Mbụkutom Africa

Ibat idụt: 57

Ibat mme andidụn̄: 802,232,357

Ibat mme asuanetop: 1,043,396

Ibat ukpepn̄kpọ Bible: 1,903,665

Rwanda Ini kiet ko, mbon emi ẹkesan̄ade ke usụn̄ ẹma ẹkụt n̄wed oro Afo Emekeme Ndidu Uwem ke Nsinsi ke Paradise ke Isọn̄ nte anade ke ọkpọusụn̄. Mmọ ẹma ẹmen enye ẹsọk etubom ufọkabasi Protestant mmọ. Enye ama esịn idem okot n̄wed oro onyụn̄ oyom Mme Ntiense, ndien mmọ ẹma ẹtọn̄ọ ndikpep Bible ye enye. Ifiọk Bible esie ama ọkọri, anam enye esịn n̄wed ọkpọn̄ ufọkabasi esie onyụn̄ edina baptism. Ofụri emi enye ama esịn ifịk eneme akpanikọ Bible ye mbon akani ufọkabasi esie, ndien owo 25 ẹma ẹwọn̄ọ ke ufọkabasi oro ẹkabade ẹdi Mme Ntiense Jehovah. Ete oro akadade itie esie nte etubom ufọkabasi emi ama ọtọn̄ọ ndikpep Bible n̄ko ye Mme Ntiense, onyụn̄ esịn n̄wed ọwọrọ ọkpọn̄ ufọkabasi oro. Enye esidụk mme mbono esop Christian idahaemi onyụn̄ ọdọhọ ke imoyom ndidi asuanetop. N̄wan esie ama ana baptism ke usen akpan mbono ndondo emi. Edi ata n̄kpọ n̄kpaidem ndifiọk ke kpukpru emi ọkọtọn̄ọ ke ntak n̄wed oro ẹkekụtde ke ọkpọusụn̄!

Côte d’Ivoire Ke adan̄aemi uyen Ntiense emi ekerede Berenger akakade ukwọrọikọ ke Abidjan, kpa ibuot obio Côte d’Ivoire, enye ama asan̄a ebe mma kiet emi akanyamde bred. Tọsịn franc ition ama ọbọhọ mma oro osop. Ke Berenger osụk emende okụk oro ndida nsọk enye, n̄wan efen ama edi edida do ofiori ete: “Nọ mi okụk oro; okụk mi ke edi!” Edi ke ini Berenger okobụpde m̀mê okụk esie emi osopde edi okụk ifan̄, mma oro ama ayat esịt adaha. Berenger ndien efehe ekesịm mma oro okụk esie okosopde. Idem ama akpa Berenger ndikop mma oro ọdọhọde ke okụk imọ ikosopke, ekem mma oro adian ete, “Oyom ndida n̄kari mbọ mi okụk.” Edi ke okụtde ke Berenger etịn̄ akpanikọ ye nte enye ọkọsọn̄ọde eyịre, mma emi ama ese ekpat esie inyụn̄ ikwe tọsịn franc ition, emi edide okụk bred 50.

Berenger ọkọdọhọ ete: “Mma nnọ enye okụk esie nnyụn̄ ndọhọ ke n̄kọnọ enye okụk oro sia Jehovah Abasi mi ekpepde mme asan̄autom esie ete ẹnam akpanikọ. Enye ama ọkọm mi onyụn̄ ọdọhọ ete: ‘Edieke kpukpru owo ẹkpenamde n̄kpọ nte Mme Ntiense Jehovah, kpukpru owo ẹkpedi ufan. Akpa n̄kụtde akparawa eyede ido ntem edi emi.’ Mma nnọ enye tract, enye onyụn̄ ọdọhọ ke ọtọn̄ọde ke ini oro, imọ iyakpan̄ utọn̄ inọ Mme Ntiense Jehovah. Usen oro n̄kenyene franc 50 kpọt ke ekpat. Kpa ye oro mma nnem esịt ndinam se inende.”

Democratic Republic of Congo Eugene edi ebiowo onyụn̄ anam utom nte owo ukpeme ke itie mbubehe daimọn. Enye ọdọhọ ete: “Mbubịteyo usen kiet owo ama edi itie urua daimọn nnyịn ndinyam daimọn emi akpade $22,000 (U.S.). Edi ekwo emi daimọn oro ọdọn̄ọde ama ọwọrọ enye ke ekpat osop. Enye ama oyom kpukpru ebiet ke mbrenyịn, edi ikwe. Ke ndan̄nsiere, eteutom ye nsan̄autom esie ẹma ẹsan̄a ofụri efak oro ẹyom ekwo oro edi ikwe. Ekem ke ini n̄kọtọn̄ọde ndikpọri an̄wa usen oro, mma ndikụt ekwo daimọn oro, mmen mfehe mbịne eteutom mi oro edide owo Belgium. Enye ikenịmke ke mmekeme ndinam oro. Mma nsian enye ke ndi kiet ke otu Mme Ntiense Jehovah ndien ke mmenen̄ede mbak Abasi mi. Sia edinam akpanikọ mi ekenen̄erede otụk andinyene daimọn oro, enye ama ofiori ete, ‘N̄kamamana n̄kwe utọ owo emi!’

“Nsan̄autom mi kiet ama ọdọhọ mi ete, ‘Eugene, afo amanam nnyịn iwọrọ eti etop!’

 “Mma n̄kọm enye nnyụn̄ ndọhọ nte: ‘Itoro enyene Jehovah, sia enye ekekpep mi ndinam akpanikọ.’”

Angola Ke ini João, emi edide isụn̄utom onyụn̄ anamde utom nte esenyịn circuit akakade obio-in̄wan̄ kiet, enye ama oyom ndiwụt nditọete ye mbon oro ẹnyenede udọn̄ ndise DVD oro Noah Walked With God—David Trusted in God. Eyenete emi ama emen ekpri ukwak unọ ikan̄, n̄kpọ utịn̄ikọ iba, aran ikan̄ ye ekpri kọmputa esie. Ke akpa obio-in̄wan̄, enye okodu ke ekpri ufọk ntan, onyụn̄ odiomi ndiwụt ndise oro ke mbubịteyo. Enye ọkọdọhọ ete: “Idem ama akpa mi ndikụt owo 38 ẹdide, ẹsan̄a ye akpakaha, nnyan n̄kpọitie, itiat, tian mmọn̄eba, ye mme n̄kpọ eken ndida ntie. Esịtufọk ikekemde mbahade iba ke otu mbon oro ẹkedide, ntre nnyịn ikenyene ndisio ndise oro ke an̄wa. Ke ini ediwak ntantaọfiọn̄ ẹkesụk ẹyamade ke ikpaenyọn̄, mma ndori kọmputa oro ke mbot kọrikọri ndien ediwak owo oro ẹkedide ẹma ẹbri ndiye ọfọn̄ Africa ẹtetie ke isọn̄ ẹse ndise oro.” Mbụk n̄kpọ emi ama ọsọsọp asuana ke edem oro, ndien ediwak owo ẹma ẹdi obio emi João okodude. Enye ọdọhọ ete: “Ke ini n̄kokụrede ndisio ndise emi, mme owo ikoyomke ndinyọn̄. Ediwak owo ẹkedọhọ ke okoneyo oro ekenem mmimọ akan ke ofụri uwem mmimọ, ẹnyụn̄ ẹkọm Jehovah ẹban̄a mme enọ eke spirit esie.” Ke urua ita oro João akakade ekese otu oro ẹdude ke obio-in̄wan̄ oro, owo 1,568 ẹkese DVD oro!

Ghana Vida emi esinyamde udia ke Accra ikamaha ndida nsek ikọn̄ n̄kanyam nnọ n̄kọk itieutom Ghana. Ntak-a? Etubom ufọkabasi mmọ ọkọdọhọ enye ke Mme Ntiense ẹsisọn̄ ido ye mbon oro mîdịghe Mme Ntiense. Ntem, idem ama akpa Vida ke akpa ini oro enye ekemende mme n̄kpọudia edi, koro mme anamutom ke itie utemudia ẹketuakde inua imam, ẹnam n̄kpọ ye enye ukpono ukpono, ẹnyụn̄ ẹkọm enye. Ke urua ifan̄ oro ẹketienede, enye ama emehe ye nditọete ke n̄kọk itieutom, okụt nte mmọ ẹfọnde ido ye enye onyụn̄ ọdiọn̄ọ ndien ke etubom ufọkabasi mmimọ iketịn̄ke akpanikọ inọ imọ.

Sia Vida okoyomde ndikpep n̄kpọ efen efen, enye ama ọdọhọ ẹtọn̄ọ ndikpep imọ Bible kpa ye oro enye mîkọfiọkke ndikot n̄wed. Ke ufan̄ ọfiọn̄ itiokiet enye ama ekpep ndikot Bible, onyụn̄ ana baptism ke mbono district ndondo emi. Kpa ye oro mbonubon ye n̄kani ufan esie ẹsisakde Vida, enye an̄wam eyen eyeneka eka esie akabade edi asuanetop oro mînaha kan̄a baptism.

Ethiopia Ete kiet emi ekerede Awoke iketịmke inyene udọn̄ ke akpanikọ kpa ye oro n̄wan esie edide Ntiense ke n̄kpọ nte isua duop. Edi ke ini enye akakade ndibọ ukpep ọfiọn̄ iba ke itie en̄wen ke idụt oro, enye ama ebiere ndiyom Mme Ntiense n̄kụt. Ke ama ekesịm do, ẹma ẹteme enye ọfis kiet emi eyenete nnyịn an̄wan anamde utom. Eyenete nnyịn emi ama esibọn̄ akam ete erenowo edi edin̄wam esop do. Ke ini ẹkesiande enye ke ete kiet ke oyom Mme Ntiense Jehovah, enye ama ọsọsọp eti akam esie. Ke okụtde Awoke, emi ekesịnede n̄kpọ onyụn̄ akamade idem ediye ediye, eyenete emi ekekere ke obufa eyenete eren emi imọ ikesibọn̄de akam iyom edi emi. Enye ama ọsọsọp ọkọm Awoke ufiop ufiop ke ntak inemesịt. Ke okụtde nte esịt enemde eyenete emi, Awoke ikekemeke ndidọhọ enye ke imọ idịghe kan̄a Ntiense, enye n̄ko ikoyomke ndiyat eyenete oro esịt ke ini ekemende enye owụt nditọete eken. Awoke ama odụk kpukpru mbono esop ke ini enye okodude do. Ke ini ukpep esie okokụrede, onyụn̄ ekemde ini unyọn̄ esie, nditọete iban ifan̄ ẹma ẹkot enye udia uwemeyo, ekem ẹdọhọ enye ọbọn̄ akam udia. Enye ama eti ndien nte n̄wan esie ekesibọbọde bọkịd ọbọn̄ akam udia mmọ ke enyịn̄ Jesus. Ntre enye ama ọbọn̄ akam oro edifọn edifọn. Mfọnido oro ẹkewụtde Awoke ama enen̄ede otụk enye tutu enye ebiere ndidi ata eyenete. Ke ama ọkọnyọn̄ ufọk, enye ama ọtọn̄ọ ndikpep Bible onyụn̄ ana baptism ke mbono oro ẹkenịmde ndondo emi. Esịt enen̄ede enem n̄wan Awoke, ndien enye Awoke ke ebet ini emi enye edibụkde mbụk idemesie inọ esop oro enye okodụkde mbono esop.