Mbụk Eyouwem

Ntak Emi N̄kopde Idatesịt Ndinam Mbet

Nte Pamela Moseley obụkde

Ekọn̄ ke akan̄wana ke England ke 1941 ke ini eka mi akadade mi aka mbono Mme Ntiense Jehovah ke obio Leicester. Brọda Joseph Rutherford ama ọnọ san̄asan̄a utịn̄ikọ aban̄a nditọwọn̄. Ke ini ami ye Mama ikanade baptism ke mbono oro, mma n̄kụt ke mbon oro ẹken̄wamde nnyịn inam n̄kọri eke spirit ẹma ẹnen̄ede ẹkop inemesịt. Ini oro n̄kọfiọkke adan̄a idatesịt oro owo esinyenede ke ndinam mbet Jesus Christ.

KE 1940 ke nnyịn ikọtọn̄ọ ndinam n̄kọri oro akadade ekesịm edikabade ndi mme mbet. Nsụk nteti enyene-ndịk usen oro ke September 1939 ke ini udiana ekọn̄ ererimbot akasiahade. Mma n̄kụt mmọn̄eyet ewetde osụhọde Mama ke mfụk ke adan̄aemi enye akakade iso ndibụp ete, “Ntak emi ererimbot mîkemeke ndinyene emem?” Ete ye eka mi ẹma ẹnam utom ekọn̄ ke ini akpa ekọn̄ ererimbot ẹnyụn̄ ẹkụt ọkpọsọn̄ ndịk oro asan̄ade ye ekọn̄. Mama ama aka okobụp ọkwọrọikọ Anglican ke obio Bristol mbụme emi. N̄kukụre se enye ọkọdọhọde ekedi: “Ekọn̄ ododu kpukpru ini, oyonyụn̄ aka iso ndidu kpukpru ini.”

Edi esisịt ini ke oro ebede, akanian̄wan kiet ama edi edem nnyịn. Enye ekedi kiet ke otu Mme Ntiense Jehovah. Mama ama obụp enye mbụme oro: “Ntak emi ererimbot mîkemeke ndinyene emem?” Ntiense oro ama ọdọhọ ke ekọn̄ ẹdi ubak idiọn̄ọ oro owụtde ke nnyịn idu ke utịt afai afai editịm n̄kpọ emi. (Matthew 24:3-14) Ikebịghike eyenan̄wan esie ama ọtọn̄ọ ndisikpep Bible ye nnyịn. Mmọ mbiba ẹma ẹsịne ke otu mbon oro ẹkekopde inemesịt ke  ini nnyịn ikanade baptism. Ntak emi ndinam mbet esinamde mme owo ẹkop inemesịt ntre? Nte ini akakade mma ndifiọk ntak. Yak nsian fi ndusụk ntak oro n̄kụtde ke se ibede isua 65 oro nnamde mbet.

Ndifiọk Idatesịt Edikpep Owo N̄kpọ

N̄kọtọn̄ọ nditiene n̄kwọrọ Obio Ubọn̄ ke obio Bristol ke ini n̄kedide isua 11. Eyenete kiet ama ọnọ mi ukwak ubre usanikwọ ye kad ikọ ntiense onyụn̄ ọdọhọ ete: “Afo enyene kpukpru ufọk ke ubọk n̄kan̄ oko ke efak emi.” Ntre mma ntọn̄ọ, ami ikpọn̄. Edi akpanikọ ke idem ama enyek mi. Mma nsibre utịn̄ikọ a-Bible oro ẹkemụmde ẹsịn ke usanikwọ oro ndien ekem n̄wụt enyeneufọk kad ikọ ntiense, emi ekesidọhọde enyeneufọk ọbọ n̄wed.

Ọtọn̄ọde ke mme iduọk isua 1950, ẹma ẹsọn̄ọ ẹtịn̄ ẹte isikot Bible ke ini inamde utom ukwọrọikọ ke ufọk ke ufọk. Ke ntọn̄ọ ntọn̄ọ, bụt ikayakke n̄keme ndinyene nneme ye isenowo nnyụn̄ nnam mme itien̄wed Bible an̄wan̄a mmọ. Edi nte ini akakade mma n̄kan mfịna emi. Ini oro ke n̄kọtọn̄ọ ndinen̄ede n̄kop inem utom ukwọrọikọ. Ndusụk owo ẹkesise nnyịn nte mme anyam-n̄wed, edi ke ini ikokotde inyụn̄ itatde mme itien̄wed Bible inọ mmọ, mmọ ẹma ẹdifiọk ke nnyịn idi mme andikpep Ikọ Abasi. Emi ama enen̄ede enem mi tutu nyom ndinen̄ede nnam ekese. Ntre, ke September 1955, mma ndụk utom ukwọrọikọ uyọhọ ini emi ẹkotde usiakusụn̄.

Ime Ada Mme Edidiọn̄ Edi

Kiet ke otu akpa n̄kpọ oro n̄kekpepde edi ke ndime ime ke eti usụn̄ ada mme edidiọn̄ edi. Isan̄ kiet, mma nnọ mma kiet emi ekekerede Violet Morice Enyọn̄-Ukpeme. Ke ini n̄kafiakde n̄ka ndise enye, enye ama eberede usụn̄ enịm in̄wan̄, awan̄ ubọk, onyụn̄ enen̄ede akpan̄ utọn̄ ke ini n̄kanamde N̄wed Abasi an̄wan̄a enye. Ini ekededi oro n̄kakade n̄kese enye, eketie nte enye ama enen̄ede enyene udọn̄. Edi ke ini n̄kobụpde m̀mê enye ayama ndisikpep Bible kpukpru ini, ibọrọ esie ekedi: “Baba. Nditọ mi ẹma ẹkponi, nyekpep.” Ama abiak mi-e! Bible ọdọhọ ke enyene “ini eke ẹyomde, ye ini eke ẹsopde.” (Ecclesiastes 3:6) Mma mbiere ke ndikpaha mba.

Ke ọfiọn̄ kiet ama ekebe, mma mfiak n̄ka n̄keneme mme itie N̄wed Abasi efen efen ye enye. Ikebịghike mma nsida ke enyịnusụn̄ esie n̄kpep Bible ye enye kpukpru urua. Ke akpatre, enye ama ọdọhọ ete: “Dụk nan̄a di esịtufọk!” Ih, enye ama akabade edi eyenete ye ata akpan ufan mi! Enye ama ana baptism nte kiet ke otu Mme Ntiense Jehovah.

Usen kiet idem ama akpa Violet ndifiọk ke ebe imọ ama anyam ufọk mmimọ onyụn̄ ọwọrọ ọkpọn̄ imọ. Edi n̄kpọ inemesịt nditịn̄ ke eyenete kiet ama an̄wam enye enyene ufọk en̄wen kpasụk usen oro. Man owụt esịtekọm ọnọ Jehovah, enye ama ebiere ndida ofụri uwem esie nnam utom nte asiakusụn̄. Ke ini n̄kokụtde nte spirit Jehovah anamde enye enyene ifịk kaban̄a utuakibuot akpanikọ, mma ndikụt ntak emi edinam mme mbet esinamde owo enen̄ede okop inemesịt. Ih, emi edidi ubọkọkọ mi!

Ke 1957, ẹma ẹnọ mi ye Mary Robinson ikanam utom nte mme asiakusụn̄ ke ikpehe oro ẹsibọpde usiakifia ke Rutherglen, emi odude ke Glasgow ke Scotland. Nnyịn ima isikwọrọ ikọ ke kpukpru idaha eyo, edi ama odot ndinam ntre. Usen kiet, mma nsobo n̄wan emi ekerede Jessie. Ama enem mi ndikpep Bible ye enye. Wally ebe esie ekedi owo Communist, ndien enye ekesifefep mi ke akpa. Edi ama enem enye etieti ke ini enye ekekpepde Bible onyụn̄ ọfiọkde ke Obio Ubọn̄ Abasi kpọt edinam n̄kpọ ọfọn ke isọn̄. Nte  ini akakade, mmọ mbiba ẹma ẹkabade ẹdi mme anam mbet.

Nte Owo Anamde N̄kpọ ke Akpa Ini Ekeme Ndibian̄a Owo

Ekem ẹma ẹnọ nnyịn ikanam utom ke Paisley ke Scotland. Usen kiet, ke ini n̄kọkwọrọde ikọ do, n̄wan kiet ama ayat esịt eberi usụn̄ abaha mi ke an̄wa. Edi ikebịghike, enye akasasan̄a oyom mi ndikpe ubọk. Ke ini n̄kafiakde ndi ke urua oro eketienede, enye ama ọdọhọ ete: “Eketie mi nte n̄kpọ eke n̄kayatde esịt mberi usụn̄ mbaha Abasi ke an̄wa. N̄kasasan̄a nyom fi.” Enye ekekere Pearl. Enye ọkọdọhọ ke imọ ikokopke inemesịt ndomo esisịt iban̄a mme ufan ye iman imọ, tutu anam imọ ibọn̄ akam inọ Abasi iyom ata ufan. Ndien enye ama ọdọhọ ete: “Ekem afo ama ọkọn̄ usụn̄ ufọk mi. Mmọfiọk ke emi ke anaedi afo edi ata ufan oro.”

Ikememke utom ndinam ufan ye Pearl. Ufọk esie okodoro ke edikon̄ obot, ndien n̄kesisan̄a ke ukot ndọk. Ofụm ye edịm ẹkpekeberi mi ẹduọk akpa ini oro n̄kakade ndida enye n̄ka mbono esop. Mma ntop ufụkeyo mi nduọk ke ini akawahade. Ke ọfiọn̄ itiokiet kpọt ẹbede tọn̄ọ Pearl ekeberi usụn̄ abaha mi, enye ama ayarade uyakidem esie ke baptism mmọn̄.

Esisịt ini ke oro ebede, ebe esie ama ebiere ndikpep Bible, ndien ikebịghike, enye ama etiene mi aka utom ukwọrọikọ eke ufọk ke ufọk. Edịm ama edep nte ido edide. Enye ama ọdọhọ ete: “Kûfịna idemfo. Mmesida ke ukem edịm emi ke ediwak hour nse mbre bọl, ntre mmekeme ndida ke edịm n̄ko ke ntak Jehovah.” Mmesima ifịk mbon Scotland etieti.

Enem mi esịt didie ntem ndifiak n̄ka do ke ediwak isua ẹma ẹkebe nnyụn̄ n̄kokụt ke ata ediwak ke otu mbon oro n̄kekpepde n̄kpọ ke ẹsụk ẹsọsọn̄ọ ẹda ke mbuọtidem! Idatesịt edinam mme mbet edi oro. (1 Thessalonica 2:17-20) Ke 1966, ke mma n̄kanam utom nte asiakusụn̄ ke se ibede isua itiaita ke Scotland, ẹma ẹkot mi ndidụk Ufọkn̄wed Enyọn̄-Ukpeme Ukpep Bible eke Gilead man mbọ ukpep nte isụn̄utom.

Ke Efakutom Esenidụt

Ẹkenọ mi n̄ka Bolivia, ke ufiop ufiop obio Santa Cruz, emi ekenyenede esop emi owo 50 ẹkedude. Obio emi ama anam mi nti nte ẹsiwụtde Edem Usoputịn United States ke vidio mbon United States. Mma nsifiak ntie n̄kere ini edem, esitie mi nte ndi isụn̄utom emi mîbọhọ ufen. Akananam fiom ifịnake mi, mbon ntịme itịmke mi, nsopke ke desat, m̀mê ubom mi ndisịp ke ufọt akpa. Kpa ye oro, ndinam mbet esidat mi esịt etieti.

Akpa ke otu iban oro n̄kekpepde Bible ke Santa Cruz ekekere Antonia. Ndikpep owo n̄kpọ ke usem Spanish ekedi en̄wan. Ini kiet, ekpri eyeneren Antonia ama obụp ete: “Mama, ndi enye esikokoi edue man anam nnyịn isak?” Antonia ye eyen esie an̄wan emi ekerede Yolanda ẹma ẹkabade ẹdi mme mbet. Yolanda ama enyene ufan emi enyịn̄ akparawa esie ekedide Dito, emi ọkọbọde ukpep ibet ke ufọkn̄wed ntaifiọk; enye n̄ko ama ọtọn̄ọ ndikpep Bible esinyụn̄ odụk mme mbono esop. Ndisan̄a ye enye ama an̄wam mi n̄kpep usụn̄ en̄wen oro ẹkpekpepde owo akpanikọ Bible: Oro edi ke ndusụk ini esiyom ẹnụk owo esisịt.

Ke ini Dito ọkọtọn̄ọde ndisitre ndikpep Bible, mma ndọhọ enye nte: “Dito, Jehovah inyịkke-nyịk fi ada ọnọ Obio Ubọn̄ esie. Afo enyene ndimek ke idemfo.” Ke ini enye ọkọdọhọde ke imọ iyom ndinam n̄kpọ Abasi, mma nsian enye nte: “Ndise adaiso n̄ka unam ukpụhọde ẹdi emi. Edieke owo okụtde ndise emi, ndi enye ekeme ndidọhọ ke afo ada ọnọ Obio Ubọn̄ Abasi?” Oro ekedi ndinụk enye esisịt.

Urua iba ke oro ebede, edinam ukpụhọde ama ada itie, ndien nditọ ufọkn̄wed ntaifiọk ẹma ẹda ikan̄ ẹn̄wana ye mme bodisi. Dito ama ofiori ufan esie ete: “Yak ifehe iyọn̄!” Ufan esie ama ọbọrọ ete: “Nnyọn̄ke! Mfịn edi usen emi ikakam itiede-tie ibet,” onyụn̄ emen ikan̄ efehe aka ndidọk ọkọm ufọkn̄wed oro. Enye ekedi ọyọhọ ufan Dito itiaita oro ẹkekpan̄ade usen oro. Mmọn̄ọ, ndi ukwe nte esịt enemde mi ndikụt Dito emi ekpeketienede akpa edieke enye mîkpekemekke ndikabade ndi ata Christian?

 Ndikụt Odudu Spirit Jehovah

Usen kiet n̄kasan̄a mbe ke enyịnusụn̄ emi n̄kekerede ke ima iwawaha, ndien mma enyeneufọk ama okot mi. Enye ekekere Ignacia. Enye ama ọdiọn̄ọ n̄kpọ aban̄a Mme Ntiense Jehovah, edi ọkpọsọn̄ ukọbọ Adalberto ebe esie emi ekedide okopidem owo bodisi, ikayakke enye ọkọri ke n̄kan̄ eke spirit. Enye ikọfiọkke ediwak akpan ukpepn̄kpọ Bible, ntre mma ntọn̄ọ ndikpep Bible ye enye. Okposụkedi ebe esie ekenen̄erede ebiere nditre ukpepn̄kpọ emi, mma nnyene anyan nneme ye ebe esie mban̄a mme n̄kpọ en̄wen. Ntọn̄ọ ufan nnyịn ekedi oro.

Kere nte esịt akadatde mi ke ini Ignacia akakabarede edi edima eyenete, emi ọdọn̄de ediwak owo esịt ke ata ata usụn̄ ye ke n̄kan̄ eke spirit. Nte ini akakade, nditọ esie ita ye ebe esie ẹma ẹkabade ẹdi Mme Ntiense. Ke akpanikọ, ke ini eti mbụk akan̄wan̄ade Adalberto ke akpatre, enye ama aka itieutom mme bodisi ọkọkwọrọ ikọ uko uko tutu ọbọ editobo Enyọn̄-Ukpeme ye Awake! 200 oto mme bodisi.

Jehovah Anam Enye Ọkọri

Ke mma n̄kanam utom ke Santa Cruz ke isua 6, ẹma ẹnọ mi n̄ka La Paz, ibuot obio Bolivia, ndien n̄kodu do isua 25. Ke ntọn̄ọ ntọn̄ọ iduọk isua 1970, owo 12 kpọt ẹkedu ke n̄kọk itieutom Mme Ntiense Jehovah ke La Paz. Nte utom ukwọrọikọ ọkọkọride, ke ntem oyomde akamba n̄kọk itieutom, ẹma ẹbọp obufa n̄kọk itieutom ke obio Santa Cruz emi akatarade usọp usọp. Ẹma ẹsio n̄kọk itieutom ẹnyọn̄ do ke 1998, ndien ẹma ẹkot mi ntiene ndidi owo ubon Bethel, emi ẹdide owo 50 idahaemi.

Esop kiet kpọt emi okodude ke Santa Cruz ko ke 1966 ebe esop 50 idahaemi. Mme Ntiense 640 oro ẹkedude ke ofụri Bolivia ini oro ẹmewak ẹkpere ndisịm 18,000 idahaemi!

Inemesịt mi edi ke utom mi ke Bolivia enyene uforo. Nte ededi, nsọn̄ọnda ekemmọ nditọete ke kpukpru ebiet esisịn udọn̄ ọnọ mi. Esịt esidat kpukpru nnyịn ndikụt edidiọn̄ Jehovah ke utom edikwọrọ Obio Ubọn̄. Enen̄ede edi n̄kpọ idatesịt nditiene mbuana ke utom edinam mbet.—Matthew 28:19, 20.

[Ndise ke page 13]

Ndinam utom usiakusụn̄ ke Scotland

[Mme ndise ke page 15]

Ndinam utom ke n̄kọk itieutom ke Bolivia; (esịne-esịt) ukụre ukpep ọyọhọ otu 42 eke Gilead