Se Inen̄erede Idi Akpan N̄kpọ Ikan Idaha Eyo

ETIE nte kpukpru idụt ẹnyene n̄ke aban̄ade idaha eyo. Efịk ẹdọhọ ke enyọn̄ ọdiọk ubom eyep edem! Mfịn mme ekpepn̄kpọ mban̄a idaha eyo ẹtịn̄ se isinamde enyọn̄ ọdiọk nte n̄ke Efịk emi owụtde.

Ke eyo Jesus mme owo ẹma ẹsitiene ẹdụn̄ọde nte ikpaenyọn̄ etiede ẹnyụn̄ ẹtịn̄ se enye ọwọrọde. Jesus ama ọdọhọ ndusụk mme Jew ete: “Ke . . . mbubịteyo mbufo ẹmemehe ndidọhọ ẹte, ‘Enyọn̄ ọyọfọn, koro enyọn̄ eyịbe’; ndien ke usenubọk, mbufo ẹte, ‘Mfịn eyetuebe onyụn̄ edep edịm, koro enyọn̄ eyịbe, onyụn̄ okpụk.’ Mbufo ẹmefiọk nditịn̄ nte ikpaenyọn̄ etiede, edi . . . “ Edi nso efen? Jesus ama aka iso etịn̄ ọkpọikọ emi otụkde owo mi ete: “Mbufo ikemeke ndifiọk mme idiọn̄ọ ini.”—Matthew 16:2, 3.

Nso ikedi “mme idiọn̄ọ ini” emi? Mmọ ẹkedi mme in̄wan̄-in̄wan̄ idiọn̄ọ emi ẹkewụtde nte ke Jesus ekedi ata Messiah oro Abasi okosiode ọdọn̄. Ẹma ẹtịm ẹkụt mme utom esie nte ẹkekụtde ndatndat ikpaenyọn̄. Nte ededi, ata ediwak mme Jew ẹma ẹfụmi mme idiọn̄ọ oro ẹkewụtde ke Messiah emedi—kpa se ikenen̄erede idi akpan n̄kpọ ikan idaha eyo.

Mfịn n̄ko, odu idiọn̄ọ emi edide akpan n̄kpọ akan nte ikpaenyọn̄ etiede. Jesus ama ọdọhọ ke ẹyesobo idiọk ererimbot emi man obufa ererimbot akpada itie esie. Enye ama asiak ediwak n̄kpọ oro ẹditịbede ndiwụt ke obufa ererimbot oro ọmọn̄ edisịm. Mme ekọn̄ ye akan̄ ke ofụri ekondo ẹsịne ke otu n̄kpọ emi enye akasiakde. Jesus ọkọdọhọ ke ẹma ẹkụt nte mme n̄kpọ emi ẹtịbede, oro ọwọrọ ke ini Abasi asan̄a ekpere.—Matthew 24:3-21.

Nte afo omokụt “mme idiọn̄ọ ini” emi?