Nte Emenịm Ediset ke N̄kpa ke Akpanikọ?
Nte Emenịm Ediset ke N̄kpa ke Akpanikọ?
“Ndinen owo ye mme anam ukwan̄n̄kpọ ẹyeset ke n̄kpa.”—UTOM 24:15.
1. Ntak emi etiede nte n̄kpa enyene iwụk akan tax?
“KE ERERIMBOT emi, n̄kpọ ndomokiet inyeneke iwụk ke mîbọhọke n̄kpa ye tax.” Ndusụk owo ẹkere ke ikọ oro Benjamin Franklin, owo ukara America ekewetde mi ke 1789 esịne ifiọk. Edi, ediwak mbon abian̄a isimaha ndikpe nnennen tax mmọ. Akam etie nte n̄kpa enyene iwụk akan tax. N̄kpa etie nte udiọn̄edịm, ikan̄ake enyịnusụn̄. Enye eyịre owo ke ekpụk ọfọn̄. Ẹsimen ndima ufan nnyịn oro ẹkpan̄ade ẹkebụk ke udi ofụri ubonowo emi mîyọhọke tutu esịm emi. (Mme N̄ke 27:20) Edi kam kop ikọ ndọn̄esịt mi!
2, 3. (a) Ntak emi mîdịghe kpukpru owo ẹdikpan̄a? (b) Nso ke nnyịn idineme ke ibuotikọ emi?
2 Ikọ Jehovah ọn̄wọn̄ọ ọnọ nnyịn ke ẹyenam mme akpan̄kpa ẹset ẹfiak ẹdidu uwem. Emi eyenen̄ede etịbe, ndien idụhe n̄kpọ ndomokiet oro ekemede ndikpan Jehovah ndinam idotenyịn emi osu. Ndusụk owo ifiọkke ite ke idịghe kpukpru owo ke n̄kpa eyịre ke ekpụk ọfọn̄. Ntak-a? Koro “akwa otuowo” oro owo mîkemeke ndibat ẹyebọhọ “akwa ukụt” oro edidude ke mîbịghike. (Ediyarade 7:9, 10, 14) Mmọ ẹyeka iso ẹdu uwem ke nsinsi. Ntre, mmọ idikpaha tutu amama. N̄ko-n̄ko, “ẹyesobo n̄kpa ẹfep.”—1 Corinth 15:26.
3 Oyom inen̄ede inịm ke ẹyenam mme akpan̄kpa ẹset ukem nte apostle Paul, emi ekewetde ete: “Ndinen owo ye mme anam ukwan̄n̄kpọ ẹyeset ke n̄kpa.” (Utom 24:15) Ẹyak ibọrọ mbụme ita oro ẹban̄ade ediset ke n̄kpa. Akpa, ntak emi nnyịn ikpenịmde ke ẹyenam mme akpan̄kpa ẹset? Ọyọhọ iba, didie ke idotenyịn ediset ke n̄kpa ekeme ndidọn̄ fi esịt? Ọyọhọ ita, didie ke idotenyịn emi okpotụk nte odude uwem fo idahaemi?
Mme Akpan̄kpa Ẹyeset
4. Didie ke ediset ke n̄kpa edinam uduak Jehovah osu?
4 Odu ediwak ntak oro ẹnamde inịm ke ẹyenam mme akpan̄kpa ẹset. Akpan ntak kiet edi man uduak Jehovah osu. Ti ete ke Satan akanam ubonowo ẹnam idiọkn̄kpọ, ndien emi ama ada n̄kpa edi. Ntre Jesus ọkọdọhọ ke Satan “ekedi owotowo ke ini ọkọtọn̄ọde.” (John 8:44) Edi Jehovah ama ọn̄wọn̄ọ ke “n̄wan” imọ, m̀mê ndamban̄a esop imọ eke heaven, ọyọnọ mfri oro edinuakde “akani urụkikọt” oro kpa Satan, ibuot, onyụn̄ osobo enye ofụri ofụri. (Genesis 3:1-6, 15; Ediyarade 12:9, 10; 20:10) Nte Jehovah akayararede uduak esie kaban̄a Mfri Messiah nsịtnsịt, ama ana in̄wan̄-in̄wan̄ nte ke Mfri oro ayanam se ikande edisobo Satan. Ikọ Abasi ọdọhọ ete: “Ẹkeyarade Eyen Abasi kaban̄a uduak emi, oro edi, man abiat mme utom Devil.” (1 John 3:8) N̄kpa oro idiọkn̄kpọ emi ikadade-da imana ito Adam adade edi, edi kiet ke otu n̄kponn̄kan utom Satan oro Jehovah aduakde ndibiat mfep m̀mê ndida Jesus Christ nnam etre. Man emi etịbe, oyoyom uwa ufak Jesus, oyonyụn̄ oyom ẹnam mme owo ẹset ke n̄kpa.—Utom 2:22-24; Rome 6:23.
5. Didie ke ediset ke n̄kpa edinọ enyịn̄ Jehovah ubọn̄?
5 Jehovah ebiere ndinọ edisana enyịn̄ esie ubọn̄. Satan esuene enyịn̄ Abasi onyụn̄ osu nsu adian enye. Enye ama osu nsu ete ke Adam ye Eve “idikpaha” edieke mmọ ẹdiade mfri oro Abasi akakpande mmọ. (Genesis 2:16, 17; 3:4) Ọtọn̄ọde ke ini oro, Satan ke esịn udọn̄ ọnọ utọ nsu oro, utọ nte ukpepn̄kpọ ukpọn̄ ikpaha ke nsinsi. Nte ededi, Jehovah ayanam mme owo ẹset ke n̄kpa man ayarade Satan nte osu nsu. Jehovah oyowụt ke nsinsi ke imọ ikpọn̄ idi Andinịm ye Andinọ uwem.
6, 7. Nnyịn isan̄a didie ifiọk ke ọdọn̄ Jehovah ndinam mme owo ẹset ke n̄kpa?
6 Ọdọn̄ Jehovah ndinam mme akpan̄kpa ẹset. Bible anam se Jehovah ekerede aban̄a n̄kpọ emi an̄wan̄a. Ke uwụtn̄kpọ, kam kere ban̄a ikọ oro Job, kpa anam-akpanikọ asan̄autom Abasi, akadade odudu spirit Abasi etịn̄ ete: “Ke owo akpade, nte enye ediset? Nyebet ke ofụri ini utom mi [“ini utom oro ẹnyịkde-nyịk owo anam,” NW], tutu edikpụhọde itie mi edi. Afo okpokot, ndien ami n̄kpeyere fi, utom ubọk fo ọkpọdọn̄ fi.” (Job 14:14, 15) Nso ke ikọ emi ọwọrọ?
7 Job ama ọfiọk ke imọ inyene ndibet ke ima ikpa. Enye ekese ini oro nte “ini utom oro ẹnyịkde-nyịk owo anam,”oro edi, ini oro anade owo ebet tutu ẹnam enye eset. Enye ama enen̄ede enịm ke imọ iyeset. Job ama ọfiọk ke edikpụhọde itie imọ eyedi. Ntak-a? Koro enye ama ọfiọk nte etiede Jehovah ke idem. ‘Ọdọn̄’ Jehovah ndifiak n̄kụt anam-akpanikọ asan̄autom esie. Ke akpanikọ, ọdọn̄ Abasi ndinam kpukpru nti owo ẹset. Jehovah oyonyụn̄ ọnọ mbon en̄wen ifet ndidu nsinsi uwem ke Paradise isọn̄. (Luke 23:43; John 5:28, 29) Sia edide uduak Abasi ndinam mme akpan̄kpa ẹset, mmọn̄ọ ndi odu owo emi ekemede ndikpan enye?
8. Didie ke Jehovah ‘ọkọnọ nsọn̄ọ’ kaban̄a idotenyịn nnyịn?
8 Ediset ke n̄kpa Jesus ọsọn̄ọ idotenyịn nnyịn. Ke ini Paul ọkọnọde utịn̄ikọ ke Athens, enye ama ọdọhọ ete: “[Abasi] emenịm usen eke enye aduakde ndikpe ikpe nnọ isọn̄ ke edinen ido ebe ke owo emi enye emekde, ndien enye ọnọ kpukpru owo nsọn̄ọ ke emi enye akanamde owo oro eset ke n̄kpa.” (Utom 17:31) Ndusụk mbon oro ẹkekopde utịn̄ikọ Paul aban̄ade ediset ke n̄kpa ẹma ẹsak. Edi, ibat ibat owo ẹma ẹnịm ikọ esie ke akpanikọ. Ekeme ndidi ndidọhọ ke idotenyịn emi enyene nsọn̄ọ akanam mmọ ẹnịm. Jehovah ama anam akakan utịben̄kpọ ke ini enye akanamde Jesus eset ke n̄kpa. Enye ama anam Eyen esie eset nte okopodudu owo eke spirit. (1 Peter 3:18) Jesus oro ẹkenamde eset enyene idaha oro okponde akan enye oro enye ekenyenede mbemiso ekedide owo. Jesus emi mîkemeke ndikpa enyene ọkpọsọn̄ odudu emi odudu Jehovah kpọt okponde akan, ndien enye eben̄e idem ndinam mme utịbe utịbe utom oro Ete esie ọdọn̄de enye. Jehovah ada Jesus anam mbon en̄wen ẹset ẹka heaven m̀mê ẹdu ke isọn̄. Jesus ke idemesie ọkọdọhọ ete: “Ami ndi ediset ye uwem.” (John 5:25, 26; 11:25, 26) Jehovah ndinam Jesus eset ke n̄kpa ọsọn̄ọ idotenyịn mme anam-akpanikọ.
9. Didie ke mbụk Bible owụt ke mme owo ẹyeset ke n̄kpa?
9 Mme owo ẹma ẹkụt nte ẹnamde owo ẹset ẹnyụn̄ ẹwet emi ke Bible. Ẹtịn̄ ọyọhọ ọyọhọ ke Bible ẹban̄a nte ẹkenamde owo itiaita ẹset ke n̄kpa ẹfiak ẹdidu uwem mi ke isọn̄. Owo ikedịbeke-dịbe inam mme utịben̄kpọ emi, edi ẹkesinam mmọ ke eferife. Jesus ama anam Lazarus emi ama akakpa ke usen inan̄ eset; nte eyịghe mîdụhe, ediwak owo, esịnede mbonubon esie, mme ufan, ye mbọhọidụn̄ ẹma ẹkụt ediset ke n̄kpa emi. Uyarade oro okowụtde ke Abasi ọkọdọn̄ Jesus mi ama enen̄ede ọsọn̄ odudu tutu mbon ido ukpono oro ẹkesuade Jesus ikekemeke ndifan̄a ke oro ama etịbe. Utu ke oro, mmọ ẹma ẹdụk odu ndiwot Jesus ye Lazarus. (John 11:17-44, 53; 12:9-11) Ke akpanikọ, nnyịn imekeme ndinen̄ede nnịm ke mme akpan̄kpa ẹyeset. Abasi ama anam ẹwet nte ẹkenamde mme owo ẹset man ọdọn̄ nnyịn esịt onyụn̄ ọsọn̄ọ mbuọtidem nnyịn.
Ndibọ Ndọn̄esịt Nto Idotenyịn Ediset ke N̄kpa
10. Nso idinam nnyịn ikop ndọn̄esịt ke ini ikotde mme mbụk ẹban̄ade ediset ke n̄kpa ke Bible?
10 Nte emesiyom ndọn̄esịt ke ini n̄kpọ edịghede fi uwem? Usụn̄ kiet oro ekemede ndikop ndọn̄esịt edi ndisikot mme mbụk Bible ẹban̄ade ediset ke n̄kpa. Ndikot mme utọ mbụk oro, nditie n̄kere mmọ, ndinyụn̄ nda enyịn ikike n̄kụt nte ẹkenamde mme owo ẹset ẹkeme ndinam inen̄ede inịm ediset ke n̄kpa ke akpanikọ. (Rome 15:4) Mmọ idịghe ikpîkpu mbụk. Ata mme owo nte nnyịn ke ẹkenam ẹset ke n̄kpa. Ẹyak ineme uwụtn̄kpọ kiet—akpa ediset ke n̄kpa oro ẹwetde ke Bible.
11, 12. (a) Nso n̄kpọ mmọn̄eyet eketịbe ọnọ ebeakpa Zarephath, ndien didie ke enye akanam n̄kpọ ke ntọn̄ọ? (b) Tịn̄ se Jehovah ọkọnọde prọfet Elijah odudu ndinam nnọ ebeakpa oro.
11 Kere ban̄a se itịbede. Ke n̄kpọ nte urua ifan̄ idahaemi, prọfet Elijah emi edide esen ke ufọk ebeakpa Zarephath, odụn̄ ke ubet enyọn̄. Uwem enen̄ede ọsọn̄ etieti. Edịm idepke ke n̄kann̄kụk emi, ndien akan̄ enen̄ede ọsọn̄ ubọk. Ediwak owo ke ẹkpan̄a. Jehovah ama adada Elijah anam utịben̄kpọ oro edibịghide ọnọ osụhọde-idem ebeakpa emi ke ntak mbuọtidem esie. Biọn̄ ama ọtọn̄ọ ndidọn̄ ebeakpa emi ye ekpri eyeneren esie, akpatre udia oro mmọ ẹkenyenede ekedi oro, edi Abasi ama ọnọ Elijah odudu anam utịben̄kpọ man ndomuyo ye aran mmọ ẹdikụre. Edi ke emi, nso akwa n̄kpọ mmọn̄eyet etịbe ntem ọnọ mma emi! Eyen esie ọduọ udọn̄ọ ndien ke mîbịghike odop ibifịk. Ebeakpa emi enyene mbọm didie ntem! Ama akam ọdiọk etieti enye nditie ye unana ebe edi ke emi sese ikpọn̄-ikpọn̄ eyen esie akpa. Enye enen̄ede eseme tutu enye ọdọhọ ke Elijah ye Jehovah Abasi esie ẹwot eyen imọ. Nso ke prọfet emi akpanam?
12 Elijah iduọhọke ebeakpa emi ke edori ikọ oro. Utu ke oro, enye ọdọhọ ete: “Nọ mi eyen fo.” Ke ama ekemen okpo eyen oro ọdọk ubet enyọn̄, Elijah ọbọn̄ akam ndien ndien ete Abasi anam uwem afiak odụk eyen oro ke idem. Ke akpatre, Jehovah ọbọrọ akam esie. Kam kere nte esịt ekenemde Elijah ke ini enye okụtde nte oti eyen oro atuakde ke ini enye afiakde ọtọn̄ọ ndin̄wek. N̄kpọkenyịn eyen oro atara, enyịn esie onyụn̄ an̄wan̄a. Elijah ada eyen oro osụhọde edisọk eka esie onyụn̄ ọdọhọ ete: ‘Sese eyen fo odu uwem.’ Inua ikemeke nditịn̄ adan̄a nte esịt ekenemde enye. Enye ọdọhọ Elijah ete: “Ke emi ke mfiọk nte ke afo edi owo Abasi, uyo Jehovah emi odude fi ke inua onyụn̄ edi akpanikọ n̄ko.” (1 Ndidem 17:8-24) Enye enen̄ede ọbuọt idem ye Jehovah ye Elijah.
13. Ntak emi mbụk aban̄ade nte Elijah akanamde eyeneren ebeakpa eset ọdọn̄de nnyịn esịt?
13 Nditie n̄kere mme utọ mbụk emi ekeme ndinen̄ede ndọn̄ nnyịn esịt. Ana in̄wan̄-in̄wan̄ nte ke Jehovah enyene ukeme ndisobo n̄kpa emi edide asua nnyịn. Kam kere adan̄a ediwak ibatowo oro ẹdikopde inemesịt ukem nte ebeakpa oro ke ini ẹdinamde mme akpan̄kpa ẹset! Inemesịt oyokpon n̄ko ke heaven ke ini Jehovah edinọde Eyen esie uyo ete anam mme owo ke ofụri ererimbot ẹset. (John 5:28, 29) Ndi akanam n̄kpa ada owo oro afo amade? Enem didie ntem ndifiọk ke Jehovah ekeme, ke oyonyụn̄ anam mme akpan̄kpa ẹset!
Nte Idotenyịn Okpotụkde nte Odude Uwem Idahaemi
14. Didie ke idotenyịn ediset ke n̄kpa ekeme nditụk uwem fo?
14 Didie ke idotenyịn ediset ke n̄kpa ekeme nditụk nte odude uwem idahaemi? Idotenyịn emi ekeme ndisọn̄ọ fi idem ke ini nsọn̄ọn̄kpọ, ukọbọ, m̀mê n̄kpọndịk. Satan oyom ndinam fi enen̄ede okop ndịk n̄kpa man ọduọk nsọn̄ọnda fo ke ini ẹsịnde fi ndịk ke idem. Ti ke Satan ọkọdọhọ Jehovah ke “kpukpru se owo enyenede ke owo edinọ ke ibuot uwem esie.” (Job 2:4) Ke nditịn̄ utọ ikọ oro, Satan ama odori kpukpru nnyịn ikọ. Mmọn̄ọ, ndi edi akpanikọ ke eyetre ndinam n̄kpọ nnọ Abasi edieke osobode idomo? Ndikere mban̄a idotenyịn ediset ke n̄kpa ekeme ndisọn̄ọ ubiere fo ndika iso nnam uduak Ete fo eke heaven.
15. Nso ndọn̄esịt ke ikeme ndinyene nto ikọ Jesus oro ẹwetde ke Matthew 10:28 ke ini isobode n̄kpọndịk?
15 Jesus ọkọdọhọ ete: “Ẹkûfehe mmọ emi ẹwotde ikpọkidem edi mîkemeke ndiwot ukpọn̄; edi ẹkam ẹfehe enye emi ekemede ndiwot ukpọn̄ ye ikpọkidem ke Gehenna.” (Matthew 10:28) Inaha nnyịn ikop ndịk iban̄a Satan m̀mê ikọt esie. Edi akpanikọ, ndusụk mmọ ẹkeme ndinam nnyịn ibak m̀mê ndikam n̄wot nnyịn. Nte ededi, se ededi oro mmọ ẹdinamde nnyịn ididịghe ke nsinsi. Jehovah enyene ukeme nditre idiọkn̄kpọ ekededi oro ẹnamde ikọt esie, enye oyonyụn̄ anam oro, idem anamde mmọ ẹset. Jehovah kpọt odot se nnyịn ibakde inyụn̄ ituakde ibuot inọ. Enye kpọt enyene odudu ndida uwem owo ye ofụri idotenyịn owo, oro edi, osobo ikpọkidem ye ukpọn̄ ke Gehenna. Edi n̄kpọ inemesịt ndifiọk ke Jehovah iyomke oro etịbe ọnọ fi. (2 Peter 3:9) Ke ntak idotenyịn ediset ke n̄kpa, nnyịn nte mme asan̄autom Abasi imekeme nditịm mfiọk ke nnyịn inyeneke mfịna. Nsinsi uwem ke ana ebet nnyịn ama akam edi nnyịn imanam akpanikọ, ndien Satan ye ikọt esie ikemeke ndikpan nnyịn ndinyene uwem oro.—Psalm 118:6; Mme Hebrew 13:6.
16. Didie ke ekikere nnyịn kaban̄a ediset ke n̄kpa enyene n̄kpọ ndinam ye se idade nte ebeiso n̄kpọ?
16 Edieke inyenede idotenyịn ediset ke n̄kpa, oro ekeme ndikpụhọde nte isede uwem nnyịn. Nnyịn imọfiọk ke ‘edieke idude uwem m̀mê ikpade, nnyịn inyene Jehovah.’ (Rome 14:7, 8) Mmọdo, oyom ida item Paul emi isịn ke edinam ke ini imekde se idide mme ebeiso n̄kpọ: “Ẹkûnyụn̄ ẹbiet editịm n̄kpọ emi, edi ẹkpụhọde oto ke edinam ekikere mbufo edi obufa, man mbufo ẹkpedomo ẹfiọk uduak Abasi eke edide eti onyụn̄ enemde enye esịt onyụn̄ ọfọnde ama.” (Rome 12:2) Ata ediwak owo ẹsinen̄ede ẹsịn idem man ẹnyene kpukpru se mmọ ẹyomde. Sia mmọ ẹdiọn̄ọde ke owo ibịghike uwem, esitie mmọ ke idem nte akpana mmimọ isọsọp inyene kpukpru se iyomde, ndien edieke mmọ ẹnyenede ido ukpono, enye isan̄ake ikekem ye ‘mfọnmma uduak Abasi.’
17, 18. (a) Didie ke Ikọ Jehovah owụt ke owo ibịghike uwem, edi nso ke Abasi oyom nnyịn inyene? (b) Ntak emi nnyịn ikpotorode Jehovah kpukpru usen-e?
17 Edi akpanikọ ke owo ibịghike uwem. Enye ‘esiwara ebe efep, ndien nnyịn idan̄a,’ edide ke isua 70 m̀mê 80. (Psalm 90:10) Mme owo ẹsidu ke ekpri ibio ini ekem ẹbe ẹfep nte mbiet. (Psalm 103:15; 144:3, 4) Edi Abasi ikaduakke ite nnyịn idu ke isua ifan̄ kpọt, ikọri inyụn̄ ikọ ifiọk ndien ekem itọn̄ọ ndikop mmemidem, iduọ udọn̄ọ, inyụn̄ ikpan̄a. Jehovah okobot owo ye udọn̄ ndidu uwem ke nsinsi. Bible asian nnyịn ete ke Abasi ‘ama esịn owo nsinsi ini ke esịt.’ (Ecclesiastes 3:11, NW) Ndi Abasi edi ibak, emi okpobotde nnyịn ye utọ udọn̄ oro edi iyakke nnyịn idu uwem nsinsi? N̄wan̄ansa-o! “Abasi edi ima.” (1 John 4:8) Enye ayanam mbon oro ẹkpan̄ade ẹset ẹdidu uwem nsinsi.
18 Idotenyịn ediset ke n̄kpa anam nnyịn inyene inem inem ini iso. Ufọn idụhe ndinam n̄kpọ itọk itọk, ikerede ke akpana inam kpukpru se akpanade inam idahaemi. Inaha nnyịn ida idiọk ererimbot emi inam n̄kpọ “ọyọhọ ọyọhọ.” (1 Corinth 7:29-31; 1 John 2:17) Nnyịn itiehe nte mbon oro mînyeneke ata idotenyịn, sia Jehovah Abasi anam nnyịn ifiọk ke edieke inamde akpanikọ inọ imọ, iyodu uwem inyụn̄ itoro enye ke nsinsi. Ntre, ẹyak nnyịn itoro Jehovah kpukpru usen, koro enye ayanam mme akpan̄kpa ẹset!
Didie ke Afo Ọkpọbọrọ?
• Idotenyịn ediset ke n̄kpa ekpetie nnyịn didie ke idem?
• Mme n̄kpọ ewe ẹnam nnyịn inịm ke ẹyenam mme akpan̄kpa ẹset?
• Didie ke idotenyịn ediset ke n̄kpa ekeme ndidọn̄ fi esịt?
• Didie ke idotenyịn ediset ke n̄kpa okpotụk nte odude uwem?
[Mme Mbụme Ukpepn̄kpọ]
[Ndise ke page 28]
Job ama ọfiọk ke ọdọn̄ Jehovah ndinam nti owo ẹset
[Ndise ke page 29]
‘Sese eyen fo odu uwem’