Se Christ Edinamde ke Ama Edi

“AFAI KE SÃO PAULO.” Ntre ke Veja magazine eketịn̄ aban̄a usen inan̄ ke May 2006 oro n̄ka ubiatibet ẹkenamde enyene-ndịk n̄kpọ “oro okomụmde owo mbọribọ” ke n̄kponn̄kan obio Brazil oro oforode akan. N̄kpọ nte owo 150 ẹma ẹkpan̄a ke “afai oro ekebede usen inan̄,” ndien emi ama esịne mme ekpeme ibet, mme abiatibet, ye mbon eken ke obio.

Afai edi ọsọ n̄kpọ ke se ikperede ndidi kpukpru ebiet ke isọn̄. Enen̄ede etie nte ukara owo ikemeke nditre enye. Ererimbot ọdiọk akan nte ekedide. Eyedi afịna fi nte idiọk mbụk ẹyọhọde kpukpru ebiet. Nte ededi, ibịghike n̄kpọ ọmọn̄ okpụhọrede.

Jesus ama ekpep mme anditiene enye ete ẹbọn̄ akam ẹben̄e Obio Ubọn̄ Abasi edi, ẹnyụn̄ ẹben̄e ẹte uduak Abasi edida itie, “nte edide ke heaven, yak edi ke isọn̄ kpasụk ntre.” (Matthew 6:9, 10) Obio Ubọn̄ emi edi ukara, ndien Jesus edi Edidem emi Abasi emekde. Enye ọyọkọk kpukpru mfịna ubonowo. Nte ededi, ana ẹbọ mme owo ukara ẹnọ Christ man Obio Ubọn̄ Abasi ekeme ndinam ukpụhọde ke isọn̄. Se Christ edinamde edi oro ke ama edi.

Nte Ẹyeyak Ukara Ẹnọ Christ Emem Emem?

Nte mme idụt ẹyeyak ukara ẹnọ Christ emem emem? N̄kukụt oro ẹkenamde apostle John okụt ọbọrọ mbụme emi. John ọdọhọ ete: “Ndien n̄kụt idiọk unam [n̄ka ukaraidem ererimbot] ye ndidem isọn̄ ye udịmekọn̄ mmọ ẹsopde idem ọtọkiet ẹte in̄wana ekọn̄ ye andidoro ke edem enan̄ mbakara [Jesus] ye udịmekọn̄ esie.” (Ediyarade 19:19) Nso iditịbe inọ ndidem isọn̄ ke ekọn̄ emi? Bible ọdọhọ ke Edidem oro Jehovah eyetde aran “ayanuak mmọ ke esan̄ ukwak; onyụn̄ obom mmọ nte n̄kpọ eke obot-eso anamde.” (Psalm 2:9) Ẹyenuak n̄ka ukaraidem ererimbot ofụri ofụri. Obio Ubọn̄ Abasi “ayanuak onyụn̄ ama kpukpru [ukara owo], ndien enye ayada ke nsinsi.”—Daniel 2:44.

Nso kaban̄a mbon emi ẹbiọn̄ọde Obio Ubọn̄ Abasi? “Ke ediyarade Ọbọn̄ Jesus emi editode ke heaven edi ye mme okopodudu angel esie ke ikan̄ eke asakde,” ẹtịn̄ ẹban̄a Jesus nte “adade usiene ọsọk mmọ eke mîfiọkke  Abasi ye mmọ eke mîsụkke ibuot inọ eti mbụk.” (2 Thessalonica 1:7, 8) Mme N̄ke 2:22 ọdọhọ ke “ẹyesobo mme idiọk owo ke isọn̄ ẹfep, ẹnyụn̄ ẹsọhi mbon abian̄a ẹfep ke esịt.”

Bible etịn̄ aban̄a edidi Christ ntem ete: “Sese! Enye ọmọn̄ asan̄a ke obubịt enyọn̄ edi, ndien kpukpru enyịn ẹyekụt enye.” (Ediyarade 1:7) Mme owo ididaha ata enyịn mmọ ikụt enye. Tọn̄ọ nte Jesus ekeset aka heaven, enye edi owo eke spirit “emi odụn̄de ke un̄wana eke owo mîkemeke ndisan̄a n̄kpere, emi . . . baba owo kiet mîkwe mîdinyụn̄ ikemeke ndikụt.”—1 Timothy 6:16.

Kpa nte mîkoyomke Jehovah emen idem owo esịne man ẹkụt enye ke ini ọkọnọde nditọ Egypt Ufen Duop ke eyo Moses, kpa ntre n̄ko iyomke Jesus emen idem owo esịne man mme odụn̄ isọn̄ “ẹkụt” enye. Mme owo eyo oro ẹma ẹfiọk ke Jehovah ọkọnọ mme ufen oro, ndien oro ama anam mmọ ẹfiọk odudu esie. (Exodus 12:31) Kpasụk ntre, ke ini Christ edidade odudu oro Abasi ọnọde enye osobo mme idiọkowo, mmọ “ẹyekụt,” oro edi, ẹyefiọk ke Abasi ada Jesus ebiere ikpe ọnọ mmimọ. Mmọ ẹyefiọk emi sia ẹyebem iso ẹtọt mmọ. Ke akpanikọ, “kpukpru enyịn ẹyekụt [Jesus], . . . ndien kpukpru mme esien isọn̄ ẹyeyịbi idem mmọ ke mfụhọ ẹban̄a enye.”—Ediyarade 1:7.

Man ata emem ye uforo afiak edidu ke isọn̄, ana ẹsobo mme idiọkowo ẹnyụn̄ ẹsio idiọk ukara owo ẹfep. Christ ayanam oro. Ekem enye ayakara isọn̄ ofụri ofụri, ndien ke oro ebede, n̄kpọ ẹyenen̄ede ẹkpụhọde.

Mme Ufọn Edinam N̄kpọ Ẹtọn̄ọ Ntak Ẹfọn

Apostle Peter ama etịn̄ aban̄a ini emi “ẹdinamde kpukpru n̄kpọ ẹtọn̄ọ ntak ẹfọn ẹma, emi Abasi eketịn̄de ebe ke inua ndisana prọfet esie eke eset.” (Utom 3:21) Emi abuana mme ukpụhọde oro ẹdinamde ke isọn̄ ke ini ukara Christ. Isaiah, emi okodude uwem ke ọyọhọ isua ikie itiaita M.E.N, edi kiet ke otu mme prọfet oro Abasi akadade etịn̄ nte “[edinamde] kpukpru n̄kpọ ẹtọn̄ọ ntak ẹfọn ẹma” ke isọn̄. Enye ama ebem iso etịn̄ ete ke Jesus Christ, “Ọbọn̄ Emem,” ayanam emem afiak edidu ke isọn̄. Ntịn̄nnịm ikọ Isaiah ọdọhọ ke ‘ubọn̄ Christ ye emem ididopke ke nsinsi.’ (Isaiah 9:6, 7) Jesus eyekpep mme owo ndidu ke emem. “Ediwak emem ẹyenyụn̄ ẹnem [mme andidụn̄ ke isọn̄] esịt.”—Psalm 37:11.

Ndi unana ye biọn̄ ẹyedu ke ini ukara Christ? Isaiah ọkọdọhọ ete: “Ndien ke obot emi ke Jehovah mme udịm edinam akamba udia ọnọ kpukpru mme idụt, n̄kpọ eke enyenede isek, ndia ke wine eke anade ke ntak, ke n̄kpọ eke enyenede isek, ẹnyụn̄ ẹwakde ndia, wine ke ntak eke ẹtịmde ẹdụk.” (Isaiah 25:6) Andiwet psalm ọkọdọhọ ete: “Uwak ibokpot ẹyedu ke isọn̄ ke nsom ikpọ obot; mfri esie ẹyenyen̄e nte Lebanon: ndien mbio-obio ẹyesehe nte mbiet in̄wan̄.” (Psalm 72:16) Akan oro, nnyịn ikot ntem iban̄a mme andidụn̄ isọn̄ ite: “Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ. Mmọ idibọpke, ndien owo en̄wen odụn̄; iditọhọ, ndien owo efen adia: koro usen ikọt mi ebietde usen eto, ndien edimek ikọt mi ẹyedia se ubọk mmọ ẹnamde.”—Isaiah 65:21, 22.

Isaiah ama ebem iso etịn̄ n̄ko aban̄a utịt udọn̄ọ ye n̄kpa. Abasi akada Isaiah etịn̄ ete: “Ndien enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan. Ndien mbụn̄ọ eyenek nte edop, edeme imụm oyonyụn̄ ọkwọ.” (Isaiah 35:5, 6) “Ndien andidụn̄ ididọhọke ite, Ndọdọn̄ọ.” (Isaiah 33:24) Abasi “eyemen n̄kpa ke nsinsi; Ọbọn̄ Jehovah [oyonyụn̄] ọkwọhọde kpukpru iso mmọn̄eyet efep.”—Isaiah 25:8.

Nso kaban̄a mme akpan̄kpa oro ẹdude ke “udi editi”? (John 5:28, 29) Isaiah ama etịn̄ ntịn̄nnịm ikọ ete: “Mme akpa-n̄kpa fo ẹyedu uwem, . . . [mmọ] ẹyebụhọde.” (Isaiah  26:19) Ih, ẹyenam mbon oro ẹma ẹkekpan̄a ẹset!

“Abasi Edi Ebekpo Fo ke Nsinsi Nsinsi”

Isọn̄ ayafiak eketie nte eketiede ke akpa ke Christ ama edi. Ẹyenam isọn̄ akabade edi ata ediye Paradise, ndien ubonowo ẹyediana kiet ẹtuak ibuot ẹnọ ata Abasi. Nte nnyịn imekeme ndinen̄ede nnịm ke Jesus Christ eyekeme ndisio idiọkido ke isọn̄ onyụn̄ anam n̄kpọ ẹfọn?

Kere ban̄a enye emi ọnọde Jesus ukeme ye odudu ukara. Bible etịn̄ aban̄a Eyen Abasi ete: “Abasi edi ebekpo fo ke nsinsi nsinsi, ndien mmọnyọ obio ubọn̄ fo edi mmọnyọ edinen ido. Afo amama edinen ido, onyụn̄ asua ubiatibet.” (Mme Hebrew 1:8, 9) Ebekpo Jesus, oro edi, idaha ye odudu ukara esie, oto Jehovah. Abasi ọkọtọn̄ọ onyụn̄ ọnọ enye ebekpo emi. Idụhe mfịna oro edisọn̄de akan Jesus ndikọk.

Jesus ọkọdọhọ mme mbet esie ke ama ekeset ke n̄kpa ete: “Ẹmenọ mi kpukpru odudu ke heaven ye ke isọn̄.” (Matthew 28:18) Akpa Peter 3:22 ọdọhọ ke “ẹma ẹnyụn̄ ẹnam mme angel ye mme andikara ye mme enyene-odudu ẹsụk ibuot ẹnọ enye.” Idụhe mme enyene-odudu ye mme andikara oro ẹdikemede ndibiọn̄ọ Jesus. Idụhe se idikpande enye ndinam se ididade ufọn isọk ubonowo ke nsinsi.

Didie ke Mme Owo Ẹse Edidi Christ?

Apostle Paul ekewet ke leta oro enye ọkọnọde ẹsọk mbon Thessalonica ete: “Nnyịn [iditreke] nditi utom mbuọtidem mbufo ye ọkpọsọn̄ utom ima mbufo ye ime mbufo oto ke ntak idotenyịn mbufo ke Ọbọn̄ nnyịn Jesus Christ ke iso Abasi ye Ete nnyịn.” (1 Thessalonica 1:3) Paul ọkọdọhọ ke idotenyịn oro owo enyenede ke Jesus Christ edinam enye anam eti utom onyụn̄ enyene ime. Idotenyịn oro esịne ndibuọt idem ke edidi Christ ye nte ke enye ayanam kpukpru n̄kpọ ẹtọn̄ọ ntak ẹfọn ẹma. Utọ idotenyịn oro ekeme ndinam ata mme Christian ẹyọ, kpa ye ata n̄kpọsọn̄ idaha.

Da Carlos, emi odụn̄de ke São Paulo ke Brazil, ke uwụtn̄kpọ. Ke August 2003, Carlos ama edifiọk ke imenyene kansa. Ọtọn̄ọde ke ini oro, enye aka usiakidem utịm ikatiaita, ndien oro anam enye okop ubiak onyụn̄ enyene mme afanikọn̄ eken. Kpa ye oro, enye aka iso ndisịn udọn̄ nnọ mbon en̄wen. Ke uwụtn̄kpọ, nte enye okosụk ọkwọrọde ikọ ke efak oro asakde iso ese akamba ufọkibọk kiet, enye ama okụt n̄wan kiet emi edide kiet ke otu Mme Ntiense Jehovah, emi ebe esie okosụk ọbọde usọbọ mmọn̄ibọk. Carlos ama esịn udọn̄ ọnọ onyụn̄ ọdọn̄ ebe ye n̄wan emi esịt sia enye ọfiọk nte udọn̄ọ kansa esibiakde owo. Ke oro ebede, ebe ye n̄wan oro ẹma ẹdọhọ ke nneme oro mmimọ ikenyenede ye enye ama enen̄ede esịn udọn̄ ọnọ mmimọ. Ntem, Carlos ama edikụt ke ikọ Paul emi edi akpanikọ: “[Abasi ọdọn̄] nnyịn esịt ke kpukpru ukụt nnyịn, man nnyịn ikpekeme ndidọn̄ mbon oro ẹdude ke ukụt ekededi esịt ebe ke ndọn̄esịt oro Abasi ọnọde nnyịn.”—2 Corinth 1:4.

Nso inam Carlos ekeme ndika iso nsịn udọn̄ nnọ mbon en̄wen kpa ye udọn̄ọ esie? Edi idotenyịn edidi Christ ye kpukpru se iditịbede ini oro anam Carlos aka iso anam “se ifọnde.”—Galatia 6:9.

Kere ban̄a se iketịbede n̄ko inọ Samuel, emi ẹkewotde eyeneka esie ẹkpere ufọk mmọ. Ẹma ẹtop itiatikan̄ duop ẹdọn̄ eyeneka esie ke idem. Okpo esie ama ana ke mbenusụn̄ ke hour itiaita ke adan̄aemi mme bodisi ẹkesụk ẹnamde ndụn̄ọde man ẹfiọk mme andiwot enye. Se iketịbede usen oro inọ Samuel ekedi akpakpa ufreke. Nte ededi, enye ọbọ ndọn̄esịt sia enyenede idotenyịn ke Christ oyosio idiọkido efep ke isọn̄ fapfap ye nte ke edinen ukara oro editienede eyemen edidiọn̄ ọsọk ubonowo. Samuel esiwak nditie n̄kere nte imọ idifatde eyeneka imọ ke  ẹma ẹnam enye eset ke Paradise ke isọn̄.—Utom 24:15.

Nso ke Ana Afo Anam?

Idotenyịn edidi Christ ye se iditịbede ini oro eyenen̄ede ọdọn̄ fi esịt. Jesus Christ oyosio kpukpru se idide ntak mfịna ubonowo efep ye mme afanikọn̄ oro nnyịn isobode.

Nso ke ana afo anam man ọbọ mme edidiọn̄ oro ukara Christ edidade ọsọk ubonowo? Tọn̄ọ ndinen̄ede n̄kpep Ikọ Abasi, kpa Bible. Jesus ọkọbọn̄ akam ọnọ Ete esie ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:3) Nam edi utịtmbuba fo ndidụn̄ọde se Bible ekpepde. Mme Ntiense Jehovah ke edem mbufo ẹyema ndin̄wam fi anam emi. Nnyịn imesịn udọn̄ inọ fi ndisobo ye mmọ mîdịghe wet n̄wed nọ ẹsọk mme andisio magazine emi.

[Mme ndise ke page 7]

Isọn̄ ayafiak eketie nte eketiede ke akpa ke Christ ama edi

[Ebiet Ẹdade N̄kpọ Ẹto]

Esịt esịt, ata edem edem kpọt: Rhino and Lion Park, Gauteng, South Africa