Owo N̄kpọnnam Emi Amade Ndinam Utom

AKPA ini emi afo okụtde Leonardo, afo udukereke ke enye ekeme ndinam utom ke itie ubọpufọk. Mbabuat unọmọ oro enye ekenyenede ke itieutom ama esịbe enye ubọk mbiba. Kpa ye oro, Leonardo ke anam utom ọkpọsọn̄ ke itie ubọpufọk ke Acajutla, El Salvador, nte afo ekemede ndikụt ke ndise emi.

Leonardo eketịm n̄kpọutom esie ke idemesie man ekeme nditiene mbuana ke utom ubọpufọk oro. Enye onụk itọn̄ubọk nnasia esie afak ke ekpọ ukwak emi ẹbọpde ẹdian ke udọk mbakara, onyụn̄ ekịm ntan sụn̄sụn̄ ọdọn̄ ke ukpatn̄kpọ. Enye ada ekara ukwak ọkọbi ke ubọk ukpatn̄kpọ oro man ekeme ndikpat. Nso ikanam enye etiene abuana ke utom ubọpufọk emi?

Leonardo okoyom nditiene mbuana ke utom ubọp Ufọkmbono Obio Ubọn̄, m̀mê itie utuakibuot, nnọ esop Mme Ntiense Jehovah ke n̄kann̄kụk mmọ. Enye ama enyene ekese ntak ndikpetre ndibuana ke utom emi. Enye enyene utom emi esinamde kpukpru ini, obiomo ndo, onyụn̄ anam utom nte asan̄autom unamutom ke esop mmọ. Kpa ye oro, enye okosụk oyoyom se akpanamde ọnọ Abasi ke itie ubọpufọk emi n̄ko.

Nte afo emenyene ukem edu oro ke utom Abasi? Utu ke ndiyak ndo oro enye obiomode edi n̄kpọ ubiọn̄ọ ọnọ enye, Leonardo ama ada ukeme ukere n̄kpọ esie etịm n̄kpọutom man ekeme ndinam utom oro enye mîkpekemeke ndinam. Enye okokpono Abasi ‘ke ofụri ekikere esie.’ (Matthew 22:37) Edide mmọ ẹdi mbon n̄kpọnnam m̀mê idịghe, mbon oro ẹbuanade ke utom ubọp Ufọkmbono Obio Ubọn̄ Mme Ntiense Jehovah ke ofụri ererimbot, ẹnyene edu n̄waidem. Mmọ ẹsidara mbon efen ẹtiene ẹdibuana ke mme mbono esop mmọ. Mmọ ẹyedara fi n̄ko etiene edibuana.