Mme Mbụme Ẹtode Mme Andikot

Nso ke ikọ Paul ọwọrọ ke ndikọdọhọ ke ana ebeakpa edi “n̄wan emi ọkọdọde ebe kiet” mbemiso esop ẹn̄wamde enye?—1 Timothy 5:9.

Sia apostle Paul eketịn̄de aban̄a ebeakpa, ikọ oro “n̄wan emi ọkọdọdọ ebe kiet” aban̄a ini oro ebe esie okodude uwem. Ndi emi ekeme ndiwọrọ ke akana ebeakpa ọdọ ebe ini kiet kpọt? Mîdịghe, nte ikọ Paul ekeme ndiwọrọ n̄kpọ en̄wen? *

Ndusụk owo ẹdọhọ ke Paul eketịn̄ aban̄a mme ebeakpa oro ẹkedọde ndọ ini kiet kpọt. Edi akpanikọ ke ediwak ebiet, ẹda ebeakpa oro mîfiakke idọ ebe nte ata eti an̄wan. Nte ededi, utọ ekikere oro atuaha ye se Paul ekewetde ke mme leta esie eken. Ke uwụtn̄kpọ, enye ama anam an̄wan̄a ke leta oro enye ọkọnọde ẹsọk mme Christian ke Corinth ete ke okposụkedi oro imọ ikerede ke ebeakpa eyenen̄ede okop inemesịt edieke mîfiakke idọ ebe, “enye enyene ifụre ndidọ owo eke enye oyomde, ke Ọbọn̄ ikpọn̄-ikpọn̄.” (1 Corinth 7:39, 40; Rome 7:2, 3) Ke adianade do, ke leta oro Paul ọkọnọde ẹsọk Timothy, enye ọkọdọhọ ete: “Nyom mme ebeakpa emi ẹdide n̄kparawa iban ẹdọ ndọ.” (1 Timothy 5:14) Ntre, owo ikadaha ebeakpa oro ekemekde ndifiak ndọ ebe nte idiọkowo.

Ikọ oro Paul ekewetde ọnọ Timothy akpan̄wan̄a nnyịn didie ndien? Ikọ oro, “n̄wan emi ọkọdọde ebe kiet” odu ke ufan̄ikọ emi ikpọn̄. Ke usem Greek, emi ọwọrọ ke ata ata usụn̄ “n̄wan erenowo kiet.” Odot ifiọk ke Paul ama esiwak ndiwet ukem ikọ emi ke mme leta esie, oro edi, “ebe n̄wan kiet,” m̀mê “eren n̄wan kiet” nte odude ke usem Greek. (1 Timothy 3:2, 12; Titus 1:6) Paul ọkọdọhọ ke kiet ke otu n̄kpọ oro anamde owo odot ndidi ebiowo ye asan̄autom unamutom edi enye ndidi “ebe n̄wan kiet.” Se ẹnemede ke itien̄wed oro owụt akpan akpan ke man erenowo oro ọdọde ndọ odot ndikama ifetutom ke esop, inaha enye enyene udọn̄ ke n̄wan en̄wen ke mîbọhọke n̄wan esie, enye ikponyụn̄ idịghe owo eke ẹkemede ndidori ikọ. * Ke ntre, etie nte ikọ oro odude ke 1 Timothy 5:9 akpan̄wan̄a nnyịn ntre n̄ko, oro edi: Man ebeakpa odot se esop ẹn̄wamde, anaedi enye ekedi n̄wan emi ọkọsọn̄ọde ada ye ebe esie ke ini emi ebe esie okodude uwem, owo ikonyụn̄ ifiọkke enye nte n̄wan emi ekenyenede idiọk ukot isan̄. Mme n̄kpọ en̄wen oro Paul eketịn̄de aban̄a, emi ẹdinamde ebeakpa odot ndibọ un̄wam nto esop, ẹsụk ẹneme ukem n̄kpọ emi.—1 Timothy 5:10.

[Mme Ikọ idakisọn̄]