Se Adryana Okoyomde

ENYENE se Adryana, eyenọwọn̄ isua itiokiet emi odụn̄de ke Tulsa, Oklahoma, U.S.A., okoyomde. Se enye okoyomde ekedi ukem ye se David, andiwet Psalm ọkọkwọde ete: “Mmeben̄e Jehovah n̄kpọ kiet, ndien nyoyom enye; nte ndụn̄ ke ufọk Jehovah ke ofụri uwem mi, man nse uyai Jehovah, nnyụn̄ ntịm mbụp ke temple esie.”—Psalm 27:4.

Ke ini Adryana ekedide ọfiọn̄ itiokiet kpọt, ẹma ẹkụt ke enye enyene idiọk mbufụt ke ndutịm usan̄a-esịp esie. Idiọk udọn̄ọ emi ama anam enye akabade mbụn̄ọ. Mbiaibọk ẹma ẹsiak enye idem ediwak ini, ẹnyụn̄ ẹda mmọn̄ibọk ẹsọbọ enye ke ofụri isua kiet.

Adryana ye eka esie ẹdi Mme Ntiense Jehovah. Ete esie emi mîdịghe kiet ke otu Mme Ntiense Jehovah ama aka ebịne n̄ka emi ẹsin̄wamde mbon emi ẹdọn̄ọde utọ udọn̄ọ emi, ekesịn eben̄e ete mmọ ẹdimen Adryana ẹka itie inemesịt emi enen̄erede ọwọrọ etop ke ofụri ererimbot. Mbemiso ẹkenyịmede eben̄e oro, n̄ka emi ẹma ẹbụp Adryana ebiet emi enye akpamade ndika. Enye ama ọkọm n̄ka emi ke se mmọ ẹkeyomde ndinam nnọ imọ, edi ọdọhọ mmọ ke imọ ikpakam ima ndika n̄kese Bethel, kpa ibuot itieutom ofụri ererimbot Mme Ntiense Jehovah, ke New York. Ke ini ọkọfiọkde se ete esie okoyomde ndinam nnọ enye, Adryana ama ọbọn̄ akam ọnọ Jehovah ete ọnọ imọ ifet ndika n̄kese Bethel. Okposụkedi n̄ka oro ẹkekerede ke ndika Bethel idinamke eyenọwọn̄ okop inemesịt, mmọ ẹma ẹnyịme ndika sia ete Adryana mîkafan̄ake.

Adryana ama asan̄a ye eka, eyeneka esie, ye ufan esie aka New York ndikese Bethel, emi akanam enye mîkaha. Adryana ọkọdọhọ ete: “Jehovah ama ọbọrọ akam mi. Mma ndiọn̄ọ ke enye ayama nnyịn ika Bethel. Mma n̄kụt nte ẹnamde mme n̄wed, magazine, ye Bible. Ndidi Bethel enem akan ndika itie inemesịt.”

Adryana ama ‘ese uyai Jehovah’ onyụn̄ adara ndikụt nte ẹnamde utom ke ibuot itieutom ikọt Jehovah mfịn. Iyadara fi n̄ko edieke edide edise Bethel. Ke adianade ye ibuot itieutom ofụri ererimbot Mme Ntiense Jehovah ke New York, nnyịn imenyene n̄ko mme n̄kọk itieutom ke nsio nsio ebiet ke ofụri ererimbot.