Nte Omokop Ndịk Aban̄a Ini Iso?

MME owo ẹnyene nsio nsio ntak ndikop ndịk. Ke uwụtn̄kpọ, ndusụk owo ẹkop ndịk ẹban̄a nte isọn̄ editiede ke ini iso. Magazine Time eke April 3, 2006 ọkọdọhọ ete: “Ọkpọsọn̄ ufiop ofụm, oyobio, ukwọ, ikan̄, ọkọrọ ye ikpọ eboho ice nditara, ẹnen̄ede ẹwụt nte ekondo abiarade eketre.

Ke May 2002, Ndutịm N̄kann̄kụk Edidiana Mme Idụt ẹma ẹmịn̄ ntọt emi ibuotikọ ekedide: “Nte Ekondo Etiede—Ọyọhọ Ikpehe 3.” Se iwakde ibe owo 1,000 ẹma ẹtịp n̄kpọ ẹsịn ke se ẹkewetde. Mbụk n̄kpọntịbe kiet ọdọhọ ke ntọt oro ọkọdọhọ ete: “Ekondo odu ke ata idiọk idaha koro mme ubiere oro mme owo ẹnamde mfịn ẹnen̄erede ẹtụk mme akai, inyan̄ibom, akpa, ikpọ obot, unamikọt, ye mme ndutịm eken oro ẹnamde uwem aka iso, kpa mme n̄kpọ emi emana idahaemi ye emana ini iso ẹdoride enyịn.”

Nte ekondo abiarade eketre mfịn edi kiet ke otu ntak editịmede esịt. Mme owo ke ofụri ererimbot ẹdidu uwem idahaemi ke ndịk ke ntak edinam oyomonsia. Udiana esenyịn ke akwa itieutom mbon ukpeme Canada ọkọdọhọ ete: “Nnyịn imesitaba idap okoneyo itie ikere iban̄a n̄kpọndịk oro nnyịn mîfiọkke iban̄a.” Kamse, ndise mbụk n̄kpọntibe ke ekebe ndise ekeme nditịmede owo esịt!

Ndịk esinam ediwak ikpọ owo oro ẹnamde utom ọkpọsọn̄ ẹkere ke ẹkeme ndisio mmimọ ke utom. Edisio owo ke utom, usiakifia ndiwụre, umia mbuba ke itieutom, ye mme eteutom ndiyom n̄kpọ n̄kaha nto mbonutom ẹkeme ndinam mme owo ẹkop ndịk ẹban̄a utom. Ndịk esinam mme uyen ẹkere ke ubọkn̄ka mmimọ ẹkeme ndisọn mmimọ. Ndịk ekeme ndinam nditọwọn̄ ẹkere ke ete ye eka mmimọ inen̄ekede ima mmimọ. Edi ndi mmọ ẹsikop ndịk ẹban̄a nte ererimbot etiede? Eka kiet oro okopde editịmede  esịt ọdọhọ ete: “Nditọwọn̄ ye mbon oro mîtịmke inyene ifiọk ẹsinen̄ede ẹkop ndịk ke ini mmọ ẹwọrọde ẹkpọn̄ ufọk.” Ndien ediwak ete ye eka ẹtịmede esịt ẹban̄a odudu oro mbiara ido uwem ererimbot emi enyenede ke idem mbon oro mmọ ẹmade, akpan akpan ke idem nditọ mmọ.

N̄kani owo ẹsiwak ndikop ndịk ediduọ ke ntak isiọn̄ m̀mê owo ndifiomo mmọ ke efak. Ih, “mmọ . . . ẹbak se ikon̄de, n̄kpọ ndịk ẹnyụn̄ ẹdu ke usụn̄.” (Ecclesiastes 12:5) Ẹkop ndịk ẹban̄a idiọk udọn̄ọ. Ntọt oro aban̄ade mme ifọt udọn̄ọ n̄kpa, utọ nte udọn̄ọ efiomnsa, kansa, ye mme udọn̄ọ eken oro ẹkemede ndibe owo ẹkeme ndinam nnyịn ikop ndịk ke iyemen esen esen udọn̄ọ, emi ekemede ndinọmọ m̀mê ndiwot nnyịn ye mbonubon nnyịn. Oro anam ke ini ikụtde mbon oro ẹkekopde nsọn̄idem ẹkenyụn̄ ẹnyenede odudu ẹdọn̄ọde n̄kpa-n̄kpa, esidi ata mmemmem n̄kpọ ndikere ke ukem n̄kpọ oro eyetịbe ọnọ nnyịn m̀mê mbon oro imade. Kere nte esitiede fi ke idem ke ini esede owo udọn̄ọ onyụn̄ okụtde ke idotenyịn esie akpa mfụhọ!

Sia odude ediwak n̄kpọ oro ẹkemede ndinam nnyịn ndịk, nte ntak ekededi odu ndinyene idotenyịn mban̄a ini iso? Ndi odu se ikpanamde ikere ke n̄kpọ ọyọfọn? Ibuotikọ oro etienede ọyọbọrọ mme mbụme emi.

[Ebiet Ẹdade Ndise Ẹto ke page 3]

© Jeroen Oerlemans/Panos Pictures