Sese! Un̄wana Edi Utịbe!

EDIEKE akanam asan̄ade ke ekịm, do, afo ọmọfiọk nte oro ekemede ndidiọk owo esịt. Enem didie ntem ndikụt un̄wana! Ekeme ndidi ama odu ke idaha oro etiede nte ekịm. Eyedi emi eketịbe ke ini mûkọfiọkke nte ọkpọkọkde akpan mfịna. Ekem ama ọtọn̄ọ ndikụt un̄wana sụn̄sụn̄—oro edi, ama ọtọn̄ọ ndikụt nte ọkpọkọkde mfịna oro. Ama enen̄ede enem fi ndiwọrọ ke utọ ekịm oro ndụk un̄wana.

Ekese owo ẹkedu ke ekịm eke spirit ke akpa isua ikie. Apostle Peter ekewet ntem ọnọ mbon oro ẹkekpọn̄de akani ido ukpono mmọ ẹkabade ẹdi Christian, ete: “[Abasi okokot] mbufo osio ke ekịm esịn ke utịbe un̄wana esie.” (1 Peter 2:9) Emi eketie mmọ ke idem nte n̄kpọ eke mmọ ẹkewọrọde ke makmak ekịm ẹdụk akwa un̄wana. Ẹkeme n̄ko ndimen oro ndomo ye owo oro okodude ikpọn̄ onyụn̄ ananade idotenyịn, ndien ekem enye okụt idemesie ke ubon oro ẹnyenede eti ini iso.—Ephesus 2:1, 12.

“Ọmọkpọn̄ Ima Emi Afo Ekenyenede ke Akpa”

Akpa mme Christian ẹma ẹkụt “akpanikọ”—kpa ata akpanikọ Christian. (John 18:37) Mmọ ẹma ẹkụt utịbe utịbe un̄wana akpanikọ ẹnyụn̄ ẹwọrọ ke ekịm eke spirit ẹdụk un̄wana oro. Nte ededi, nte ini akakade, ifiopesịt ye ifịk oro ndusụk Christian ẹkenyenede ama etehede ube. Ke uwụtn̄kpọ, etisịm utịt akpa isua ikie, akamba mfịna ama ọnyọni odụk esop Ephesus. Jesus Christ emi ẹkenamde eset ama asiak mfịna mmọ, ete: “Mmenyene emi ndida mbiom fi, nte ke ọmọkpọn̄ ima emi afo ekenyenede ke akpa. Ke ntre ti itie emi afo ọduọde ọkpọn̄, ndien kabade esịt nyụn̄ nam mme akpa edinam.” (Ediyarade 2:4, 5) Akana mme Christian ke Ephesus ẹfiak ẹma Abasi ẹnyụn̄ ẹma akpanikọ nte ẹkemade ke akpa.

Nso kaban̄a nnyịn? Nnyịn n̄ko imokop idatesịt ndikụt un̄wana, oro edi, ndifiọk utịbe utịbe akpanikọ N̄wed Abasi. Nnyịn imedi idima akpanikọ. Edi mme afanikọn̄ oro ẹdide ọsọ mfịn ẹkeme ndinam nnyịn itịmke ima akpanikọ aba. Mme mfịna “akpatre usen” emi ẹkeme ndinam afanikọn̄ nnyịn ọdọdiọn̄ okpon. Nnyịn idu ke ererimbot oro “ndiọkeyo” odude—ererimbot oro mme owo ẹdide “mme ama idem, mme ama okụk, ẹwụt idem, ẹtan̄ idem, ẹsụn̄i isụn̄i, ẹsọn̄ ibuot ye ete ye eka, ẹnana esịtekọm, inyeneke nsọn̄ọnda.” (2 Timothy 3:1, 2) Mmọ ẹkeme ndinam nnyịn itek ke ifịk ẹnyụn̄ ẹnam ima oro imade Jehovah ebịt.

Edieke nnyịn mîmaha Abasi nte ikamade ke akpa, ana nnyịn ‘iti ke imọduọ inyụn̄ ikabade esịt.’ Ana ifiak ima Abasi nte ikamade ke akpa. Ke adianade do, ana ikpeme mbak ima oro imade akpanikọ edisụhọde. Edi akpan n̄kpọ didie ntem kpukpru nnyịn ndidat esịt mban̄a idotenyịn oro inyenede, nnyụn̄ n̄ka iso mma Abasi ye Ikọ esie!

‘Akpanikọ Oro Anamde Nnyịn Iwọrọ Ufụn’

Un̄wana oro akpanikọ N̄wed Abasi ọnọde enen̄ede edi utịbe koro enye ọbọrọ mme akpan mbụme oro ayan̄ade ubonowo ifiọk ke ediwak tọsịn isua. Mme utọ mbụme oro ẹdi emi: Ntak emi nnyịn idude mi ke isọn̄-ọ? Nso  idi uduak uwem? Ntak emi idiọkn̄kpọ odude? Ndi owo esika iso odu uwem ke enye ama akakpa? Jehovah ada utịbe utịbe ukpepn̄kpọ akpanikọ Bible anam nnyịn ifiọk mme n̄kpọ emi. Nte nnyịn ikpenen̄ekede iwụt esịtekọm? Akpakam nnyịn idehedei ida se ikpepde ke mbio!

Jesus ọkọdọhọ mme mbet esie ete: “Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.” (John 8:32) Uwa ufak Jesus anam ikeme ndiwọrọ ke ufụn idiọkn̄kpọ ye n̄kpa. Ke adianade do, ọsọn̄urua akpanikọ N̄wed Abasi iyakke nnyịn inana ifiọk inyụn̄ inana iwụk nte ererimbot oro enyịnede ke ekịm mi ananade. Nditie n̄kere nnyụn̄ mma se ikpepde ayanam itetịm ima Jehovah ye Ikọ esie.

Apostle Paul ọkọdọhọ ke leta oro enye ekewetde ọnọ esọk mme Christian ke Thessalonica ete: “Ke ini mbufo ẹbọde ikọ Abasi, emi mbufo ẹkekopde ẹto nnyịn, mbufo ibọhọ enye nte ikọ owo, edi, kpa nte enye ke akpanikọ edide, nte ikọ Abasi, emi n̄ko anamde utom ke idem mbufo mme andinịm ke akpanikọ.” (1 Thessalonica 2:13) Mbon Thessalonica ẹma ẹkop ẹnyụn̄ ‘ẹbọ ikọ Abasi ye idatesịt.’ Mmọ ikodụhe aba ke “ekịm.” Edi mmọ ẹkekabade ẹdi “nditọ un̄wana.” (1 Thessalonica 1:4-7; 5:4, 5) Mme Christian emi ẹma ẹdifiọk ke Jehovah edi Andibot ye ata Ọkpọsọn̄ Abasi emi enyenede ọniọn̄, ima, ye esịtmbọm. Mmọ ye ekemmọ mme anditiene Christ ẹma ẹdifiọk ke Jehovah anam ndutịm ndida uwa ufak Jesus Christ Eyen esie, nsọhi mme idiọkn̄kpọ mmọ mfep.—Utom 3:19-21.

Okposụkedi mbon Thessalonica mîkenyeneke ọyọhọ ifiọk akpanikọ, mmọ ẹma ẹfiọk ebiet emi mmọ ẹkpekọde ifiọk emi. N̄wed oro Abasi ọkọnọde odudu spirit esie ẹda ẹwet ekeme ndinam owo Abasi “etịm odot, eben̄e idem ọyọhọ ọyọhọ ndinam eti utom ekededi.” (2 Timothy 3:16, 17) Mme Christian ke Thessalonica ẹkenyene ndika iso n̄kpep n̄kpọ nnyụn̄ n̄ka iso n̄kụt nte un̄wana Ikọ Abasi edide utịbe. Oro akanam mmọ ẹdat esịt kpukpru ini. (1 Thessalonica 5:16) Kpasụk ntre ke edi ye nnyịn.

Un̄wana ke Usụn̄ Nnyịn

Andiwet psalm ama etịn̄ n̄kpọ kiet emi owụt nte un̄wana emi ọfọnde, ete: “Ikọ fo edi utuenikan̄ ukot mi, ye un̄wana usụn̄ mi.” (Psalm 119:105) Ndausụn̄ oro Ikọ Abasi ọnọde nnyịn ekeme ndinam nnyịn ifiọk usụn̄ oro ikpodụkde inyụn̄ idu uwem oro enyenede se ọwọrọde. Nnyịn inyeneke ndibiet nsụn̄ikan̄ oro osopde usụn̄. Ndifiọk akpanikọ nnyụn̄ nda se ifiọkde nsịn ke edinam idiyakke ‘kpukpru ofụm ukpepn̄kpọ ẹberi nnyịn nte oyobio emen oyo.’—Ephesus 4:14.

Bible ọdọhọ ete: “Mbufo ẹkûbuọt idem ye mbọn̄, ẹkûbuọt ye eyen owo, emi edinyan̄a mîdụhe enye ke idem.” Itien̄wed oro aka iso ete: “Ọfọfọn ọnọ owo eke Abasi Jacob edide andin̄wam enye, eke odoride enyịn ye Jehovah Abasi esie.” (Psalm 146:3, 5) Ke adianade do, ndibuọt idem ke Jehovah anam nnyịn ikeme ndikan ndịk ye editịmede esịt. Apostle Paul ekewet ete: “Ẹkûtịmede esịt ke baba n̄kpọ kiet, edi ke kpukpru n̄kpọ ẹda akam ye n̄kpeubọk ọkọrọ ye ekọm ẹsian Abasi eben̄e mbufo; ndien emem Abasi emi akande kpukpru ekikere eyekpeme esịt mbufo ye ukeme ukeren̄kpọ mbufo ke Christ Jesus.” (Philippi 4:6, 7) Ndiyak un̄wana Ikọ Abasi ada nnyịn usụn̄ ekeme ndinen̄ede nnam ufọn nnọ nnyịn.

 Yama nte Se Inọde Un̄wana ke Ererimbot

Ntak en̄wen emi anamde un̄wana Ikọ Abasi enen̄ede ọsọn̄ urua edi ke enye ọnọ owo ifet ndinam n̄kponn̄kan utom oro akanam ẹnọde owo. Jesus okowụk mme anditiene enye ete: “Ẹka ẹkenam mme owo ke kpukpru idụt ẹdi mbet mi, ẹnịm mmọ baptism ke enyịn̄ Ete ye Eyen ye edisana spirit, ẹkpep mmọ ẹnam kpukpru n̄kpọ eke n̄ketemede mbufo. Ndien, sese! Ami ndodu ye mbufo kpukpru usen tutu esịm utịt editịm n̄kpọ emi.” Mbemiso enye ọkọnọde ewụhọ emi, Jesus ọkọdọhọ ete: “Ẹmenọ mi kpukpru odudu ke heaven ye ke isọn̄.”—Matthew 28:18-20.

Kam fiọk owo oro an̄wamde ata mme Christian ke utom edikwọrọ eti mbụk ye edikpep mme owo akpanikọ Bible ke kpukpru idụt. Jesus ọkọn̄wọn̄ọ ọnọ mme anditiene enye ete iyodu ye mmọ. Ke akpanikọ, enye aman̄wam mmọ onyụn̄ ọnọ mmọ ibetedem ke utom ukwọrọikọ mmọ nte mmọ ‘ẹyakde un̄wana mmọ ayama’ ke ndinam utom emi ye “nti utom” eken. (Matthew 5:14-16) Mme angel ẹtiene n̄ko ẹnam utom ukwọrọikọ emi. (Ediyarade 14:6) Ndien nso kaban̄a Jehovah Abasi ke idemesie? Apostle Paul ekewet ete: “Ami n̄kọtọ, Apollos ọkọbọk ke mmọn̄, edi Abasi aka iso ndinam enye ọkọri.” Nso akwa ifet ke edi ntem nditiene ndi “nsan̄autom Abasi”!—1 Corinth 3:6, 9.

Kere n̄ko ban̄a nte Abasi ọdiọn̄de ukeme oro isịnde ke utom esie. Idụhe n̄kpọ oro ẹkpemende ẹdomo ye ifet oro Abasi ọnọde nnyịn “[ndiyama] nte se inọde un̄wana ke ererimbot.” Nnyịn ndiyak un̄wana Ikọ Abasi otụk nte itịn̄de ikọ inyụn̄ inamde n̄kpọ anam ikeme ndinen̄ede n̄n̄wam mbon oro ẹnyenede esịt akpanikọ. (Philippi 2:15) Nnyịn n̄ko imekeme ndidat esịt nte isịnde ifịk ikwọrọ ikọ inyụn̄ ikpepde mme owo n̄kpọ, ‘koro Abasi ikwan̄ake nte efrede utom ye ima eke nnyịn iwụtde iban̄a enyịn̄ esie.’—Mme Hebrew 6:10.

‘Dep Ibọk Enyịn Da Yet ke Enyịn Fo’

Jesus okotobo esop Laodicea eke akpa isua ikie etop emi ete: ‘Bọ mi ibọk enyịn dep da yet ke enyịn man afo ekeme ndikụt usụn̄. Kpukpru mbon oro mmade ke nnọ nsuannọ ye ntụnọ.’ (Ediyarade 3:18, 19) Ata eti ibọk oro ẹkemede ndida n̄kọk nnan eke spirit edi “ibọk enyịn”—oro edi, ukpepn̄kpọ ye ntụnọ oro Jesus ọnọde. Edieke iyomde nditịm n̄kụt usụn̄ ke n̄kan̄ eke spirit, ana nnyịn inyịme item Jesus inyụn̄ ida enye ye kpukpru item eken ke Bible isịn ke edinam. Nnyịn ikponyụn̄ inyene ndikere n̄kpọ nte Christ ekekerede inyụn̄ itiene nde ikpat esie. (Philippi 2:5; 1 Peter 2:21) Owo inọhọ ibọk enyịn emi ke mfọn-o. Jesus ọkọdọhọ ete: ‘Bọ mi dep.’ Ida ini ye ukeme nnyịn idep enye.

Owo oro ọwọrọde ke makmak ekịm odụk un̄wana isisọpke ikụt usụn̄ ọfọn. Kpasụk ntre, esida ini ndikpep Ikọ Abasi nnyụn̄ n̄kụt un̄wana akpanikọ. Esinyụn̄ ada ini nditie n̄kere se ikpepde nnyụn̄ n̄kere nte akpanikọ enen̄erede enyene ufọn. Nte ededi, ndida ini nnam kpukpru emi ikponke ikaha. Ntak idọhọde ntre? Koro un̄wana akpanikọ edi utịbe!

[Ndise ke page 14]

‘Bọ mi ibọk enyịn dep da yet ke enyịn man afo ekeme ndikụt usụn̄’