke Jehovah esinam kpukpru ini ọnọ mme asan̄autom esie, ndien nso ke inyene ndinam man ibọ ufọn ito oro?
12 Jehovah esin̄wam mme asan̄autom esie kpukpru ini ndinam uduak esie. Ke uwụtn̄kpọ, Abasi ama eteme Noah nnennen nnennen nte edikọn̄de ubom—kpa utom oro ẹkenyenede ndinam nnennen nnennen ke akpa ubọk! Noah ama onyụn̄ anam ọfọn. Ntak-a? Koro enye akanamde “kpukpru se Abasi eketemede enye, ntem ke enye anam.” (Genesis 6:14-22) Jehovah enen̄ede eben̄e mme asan̄autom esie idem mfịn n̄ko ndinam uduak esie. Edi akpanikọ, akpan utom nnyịn edi ndikwọrọ eti mbụk Obio Ubọn̄ Abasi oro ama ọkọtọn̄ọ ndikara ke heaven nnyụn̄ n̄n̄wam mbon oro ẹdotde ẹkabade ẹdi mme mbet Jesus Christ. Kpa nte ekedide ye Noah, ana ikop item edieke anade ikụt unen. Ana inen̄ede itiene ndausụn̄ oro Jehovah adade Ikọ ye esop esie ọnọ.—Matthew 24:14; 28:19, 20.
13. Nso ke Jehovah ada ekpep nnyịn n̄kpọ?
13 Man ikeme ndinam utom emi mma, ana ikpep ‘nditịm n̄kama’ akpan n̄kpọutom nnyịn—kpa Ikọ Abasi—emi ọfọnde “ndida nnọ ukpep, nsua nnọ owo, nnen̄ede mme n̄kpọ, nnọ ntụnọ ke edinen ido, man owo Abasi etịm odot, eben̄e idem ọyọhọ ọyọhọ ndinam eti utom ekededi.” (2 Timothy 2:15; 3:16, 17) Kpa nte ekedide ke akpa isua ikie, Jehovah ada esop Christian ekpep nnyịn nti n̄kpọ. Mfịn, Ufọkn̄wed Utom Ukara Abasi ye Esoputom oro ẹsinịmde kpukpru urua ke esop 99,770 oro ẹdude ke ofụri ererimbot, ẹsin̄wam nnyịn ke utom ukwọrọikọ nnyịn. Ndi omowụt esịtekọm aban̄a mme akpan mbono esop emi ke ndisidụk mmọ kpukpru ini nnyụn̄ nda se ekpepde nsịn ke edinam?—Mme Hebrew 10:24, 25.
14. Didie ke mme asan̄autom Jehovah ẹwụt esịtekọm ẹban̄a ifetutom oro mmọ ẹnyenede ndinam n̄kpọ Abasi? (Sịn se idude ke chart oro odude ke page 27 esịm 30.)
14 Ediwak miliọn ikọt Abasi ke ofụri ererimbot ẹwụt esịtekọm ẹban̄a se ẹkpepde mmọ ke ndisịn idem ke utom ukwọrọikọ. Ke uwụtn̄kpọ, ke isua utom 2006, mme anditan̄a Obio Ubọn̄ 6,741,444 ẹma ẹbiat hour 1,333,966,199 ẹkwọrọ ikọ ke nsio nsio usụn̄, ndien emi esịne ini oro ẹkedade ẹnịm ukpepn̄kpọ Bible 6,286,618. Emi edi ndusụk n̄kpọ oro ẹdude ke akama-nsịnudọn̄ ibatutom ofụri ererimbot oro. Nnyịn imesịn udọn̄ inọ fi ite enen̄ede odụn̄ọde ibatutom emi onyụn̄ ada enye ọdọn̄ idem fo esịt, kpa nte mbụk ibatutom oro okowụtde nte ẹketatde utom ukwọrọikọ ke akpa isua ikie ọkọnọde nditọete nnyịn eke akpa isua ikie nsịnudọn̄.—Utom 1:15; 2:5-11, 41, 47; 4:4; 6:7.
15. Ntak emi owo ndomokiet mîkpokopke mmemidem iban̄a utom ofụri ukpọn̄ oro enye anamde ọnọ Jehovah?
15 Akaka itoro oro ọdọkde heaven ebịne Jehovah kpukpru isua owụt nte esịtekọm oro mme asan̄autom esie ẹnyenede okponde, kaban̄a Jehovah ndinọ mmimọ ifet ndidifiọk imọ nnyụn̄ ndi Mme Ntiense esie. (Isaiah 43:10) Edi akpanikọ ke ẹkeme ndidọhọ ke uwa ekọm oro ndusụk nditọete nnyịn iren ye iban oro ẹma ẹkesọn̄, ẹdọn̄ọde, m̀mê ẹbiomode ndo ẹwade ẹnọ Abasi, etie nte n̄kpri okudọk oro ubuene ebeakpa oro eketịpde. Edi ẹyak ikûfre ke Jehovah ye Eyen esie ẹsinen̄ede ẹwụt esịtekọm ẹnọ kpukpru mbon oro ẹnamde n̄kpọ Abasi ke ofụri ukpọn̄, nte mmọ ẹsịnde idem ẹnam ofụri se mmọ ẹkekeme.—Luke 21:1-4; Galatia 6:4.
16. Nso n̄kpọ un̄wam ukpepn̄kpọ ke Abasi ọnọ nnyịn ke mme iduọk isua ndondo emi?
16 Ke adianade ye ndikpep nnyịn nte ikpọkwọrọde ikọ, Jehovah ada esop esie ọnọ nnyịn ata nti n̄kpọ un̄wam ukpepn̄kpọ. Ke mme iduọk isua ndondo emi, mme n̄kpọ un̄wam ukpepn̄kpọ emi ẹsịne Akpanikö oro Adade osim Nsinsi Uwem, Afo Emekeme Ndidu Uwem ke Nsinsi ke Paradise ke Isọn̄, Ifiọk Oro Adade Osịm Nsinsi Uwem, ye Nso ke Bible Enen̄ede Ekpep? oro ẹsụk ẹsiode n̄kpọn̄ n̄kpọn̄ emi. Mbon oro ẹnen̄erede ẹwụt esịtekọm ẹban̄a nti enọ emi ẹda mmọ ẹnam n̄kpọ edifọn edifọn ke an̄wautom.
Da N̄wed Bible Ekpep Nam N̄kpọ Edifọn Edifọn
17, 18. (a) Ewe ikpehe n̄wed Bible Ekpep ke afo ama ndida n̄kwọrọ ikọ? (b) Nso ke esenyịn circuit kiet etịn̄ aban̄a n̄wed Bible Ekpep?
17 Ofụri ibuot 19 oro ẹdude ke n̄wed Nso ke Bible Enen̄ede Ekpep? ọkọrọ ye se ẹwetde ẹdian, oro enemede n̄kpọ ntotụn̄ọ ntotụn̄ọ, ye ata mmemmem ye in̄wan̄-in̄wan̄ usụn̄ oro ẹwetde n̄wed emi, anam enye enen̄ede ọfọn ke an̄wautom. Ke uwụtn̄kpọ, ibuot 12 eneme ibuotikọ emi, “Ndidu Uwem Oro Enemde Abasi Esịt.” Ibuotikọ emi anam eyen ukpepn̄kpọ ọfiọk nte enye ekemede ndidi ufan Abasi, kpa n̄kpọ emi ediwak owo mîkam ikereke-kere ke ekeme nditịbe. (James 2:23) Nso ke mme owo ẹtịn̄ ẹban̄a n̄wed un̄wam ukpep Bible emi?
18 Esenyịn circuit kiet ke Australia ọdọhọ ke n̄wed Bible Ekpep “esisọp edemerede mme owo udọn̄, onyụn̄ anam enyeneufọk etiene abuana ke nneme.” Enye ama adian do ete ke n̄wed emi enen̄ede emem utom ndida n̄kwọrọ ikọ tutu “anam ediwak mme asuanetop Obio Ubọn̄ ẹfiak ẹnyene uko ye idatesịt ke utom ukwọrọikọ. Eyịghe idụhe emi ndusụk owo ẹkotde enye utouto n̄kpọuto!”
19-21. Bụk mme ifiọkutom oro ẹwụtde ufọn n̄wed Bible Ekpep.
19 N̄wan kiet ke Guyana ọkọdọhọ asiakusụn̄ oro akakade ufọk esie ete: “Abasi ada fi edi.” Ibịghike ebe esie ọkọkpọn̄ enye ye n̄kpri nditọ iba. Asiakusụn̄ oro ama okụbọde akpa ibuot ke n̄wed Bible Ekpep onyụn̄ okot ikpehe ekikere 11 uyo ọwọrọ, ke ekpri ibuotikọ oro ọdọhọde, “Abasi Ese Didie Ukwan̄ikpe Oro Isobode?” Asiakusụn̄ oro ọdọhọ ete: “Itie oro ama enen̄ede otụk mma emi. Ke nditịm ntịn̄, enye ama adaha akada ke edem ufọkurua esie enen̄ede atua eyet.” Mma emi enyịme eyenete an̄wan ke n̄kann̄kụk oro esidi edikpep imọ Bible kpukpru ini, ndien enye ke anam n̄kọri.
20 José emi odụn̄de ke Spain ama ataba n̄wan esie ke mbabuat unọmọ ubomisọn̄. Enye ama ada n̄kpọsọn̄ ibọk onyụn̄ oyom un̄wam oto abiausọbọ ekikere man ekikere ana enye sụn̄-n̄. Nte ededi, abiausọbọ emi ikekemeke ndibọrọ mbụme oro ekenen̄erede afịna José, oro edi “Ntak emi Abasi akayakde n̄wan mi akpa?” Usen kiet, José ama osobo ye Francesc, nsan̄autom esie. Francesc ama ọdọhọ yak mmimọ ineme ibuot 11 ke n̄wed Bible Ekpep, emi ibuotikọ edide, “Ntak Emi Abasi Ayakde Ndutụhọ Odu-o?” Nte N̄wed Abasi ọbọrọde mbụme emi, ọkọrọ ye uwụtn̄kpọ oro ẹnọde ke n̄wed oro ẹban̄a andikpep ye eyen ufọkn̄wed ẹma ẹnen̄ede ẹtụk José. Enye ama enen̄ede ọtọn̄ọ ndisịn ifịk n̄kpep n̄kpọ, onyụn̄ odụk mbono circuit, ndien idahaemi, enye esidụk mme mbono esop ke Ufọkmbono Obio Ubọn̄.
21 Roman, kpa anam mbubehe ke Poland emi edide isua 40 esikpono Ikọ Abasi. Utom esie ikayakke enye etịm anam n̄kọri ke ukpepn̄kpọ Bible. Nte ededi, enye ama odụk mbono district onyụn̄ ọbọ n̄wed Bible Ekpep. Ke ama ọkọbọ n̄wed emi, enye ama enen̄ede anam ukpụhọde. Enye ọdọhọ ete: “N̄wed emi anam ẹfiọk kpukpru mme akpan ukpepn̄kpọ Bible.” Roman ekpep Bible kpukpru ini idahaemi, ke onyụn̄ enen̄ede anam n̄kọri.
Ka Iso Wụt Esịtekọm
22, 23. Didie ke ikeme ndika iso n̄wụt esịtekọm mban̄a idotenyịn oro ẹnọde nnyịn?
22 Nte ẹketịn̄de ke aduai-owo-idem Mbono District “Edinyan̄a Emekpere!,” ata mme Christian ẹtetie ẹbet “nsinsi edinyan̄a” oro Abasi ọkọn̄wọn̄ode, emi iyịp Jesus Christ oro ẹkeduọkde edinamde ẹnyene. Idụhe usụn̄ efen oro ikpadade iwụt ata esịtekọm oro inyenede iban̄a ọsọn̄urua idotenyịn emi ẹnọde nnyịn mi akan ndika iso nnam idem nnyịn asana “ọbọhọ mme utom n̄kpa man nnyịn ikpanam edisana utom inọ odu-uwem Abasi.”—Mme Hebrew 9:12, 14.
23 Ke akpanikọ, enen̄ede edi utịben̄kpọ ndikụt se iwakde ibe mme anditan̄a Obio Ubọn̄ miliọn itiokiet ẹsọn̄ọde ẹda ẹnam n̄kpọ Abasi ke adan̄aemi mme amaidem ẹyọhọde ererimbot mfịn. Emi owụt n̄ko ke mme asan̄autom Jehovah ẹnen̄ede ẹwụt esịtekọm ẹban̄a ukpono oro Abasi ọnọde mmimọ ndinam n̄kpọ esie, ẹfiọkde ke utom mmimọ “idịghe ikpîkpu ke ebuana ye Ọbọn̄.” Nnyịn ikpakam ika iso iwụt orụk esịtekọm emi!—1 Corinth 15:58; Psalm 110:3.
Didie ke Afo Ọkpọbọrọ?
• Nso ke andiwet psalm ekpep nnyịn aban̄a ediwụt esịtekọm nnọ Abasi ye kaban̄a mme enọ esie eke spirit?
• Didie ke ikọ Haggai 2:7 osu mfịn?
• Didie ke Jehovah eben̄e mme asan̄autom esie idem ndinam n̄kpọ esie edifọn edifọn?
• Nso ke akpanam man owụt esịtekọm oro enyenede aban̄a mfọnido Jehovah?
[Mme Mbụme Ukpepn̄kpọ]
[Chart ke page 27-30]
IBATUTOM ISUA UTOM 2006 EKE MME NTIENSE JEHOVAH KE OFỤRI ERERIMBOT
(Se magazine)
[Ndise ke page 25]
Jehovah enen̄ede eben̄e nnyịn idem ndinam uduak esie