Ediyom Nnennen Ibọrọ

Nso ke n̄kpanam mbak ndidọn̄ọ?

Nso ke n̄kpanam man ubon mi ẹnen̄ede ẹkop idatesịt?

Nso ke n̄kpanam mbak nditaba utom mi?

NTE akanam omobụp ekededi ke otu mbụme oro? Nte ama enyene nti ibọrọ oro ẹnen̄erede ẹnyene ufọn? Kpukpru isua, ẹsisio n̄kpọ nte n̄wed 2,000 oro ẹnọde item ẹban̄a mme n̄kpọ emi ye mme akpan n̄kpọ en̄wen. Ke Britain kpọt, mme owo ẹsibiat n̄kpọ nte miliọn pound 80 (oro edi n̄kpọ nte miliọn dollar 150) ke isua kiet ẹdep mme n̄wed oro ẹtemede owo nte ẹkpekọkde mfịna. Ke United States, mme owo ẹsibiat n̄kpọ nte miliọn dollar 600 ke isua ẹdep mme utọ n̄wed emi. Ata ediwak owo ẹyom eti ndausụn̄ ke nte ẹkpekọkde mme mfịna oro mmọ ẹsisobode ke usen ke usen.

Kop se ewet n̄wed kiet etịn̄de aban̄a item oro ẹdọn̄ọde ke akpakịp n̄wed oro ẹsiode mi: “Ediwak n̄wed ẹfiak ẹtịn̄ se ẹma ẹkewewet.” Ke nditịm ntịn̄, ediwak item oro ẹnọde ke mme n̄wed emi ẹkam ẹfiak ẹtịn̄ ikọ ọniọn̄ oro ẹkewetde ke mbịghi-n̄kan n̄wed ke ererimbot. N̄wed emi ke ẹsuan ẹkan ke ofụri ererimbot. Ẹkabade enye ofụri ofụri m̀mê ubak ubak ẹsịn ke usem 2,400. Ẹmịn̄ se iwakde ibe biliọn inan̄ ye ubak ke ofụri ererimbot. N̄wed emi edi Bible.

Bible etịn̄ in̄wan̄-in̄wan̄ ete: “Abasi ọkọnọ odudu ẹda ẹwet ofụri N̄wed Abasi ndien enye ọfọn ndida nnọ ukpep, nsua nnọ owo, nnen̄ede mme n̄kpọ, nnọ ntụnọ ke edinen ido.” (2 Timothy 3:16) Edi akpanikọ ke owo ikewetke Bible nte n̄wed oro etemede owo nte ẹkpekọkde mfịna. Akpan ntak oro ẹkewetde enye edi man anam mme owo ẹfiọk uduak Abasi. Kpa ye oro, Bible etịn̄ ekese aban̄a nte ẹkpekọkde mme mfịna oro ẹdide ọsọ mfịn, ndien enye ọn̄wọn̄ọ ke mbon oro ẹtienede ndausụn̄ esie ẹyebọ ufọn. (Isaiah 48:17, 18) Inamke n̄kpọ m̀mê owo oto m̀mọ̀n̄, m̀mê aka n̄wed m̀mê ikaha, nti item oro ẹdọn̄ọde ke Bible ẹsinyene ufọn edieke ẹdade ẹsịn ke edinam. Mbọk kot ibuotikọ oro etienede nyụn̄ se ke idemfo m̀mê se Bible etịn̄de aban̄a nsọn̄idem, ubon, ye utom enyene ufọn.