Dara Ediye Isọn̄ Nnyịn

MME ekpepn̄kpọ mban̄a ikpaenyọn̄ ẹkụt ke ebietidụn̄ ubonowo edi ata ekpri ntọi ke akaka ekondo oro mînyeneke utịt. Idụhe ebiet efen oro uwem odude ke ekondo. Ke ekondo Isọn̄ kpọt ke ẹnyene ata nnennen idaha oro ekemede ndinam uwem odu.

Akan oro, nnyịn imekeme ndidara uwem ke ediye isọn̄ emi. Ufiop eyo esinem didie ntem ke usen etuep! Anie ke otu nnyịn mîmaha ediye usiahautịn m̀mê usoputịn? Ke adianade ye utịn ndiye nnyịn ke enyịn nnyụn̄ nnam nnyịn ikop ufiop, enye anam nnyịn idu uwem.

Ke anana-ibat isua, odudu utịn oro esidụride n̄kpọ aka isọn̄ amanam isọn̄ ye mme ekondo eken ẹsọn̄ọ ẹwụhọ ke itie mmọ, ke nnennen ebiet oro mmọ ẹsisan̄ade ẹkanade. Ndien nte ẹsikpepde ke ufọkn̄wed, ofụri ndutịm ekondo nnyịn esisan̄a akanade ufọt Ntọn̄ntọn̄ Otu Ntantaọfiọn̄ nnyịn. Edi utịn edi kiet kpọt ke otu se iwakde ibe ntantaọfiọn̄ biliọn ikie oro ẹsisan̄ade ẹkanade ntem.

Ntọn̄ntọn̄ Otu Ntantaọfiọn̄ nnyịn esịne ke uyọ oro enyenede otu ntantaọfiọn̄ 35. Mme uyọ en̄wen ẹkponde ẹkan emi ẹnyene ediwak tọsịn otu ntantaọfiọn̄. Etie nte ndutịm ekondo nnyịn ikpọsọn̄ọke ida edieke enye ekpesịnede ke uyọ ntantaọfiọn̄ oro enen̄erede okpon onyụn̄ aban̄de. Guillermo Gonzalez ye Jay W. Richards ẹdọhọ ke n̄wed mmọ oro The Privileged Planet ẹte ke iwakke ebiet en̄wen ke ekondo oro “awak-n̄kukọhọ uwem ekemede ndidu nte edide ke isọn̄ nnyịn.”

Ndi uwem ọkọtọn̄ọ ke isọn̄ ke mbuari? Mîdịghe ndi uwem enen̄ede enyene se ọwọrọde ke ediye ekondo Isọn̄ nnyịn?

Ediwak owo ẹnyịme ke ẹkebot isọn̄ nnyịn man uwem ekeme ndidu. * Ke ediwak isua ikie emi ẹkebede, ewet uto eyen Hebrew kiet ama ewet aban̄a isọn̄ ye enyọn̄. Enye ekewet ete: “Ke adan̄aemi nsede enyọn̄, utom nnuenubọk fo, ọfiọn̄ ye ntantaọfiọn̄ emi afo owụkde; nso n̄kpọ edi owo?” (Psalm 8:​3, 4) Andiwet uto emi ama enịm ke Andibot odu. Ndi owụt ifiọk ndinịm oro ke eyo ifiọk ntaifiọk emi?

[Ikọ idakisọn̄]

[Ekebe/Ndise ke page 3]

N̄wed oro, The Illustrated Science Encyclopedia​​—⁠Amazing Planet Earth, ọdọhọ ete: “Edieke ẹdade ke ata enyọn̄ ko ẹse, isọn̄ esisem nte ọsọn̄urua itiat oro etiede blublu ke ekịm ikpaenyọn̄.”

[Ebiet Ẹdade N̄kpọ Ẹto]

Ekondo: U.S. Fish & Wildlife Service, Washington, D.C./NASA