Bak Jehovah man Okop Inemesịt
Bak Jehovah man Okop Inemesịt
“Mbufo, nti ikọt Jehovah, ẹbak enye: koro mmọ eke ẹbakde enye mînanake baba n̄kpọ kiet.”—PSALM 34:9.
1, 2. (a) Didie ke Christendom ese mbak Abasi? (b) Mme mbụme ewe ke nnyịn idineme idahaemi?
MME ọkwọrọ ederi Christendom ẹsiwak ndikpep mme owo ẹte ẹbak Abasi mbak enye editụhọde mmọ ke ikan̄ hell ke nsinsi. Utọ ukpepn̄kpọ oro atuaha ye se Bible ekpepde aban̄a Jehovah nte Abasi ima ye unenikpe. (Genesis 3:19; Deuteronomy 32:4; Rome 6:23; 1 John 4:8) Mme ọkwọrọ ederi en̄wen ke Christendom isinamke ntre. Mmọ isikam itịn̄ke-tịn̄ n̄kpọ ndomokiet iban̄a mbak Abasi. Utu ke oro, mmọ ẹkpep ke Abasi enyenyịme owo ekededi, inamke n̄kpọ m̀mê enye odu uwem didie. Oro n̄ko idịghe se Bible ekpepde.—Galatia 5:19-21.
2 Ke akpanikọ, Bible esịn udọn̄ ọnọ nnyịn ete ibak Abasi. (Ediyarade 14:7) Ukpepn̄kpọ emi edemede mme mbụme. Ntak emi Abasi ima oyomde nnyịn ibak enye? Nso utọ mbak ke Abasi oyom? Didie ke mbak Abasi enyene ufọn ọnọ nnyịn? Nnyịn iyọbọrọ mme mbụme emi nte isụk ikade iso ndineme ọyọhọ Psalm 34.
Ntak Anade Ibak Abasi
3. (a) Didie ke afo ese ewụhọ oro ọdọhọde ẹbak Abasi? (b) Ntak emi ọfọnde ọnọ mbon oro ẹbakde Jehovah?
3 Sia Jehovah edide Andibot ye Akakan Andikara ekondo, odot ẹbak enye. (1 Peter 2:17) Nte ededi, utọ mbak oro idịghe ọkpọsọn̄ ndịk oro ẹkopde ẹban̄a abasi ibak. Enye edi eti mbak oro inyenede inọ Jehovah ke ntak orụk Abasi emi enye edide. Mbak emi n̄ko idiyakke inam se iyatde enye esịt. Mbak Abasi ọfọn, ofori uwem owo, inyụn̄ isịnke owo ndịk ke idem. Jehovah, “Abasi inemesịt,” oyom mme owo ẹkop inem uwem. (1 Timothy 1:11) Nte ededi, man ikop inem emi, ana inam se Abasi oyomde oto nnyịn. Emi oyoyom ediwak owo ẹkpụhọde edu mmọ. Kpukpru mbon oro ẹnamde ukpụhọde oro ẹyomde ẹyekụt nte ikọ David, andiwet psalm emi edide akpanikọ: “O mbufo ẹtabi, ẹnyụn̄ ẹse nte Jehovah ọfọnde: ọfọfọn ọnọ owo eke eberede idem ye enye. Mbufo, nti ikọt Jehovah, ẹbak enye: koro mmọ eke ẹbakde enye mînanake baba n̄kpọ kiet.” (Psalm 34:8, 9) Sia kpukpru mbon oro ẹbakde Jehovah ẹnyenede eti itie ebuana ye enye, mmọ inanake baba n̄kpọ kiet oro enyenede nsinsi ufọn.
4. Nso nsọn̄ọ ke David ye Jesus ẹkenọ?
4 Tịm fiọk ke David ama okpono ikọt esie ke ndikot mmọ “nti ikọt Jehovah.” Mmọ ẹkesịne ke otu ndisana ikọt Abasi. Mmọ n̄ko ẹma ẹsịn uwem mmọ ke itiendịk man ẹtiene David. Kpa ye oro mmọ ẹkefehede man ẹbọhọ Edidem Saul, David ama enịm ke Jehovah ayaka iso ọnọ mmimọ se inanade mmimọ. David ekewet ete: “Mme lion ẹnana udia, ẹnyụn̄ ẹtie biọn̄: edi mmọ eke ẹyomde Jehovah idinanake baba eti n̄kpọ kiet.” (Psalm 34:10) Jesus ama ọnọ mme anditiene enye ukem nsọn̄ọ oro.—Matthew 6:33.
5. (a) Nso orụk owo ke ediwak mme anditiene Jesus ẹkedi? (b) Nso item ke Jesus ọkọnọ aban̄a ndifehe ndịk?
5 Ediwak mbon oro ẹkekpan̄de utọn̄ ẹnọ Jesus ẹkedi mme Jew oro ẹkedide ubuene. Ntem, Jesus ama ‘atua mmọ mbọm, koro ẹkefiomode ẹkenyụn̄ ẹsuande mmọ nte erọn̄ eke mînyeneke andikpeme.’ (Matthew 9:36) Ndi mme utọ ubuene oro ẹma ẹnyene uko nditiene Jesus? Man ẹkeme ndinam emi, mmọ ẹkenyene ndibak Jehovah, utu ke ndibak owo. Jesus ọkọdọhọ ete: “Ẹkûfehe mmọ emi ẹwotde ikpọkidem ndien mîkemeke ndinam n̄kpọ n̄kan oro. Edi nyowụt mbufo enye emi ẹkpefehede: Ẹfehe enye emi edide ke ama okowot, enye enyene odudu nditop nsịn ke Gehenna. Ih, ndọhọ mbufo nte, ẹfehe Enye emi. Nte owo inyamke akadan̄abasi ition ke n̄kpri okudọk iba? Kpa ye oro Abasi ifreke ndomo mmọ kiet. Edi ẹmebat kpa kpukpru idet ke ibuot mbufo. Ẹkûfehe ndịk; mbufo ẹmesọn̄ urua ẹkan ediwak akadan̄abasi.”—Luke 12:4-7.
6. (a) Ewe ikọ Jesus esisọn̄ọ mme Christian idem? (b) Ntak emi Jesus edide mfọnn̄kan uwụtn̄kpọ owo emi abakde Abasi?
6 Ke ini mme asua ẹnyịkde mbon oro ẹbakde Jehovah ẹtre ndinam n̄kpọ Abasi, mmọ ẹkeme nditi ikọ Jesus emi: “Owo ekededi eke enyịmede ke iso owo ete idi okịm, Eyen owo n̄ko eyenyịme ke iso mme angel Abasi ete enye edi eke imọ. Edi owo eke akan̄de mi ke iso owo, nyakan̄ enye ke iso mme angel Abasi.” (Luke 12:8, 9) Ikọ emi esisọn̄ọ mme Christian idem, akpan akpan ke mme idụt oro ẹkpande utuakibuot akpanikọ. Mmọ ẹka iso ndida mbufiọk ntoro Jehovah ke mme mbono esop Christian ye ke utom an̄wautom. (Utom 5:29) Jesus enịm mfọnn̄kan uwụtn̄kpọ ke ndiwụt “mbak Abasi.” (Mme Hebrew 5:7) Ẹma ẹbem iso ẹtịn̄ ẹban̄a enye ke Bible ẹte: “Spirit Jehovah oyodoro enye ke idem, spirit . . . uten̄e Jehovah: ndien uten̄e Jehovah eyenem enye esịt.” (Isaiah 11:2, 3) Ntem, Jesus enen̄ede odot ndikpep nnyịn mme ufọn oro mbak Abasi enyenede.
7. (a) Didie ke mme Christian ẹyere ukem ikot oro David ọkọnọde? (b) Didie ke mme ete ye eka ẹkeme nditiene eti uwụtn̄kpọ David?
7 Ke nditịm ntịn̄, kpukpru mbon oro ẹtienede uwụtn̄kpọ ye ukpepn̄kpọ Jesus ẹnam se David ọkọdọhọde ikọt esie ẹnam: “Mbufo nditọwọn̄, ẹdi ẹkop uyo mi: nyeteme mbufo ẹten̄e Jehovah.” (Psalm 34:11) David ama odot ndikot ikọt esie “nditọwọn̄” koro mmọ ẹkekponode enye nte etubom mmọ. David ke idemesie ama an̄wam ikọt esie ẹbak Abasi man mmọ ẹkpediana kiet ẹnyụn̄ ẹkụt mfọn ke iso Abasi. Nso eti uwụtn̄kpọ ke emi edi ntem ọnọ mme ete ye eka oro ẹdide Christian! Jehovah ọnọ mmọ odudu ‘ndika iso n̄kama nditọ mmọ ke ntụnọ ye ke usụn̄ ukere n̄kpọ Jehovah.’ (Ephesus 6:4) Mme ete ye eka ẹkeme ndin̄wam nditọ mmọ ẹbak Jehovah man ẹkop inemesịt ebe ke ndineme mme n̄kpọ eke spirit ye mmọ ke usen ke usen ye ke ndinịm ukpepn̄kpọ Bible ye mmọ kpukpru ini.—Deuteronomy 6:6, 7.
Nte Ikemede Ndinyene Mbak Abasi
8, 9. (a) Ntak emi ọfọnde ndidu uwem uten̄e Abasi? (b) Nso ke ndikpeme edeme nnyịn ọwọrọ?
8 Nte ima iketetịn̄, ndibak Jehovah inamke nnyịn ikûkop inem uwem. David okobụp ete: “Anie owo ke itọn̄ uwem ọdọn̄ enye, [onyụn̄ ama ndikụt] nti n̄kpọ?” (Psalm 34:12) Ana in̄wan̄-in̄wan̄ ke ndibak Jehovah edi akpan n̄kpọ edieke owo oyomde ndidu inem inem uwem mbịghi nnyụn̄ n̄kụt nti n̄kpọ. Nte ededi, edi mmemmem n̄kpọ ndidọhọ, “Mmabak Abasi.” Edi idịghe mmemmem n̄kpọ ndidu uwem emi owụtde ke imabak Abasi. Ntem, David ama aka iso etịn̄ nte ikemede ndiwụt ke imenyene mbak Abasi.
9 “Kpeme edeme fo ke idiọk, kpeme n̄kpọk-inua fo ke abian̄a.” (Psalm 34:13) Edisana spirit ama anam apostle Peter okot oto Psalm 34:13 ke enye ama eketeme mme Christian ete ẹnyene ima nditọete. (1 Peter 3:8-12) Ndikpeme edeme nnyịn ke idiọk ọwọrọ ke nnyịn idisan̄ake itịn̄ ikọ-edem. Utu ke oro, nnyịn iyodomo nditịn̄ ikọ oro ọbọpde owo anam ọkọri. Ke adianade do, nnyịn iyodomo ndisọn̄ọ nda ntịn̄ akpanikọ.—Ephesus 4:25, 29, 31; James 5:16.
10. (a) Tịn̄ se ndiwọn̄ọde n̄kpọn̄ idiọk ọwọrọde. (b) Nso ke ndinam eti n̄kpọ abuana?
10 “Wọn̄ọde kpọn̄ idiọk, nyụn̄ nam eti: yom emem, nyụn̄ bịne enye.” (Psalm 34:14) Nnyịn isinamke mme n̄kpọ oro Abasi asuade, utọ nte oburobụt ido idan̄, edise ndise idan̄, uyịpinọ, ubụpekpo, afai, ukpammịn, ye edida n̄kpọsọn̄ ibọk ke idiọk usụn̄. Nnyịn n̄ko isibuanake ke unọ idem inemesịt oro esịnede utọ mbukpo edinam emi. (Ephesus 5:10-12) Utu ke oro, nnyịn inyene ndida ini nnyịn nnam nti n̄kpọ. Mfọnn̄kan n̄kpọ oro nnyịn ikemede ndinam edi ndibuana kpukpru ini ke utom edikwọrọ Obio Ubọn̄ ye edinam mbet, in̄wamde mbon en̄wen ẹnyene edinyan̄a. (Matthew 24:14; 28:19, 20) Edinam eti n̄kpọ abuana n̄ko nditịm idem nnọ nnyụn̄ ndụk mme mbono esop Christian, nditịp okụk nsịn ke utom ofụri ererimbot, ndise mban̄a Ufọk Mbono Obio Ubọn̄, ye ndikere mban̄a mme Christian oro ẹyomde un̄wam.
11. (a) Didie ke David akanam se enye ekekpepde aban̄a emem? (b) Nso ke afo ekeme ndinam man ‘ebịne emem’ ke esop?
11 David ama enịm eti uwụtn̄kpọ ke ndibịne emem. Enye ama enyene ifet utịm ikaba ndiwot Saul. Ke idaha mbiba emi, enye ikọduọhọ obom, ndien ekem enye ama etịn̄ ikọ ukpono ukpono ye edidem, onyụn̄ oyom usụn̄ ndinam emem ye enye. (1 Samuel 24:8-11; 26:17-20) Nso ke ẹkeme ndinam edieke mfịna oyomde ndibiat emem esop? Nnyịn ikpenyene ‘ndiyom emem, nnyụn̄ mbịne enye.’ Ntem, edieke ifiọkde ke ekemmọ andinịm ke akpanikọ enyene ikọ ye nnyịn, ọyọfọn inam item Jesus emi: “Kebem iso nam emem ye eyenusọ.” Ekem nnyịn ika iso inam mme n̄kpọ en̄wen ke utuakibuot akpanikọ.—Matthew 5:23, 24; Ephesus 4:26.
Ndibak Abasi Ada Ediwak Edidiọn̄ Edi
12, 13. (a) Nso ufọn ke mme abak-Abasi ẹnyene idahaemi? (b) Nso akwa utịp ke mme anam-akpanikọ andituak ibuot ẹdinyene ke mîbịghike?
12 “Enyịn Jehovah ese mbon eti ido, utọn̄ esie onyụn̄ ọbiọn̄ọ ọnọ eseme mmọ.” (Psalm 34:15) Nte Abasi akanamde n̄kpọ ye David owụt ke ikọ oro edi akpanikọ. Mfịn, nnyịn imenen̄ede ikop idatesịt inyụn̄ idu ke emem koro ifiọkde ke Jehovah ke ekpeme nnyịn. Nnyịn imenịm ke enye ayaka iso ọnọ nnyịn se iyomde, idem ke ini isobode ọkpọsọn̄ mfịghe. Nnyịn imọfiọk ke mîbịghike, Gog eke Magog ayan̄wana ye ata mme andituak ibuot nnọ Abasi, iyonyụn̄ ikụt nte “usen Jehovah emi enyenede ndịk” oro ẹkebemde iso ẹtịn̄, edide. (Joel 2:11, 31; Ezekiel 38:14-18, 21-23) Se ededi oro nnyịn idisobode ini oro, ikọ David oyosu nnyịn ke idem: “Mmọ ẹseme, ndien Jehovah okop, onyụn̄ osio mmọ ke kpukpru nnanenyịn mmọ.”—Psalm 34:17.
13 Nso n̄kpọ nduaidem ke edidi ntem ini oro ndikụt Jehovah ọnọde akwa enyịn̄ esie ubọn̄! Nnyịn iyenen̄ede ibak Abasi ke ofụri esịt ikan nte akanam ibakde, edi ẹyesobo kpukpru mme andibiọn̄ọ ẹfep. “Jehovah owụk iso ese mme anam-idiọk, onyụn̄ esịbe se ẹdade ẹti mmọ ke ererimbot efep.” (Psalm 34:16) Nso eti utịp ke edidi ntem ndikụt nte ẹnyan̄ade nnyịn ẹsịn ke edinen obufa ererimbot Abasi!
Mme Un̄wọn̄ọ Oro Ẹn̄wamde Nnyịn Iyọ
14. Nso idin̄wam nnyịn iyọ mme afanikọn̄?
14 Kan̄a ke emi, imoyom ime man ika iso ikop uyo Jehovah ke idiọk ererimbot emi. Mbak Abasi ekeme ndinen̄ede n̄n̄wam nnyịn ika iso ikop item. Ke ntak ndiọkeyo emi nnyịn idude mi, ndusụk asan̄autom Jehovah ẹsisobo ebeubọk nsọn̄ọn̄kpọ emi mîsiyakke mmọ ẹkop inem uwem, emi esinyụn̄ anamde esịt ọduọ mmọ. Nte ededi, mmọ ẹkeme nditịm mfiọk ke edieke mmimọ iberide edem ke Jehovah, enye ayan̄wam mmimọ iyọ. Ikọ David enen̄ede ọdọn̄ nnyịn esịt: “Jehovah emekpere mmọ eke esịt obụn̄ọde mmọ; onyụn̄ anyan̄a mmọ eke esịt ọduọde.” (Psalm 34:18) Edi n̄kpọ ndọn̄esịt ndifiọk se David eketịn̄de adian do, ete: “Ediwak ukụt ẹsịm eti owo; edi Jehovah osio enye ke mmọ kpukpru.” (Psalm 34:19) Inamke n̄kpọ m̀mê mme afanikọn̄ nnyịn ẹwak adan̄a didie, Jehovah enyene odudu ekem ndinyan̄a nnyịn.
15, 16. (a) Nso afanikọn̄ ke ẹkedi ẹditịn̄ ẹnọ David esisịt ini ke enye ama ekewet Psalm 34? (b) Nso idin̄wam nnyịn iyọ mme idomo?
15 Esisịt ini ke David ama ekewet Psalm 34, enye ama okop afanikọn̄ oro ekesịmde mbon Nob, ke ini Saul okowotde mbio-obio oro ye ata ediwak oku mmọ. Anaedi David ama enen̄ede ofụhọ ke ini enye eketide ke imọ ndika Nob akayat Saul esịt. (1 Samuel 22:13, 18-21) Eyịghe idụhe nte ke David ama eben̄e Jehovah an̄wam imọ onyụn̄ ọdọn̄ idemesie esịt ke “ndinen owo” ẹyeset ke ini iso.—Utom 24:15.
16 Mfịn, idotenyịn ediset ke n̄kpa ọsọn̄ọ nnyịn idem n̄ko. Nnyịn imọfiọk ke idụhe se mme asua nnyịn ẹnamde emi ekemede ndinọmọ nnyịn ke nsinsi. (Matthew 10:28) David ama enịm emi n̄ko ke akpanikọ, nte ikụtde ke ikọ emi: “Enye ekpeme kpukpru mme ọkpọ [nti owo]: baba mmọ kiet ibụn̄ọke.” (Psalm 34:20) Ufan̄ikọ emi ama osu Jesus ke idem. Kpa ye oro ẹkewotde Jesus ke ibak ibak usụn̄, owo ‘ikanuakke’ baba ọkpọ esie kiet. (John 19:36) Ke usụn̄ efen, Psalm 34:20 anam nnyịn itịm ifiọk ke se ededi emi mme Christian oro ẹyetde aran ye “mme erọn̄ en̄wen” ẹsobode idinọmọke mmọ ke nsinsi. Ke ndamban̄a usụn̄, owo idibụn̄ke ọkpọ mmọ tutu amama.—John 10:16.
17. Ewe afanikọn̄ ana ebet mme asua ikọt Jehovah oro mîkabakede esịt?
17 Idaha mme idiọkowo itiehe ntem. Ibịghike mmọ ẹyedọk idiọkn̄kpọ oro mmọ ẹtọde. “Idiọk oyowot idiọk owo: ndien mmọ eke ẹsuade mbon eti ido ẹdue isop.” (Psalm 34:21) Kpukpru mbon oro ẹkade iso ẹbiọn̄ọ ikọt Abasi ẹyesobo ndiọkn̄kan afanikọn̄. Ke ediyarade Jesus Christ, mmọ ‘ẹyebọ ufen ubiomikpe nsinsi nsobo.’—2 Thessalonica 1:9.
18. Ke nso usụn̄ ke ẹfak “akwa otuowo” idahaemi, ndien nso iditịbe inọ mmọ ke ini iso?
18 Psalm David etre ye ikọ nsịnudọn̄ emi: “Jehovah afak ukpọn̄ ikọt esie: ndien baba owo kiet eke eberede idem mmọ ye enye, iduehe isop.” (Psalm 34:22) Ke ekperede utịt isua 40 emi Edidem David akakarade, enye ọkọdọhọ ete: ‘Abasi akafak ukpọn̄ mi osio ke kpukpru nnanenyịn.’ (1 Ndidem 1:29) Ukem nte David, ibịghike mbon oro ẹbakde Jehovah ẹyeti se iketịbede ẹnyụn̄ ẹdara sia ẹfakde mmọ ẹsio ke isop idiọkn̄kpọ, ẹnyụn̄ ẹnyan̄ade mmọ ẹsio ke kpukpru idomo mmọ. Idem idahaemi, ata ediwak Christian oro ẹyetde aran ẹma ẹbọbọ utịp mmọ ke heaven. “Akwa otuowo” emi ẹtode kpukpru idụt ẹmediana ye nditọete Jesus oro ẹsụhọde ẹnam n̄kpọ Abasi ẹnyụn̄ ẹnyene eti idaha ke iso Jehovah nte utịp. Emi edi koro mmọ ẹnyenede mbuọtidem nte ke iyịp oro Jesus ọkọduọkde enyene odudu ndifak mmimọ. Ke Tọsịn Isua Ukara Christ emi edidide, ẹyeda ufọn uwa ufak Jesus ẹn̄wam mmọ, ẹnyụn̄ ẹnam mmọ ẹkabade ẹdi mfọnmma.—Ediyarade 7:9, 14, 17; 21:3-5.
19. Nso ke “akwa otuowo” ẹbiere ndinam?
19 Ntak emi “akwa otuowo” oro ẹtuakde ibuot ẹnọ Abasi ẹdinyenede kpukpru edidiọn̄ emi-e? Koro mmọ ẹbierede ndika iso mbak Jehovah nnyụn̄ nnam n̄kpọ nnọ enye ke uten̄e ye ukpono. Ke akpanikọ, ndibak Jehovah anam uwem enem idahaemi onyụn̄ an̄wam nnyịn ‘isọn̄ọ imụm ata uwem ikama’—kpa nsinsi uwem ke obufa ererimbot Abasi.—1 Timothy 6:12, 18, 19; Ediyarade 15:3, 4.
Nte Afo Emeti?
• Ntak emi anade ibak Abasi, ndien nso ke ndibak Abasi ọwọrọ?
• Didie ke mbak Abasi enyene n̄kpọ ndinam ye edu nnyịn?
• Mme ufọn ewe ke mme abak-Abasi ẹnyene?
• Mme un̄wọn̄ọ ewe ẹn̄wam nnyịn iyọ?
[Mme Mbụme Ukpepn̄kpọ]
[Ndise ke page 26]
Mbon oro ẹbakde Jehovah ẹsinam n̄kpọ ye mbufiọk ke ini ẹkpande utom mmọ
[Ndise ke page 28]
Mfọnn̄kan n̄kpọ oro ikemede ndinam nnọ mme mbọhọidụn̄ nnyịn edi ndibuana eti mbụk Obio Ubọn̄ ye mmọ