Mme Mbụme Ẹtode Mme Andikot

Nso idi “ekọn̄ . . Abasi Ata Ọkpọsọn̄” ke Har–Magedon, ndien nso ididi utịt esie?—Ediyarade 16:14, 16.

Ke nditịn̄ ibio ibio, ekọn̄ Har–Magedon edi ekọn̄ oro ẹdin̄wanade ke ofụri ekondo, emi Jesus Christ, kpa edidem oro Jehovah emekde, edisobode mme asua Abasi. Bible ọdọhọ ke “spirit mme demon emi ẹnamde mme idiọn̄ọ” ẹyesịn nsọk ẹnọ ẹnyụn̄ ẹtan̄ mme asua Abasi emi, oro edi “ndidem ofụri isọn̄,” ẹbok ọtọkiet ẹnọ “ekọn̄ akwa usen Abasi Ata Ọkpọsọn̄ . . . ke ebiet emi ẹkotde ke usem Hebrew, Har-magedon.”—Ediyarade 16:14, 16.

Ebiet oro ẹdin̄wanade ekọn̄ emi idịghe ata ebiet. Enyịn̄ oro Har-magedon ọwọrọ “Obot Megiddo.” (Ediyarade 16:16) Idụhe obot oro ẹkotde Megiddo. N̄ko-n̄ko, idụhe ebiet oro ekpekemde “ndidem isọn̄ ye udịmekọn̄ mmọ” ndisop idem ọtọkiet. (Ediyarade 19:19) Utu ke oro, “ebiet emi” ada aban̄a nte mme andikara ererimbot ye ikọt mmọ ẹdin̄wanade ye Jehovah ye “udịmekọn̄ oro ẹdude ke heaven,” emi “Edidem ndidem ye Ọbọn̄ mbọn̄,” kpa Jesus Christ, adade usụn̄.—Ediyarade 19:14, 16.

Edi akpan n̄kpọ ndifiọk ke ikọ oro “Har–Magedon” enyene n̄kpọ ndinam ye obio Megiddo Israel eset. Sia Megiddo okodude ke ata eti itie ke Edem Usiahautịn Obot Carmel, enye ekedi ebiet oro mme anyamurua ye mbonekọn̄ ẹkesiwakde ndisan̄a mbe. Enye n̄ko ekedi ebiet oro ẹkesin̄wanade ekọn̄ oro akanamde ẹfiọk mbon oro ẹnyenede odudu ẹkan. Ke uwụtn̄kpọ, “ke mben mmọn̄ Megiddo” ke Barak ebiereikpe Israel akakan akwa udịmekọn̄ Canaan emi Etubom Sisera akadade usụn̄. (Judges 4:12-24; 5:19, 20) Kpa ke mbọhọ oro ke Gideon ebiereikpe Israel akakan udịmekọn̄ mbon Midian ndien mmọ ẹtịbi itọk. (Judges 7:1-22) Bible ndida Megiddo n̄kabuan ye ekọn̄ Abasi oro edin̄wanade ọsọn̄ọ owụt ke Abasi ayada Eyen esie akan kpukpru udịmekọn̄ oro ẹdin̄wanade ye Enye.

Nso ididi utịt ekọn̄ oro? Ekọn̄ Har-magedon oyosio se idiọkde efep ke ererimbot ofụri ofụri. Enye ayada ata eti idaha oro akanam mîdụhe tọn̄ọ ẹkebot owo, edi. (Ediyarade 21:1-4) Obio Ubọn̄ Abasi ayanam isọn̄ akabade edi Paradise oro nti owo ẹdidụn̄de ke nsinsi.—Psalm 37:29.