Ndisụk Ibuot Nnọ Ndima Ekpemerọn̄
Ndisụk Ibuot Nnọ Ndima Ekpemerọn̄
“Ẹkop uyo ẹnọ mbon oro ẹdade usụn̄ ke otu mbufo ẹnyụn̄ ẹsụk ibuot.” —MME HEBREW 13:17.
1, 2. Mme itie N̄wed Abasi ewe ẹwụt ke Jehovah ye Jesus ẹdi ndima Ekpemerọn̄?
JEHOVAH ABASI ye Jesus Christ Eyen esie, ẹdi ndima Ekpemerọn̄. Isaiah ọkọdọhọ ete: “Sese! Ọbọn̄ Jehovah ayada odudu esie edi, ubọk esie oyonyụn̄ akara ọnọ enye. . . . Enye ọyọbọk ikọt esiemmọ nte ọbọk-ufene: ayatan̄ nditọ erọn̄ ke ubọk esie, akama ke ikpanesịt esie, onyụn̄ ada mme ọnọ-mmọn̄eba usụn̄.”—Isaiah 40:10, 11.
2 Akpa ini emi ntịn̄nnịm ikọ emi okosude ekedi ke ini emi nsụhọ mme Jew ẹkefiakde ẹnyọn̄ ẹdi Judah ke isua 537 M.E.N. (2 Chronicles 36:22, 23) Enye ama afiak osu ke ini Jesus Christ, kpa Akamba Cyrus, akanyan̄ade nsụhọ oro ẹyetde aran osio ke “Akwa Babylon” ke 1919. (Ediyarade 18:2; Isaiah 44:28) Jesus edi “ubọk” emi Jehovah adade akara, atan̄, onyụn̄ ọbọk mme erọn̄ Esie ke ima. Jesus ke idemesie ọkọdọhọ ete: “Ami ndi eti ekpemerọn̄, mmonyụn̄ mfiọk mme erọn̄ mi, mme erọn̄ mi ẹnyụn̄ ẹfiọk mi.”—John 10:14.
3. Didie ke Jehovah owụt ke imekere iban̄a nte ẹkamade mme erọn̄ imọ?
3 Ntịn̄nnịm ikọ emi odude ke Isaiah 40:10, 11 ọsọn̄ọ owụt nte Jehovah ọbọkde ikọt esie ke ima. (Psalm 23:1-6) Ke ini Jesus akanamde utom ukwọrọikọ esie mi ke isọn̄, enye n̄ko ama enen̄ede ama onyụn̄ ekere aban̄a mme mbet esie ye mbon en̄wen. (Matthew 11:28-30; Mark 6:34) Jehovah ye Jesus ẹma ẹnen̄ede ẹsua isọn̄esịt mme ọbọkerọn̄, m̀mê mme adausụn̄ Israel, emi ẹkefụmide ẹnyụn̄ ẹwo otuerọn̄ mmọ. (Ezekiel 34:2-10; Matthew 23:3, 4, 15) Jehovah ama ọn̄wọn̄ọ ete: “Nyanyan̄a ufene mi, mmọ idinyụn̄ idịghe aba se ẹbụmede: ndien ami nyekpe ikpe ke ufọt erọn̄ ye erọn̄. Ndien nyanam ọbọk kiet eke edibọkde mmọ adaha ada akan mmọ, kpa owo mi David; enye ọyọbọk mmọ, ndien mmọ ẹyenyene enye ke andibọk.” (Ezekiel 34:22, 23) Ke utịt ini emi, Jesus Christ, Akwa David, edi “ekpemerọn̄ kiet” emi Jehovah emekde ndibọk kpukpru ikọt Esie ke isọn̄, kpa mme Christian oro ẹyetde aran ye mme “erọn̄ en̄wen.”—John 10:16.
Mme Enọ Emi Jehovah Ọnọde Esop
4, 5. (a) Nso ọsọn̄urua enọ ke Jehovah ọnọ ikọt esie ke isọn̄? (b) Nso enọ ke Jesus ọnọ esop esie?
4 Jehovah ọnọ esop ata ọsọn̄urua enọ ke ndimek “ekpemerọn̄ kiet”—Jesus Christ—ndibọk mme asan̄autom Esie ke isọn̄. Ẹma ẹtetịn̄ ẹban̄a Adausụn̄ emi otode heaven ke Isaiah 55:4 ẹte: “Sese, mmenịm enye ke ntiense mme idụt, ọbọn̄ ye etubom mme idụt.” Mme Christian oro ẹyetde aran ye “akwa otuowo” ẹto kpukpru idụt, ye esien, ye obio, ye usem. (Ediyarade 5:9, 10; 7:9) Mmọ ẹkabade ẹdi esop ofụri ererimbot, kpa “otuerọn̄ kiet,” ke idak ndausụn̄ “ekpemerọn̄ kiet,” kpa Christ Jesus.
5 Jesus n̄ko ọmọnọ esop esie ke isọn̄ ọsọn̄urua enọ. Enye ọmọnọ mmọ mme anam-akpanikọ ekpemerọn̄ emi ẹdude ke idak esie, emi ẹkpebede Jehovah ye Jesus ke ndibọk otuerọn̄ ke ima. Apostle Paul ama etịn̄ aban̄a ọsọn̄urua enọ emi ke leta oro enye ọkọnọde ẹsọk mme Christian ke Ephesus. Enye ọkọdọhọ ete: “‘Ke ini enye ọdọkde ke enyọn̄ enye ada mbuotekọn̄ ọnyọn̄; enye ọnọ mme owo nte enọ.’ . . . Enye ọkọnọ ndusụk owo nte mme apostle, ndusụk owo nte mme prọfet, ndusụk owo nte mme ọkwọrọ eti mbụk, ndusụk owo nte mme ekpemerọn̄ ye mme andikpep, man ẹnen̄ede ndisana owo, man ẹsan̄a utom, man ẹbọp idem Christ ẹnam ọkọri.”—Ephesus 4:8, 11, 12.
6. Ediyarade 1:16, 20 etịn̄ nso aban̄a otu mbiowo oro ẹkeyetde aran, ndien didie ke nnyịn ikpese mbiowo emi ẹmekde ke otu mme erọn̄ en̄wen?
6 Jehovah ye Eyen esie ẹda edisana spirit ẹmek “mme owo nte enọ,” emi ẹdide mme esenyịn m̀mê mbiowo, man ẹbọk mme erọn̄ ke mbọm. (Utom 20:28, 29) Ke ntọn̄ọ, kpukpru mme esenyịn emi ẹkedi iren Christian oro ẹyetde aran. Ediyarade 1:16, 20 ọdọhọ ke otu mbiowo ke esop mbon oro ẹyetde aran ẹkedi “ntantaọfiọn̄” m̀mê “mme angel” emi ẹdude ke ubọk nnasia Christ, oro edi, ke enye akada mmọ usụn̄. Nte ededi, sia ibat mme esenyịn oro ẹyetde aran ẹkade-ka iso ndisụhọde mfịn, ata ediwak mbiowo ke esop ẹdi mme erọn̄ en̄wen. Sia mme andida ke ibuot Otu Ukara ẹdade odudu spirit Abasi ẹmek mmọ, ẹkeme ndidọhọ ke mmọ n̄ko ẹdu ke ubọk nnasia, m̀mê ke Eti Ekpemerọn̄, kpa Jesus Christ, ada mmọ usụn̄. (Isaiah 61:5, 6) Sia mbiowo esop ẹsụkde ibuot ẹnọ Christ, kpa Ibuot esop, odot nnyịn inọ mmọ ibetedem ke ofụri esịt.—Colossae 1:18.
N̄kopuyo ye Nsụkibuot
7. Nso item ke apostle Paul ọkọnọ aban̄a nte nnyịn ikpanamde n̄kpọ ye mme esenyịn Christian?
7 Jehovah Abasi ye Jesus Christ, emi ẹdide mme Andikpeme nnyịn emi ẹdude ke heaven, ẹyom nnyịn ikop uyo inyụn̄ isụk ibuot inọ mme ekpemerọn̄ emi ẹdude ke idak mmọ, emi mmọ ẹmekde ẹse ẹban̄a esop. (1 Peter 5:5) Apostle Paul akada odudu spirit Abasi ewet ete: “Ẹti mmọ eke ẹdade usụn̄ ke otu mbufo, emi ẹtịn̄de ikọ Abasi ẹnọ mbufo, ndien nte mbufo ẹtịmde ẹse nte edu uwem mmọ etiede, ẹkpebe mbuọtidem mmọ. Ẹkop uyo ẹnọ mbon oro ẹdade usụn̄ ke otu mbufo ẹnyụn̄ ẹsụk ibuot, sia mmọ ẹkpemede ukpọn̄ mbufo nte mmọ eke ẹdinamde ibat, man mmọ ẹkpenam emi ke idatesịt, ẹkûnam ke nsiama, koro emi idifọnke ye mbufo.”—Mme Hebrew 13:7, 17.
8. Nso ke Paul ọdọhọ nnyịn ‘itịm ise,’ ndien didie ke nnyịn ‘ikpokop uyo’?
8 Tịm fiọk ke Paul ọdọhọ nnyịn ‘itịm ise’ nte edu uwem mbiowo owụtde mbuọtidem mmọ inyụn̄ ikpebe utọ mbuọtidem oro. N̄ko-n̄ko, enye eteme nnyịn ete ikop uyo inyụn̄ isụk ibuot inọ iren emi ẹmekde mi ke nditiene ndausụn̄ mmọ. Eyen ukpepn̄kpọ Bible oro ekerede R. T. France ọdọhọ ke akpasarade ikọ Greek emi ẹkabarede “ẹkop uyo” idịghe “ikọ emi ẹsiwakde ndida ntịn̄ mban̄a n̄kopuyo, edi ke ata ata usụn̄, ọwọrọ ‘ẹnyịme,’ emi owụtde edinen̄ede nnyịme nditiene ndausụn̄ mmọ.” Nnyịn ikop uyo inọ mbiowo koro Ikọ Abasi eteme nnyịn ete inam ntre, n̄ko koro nnyịn imenen̄ede inịm ke mmọ ẹnen̄ede ẹkere ẹban̄a mme n̄kpọ Obio Ubọn̄ ye ufọn nnyịn n̄ko. Nnyịn iyenen̄ede ikop inemesịt edieke inyịmede ndausụn̄ mmọ ke ofụri esịt.
9. Ntak emi anade nnyịn ‘isụk ibuot’ inyụn̄ ikop uyo n̄ko?
9 Nso ke nnyịn ikpanam edieke etiede nnyịn ndusụk ini nte ke ndausụn̄ mbiowo inenke? Edi mi ke nsụkibuot odụk edi. Esimem utom ndikop uyo ke ini nnyịn imade se ẹtịn̄de, m̀mê ke ini kpukpru se ẹnamde ẹn̄wan̄ade nnyịn, edi nnyịn idiwụt ata nsụkibuot edieke nnyịn itienede ndausụn̄ oro ẹnọde idem ke ini ndausụn̄ oro mîn̄wan̄ake nnyịn. Peter emi akakabarede edi apostle ama owụt orụk nsụkibuot emi.—Luke 5:4, 5.
Ntak Inan̄ Oro Anade Isụk Ibuot
10, 11. Didie ke mme esenyịn ‘ẹketịn̄ ikọ Abasi’ ẹnọ ekemmọ mme Christian ke akpa isua ikie, ndien didie ke ẹnam ntre mfịn?
10 Ke Mme Hebrew 13:7, 17 oro ẹkotde ẹsịn ke ikpehe ekikere 7, apostle Paul ọnọ nnyịn ntak inan̄ oro anade ikop uyo inyụn̄ isụk ibuot inọ mbiowo. Akpa ntak edi koro mmọ ‘ẹtịn̄ ikọ Abasi ẹnọ nnyịn.’ Ti ke Jesus ọkọnọ esop “mme owo nte enọ” man mmọ “ẹnen̄ede ndisana owo.” (Ephesus 4:11, 12) Enye ama ada mme anam-akpanikọ ekpemerọn̄ emi ẹdude ke idak esie, emi ẹkenọde ndusụk mmọ odudu spirit ndiwet leta nnọ esop, enen̄ede ekikere ye edu uwem mme Christian akpa isua ikie. Enye ama ada mme esenyịn oro ẹdade spirit Abasi ẹmek, ọsọn̄ọ akpa mme Christian idem onyụn̄ ọnọ mmọ ndausụn̄.—1 Corinth 16:15-18; 2 Timothy 2:2; Titus 1:5.
11 Mfịn, Jesus ada Otu Ukara emi adade ke ibuot “ofụn emi anamde akpanikọ onyụn̄ enyenede ọniọn̄,” ye mbiowo ọnọ nnyịn ndausụn̄. (Matthew 24:45) Ukpono oro inyenede inọ Jesus Christ emi edide “etubom ekpemerọn̄” anam ikop item Paul emi: “Ẹkpono mbon oro ẹnamde utom ọkpọsọn̄ ke otu mbufo ẹnyụn̄ ẹdade mbufo usụn̄ ke Ọbọn̄ ẹnyụn̄ ẹnọde mbufo item.”—1 Peter 5:4; 1 Thessalonica 5:12; 1 Timothy 5:17.
12. Didie ke mme esenyịn ‘ẹkpeme ukpọn̄ nnyịn’?
12 Ọyọhọ ntak iba oro anamde ikop uyo inọ mbiowo edi “sia mmọ ẹkpemede ukpọn̄” nnyịn. Edieke mmọ ẹkụtde n̄kpọ ekededi ke edu uwem nnyịn oro ekemede ndibiat mbuọtidem nnyịn, mmọ ẹsisọp ndinọ nnyịn item man ẹnen̄ede nnyịn. (Galatia 6:1) Ikọ Greek oro ẹkabarede ‘ndikpeme’ ke ata ata usụn̄ ọwọrọ “nditaba idap.” Eyen ukpepn̄kpọ Bible kiet ọdọhọ ke ikọ oro “ada aban̄a mme ekpemerọn̄ nditaba idap kpukpru ini.” Ke adianade ye mmọ ndidu ke edidemede ke n̄kan̄ eke spirit, mbiowo ẹkeme nditaba idap ndusụk ini ke ntak emi ẹkerede ẹban̄a mfọnọn̄kpọ eke spirit nnyịn. Nte nnyịn ikpenyịmeke ndisụk ibuot nnọ mme ekpemerọn̄ oro ẹdude ke idak Christ, emi ẹsịnde ofụri ukeme mmọ ndikpebe mbọm “akwa ekpemerọn̄,” kpa Jesus Christ?—Mme Hebrew 13:20.
13. Anie ke mme esenyịn ye kpukpru mme Christian ẹnyene ndinam ibat nnọ, ndien didie?
13 Ọyọhọ ntak ita oro anamde nnyịn isụk ibuot inọ mbiowo edi sia mmọ ẹkpemede nnyịn “nte mmọ eke ẹdinamde ibat.” Mbiowo ẹfiọk ke mimmọ idi mme ekpemerọn̄ emi ẹnamde utom ke idak mme Ekpemerọn̄ eke heaven, oro edi, Jehovah Abasi ye Jesus Christ. (Ezekiel 34:22-24) Jehovah enyene erọn̄ emi “enye ekedepde ke iyịp Eyen esie,” ndien mme esenyịn ẹyenam ibat ẹnọ enye ke nte mmọ ẹnamde n̄kpọ ye otuerọn̄ Esie. Mmọ ẹkpenyene ndinam n̄kpọ ye otuerọn̄ “ke mbọm.” (Utom 20:28, 29) Nnyịn n̄ko iyanam ibat inọ Jehovah ke nte itienede ndausụn̄ esie. (Rome 14:10-12) Nnyịn ndisụk ibuot nnọ mbiowo emi ẹmekde owụt ke isụk ibuot inọ Christ emi edide Ibuot esop.—Colossae 2:19.
14. Nso ikeme ndinam mme esenyịn Christian ẹnam utom mmọ “ke nsiama,” ndien nso ididi utịp?
14 Paul ama ọnọ ọyọhọ ntak inan̄ oro akpanamde isụk ibuot inọ mbiowo. Enye ekewet ete: “Man mmọ ẹkpenam emi ke idatesịt, ẹkûnam ke nsiama, koro emi idifọnke ye mbufo.” (Mme Hebrew 13:17) Mbiowo Christian ẹbiom ndodobi mbiomo ke ndinọ ukpep, ndibọk erọn̄, ndida usụn̄ ke utom ukwọrọikọ, ndibọk ubon mmọ, nnyụn̄ n̄kọk mme mfịna ke esop. (2 Corinth 11:28, 29) Nnyịn idinam mbiomo mmọ enen̄ede odobi edieke nnyịn mîsụkke ibuot inọ mmọ. Emi ayanam mmọ ‘ẹsiama.’ Nnyịn ndisọn̄ ibuot idinemke Jehovah esịt, ndien emi idifọnke ye nnyịn. Edi, edieke nnyịn inen̄erede ikpono mmọ inyụn̄ isụkde ibuot inọ mmọ, mbiowo ẹyenam utom mmọ ye idatesịt, ndien emi ayanam nnyịn idiana kiet inyụn̄ ibuana idara idara ke utom ukwọrọikọ Obio Ubọn̄.—Rome 15:5, 6.
Nte Ikposụkde Ibuot
15. Didie ke nnyịn ikeme ndiwụt ke imokop uyo inyụn̄ isụk ibuot?
15 Ediwak nti usụn̄ ẹdu emi nnyịn ikemede ndisụk ibuot nnọ mme esenyịn ke esop. Ke ntak ukpụhọde idaha ke efakutom, nte mbiowo ediomi mbono an̄wautom ke ebiet ye usen oro oyomde nnyịn ikpụhọde ndutịm nnyịn? Ẹyak nnyịn idomo ndibere ye obufa ndutịm oro ẹnamde. Emi ekeme ndisụn̄ọ ke mme edidiọn̄ oro nnyịn mîkodorike enyịn. Nte esenyịn utom odiomi ndidi otu Ukpepn̄kpọ N̄wed Esop nnyịn? Ẹyak nnyịn idomo adan̄a nte ikekeme nditiene mbuana ọyọhọ ọyọhọ ke utom ukwọrọikọ urua oro. Nte ẹnọ nnyịn n̄kpọ ndinam ke Ufọkn̄wed Utom Ukara Abasi? Nnyịn ikpenyene ndisịn ofụri ukeme ndika mbono esop n̄kanam se ẹkenọde nnyịn. Nte esenyịn Ukpepn̄kpọ N̄wed Esop ọtọt ke nnyịn inyene ndinam ufọkmbono Obio Ubọn̄ asana? Adan̄a nte ukeme ye nsọn̄idem nnyịn ẹyakde, ẹyak inen̄ede ibere ye enye. Ke mme usụn̄ emi ye mmọ eken, nnyịn iyowụt ke imosụk ibuot inọ iren emi Jehovah ye Eyen esie ẹmekde ndise mban̄a otuerọn̄ mmọ.
16. Edieke ebiowo mîtieneke ndausụn̄ oro ẹnọde, ntak emi nnyịn mîkpọsọn̄ke ibuot ye enye?
16 Ndusụk ini, ebiowo ekeme nditre nditiene ndausụn̄ oro ofụn emi anamde akpanikọ ye Otu Ukara esie ẹnọde. Edieke enye akade iso anam ntre, enye ayanam ibat ọnọ Jehovah, kpa “andibọk ye andise mban̄a ukpọn̄” nnyịn. (1 Peter 2:25) Ndusụk mbiowo ndinam ndudue m̀mê nditre ndinam se ẹkpenamde inọhọ nnyịn ntak ekededi ndisọn̄ ibuot ye mmọ. Jehovah imaha ntụtutọn̄ ye nsọn̄ibuot.—Numbers 12:1, 2, 9-11.
Jehovah Ọdiọn̄ Nsụkibuot Ofụri Esịt
17. Didie ke nnyịn ikpese mme esenyịn ke esop nnyịn?
17 Jehovah Abasi ọfiọk ke iren oro imọ imekde nte mme esenyịn idịghe mfọnmma. Kpa ye oro, enye ke ada mmọ anam utom, onyụn̄ ada spirit esie ọbọk ikọt esie ke isọn̄. Mbiowo—ye kpukpru nnyịn n̄ko—imọfiọk ke “odudu eke ebede ukeme owo [oto] Abasi, itoho nnyịn.” (2 Corinth 4:7) Ke ntre, nnyịn ikpenyene ndikọm Jehovah ke utom emi mme esenyịn emi ẹnamde akpanikọ ẹnamde, ikponyụn̄ inyene ndinen̄ede nsụk ibuot nnọ mmọ.
18. Nso ke nnyịn ndisụk ibuot nnọ mme esenyịn enen̄ede ọwọrọ?
18 Mme esenyịn ẹsịn ofụri ukeme man ẹtie nte mme ekpemerọn̄ emi Jehovah eketịn̄de ke Jeremiah 3:15 nte idimekde ẹbọk mme erọn̄ imọ ke mme akpatre usen emi, ete: “Nyonyụn̄ nnọ mbufo [mme] owo eke ẹbọkde mbufo nte esịt mi amade, ndien mmọ ẹyeda ifiọk ye ọniọn̄ ẹbọk mbufo.” Ke akpanikọ, mbiowo ke ẹnam ata eti utom ke ndikpep nnyụn̄ n̄kpeme mme erọn̄ Jehovah. Nnyịn ikpakam iwụt esịtekọm iban̄a ọkpọsọn̄ utom oro mmọ ẹnamde ke ndinọ mmọ ibetedem ke ofụri esịt, ndikop uyo, nnyụn̄ nsụk ibuot nnọ mmọ. Edieke inamde ntre, nnyịn iyowụt esịtekọm oro inyenede inọ mme Ekpemerọn̄ nnyịn emi ẹdude ke heaven, kpa Jehovah Abasi ye Jesus Christ.
Ke Ndidụn̄ọde
• Didie ke Jehovah ye Jesus Christ ẹwụt ke idi ndima Ekpemerọn?
• Ntak emi oyomde isụk ibuot ke adianade ye ndikop uyo?
• Nti usụn̄ ewe ke nnyịn ikeme ndiwụt ke imosụk ibuot?
[Mme Mbụme Ukpepn̄kpọ]
[Ndise ke page 27]
Mbiowo Christian ẹnyịme ndausụn̄ Christ
[Mme ndise ke page 29]
Ediwak usụn̄ ẹdu emi nnyịn ikemede ndiwụt ke imosụk ibuot inọ mme ekpemerọn̄ emi Jehovah emekde