Ndi Isiyom Mbon En̄wen Kpọt Ẹnam m̀mê Ẹtịn̄ Akpanikọ?

EYENAN̄WAN isua 16 ọkọdọhọ ete: “Mmaha nsu, nsinyụn̄ mmaha ẹsu nsu ẹnọ mi!” Ediwak nnyịn n̄ko isimaha. Nnyịn isima etop oro ibọde—edide ẹtetịn̄ m̀mê ẹwewet—edi akpanikọ. Edi, nte nnyịn imesitịn̄ akpanikọ inọ mbon en̄wen?

Ke ndụn̄ọde oro ẹkenamde ke Germany, ata ediwak owo ẹkedọhọ “ke idiọkke ndisu nsu ke n̄kpri n̄kpọ nda nnyan̄a idem m̀mê mbon en̄wen. Ke nditịm ntịn̄, esikam oyom ẹsu nsu mbak ẹdinyene mfịna ye owo.” Ọkọmbụk n̄kpọntịbe kiet ekewet ete: “Ọfọn ndisitịn̄ akpanikọ kpukpru ini, edi akpanikọ isiyakke owo ọbọ emem.”

Ndi ekeme ndidi imesiyom mbon efen ẹtịn̄ akpanikọ edi ndusụk ini ikere ke nnyịn ke idem nnyịn imenyene eti ntak nditre nditịn̄ akpanikọ? Ndi ọfọn nditịn̄ m̀mê nditre nditịn̄ akpanikọ? Nso idi mme utịp abian̄a?

Ndiọi Utịp Abian̄a

Kere ban̄a ndiọi utịp abian̄a. Nsu isiyakke nsan̄a ndọ ye mbonubon ẹnịm kiet eken ke akpanikọ. Edidọk ekeme ndibiat owo enyịn̄. N̄wo mbonutom esinam n̄kpọ enen̄ede ọsọn̄ urua. Nditre ndiwet nnennen n̄kpọ ke n̄wed tax isiyakke ukara enyene okụk oro ẹkpedade ẹnam utom obio. Nsu oro mme anam-ndụn̄ọde ẹsisude esibiat eti ubọkọkọ mmọ ye enyịn̄ itieutom mmọ. Mme abian̄a abian̄a ndutịm unyene inyene usọp usọp ẹsinam mme anam-mbubehe oro ẹsisọpde ẹnịm kpukpru n̄kpọ ke akpanikọ ẹtaba inyene ofụri eyouwem mmọ m̀mê ẹkam ẹsobo se idiọkde ikan oro. Eyịghe idụhe Bible abatde “edeme nsu” ye “owo eke oyokde nyok, nte ntiense nsu” esịn ke otu mme n̄kpọ oro Jehovah Abasi esede ke mbubiam!—Mme N̄ke 6:16-19.

Nsu oro ẹkade iso ndisuan ekeme ndibiat enyịn̄ owo m̀mê eke ofụri obio. Iwakke-wak mbon oro ẹdifan̄ade emi. Do, ntak emi mme owo ẹsikoide-koi ẹbian̄a abian̄a? Edi ndi kpukpru abian̄a ẹdi nsu? Iyeneme ibọrọ mbụme emi ye mme mbụme en̄wen ke ibuotikọ oro etienede.

[Ndise ke page 3]

Nsu isiyakke nsan̄a ndọ ẹnịm kiet eken ke akpanikọ