Ẹnem Esịt Ndibet Jehovah

NTE akanam amadia n̄kịm mfri? Anaedi ukumaha nte enye eketiede fi ke inua. Esida ini mbemiso mfri adatde, edi esifọn ẹbet tutu enye adat. Odu mme n̄kpọ en̄wen oro ọfọnde ẹbet. Bible ọdọhọ ete: “Ọfọn ndidori enyịn, nnyụn̄ ntie ndop mbet edinyan̄a Jehovah.” (Eseme 3:26; Titus 2:13) Ke mme usụn̄ ewe ke ana mme Christian ẹbet Jehovah? Nso ufọn ke idinyene edieke ibetde enye?

Ndibet Abasi Abuana Nso?

Nnyịn nte mme Christian ke ‘itie ibet inyụn̄ isọn̄ọ inyene edidu usen Jehovah ke ekikere.’ Nnyịn ke itie ibet ubọhọ ke ini oro enye ‘edisobode mbon unana uten̄e Abasi.’ (2 Peter 3:7, 12) Enen̄ede ọdọn̄ Jehovah nditre kpukpru orụk idiọkido, edi enye omụm idem akama man anyan̄a mme Christian ke usụn̄ oro edinọde enyịn̄ esie ubọn̄. Bible ọdọhọ ete: “Okposụkedi [Abasi] enyenede odudu ndiwụt iyatesịt esie ndinyụn̄ nnam ẹfiọk odudu esie, [enye ọyọ] mme eso iyatesịt oro ẹdotde nsobo, man enye akpanam ẹfiọk akpakịp ubọn̄ esie ke idem mme eso mbọm, emi enye ekebemde iso eben̄e enịm ọnọ ubọn̄.” (Rome 9:22, 23) Kpa nte Jehovah akanamde ke eyo Noah, enye ọfiọk nnennen ini ndinyan̄a ikọt esie mfịn. (1 Peter 3:20) Ntem, ndibet Abasi abuana ndibet ini oro enye edinyan̄ade ikọt esie.

Nte nnyịn ibetde usen Jehovah, ekeme ndiyat nnyịn ndusụk ini ndikụt nte ido uwem ke ererimbot emi akade iso ndibiara. Ke ini ikụtde mme utọ n̄kpọ ntre, esifọn ikere mme ikọ Micah emi ekedide prọfet Abasi, oro ekewetde ete: “Owo eke amade Abasi atak ke isọn̄: baba owo kiet eke enende ke otu owo idụhe.” Ekem enye adian do ete: “Edi ami nyetịn̄ enyịn ke Jehovah: nyebet Abasi emi anyan̄ade mi.” (Micah 7:2, 7) Didie ke nnyịn ikeme ‘ndibet’? Sia editie mbet n̄kpọ esikamade edikpu, didie ke ikeme ndinem esịt ke adan̄aemi ibetde Abasi?

Ẹnem Esịt ke Adan̄aemi Ẹbetde

Nnyịn imekeme ndikpebe Jehovah ke ndinyene nnennen edu. Akananam enye itreke ndidi “Abasi inemesịt.” (1 Timothy 1:11) Esịt enem enye ndibet sia enye akade iso ndinam n̄kpọ mban̄a edisu uduak esie man anam mbon oro ẹmade enye ẹdi mfọnmma nte enye akaduakde ke ini enye okobotde mmọ. (Rome 5:12; 6:23) Jehovah enyene nti utịp oto utom esie—nte ediwak miliọn owo ẹbụn̄ọde ẹdụk utuakibuot akpanikọ. Jesus ọkọdọhọ ete: “Ete mi ke ananam utom tutu esịm emi, ami ke nnyụn̄ nnam utom.” (John 5:17) Ndinam n̄kpọ nnọ mbon efen esinam owo okop inemesịt. (Utom 20:35) Ukem ntre, ata mme Christian isikpan̄ke-kpan̄ ubọk itie. Utu ke oro, mmọ ẹsisịn idem ẹn̄wam mbon efen ẹkpep uduak Abasi kaban̄a ubonowo.

Mbon oro ẹnamde akpanikọ ẹsikop uyụhọ nditoro Abasi ke adan̄aemi ẹbetde ini emi enye edinamde n̄kpọ. Da David andiwet Psalm ke uwụtn̄kpọ. Edidem Saul ama ọkọbọ David, akpan ufan David onyụn̄ ada enye ọnọ, ndien eyen esie ama an̄wana ye enye. Ke mme idaha emi, nte David ama ekeme  ndikop inemesịt nte enye ekebetde ini emi Jehovah edinyan̄ade imọ? Psalm 71, emi etiede nte enye David ekewet, ọdọhọ ete: “Edi ami nyodori enyịn kpukpru ini, nnyụn̄ nnam ofụri itoro fo ọdọdiọn̄ aka iso. Inua mi oyobụk mfọnido fo, ye edinyan̄a fo ofụri usen.” (Psalm 71:14, 15) Utu ke David nditie mfụhọ mfụhọ mbet Abasi, enye ama okop idatesịt sia ekesịnde idem otoro Jehovah onyụn̄ esịnde udọn̄ ọnọ mbon en̄wen ndika iso ntuak ibuot nnọ Abasi.—Psalm 71:23.

Ndibet Jehovah itiehe nte ndibet ubomisọn̄ oro mîsọpke idisịm. Enye akam etie nte ete ye eka emi ẹtiede ẹbet eyen mmọ ọkọri ọwọrọ owo, ndien emi esinem mmọ esịt. Mmọ ẹsinam utom ọkpọsọn̄ ke mme isua oro mmọ ẹbetde do—esịnede unọ ukpep, item, ye ntụnọ—ndien ẹsinam kpukpru emi man ẹnyene eti utịp. Ukem ntre, nnyịn oro itiede ibet Jehovah imesikop inemesịt ndin̄wam mbon en̄wen ẹsan̄a ẹkpere Abasi. Nnyịn n̄ko imoyom Abasi ama onyụn̄ anyan̄a nnyịn ke akpatre.

Ẹkûduọk Idotenyịn

Ndibet Jehovah abuana ndika iso mma nnyụn̄ nnam n̄kpọ esie ye unana ediduọk idotenyịn. Emi ekeme ndisọn̄. Ediwak ikọt Abasi mfịn ẹdu ke mme obio emi mme owo ẹsisakde owo ekededi oro odude eti uwem onyụn̄ ọbuọtde idem ke mme un̄wọn̄ọ Abasi. Kere ban̄a uwụtn̄kpọ mme anam-akpanikọ nditọ Israel oro mîkọduọkke idotenyịn ke isua 70 oro mmọ ẹkedude ke ntan̄mfep Babylon. Nso ikan̄wam mmọ ẹka iso ẹnyene idotenyịn? Nte eyịghe mîdụhe, ndikot mme psalm ama ọsọn̄ọ mmọ idem. Edinem psalm kiet emi etiede nte ẹkewet ini oro ọdọhọ ete: “Ami nnyụn̄ ndori enyịn ke ikọ esie. Ukpọn̄ mi ke ebebet Ọbọn̄, akan nte mbon-ukpeme ẹbetde usiere: mbon-ukpeme ẹbet usiere. Israel, dori enyịn ye Jehovah.”—Psalm 130:5-7.

Mme Jew oro ẹkekade iso ẹnyene idotenyịn ke ndikot nnyụn̄ ntịn̄ mban̄a idotenyịn mmọ ẹma ẹbọhọ ke ini ẹkekande Babylon. Ediwak tọsịn mme Jew oro ẹkenamde akpanikọ ẹma ẹfiak ẹnyọn̄ọ Jerusalem. Ẹwet ntem ẹban̄a ini oro: “Adan̄aemi Jehovah afiakde etiene nditọ Zion emi ẹketan̄de ẹfep, . . . imam ọyọhọ nnyịn ke inua.” (Psalm 126:1, 2) Mme Jew oro ikọduọkke idotenyịn, edi ẹma ẹka iso ndisọn̄ọ mbuọtidem mmọ ebe ke ndikot nnyụn̄ nneme Ikọ Abasi. Ndien mmọ ikakpaha mba ndikwọ itoro Jehovah.

Ke ukem usụn̄ oro, ata mme Christian emi ẹbetde Abasi ke “utịt editịm n̄kpọ emi” ẹka iso ẹsịn ukeme ndisọn̄ọ mbuọtidem mmọ. Mmọ ẹsikpep Ikọ Abasi, ẹsịn udọn̄ ẹnọ kiet eken, ẹnyụn̄ ẹka iso ẹtoro Jehovah ke ndikwọrọ eti mbụk Obio Ubọn̄ esie.—Matthew 24:3, 14.

Ndibet man Ibọ Ufọn Ito Ntụnọ

Jeremiah emi ekedide prọfet Abasi ekewet ete: “Ọfọn ndidori enyịn, nnyụn̄ ntie ndop mbet edinyan̄a Jehovah.” (Eseme 3:26) Ikọ  Jeremiah ọkọwọrọ nte ke ọyọfọn edieke ikọt Abasi mîkụnike iban̄a usụn̄ oro Jehovah okotụnọde mmọ ke ini enye akayakde ẹsobo Jerusalem. Utu ke oro, mmọ ẹkpenyene ndikere mban̄a nsọn̄ibuot mmọ ye nte mmọ ẹkpekabarede esịt man ẹbọ ufọn ẹto ntụnọ oro.—Eseme 3:40, 42.

Ẹkeme ndimen usụn̄ oro ntụnọ Jehovah enyenede ufọn ọnọ nnyịn ndomo ye nte eto esikọride. Bible etịn̄ ntem aban̄a ntụnọ oro Abasi ọnọde: “Enye on̄wụm mfri emem ọnọ mmọ oro ẹkedade enye ẹnọ mmọ ukpep, oro edi, edinen ido.” (Mme Hebrew 12:11) Ukem nte mfri esidade ini mbemiso adatde, nnyịn ndikpụhọde ekikere nnyịn ntiene ukpep oro Abasi ọnọde esida ini n̄ko. Ke uwụtn̄kpọ, edieke idiọk edu uwem nnyịn anamde itaba ndusụk ifetutom ke esop, nnyịn ndinyịme ndibet ekemini Abasi idiyakke nnyịn ikop mmemidem inyụn̄ ikpa mba. Ke mme utọ idaha oro, se David akadade odudu spirit Abasi ewet eyesịn udọn̄ ọnọ nnyịn. Enye ekewet ete: “Koro enye [Abasi] ayatde esịt ke ekpri ini; uwem oto ke mfọn-ido esie: eyet ayadan̄ ke mbubịteyo, ndien idara edi ke usenubọk.” (Psalm 30:5) Edieke inamde edi edu nnyịn ndibet inyụn̄ inamde item oro ibọde ke Ikọ Abasi ye esop esie, ini “idara” nnyịn eyedi.

Ada Ini Ndikọri Nsịm Ọyọhọ Idaha

Edieke afo edide uyen m̀mê anade baptism ndondo emi, ekeme ndidọn̄ fi ndinyene ifetutom ke esop Christian. Edi esida ini ndikọri nsịm ọyọhọ idaha ke n̄kan̄ eke spirit man ẹkeme ndibiom utọ mbiomo oro. Ke ntre, da ini emi edide uyen mi nam n̄kọri ke n̄kan̄ eke spirit. Ke uwụtn̄kpọ, ini uyen edi ata eti ini ndikot ofụri Bible, ndikọri mme edu Christian, ndinyụn̄ nnyene usọ ke utom unam mbet. (Ecclesiastes 12:1) Edieke afo osụhọrede idem ebet Jehovah, ini eyedi emi enye edinọde fi ifetutom efen efen.

Utom unam mbet n̄ko oyom ime. Ukem nte anade ọtọin̄wan̄ aka iso ọduọk mmọn̄ ke se enye ọtọde tutu Abasi anam n̄kpọ oro ọkọri, ntre ke edi ye utom unam mbet. (1 Corinth 3:7; James 5:7) Esiyom ẹda ime ẹkpep Bible ke ediwak ọfiọn̄ m̀mê isua man ẹn̄wam mbon en̄wen ẹnyene mbuọtidem ẹnyụn̄ ẹwụt esịtekọm ẹnọ Jehovah. Ndibet Jehovah oyom owo enyene ime ye nditọ ukpepn̄kpọ oro mîsọpke ida se mmọ ẹkpepde isịn ke edinam. Edieke mmọ ẹkam ẹwụtde esịtekọm, oro ekeme ndidi idiọn̄ọ ndiwụt ke mmọ ke ẹtọn̄ọ ndinyene spirit Jehovah. Edieke afo enyenede ime, emekeme ndikụt ini emi Jehovah edinamde eyen ukpepn̄kpọ fo akabade edi mbet Christ.—Matthew 28:20.

Ndiwụt Ima ke Edibet

Man ọfiọk nte edibet ekemede ndiwụt ke owo enyene ima ye mbuọtidem, kere ban̄a eka eka kiet emi odụn̄de ke ikpehe desat Andes, ke Edem Usụk America. Enye ye eyenete en̄wen ẹkedi n̄kukụre Ntiense Jehovah ke obio mmọ. Afo emekeme ndikụt ntak emi mmọ ẹkenen̄erede ẹyom ekemmọ mme Christian ẹdise mmimọ. Esenyịn oro asan̄ade-san̄a ama osop usụn̄ ke akpa ini oro enye akakade ndise mmọ. Akana enye afiak aka ebiet emi enye ọkọtọn̄ọde isan̄ esie man enye ekeme ndifiọk usụn̄, ndien emi ama ada ediwak hour. Enye akada nsannsan okụt obio oro ke ama ekebe ufọt okoneyo. Sia ikan̄ ilektrik mîkodụhe ke efak oro, idem ama akpa enye ndikụt ikan̄ etuenede do. Esịt ekenem enye didie ntem ndisịm obio oro nnyụn̄ mfiọk ke akanian̄wan emi okodomo utuenikan̄ oro enịm! Enye ama etịm ọfiọk ke esenyịn emi eyedi, ndien mma oro ama etie ebet.

Nnyịn ida ukem ime oro itie ibet Jehovah ye inemesịt. Nnyịn imenen̄ede inịm ke enye ayanam mme un̄wọn̄ọ esie. Ndien ukem nte esenyịn oro asan̄ade-san̄a do, nnyịn imesima mbon oro ẹbetde nnyịn. Ke ntre, ikpaha nnyịn idem ndifiọk ke Abasi ama mbon oro ẹbetde enye. Bible ọdọhọ ete: “Mmọ eke . . . ẹdoride enyịn ke ima [Jehovah] ẹnem enye esịt.”—Psalm 147:11.

[Ndise ke page 18]

Mbon oro ẹsịnde ifịk ẹtoro Abasi ẹsinem esịt ndibet Jehovah