Nte Ẹkemede Ndidiọn̄ọ Ido Ukpono Akpanikọ

ATA ediwak ido ukpono ẹdọhọ ke ukpepn̄kpọ mmimọ oto Abasi. Ntak edi oro ọfọnde ndinam item John, apostle Jesus, emi ekewetde ete: “Ndima, ẹkûnịm kpukpru ikọ odudu spirit ke akpanikọ, edi ẹdomo mme ikọ odudu spirit ẹse man ẹkụt m̀mê mmọ ẹtọn̄ọ ẹto Abasi, koro ediwak prọfet nsu ẹwọn̄ọ ẹdụk ke ererimbot.” (1 John 4:1) Didie ke nnyịn ikeme ndidomo n̄kpọ nse m̀mê oto Abasi?

Kpukpru n̄kpọ oro ẹtode Abasi ẹwụt edu esie, akpan akpan ima, emi edide n̄wọrọnda edu esie. Ke uwụtn̄kpọ, ibuo nnyịn emi esinamde ikop utebe ikọn̄, ufuọn̄ flawa, m̀mê ufuọn̄ obufa bred, owụt ima Abasi. Nnyịn ndikeme ndikụt nte utịn osopde, ọfọn̄ekpo, m̀mê eyenọwọn̄ atuakde inua imam, owụt ke Abasi ama nnyịn. Ntre n̄ko ke edi ke ini ikopde mme owo ẹkwọde ndinem ikwọ, uyo inuen, m̀mê ndikop uyo iman m̀mê ufan nnyịn. Kpa ye oro idide mme anana-mfọnmma, usụn̄ oro Abasi obotde nnyịn owụt ke enye ama nnyịn. Ntak edi oro isiwakde ndikụt nte ikọ Jesus emi edide akpanikọ: “Inemesịt okpon ke ndinọnọ akan ke ndibọbọ.” (Utom 20:35) Esinem nnyịn ndima ima koro ẹkebotde nnyịn “ke mbiet Abasi.” (Genesis 1:27) Okposụkedi Jehovah enyenede ediwak edu efen, ima edi ata n̄wọrọnda edu esie.

N̄wed emi otode Abasi ekpenyene ndiwụt ima esie. Mme ido ukpono ererimbot emi ẹnyene ediwak n̄wed eset. Ndi mme n̄wed oro ẹnen̄ede ẹwụt ima Abasi?

Ke akpanikọ, ata ediwak n̄wed ido ukpono oro ẹkewetde ke eset inen̄ekede itịn̄ n̄kpọ iban̄a nte Abasi amade nnyịn m̀mê nte nnyịn ikemede ndima Abasi. Ntem, ata ediwak owo inyeneke ibọrọ ke ini mmọ ẹbụpde ẹte: “Ntak emi ndutụhọ ye idiọkn̄kpọ ẹsụk ẹkade iso ke ini mme n̄kpọ oro Abasi obotde ẹwụtde ke enye ama nnyịn?” Ke n̄kan̄ eken, Bible edi n̄kukụre n̄wed ido ukpono oro ẹkewetde ke eset, emi enen̄erede etịn̄ n̄kpọ aban̄a ima Abasi. Enye n̄ko ekpep nnyịn nte ikpamade ima.

N̄wed Oro Aban̄ade Ima

Ikọ Abasi, kpa Bible, owụt ke Jehovah edi “Abasi ima.” (2 Corinth 13:11) Bible etịn̄ nte ima akanamde Jehovah obot akpa owo iba onyụn̄ ọnọ mmọ uwem emi udọn̄ọ ye n̄kpa mîdụhe. Edi mmọ ndikọsọn̄ ibuot ye Abasi ama ada ndutụhọ ọsọk ubonowo. (Deuteronomy 32:4, 5; Rome 5:12) Jehovah ama anam n̄kpọ man akpafiak ọnọ owo se ẹkeduọkde. Ikọ Abasi ọdọhọ ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) Edisana N̄wed Abasi anam ima Abasi enen̄ede an̄wan̄a ke ini enye etịn̄de aban̄a mfọnmma ukara oro Abasi ayakde ọnọ Jesus akara  man akpada emem ọsọk okopitem ubonowo.—Daniel 7:13, 14; 2 Peter 3:13.

Bible etịn̄ se owo enyenede ndinam ibio ibio ete: “‘Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.’ Emi edi n̄kponn̄kan ye akpa ewụhọ. Udiana, eke ebietde enye, edi emi, ‘Afo enyene ndima mbọhọidụn̄ fo nte idemfo.’ Ofụri Ibet . . . ẹkọn̄ọ ke ewụhọ mbiba emi.” (Matthew 22:37-40) Ẹdọhọ ke ẹkeda odudu spirit Abasi ẹwet Bible. Sia Bible enen̄erede owụt edu Abasi, nnyịn imekeme ndinịm ke enye oto “Abasi ima.”—2 Timothy 3:16.

Ke ikerede iban̄a n̄wed oro enemede ima Abasi, nnyịn imekeme ndidiọn̄ọ n̄wed eset oro enen̄erede oto Abasi. Ima n̄ko anam ẹdiọn̄ọ ata mme andituak ibuot nnọ Abasi, koro mmọ ẹkpebede Abasi ke ndima ima.

Nte Ẹkpediọn̄ọde Mbon Oro Ẹmade Abasi

Ẹtịm ẹdiọn̄ọ mbon oro ẹnen̄erede ẹma Abasi, akpan akpan idahaemi, oro nnyịn idude uwem ke ini emi Bible okotde “mme akpatre usen.” Mme owo ẹka iso ndidi ‘mme ama idem, mme ama okụk, ẹnyụn̄ ẹma inemesịt utu ke ndima Abasi.’—2 Timothy 3:1-4.

Didie ke afo ekeme ndidiọn̄ọ mbon oro ẹmade Abasi? Bible ọdọhọ ete: “Emi edi se ndima Abasi ọwọrọde, ete nnyịn inịm ibet esie.” (1 John 5:3) Ima oro ẹnyenede ẹnọ Abasi anam mme owo ẹkpono mme idaha ido uwem oro ẹwetde ke Bible. Ke uwụtn̄kpọ, enyene ibet emi Ikọ Abasi ọnọde aban̄a idan̄ ye ndọ. N̄wan ye ebe kpọt ẹdot ndinyene ebuana idan̄, ndien ndọ ekpenyene ndidi nsinsi mbọbọ. (Matthew 19:9; Mme Hebrew 13:4) Ke ini n̄wan kiet ke Spain emi edide eyen ukpepn̄kpọ ido ukpono okodụkde mboho emi Mme Ntiense Jehovah ẹkekpepde mbet ido uwem oro ẹwetde ke Bible, enye ọkọdọhọ ete: “N̄kọnyọn̄ ye inemesịt, idịghe n̄kukụre ke ntak inem inem utịn̄ikọ Bible kpọt, edi n̄ko ke ntak edidianakiet mmọ, n̄kokon̄ idaha ido uwem, ye nti edu mmọ.”

Ke adianade ye mmọ ndima Abasi, ẹkeme ndisọsọp ndiọn̄ọ ata mme Christian ke nte mmọ ẹmade mbọhọidụn̄ mmọ. Ata akpan utom mmọ edi ndin̄wam mbon en̄wen ẹfiọk n̄kukụre idotenyịn ubonowo, kpa Obio Ubọn̄ Abasi. (Matthew 24:14) Idụhe n̄kpọ efen emi ekemede ndida ufọn nsọk mbọhọidụn̄ mmọ nte ndin̄wam mmọ ẹnyene ifiọk Abasi. (John 17:3) Ata mme Christian ẹsiwụt ima n̄ko ke mme usụn̄ efen. Mmọ ẹsin̄wam mbon oro ẹkụtde ndutụhọ. Ke uwụtn̄kpọ, ke ini unyekisọn̄ eketịbede ke Italy, n̄wedmbụk n̄kpọntịbe kiet ke idụt oro ọkọdọhọ ke Mme Ntiense Jehovah ẹma “ẹnam n̄kpọ ke eti usụn̄, ẹn̄wam mbon oro ẹkụtde ukụt, inyụn̄ ikereke m̀mê ewe ido ukpono ke mmọ ẹsika.”

Ke ẹsiode ndima Abasi ye mbọhọidụn̄ ẹfep, ata mme Christian ẹma kiet eken. Jesus ọkọdọhọ ete: “Ami mmọnọ mbufo obufa ibet, nte mbufo ẹma kiet eken; kpa nte n̄kamade mbufo, nte mbufo n̄ko ẹma kiet eken. Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.”—John 13:34, 35.

Nte ẹsisọsọp ẹkụt ukpụhọde oro odude ke ima oro ata mme Christian ẹnyenede ẹnọ kiet eken? Eyenufọk kiet emi ekerede Ema ekekere ke ẹsisọp ẹkụt ukpụhọde emi. Eyenan̄wan emi anam utom ke La Paz, ke Bolivia emi asari eke ekpụk esiwakde ndidianade mme imọ owo n̄kpọn̄ mme ubuene. Enye ọkọdọhọ ete: “Akpa ini oro n̄kodụkde mboho Mme Ntiense Jehovah, mma n̄kụt eren kiet oro ekesịnede ọfọn̄ ediye ediye enemede nneme ye n̄wan India. Akananam n̄kwe utọ n̄kpọ oro. Ke ndondo oro, mma mfiọk ke mmọ ẹdi ikọt Abasi.” Ukem ntre, n̄kaiferi Brazil kiet emi ekerede Miriam ọkọdọhọ ete: “Idem ke ubon nnyịn, n̄kọfiọkke nte n̄kpasan̄ade n̄kop inemesịt. Akpa ini oro n̄kokụtde mme owo ẹmade ima ekedi ke otu Mme Ntiense Jehovah.” Ke United States, ete kiet emi edide adausụn̄ ke itie usuanetop ekebe ndise ekewet ete: “Edieke ediwak owo ẹkpedude uwem nte mbon ido ukpono mbufo ẹdude, idụt emi ikpetiehe nte  enye etiede emi. Ami ndi ọkọmbụk n̄kpọntịbe, ndien mmọfiọk ke esop mbufo edi esop ima, ye nte ke mbufo ẹmenen̄ede ẹnyene mbuọtidem ke Andibot.”

Yom Ido Ukpono Akpanikọ

Ima edi n̄kpọ kiet emi ẹdade ẹdiọn̄ọ ido ukpono akpanikọ. Jesus ekemen owo ndikụt ido ukpono akpanikọ odomo ye owo ndikụt nnennen usụn̄ nnyụn̄ mmek ndisan̄a ke esịt. Enye edi n̄kukụre usụn̄ emi adade esịm nsinsi uwem. Jesus ọkọdọhọ ete: “Ẹbe ke mfafaha inuaotop ẹdụk; koro usụn̄ emi adade owo esịm nsobo atatara onyụn̄ an̄wan̄a, mme andidụk ke esịt esie ẹnyụn̄ ẹwak; edi inuaotop emi adade owo esịm uwem afafaha usụn̄ esie onyụn̄ esịre, mme andikụt enye inyụn̄ iwakke.” (Matthew 7:13, 14) Otu ata mme Christian kiet kpọt ẹdiana kiet ẹsan̄a ye Abasi ke usụn̄ utuakibuot akpanikọ. Mmọdo, ọfọn etịm ekere m̀mê ewe ido ukpono ke afo ekpemek. Edieke afo okụtde usụn̄ oro onyụn̄ emekde ndisan̄a ke esịt, ọwọrọ ke omokụt mfọnn̄kan usụn̄ uwem, oro onyụn̄ edide usụn̄ ima.—Ephesus 4:1-4.

Kere ban̄a utọ idatesịt oro afo ekemede ndinyene nte asan̄ade ke usụn̄ utuakibuot akpanikọ! Enye etie nte afo ndisan̄a ye Abasi. Abasi eyekpep fi ọniọn̄ ye ima man afo ekpekeme ndinyene eti itie ebuana ye mbon en̄wen. Enye eyekpep fi uduak uwem, ndien afo emekeme ndifiọk mme un̄wọn̄ọ Abasi onyụn̄ enyene idotenyịn aban̄a ini iso. Tutu amama, afo udutuaha n̄kpọfiọk ke ndikoyom ido ukpono akpanikọ.

[Ndise ke page 5]

Ke otu n̄wed ido ukpono oro ẹkewetde ke eset, Bible kpọt owụt ke Abasi edi ima

[Mme ndise ke page 7]

Ima ke ẹda ẹdiọn̄ọ ata mme Christian