Nte Afo Emeti?

Nte afo ama ọbọ ufọn ndikot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:

• Nso ke nnyịn ikeme ndikpep nto uwụtn̄kpọ Jesus aban̄ade owo oro ekeyịrede ọkọn̄ usụn̄ ufan esie ke ini esenowo ekemende enye? (Luke 11:5-10)

Uwụtn̄kpọ emi owụt edu oro ikpenyenede ke ini ibọn̄de akam. Nnyịn inyene ndiyịre nyom, m̀mê ndika iso mben̄e, akpan akpan, edisana spirit Abasi. (Luke 11:11-13)—12/15, page 20-22.

• Nso ke nnyịn ikpep ito uwụtn̄kpọ Jesus aban̄ade ebeakpa ye ebiereikpe? (Luke 18:1-8)

Emi ọsọn̄ọ owụt ufọn edibọn̄ akam. Jehovah itiehe nte ebiereikpe oro, enye edi edinen onyụn̄ oyom ndin̄wam nnyịn. Akan oro, akpana inyene mbuọtidem nte ebeakpa oro.—12/15, page 26-28.

• Ntak emi apostle Paul ọkọdọhọde mme Christian ke Corinth ete “ẹtat esịt?” (2 Corinth 6:11-13)

Etie nte ndusụk owo ke Corinth ikokponoke nditọete mmọ, ikatarake ido, ikonyụn̄ ifọnke ido. Oyom isịn ukeme man inen̄ede ikpono nditọete nnyịn, inyụn̄ inam mbufa ufan.—1/1, page 9-11.

• Edifịk ewe idiọn̄ọ ke ẹtịn̄ ẹban̄a ke Ediyarade 7:3?

Ke ini Abasi adade edisana spirit eyet mme Christian aran, emi edi edifịk akpa idiọn̄ọ. Edi Ediyarade 7:3 etịn̄ aban̄a edifịk mmọ akpatre idiọn̄ọ, ke ini mmọ ẹma ẹkesọn̄ọ ẹda ẹnam akpanikọ ọyọhọ ọyọhọ.—1/1, page 30-31.

• Nso ke mme ete ye eka ẹkeme ndikpep nto mbụk Bible aban̄ade Samuel?

Akpa, mmọ ẹkpenyene ndikpep nditọ mmọ ikọ Abasi, kpa nte ete ye eka Samuel ẹkekpepde enye. Ke adianade do, mmọ ẹkpenyene ndisịn udọn̄ nnọ nditọ mmọ ẹda utom Jehovah nte ubọkọkọ.—1/15, page 16.

• Didie ke ikeme ndiwụt ke imenem esịt nditie mbet Jehovah?

Nnyịn ‘itie ibet usen Jehovah,’ inyụn̄ itie ibet ubọhọ ke ini oro enye edisobode mbon unana uten̄e Abasi. (2 Peter 3:7, 12) Okposụkedi enen̄erede ọdọn̄ Jehovah nditre kpukpru orụk idiọkido, enye omụm idem akama man anyan̄a mme Christian ke usụn̄ oro edinọde enyịn̄ esie ubọn̄. Akpana inyene mbuọtidem ke Jehovah ọfiọk nnennen ini ndinam n̄kpọ, ndien kan̄a ke emi, nnyịn ikpenyene ndisịn ifịk ntoro enye. (Psalm 71:14, 15)—3/1, page 17-18.

Ndi Noah akada ndisana unam itiaba ke orụk kiet kiet odụk ubom m̀mê akada nyara itiaba ye uman itiaba?

Ẹkedọhọ Noah ada kpukpru orụk edisana unam ‘itiaba itiaba adian idem.’ (Genesis 7:1, 2) Ke usem Hebrew, ikọ oro ndusụk edikabade Bible ẹkabarede “itiaba ke itie iba” ọwọrọ “itiaba itiaba” ke ata ata usụn̄. Nte mme itien̄wed en̄wen ẹwụtde, ndiwet ibat utịm ikaba ntem iwọrọke itiaba ke itie iba. Anaedi Naoh akada unam itiaba ke kpukpru ndisana unam, oro edi, nyara ita, uman ita, ye unam kiet ndida n̄wa uwa. (Genesis 8:20)—3/15, page 31.

• Ntak emi mme Christian ‘ẹkpetịmde ẹse’ nte mbuọtidem mbiowo, oro edi, mbon oro ẹdade usụn̄, etiede?

Apostle Paul ọdọhọ ‘itịm ise’ nte edu uwem mbiowo owụtde mbuọtidem mmọ inyụn̄ ikpebe utọ mbuọtidem oro. (Mme Hebrew 13:7) Nnyịn inam emi sia ẹtemede nnyịn ke Ikọ Abasi ẹte inam ntre. N̄ko-n̄ko, mbiowo ndikere mban̄a mme n̄kpọ eke spirit nnyụn̄ n̄kere mban̄a mfọnọn̄kpọ nnyịn esịn udọn̄ ọnọ nnyịn ndinam ntre.—4/1, page 28.