Ntak Emi Ikposopde Idem Ọtọkiet-e?

EBE Christine ama ọkpọn̄ enye ke unana idotenyịn—ke mmọ ẹma ẹkedọ ndọ ke isua 20. Christine eketie ikpọn̄ ọbọk nditọiren itiaba ye eyenan̄wan kiet. Mmọ ẹkedi isua 7 ẹsịm 18 ke emana. Enye ọdọhọ ete: “Ami ikpọn̄ nnyene ndinam kpukpru ikpọ ubiere idahaemi. Emi esinam idem emem mi, onyụn̄ anam nyom un̄wam ye ndausụn̄.” M̀mọ̀n̄ ke enye ekenyene un̄wam oro enye okoyomde?

Christine ọdọhọ ete: “Mme mbono esop Christian ẹkesin̄wam mi ye ubon mi. Mme ufan nnyịn ẹma ẹsisịn udọn̄ ẹnọ nnyịn ke mme mbono esop, ndien Ikọ Abasi ama esida nnyịn usụn̄. Ndisidụk mbono esop kpukpru ini ama an̄wam nnyịn ke kpukpru ikpehe uwem ubon nnyịn.”

Ke “ndiọkeyo” emi, kpukpru nnyịn inyene ndiyọ nsio nsio idomo. (2 Timothy 3:1) Ukem nte Christine, ekeme ndidi afo amada mbono esop Mme Ntiense Jehovah nte n̄kpọ oro an̄wamde fi ke n̄kan̄ eke spirit, kpa akpan usụn̄ ndituak ibuot nnọ Jehovah. Enen̄ede etie nte ke mbono esop ition oro ẹdiomide ke urua ke urua ẹsidemede ima oro afo amade Abasi, ẹsọn̄ọ mbuọtidem ini iso fo, ẹnyụn̄ ẹnọ fi item N̄wed Abasi oro ẹwụtde nte ọkpọyọde mme idomo.

Edi odu mbon oro mîsikemeke ndidụk mme mbono esop kpukpru ini. Utom esinen̄ede akak mmọ, ndien ndikam n̄kekere mban̄a nte ẹdisịnede ọfọn̄ oro odotde ẹnyụn̄ ẹsan̄a anyan isan̄ ẹka mbono esop esitịmede mmọ ekikere. Ndusụk owo ẹkụt ke utom mmimọ isiyakke idụk mbono esop kpukpru ini. Man ẹdụk kpukpru mbono esop, mmọ ẹsinam utom oro ẹdibọde esisịt okụk mîdịghe ẹkpọn̄ utom man ẹkedụk mbono esop. Ndusụk owo ẹkeme nditre ndidụk mbono esop sia ẹkerede ke ndinọ idem nduọkodudu eyenem mmimọ ke idem akan ndidụk mbono esop.

Ntre, mme akpan ntak ewe ẹkpenam fi esiyom ndidụk mme mbono esop Christian? Didie ke afo ekeme ndikop inem ke ini odụkde mme utọ mboho oro? Man ikeme ndibọrọ mme mbụme emi, ẹyak idụn̄ọde ima ima ikot oro Jesus ọkọnọde, oro ẹwetde ke Matthew 11:28-30. Enye ọkọdọhọ ete: “Ẹtiene mi, kpukpru mbufo emi ẹkpade utom ẹnyụn̄ ẹbiomde ndodobi mbiomo, ndien nyọnọ mbufo nduọkodudu. Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi, koro ami mmenyene ifụre ifụre ido nnyụn̄ nsụhọde esịt, ndien mbufo ẹyekụt  nduọkodudu ẹnọ ukpọn̄ mbufo. Koro ọkpọnọ mi ememem, mbiomo mi onyụn̄ efefere.”

“Ẹtiene Mi”

Jesus ọkọdọhọ ete: “Ẹtiene mi.” Usụn̄ kiet ndiyere ikot oro edi ndidụk mbono esop kpukpru ini. Ọfọn ndisidụk, sia ini kiet efen Jesus ama ọdọhọ ete: “Ke ebiet eke owo iba m̀mê ita ẹsopde idem ke enyịn̄ mi, ami ndodu ke ufọt mmọ.”—Matthew 18:20.

Ke akpa isua ikie, Jesus ke idemesie ama okot nsio nsio owo ete ẹtiene imọ. Ntre enye ama ọnọ mmọ ifet ndikpere enye idem. Ndusụk ke otu mmọ emi ẹma ẹsọsọp ẹyere ikot oro. (Matthew 4:18-22) Uyom-inyene ikayakke mbon eken ẹyere ikot oro. (Mark 10:21, 22; Luke 9:57-62) Jesus ama etịn̄ ikọ oro ọsọn̄ọde owo idem mi ọnọ mbon oro ẹketienede enye ete: “Idịghe mbufo ẹkemek mi, edi ami n̄kemek mbufo.”—John 15:16.

Ke Christ ama akakpa onyụn̄ eset, enye ikodụhe aba ke obụk ye mme mbet esie. Edi enye okosụk ododu ye mmọ sia enye akadade mmọ usụn̄ ke utom mmọ onyụn̄ esede nte mmọ ẹnamde item esie. Ke uwụtn̄kpọ, n̄kpọ nte isua 70 ke Jesus ama ekeset ke n̄kpa, enye ama ọnọ esop itiaba ke Asia Minor item onyụn̄ esịn udọn̄ ọnọ mmọ. Se enye eketịn̄de ama owụt ke enye ama enen̄ede ọfiọk nti edu ye mmeme owo kiet kiet ke mme esop oro.—Ediyarade 2:1-3:22.

Jesus osụk enyenyene udọn̄ ke idem mbet esie kiet kiet. Enye ọn̄wọn̄ọ ete: “Sese! Ami ndodu ye mbufo kpukpru usen tutu esịm utịt editịm n̄kpọ emi.” (Matthew 28:20) Nnyịn idu idahaemi ke utịt eyo, ndien oyom iyere ikot oro Jesus okotde nnyịn ete itiene imọ. Ndinam ntre abuana ndidụk mme mbono esop kpukpru ini. Jesus oyom nnyịn ikpan̄ utọn̄ inọ imọ inyụn̄ ida mme ukpepn̄kpọ Bible ye mme utịn̄ikọ emi ẹsinọde ke mme mbono esop, emi ẹdide akpan ikpehe mbono esop, ‘ikpep n̄kpọ ito imọ.’ (Ephesus 4:20, 21) Ndi afo ke eyere ikot Jesus oro ọdọhọde: “Ẹtiene mi”?

“Mbufo Emi Ẹkpade Utom Ẹnyụn̄ Ẹbiomde Ndodobi Mbiomo”

Ata akpan ntak oro isikade mme mbono esop Christian edi man ikọbọ nsịnudọn̄. (Mme Hebrew 10:24, 25) Ata ediwak nnyịn imenen̄ede ‘ikpa utom inyụn̄ ibiom ndodobi mbiomo’ ke nsio nsio usụn̄. Utọ ọkpọkpọ mfịna nte unana nsọn̄idem ekeme ndidobi fi mbiomo. Afo emekeme ndibọ nnyụn̄ nnọ owo nsịnudọn̄ ke mme mbono esop Christian. (Rome 1:11, 12) Ke uwụtn̄kpọ, afo oyokop mme ikọ oro ẹdisọn̄ọde fi idem ke n̄kan̄ eke spirit, ẹyeti fi idotenyịn fo oro ọkọn̄ọde ke Bible, afo oyonyụn̄ okụt nte mbon en̄wen ẹsọn̄ọde ẹda ẹyọ nsio nsio idomo. Kpukpru emi ẹkeme ndin̄wam fi ọyọ onyụn̄ enyene ekikere oro adade ukem ukem aban̄a mfịna fo.

Kere ban̄a se eyenete Christian kiet emi ọkọdọn̄ọde uyịre uyịre udọn̄ọ eketịn̄de. Enye ọkọdọhọ ete: “Udọn̄ọ mi esiyom mbiat ini ke ufọkibọk. Ke mma n̄kodu ke ufọkibọk mbịghi, isimemke utom ndinyọn̄ ndika mbono esop, edi esịt mi esidu ke mbono esop. Ima nditọete esinam n̄kop inemesịt, ndien ukpep ye ndausụn̄ emi Jehovah ye Jesus ẹsinọde ẹsinam uwem mi enyene se ọwọrọde.”

“Ọkpọnọ Mi Ememem, Mbiomo Mi Onyụn̄ Efefere”

Ti se Jesus eketịn̄de ke itien̄wed oro isụk inemede mi, ete: “Ẹkpebe mi.” Nnyịn ndikpebe Jesus ayanam nnyịn idi mbet esie, ndien nnyịn imen ọkpọnọ esie ikọn̄ọ ke ini iyakde idem inọ Abasi inyụn̄ ina baptism. (Matthew 28:19, 20) Ọfọn idụk mbono esop kpukpru ini man ika iso idi mbet Jesus. Ntak-a? Koro edi ke mme mbono esop Christian ke ẹsikpep nnyịn ẹban̄a Jesus, mme ukpepn̄kpọ esie, ye mme usụn̄ unọ ukpep esie.

Nso idi mbiomo oro Christ ọkọdọhọde nnyịn ibiom? Edi ukem mbiomo oro enye ke idemesie okobiomde—edinam uduak Abasi. (John 4:34; 15:8) Oyom ẹsịn ukeme man ẹnịm ibet Abasi, edi mbiomo enye emi idobike ikaha. Enye editie nte odobi edieke iyomde  ndida odudu idem nnyịn mbiom enye. Nte ededi, edieke ibọn̄de akam iyom spirit Abasi inyụn̄ idiade udia eke spirit oro ẹnọde ke mme mbono esop, nnyịn iyọbọ “odudu eke ebede ukeme owo” ito Abasi. (2 Corinth 4:7) Nditịm idem nnọ nnyụn̄ ntiene mbuana ke mme mbono esop ayanam ima oro imade Jehovah etetịm okpon. Ndien edieke nnyịn imade Jehovah, ibet esie ‘ididobike nnyịn mbiomo.’—1 John 5:3.

Isimemke utom inọ ndusụk owo ndinyene se ẹdade ẹka inua, ndise mban̄a nsọn̄idem mmọ, ye mme ọkpọkpọ mfịna. Nte ededi, man ise iban̄a mme mfịna emi, nnyịn iberike edem ke ọniọn̄ owo. Mme mbono esop ẹn̄wam nnyịn ‘itre nditịmede esịt,’ sia Jehovah esinọ nnyịn se iyomde onyụn̄ an̄wam nnyịn iyọ mme mfịna. (Matthew 6:25-33) Ke akpanikọ, mme mbono esop Christian ẹwụt ima oro Abasi amade nnyịn.

“Ami Mmenyene Ifụre Ifụre Ido Nnyụn̄ Nsụhọde Esịt”

Jesus ama esika synagogue, emi ẹkesinemede Ikọ Abasi. Usen kiet ke ini enye akakade synagogue, enye ama ọbọ n̄wed prọfet Isaiah onyụn̄ okot ete: “Spirit Jehovah odoro mi ke idem, koro enye ama eyet mi aran enịm ete ntan̄a eti mbụk nnọ mme ubuene, enye ama osio mi ọdọn̄ ete n̄kwọrọ ubọhọ-ufụn nnọ mbuotekọn̄ nnyụn̄ n̄kwọrọ edifiak n̄kụt usụn̄ nnọ mme nnan, nnyụn̄ nnọ mmọ emi ẹfịkde ẹnyọn̄ọ ke ifụre, nnyụn̄ n̄kwọrọ isua mfọnido Jehovah.” (Luke 4:16, 18, 19) Ekedi n̄kpọ inemesịt didie ntem ndikop Jesus anamde ikọ oro an̄wan̄a ete: “Mfịn emi itien̄wed Abasi oro mbufo ẹsụk ẹkopde do omosu”!—Luke 4:21.

Jesus, kpa “etubom ekpemerọn̄” emi enyenede ifụre ifụre ido ke aka iso ndikpeme mme anditiene enye. (1 Peter 5:1-4) Enye amada “ofụn emi anamde akpanikọ onyụn̄ enyenede ọniọn̄” emek mme owo nte mme ekpemerọn̄ ke mme esop Mme Ntiense Jehovah ke ofụri ererimbot. (Matthew 24:45-47; Titus 1:5-9) Iren emi “ẹkpeme esop Abasi” ke ifụre ifụre ido ẹnyụn̄ ẹnịm eti uwụtn̄kpọ ke ndisidụk mme mbono esop kpukpru ini. Afo emekeme ndiwụt esịtekọm mban̄a ‘mme owo oro ẹnọde nte enọ’ mi ke ndisidụk mme mbono esop, man ekeme ndisịn udọn̄ nnọ mbon en̄wen ke ndidụk nnyụn̄ ntiene mbuana.—Utom 15:30-33; 20:28; Ephesus 4:8, 11, 12.

“Mbufo Ẹyekụt Nduọkodudu Ẹnọ Ukpọn̄ Mbufo”

Ke ini odụkde mme mbono esop Christian, didie ke afo akpanam mboho emi ẹnen̄ede ẹnọ fi nduọkodudu? Usụn̄ kiet edi ndinam item Jesus emi: “Ẹkpeme nte mbufo ẹkpan̄de utọn̄.” (Luke 8:18) Mbon oro ẹkenen̄erede ẹyom ndikpep n̄kpọ ẹma ẹtịm ẹkpan̄ utọn̄ ẹnọ Jesus. Mmọ ẹma ẹdọhọ enye anam mme uwụtn̄kpọ m̀mê n̄ke esie ẹn̄wan̄a mmimọ, ndien ẹma ẹnam ifiọk mmọ enen̄ede okpon.—Matthew 13:10-16.

Afo emekeme ndikpebe utọ mbon oro ẹkekopde biọn̄ ke n̄kan̄ eke spirit do ebe ke nditịm n̄kpan̄ utọn̄ n̄kop mme utịn̄ikọ oro ẹnọde ke mme mbono esop. (Matthew 5:3, 6) Domo nditiene se etịn̄ikọ enemede ketket man esịt fo owụhọ ke se ẹnemede oro. Bụp idemfo utọ mbụme nte: ‘Didie ke n̄keme ndida se ẹtịn̄de emi nsịn ke edinam? Didie ke n̄keme ndida enye n̄n̄wam mbon efen? Didie ke n̄keme ndinam se ẹnemede emi an̄wan̄a?’ Ke adianade do, kụbọde mme itie Bible oro etịn̄ikọ adade ọsọn̄ọ ikọ esie. Nte afo akpan̄de utọn̄, ntre ke mbono esop edinọ fi nduọkodudu.

Ke ẹma ẹkesuana, neme se ẹkekpepde ye mbon efen. Wụk ntịn̄enyịn ke se ẹkekpepde ye nte ekemede ndida enye nsịn ke edinam. Nneme oro ọbọpde-bọp esinam mme mbono esop ẹnen̄ede ẹnọ nduọkodudu.

Nte eyịghe mîdụhe, ana nnyịn isisop idem ọtọkiet. Ke ama okodụn̄ọde mme ufọn oro inemede mi, bụp idem fo ete, ‘Didie ke nyere ikot Jesus oro: “Ẹtiene mi”?’

[Mme ndise ke page 11]

Ndi mme edinam eken ẹsikpan fi ndidụk mbono esop kpukpru ini?