Mme Mbụme Ẹtode Mme Andikot

Ini ewe ke ẹtre ndimek mme Christian oro ẹdikade heaven?

Bible inyeneke akpan ibọrọ inọ mbụme emi. Nnyịn imọfiọk ke ẹketọn̄ọ ndiyet mme mbet Jesus aran nte mme andinyene udeme eke heaven ke isua 33 E.N. (Utom 2:1-4) Nnyịn imọfiọk n̄ko ke mme apostle ẹma ẹkekpa, ata mme Christian oro ẹyetde aran, emi ẹdide “wheat,” ẹma “ẹkọri ọtọkiet” ye mme nsunsu Christian emi ẹdide “mbiet.” (Matthew 13:24-30) Ndien ọtọn̄ọde ke utịt utịt iduọk isua 1800, mme Christian oro ẹyetde aran ẹma ẹfiak ẹtọn̄ọ ndinam utom ifịk ifịk. Ke 1919, ẹma ẹtọn̄ọ ndikpen̄e “mbun̄wụm isọn̄,” esịnede editan̄ akpatre ke otu mbon oro ẹyetde aran mbok.—Ediyarade 14:15, 16.

Ọtọn̄ọde ke utịt utịt iduọk isua 1800 esịm 1931, akpan uduak utom ukwọrọikọ ekedi editan̄ nsụhọ oro ẹdibuanade ke idem Christ mbok. Ke 1931, Nditọ Ukpepn̄kpọ Bible ẹma ẹda enyịn̄ N̄wed Abasi oro, Mme Ntiense Jehovah, ẹkere, ndien ke nsiondi Enyọn̄-Ukpeme [Ikọmbakara] eke November 15, 1933, ẹkedọhọ ke n̄wọrọnda enyịn̄ emi edi “denarius” oro ẹtịn̄de ẹban̄a ke n̄ke Jesus ke Matthew 20:1-16. Ndien ẹkekere ke hour 12 oro ẹtịn̄de ẹban̄a ke n̄ke oro ẹkedi isua 12 oro ọkọtọn̄ọde ke 1919 esịm 1931. Ediwak isua ke oro ama ekebe, ẹkekere ke ẹma ẹtre ndimek mme owo oro ẹdikade heaven ke 1931, ndien ke mbon oro ẹkemekde ke 1930 ye 1931 ẹte ẹdinyene udeme ye Christ ẹkedi “akpatre” mbon oro ẹmekde. (Matthew 20:6-8) Nte ededi, ke 1966, ẹma ẹdinam se n̄ke oro ọwọrọde enen̄ede an̄wan̄a, ndien ẹma ẹdifiọk ke enye inyeneke n̄kpọ ndomokiet ndinam ye ini emi ẹditrede ndimek mbon oro ẹyetde aran.

Ke 1935, ẹma ẹdifiọk ke “akwa otuowo” eke Ediyarade 7:9-15 ẹdi “mme erọn̄ en̄wen,” oro edi mme Christian oro ẹnyenede idotenyịn edidu uwem ke isọn̄, kpa mbon oro ẹdidude ke “mme akpatre usen” emi, ẹdinyụn̄ ẹbọhọde Armageddon. (John 10:16; 2 Timothy 3:1; Ediyarade 21:3, 4) Ke isua oro ama ekebe, akpan uduak utom unam mbet ekedi editan̄ akwa otuowo mbok. Ntre, akpan akpan ke 1966, ẹkekere ke idotenyịn uka heaven ama etre ke 1935. Eketie nte ekikere emi ama enen ke ini se ikperede ndidi kpukpru mbon oro  ẹkenade baptism ke 1935 ama ekebe ẹkedọhọde ke inyene idotenyịn eke isọn̄. Ke oro ebede, ẹkekere ke owo ekededi oro ẹfiakde ẹmek ẹsịn ke otu mbon oro ẹdikade heaven akada itie Christian oro ẹma ẹkeyet aran, edi emi mîkọsọn̄ọke ida inam akpanikọ.

Nte eyịghe mîdụhe, edieke Christian oro ẹyetde aran anamde idiọkn̄kpọ ye unana edikabade esịt, Jehovah esimek owo en̄wen ada itie esie. (Rome 11:17-22) Nte ededi, ibat ata mbon oro ẹyetde aran, oro mîsọn̄ọke ida inam akpanikọ iwakke. Ke n̄kan̄ eken, spirit etie ntiense ọnọ ndusụk Christian oro ẹnade baptism ke 1935 ama ekebe nte ke mmọ ẹnyene idotenyịn uka heaven. (Rome 8:16, 17) Ke ntre, etie nte nnyịn ikemeke nditịn̄ akpan usenọfiọn̄ oro ẹtrede ndimek mme Christian oro ẹdikade heaven.

Didie ndien ke ikpese owo oro ebierede ke esịt esie ke ẹyet imọ aran, onyụn̄ ọtọn̄ọde ndita uyo nnyụn̄ n̄n̄wọn̄ wine Editi? Owo ikpenyeneke ndibiere ikpe nnọ enye. Oro ebehe enye ye Jehovah. (Rome 14:12) Nte ededi, ata mme Christian oro ẹyetde aran idomoke ndidụri ntịn̄enyịn nnọ idemmọ. Mmọ inịmke ke ediyet mmimọ aran anam mmimọ inen̄ede ifiọk n̄kpọ m̀mê inyene “ikike” ikan ndusụk n̄kani owo ke otu akwa otuowo. Mmọ inyụn̄ inịmke ke imenyene edisana spirit ikan nsan̄a mmimọ oro ẹdide mme erọn̄ en̄wen. Mmọ n̄ko inyụn̄ iyomke mbon en̄wen ẹdụk ufụn ẹnọ mmimọ, m̀mê ndikere ke ndita uyo nnyụn̄ n̄n̄wọn̄ wine Editi anam mmimọ ikpon ikan mbiowo esop. Mmọ ẹsụhọde idem ẹnyụn̄ ẹti ẹte ke ndusụk mbon oro ẹkeyetde aran ke akpa isua ikie ikodotke ndidi mbiowo m̀mê mme asan̄autom unamutom. (1 Timothy 3:1-10, 12, 13; Titus 1:5-9; James 3:1) Ndusụk Christian oro ẹkeyetde aran ikakam isọn̄ke idem ke n̄kan̄ eke spirit. (1 Thessalonica 5:14) N̄ko nditọete iban oro ẹkeyetde aran ikedịghe mme andikpep ke esop.—1 Timothy 2:11, 12.

Ntre, mme Christian oro ẹyetde aran ye nsan̄a mmọ oro ẹdide mme erọn̄ en̄wen, ẹsịn ofụri ukeme ndisọn̄ idem ke n̄kan̄ eke spirit, ndikọri mbun̄wụm spirit, ndinyụn̄ nnam emem odu ke esop. Kpukpru mme Christian, mbon oro ẹyetde aran ye mme erọn̄ en̄wen, ẹtiene ndausụn̄ Otu Ukara ke ndibuana ifịk ifịk ke utom edikwọrọ eti mbụk ye edinam mbet. Mme Christian oro ẹyetde aran ẹnyịme ndinam utom emi, adan̄a nte Jehovah enyịmede mmọ ẹka iso ẹdu ke isọn̄ nte mme asan̄autom esie.