Unọ Ukpep Bible Oro An̄wamde Mme Owo Ẹnyene Mbuọtidem

ANDIDA ke ibuot ọyọhọ otu 122 ke Ufọkn̄wed Enyọn̄-Ukpeme Ukpep Bible eke Gilead ọkọdọhọ ke usen ukụre ukpep mmọ ete: “Nso ọsọn̄urua ifet ke edi ntem ndida ọfiọn̄ ition oro ẹbede nnen̄ede n̄kpep mban̄a nte Andibot esikerede n̄kpọ nnyụn̄ n̄kpep ndise n̄kpọ nte enye esisede.” Nditọ ufọkn̄wed 56 emi ẹben̄ede idem nditọn̄ọ utom isụn̄utom mmọ ke idụt 26 oro ẹnọde mmọ ẹka, idisọpke ifre March 10, 2007.

Ke Theodore Jaracz, emi edide owo Otu Ukara, ama ekenen̄ede ọkọm kpukpru owo 6,205 oro ẹkedụkde edinam emi, enye ama ọdọhọ ete: “Nnyịn imenen̄ede inịm ke edinam ukụre ukpep emi ayanam mbufo ẹnen̄ede ẹkop idem ke n̄kan̄ eke spirit onyụn̄ anam mbuọtidem mbufo etetịm ọsọn̄.” Enye ama okot etịn̄ikọ inan̄ ke adiana ke adiana, oro ẹkedade Bible ẹnọ nditọ ufọkn̄wed oro ekemini item ye nsịnudọn̄ oro ẹdin̄wamde mmọ ẹkụt unen ke utom isụn̄utom mmọ.

Ẹsịn Udọn̄ Ẹnọ Mmọ Ẹn̄wam Mbon En̄wen Ẹnyene Mbuọtidem

Leon Weaver, emi edide owo Kọmiti N̄kọk Itieutom United States ama etịn̄ ikọ ke ibuotikọ emi, “Ẹka Iso Ẹnam Se Ifọnde.” Enye ama eti nditọ ufọkn̄wed ete ke ẹbaharede ukem ukem, owo mmọ kiet kiet abiat isua 13 ke utom uyọhọ ini ekpep mme owo Bible man ẹnyene mbuọtidem ke Abasi. Enye ọkọdọhọ ete: “Eti utom ke mbufo ẹnam, koro enye edi utom unyan̄a uwem, ndien se ikam inamde enye enen̄ede edi eti utom edi nte ke enye ọnọ Jehovah, Ete nnyịn eke heaven, ubọn̄.” Ekem, Brọda Weaver ama esịn udọn̄ ọnọ nditọ ufọkn̄wed ete ẹka iso ‘ẹtọ ẹnọ spirit,’ ẹkûnyụn̄ ‘ẹkpa mba ke edinam se ifọnde.’—Galatia 6:8, 9.

David Splane, emi edide owo Otu Ukara, ama ọnọ utịn̄ikọ oro etide mmọ ata akpan n̄kpọ, ke ibuotikọ emi, “Ẹkụt Ẹte ke Ẹmesịn Ofụri Ukeme Mbufo ke Ntọn̄ọ.” Brọda Splane ama esịn udọn̄ ọnọ mbufa isụn̄utom emi ete ẹsịn ofụri ukeme mmọ toto ke akpa usen oro mmọ ẹtọn̄ọde utom isụn̄utom mmọ. Enye ọkọdọhọ mmọ ete: “Ẹnyene in̄wan̄-in̄wan̄ edu. Ẹkûsọp ẹbiere ikpe ẹnọ owo. Ẹtie ufan ufan. Ẹkûdi mme okụt-ndudue. Ẹsụhọde idem, ẹnyụn̄ ẹkpono nditọete oro ẹdikade ẹkesobo.” Ekem enye ama adian do ete: “Ẹma ẹsụk ẹwọwọrọ ke ubomofụm, ẹtọn̄ọ ndinam ofụri ukeme mbufo, ndien Jehovah akpakam ọdiọn̄ ndiye ukot mbufo nte mmọ ẹdade ‘eti mbụk eti n̄kpọ’ ẹsọk mme owo.”—Isaiah 52:7.

 “Inyene Oro Enyenede Nsọn̄ọ,” ekedi ibuotikọ oro Lawrence Bowen, andikpep ke Gilead, ekenemede. Brọda Bowen ama eti nditọ ufọkn̄wed ke mbuọtidem oro ẹkenyenede ke ntịn̄nnịm Ikọ Jehovah oyosu akanam ẹtọn̄ọ Ufọkn̄wed Gilead ke ini udiana ekọn̄ ererimbot okosụk an̄wanade. (Mme Hebrew 11:1; Ediyarade 17:8) Toto ke ini oro, Ufọkn̄wed Gilead ọnọ nditọ ufọkn̄wed ifet ndisọn̄ọ mbuọtidem mmọ. Ọkpọsọn̄ mbuọtidem anam nditọ ufọkn̄wed oro ẹkụrede ukpep ẹka iso ẹtan̄a akpanikọ ifịk ifịk.

Mark Noumair, andikpep efen ke Gilead ekeneme edemede-owo-udọn̄ ibuotikọ emi, “Enyene Owo Emi Mbufo Ẹbietde.” Enye ama etịn̄ aban̄a prọfet Elisha, emi  akadade uko ye mbuọtidem anam utom esie. Brọda Noumair akada ikọ esie oto 1 Ndidem 19:21, onyụn̄ ọdọhọ ete: “Elisha ama enyịme ndinam ukpụhọde ke uwem esie, ayak ọkpọkpọ mbubehe esie edi udiana n̄kpọ ke uwem esie, onyụn̄ esịn idem anam uduak Jehovah.” Enye ama otoro mme andikụre ukpep emi ke ntak emi mmọ ẹnyenede ukem edu Elisha onyụn̄ esịn udọn̄ ọnọ mmọ ete ẹka iso ẹnyene edu emi ke obufa efakutom mmọ.

Mbuọtidem Anam Ẹnyene Ifụre Utịn̄ikọ

Nditọ ufọkn̄wed emi ẹma ẹda ukpep oro mmọ ẹkebọde ke ufọkn̄wed ẹsọn̄ọ mbuọtidem mmọ, ẹnyụn̄ ẹda mme utịturua ẹkwọrọ eti mbụk ẹnọ mbon en̄wen. Emi ama anam ẹnyene ndinem ifiọkutom oro ẹkebụkde, ẹnyụn̄ ẹfiak ẹnanam ndusụk ẹwụt ke ikpehe edinam oro Wallace Liverance, emi edide andikpep en̄wen ke Gilead, akadade usụn̄. Ibuotikọ esie, “Mbuọtidem Oro Inyenede Anam Itịn̄ Ikọ,” anam owo eti ikọ apostle Paul oro ẹwetde ke 2 Corinth 4:13.

Ke oro ebede, Daniel Barnes ye Charles Woody, emi ẹdide mbonubon Bethel, ẹma ẹnam ndụn̄ọde ye mbufa ye n̄kani isụn̄utom. Mmọ ẹma ẹtịn̄ nte Jehovah ekerede aban̄a owo onyụn̄ ọdiọn̄de mbon oro ẹsịnde idem ẹnam utom esie. (Mme N̄ke 10:22; 1 Peter 5:7) Isụn̄utom kiet ọkọdọhọ ete: “Ukpep oro ikọbọde ke Gilead ama anam mi ye n̄wan mi inen̄ede ikụt mfọn Jehovah. Emi ama enen̄ede ọsọn̄ọ mbuọtidem nnyịn. Mbuọtidem edi akpan n̄kpọ koro kpukpru mme asan̄autom Abasi, esịnede mme isụn̄utom, ẹyekop editịmede esịt ẹnyụn̄ ẹsobo mme idomo ye afanikọn̄.”

Ẹka Iso Ẹkpep Mme Owo Bible man Mmọ Ẹnyene Mbuọtidem

Samuel Herd, owo Otu Ukara ama ada edinam oro ekeberi ediye ediye ke ndineme ibuotikọ emi, “Ẹka Iso Ẹsọn̄ọ Nditọete Mbufo Idem.” Ntak emi nditọ ufọkn̄wed emi ẹkebọde ofụri ukpep emi? Brọda Herd ọkọdọhọ ete: “Ntak edi man ẹkpep mbufo ndida edeme mbufo ntoro Jehovah, n̄kpep mbon en̄wen akpanikọ ke efakutom oro ẹnọde mbufo, nnyụn̄ nsọn̄ọ mbuọtidem nditọete mbufo.” Nte ededi, enye ama eti nditọ ufọkn̄wed ke owo ekeme n̄ko ndida edeme esie ntịn̄ se mîbọpke-bọp. (Mme N̄ke 18:21; James 3:8-10) Enye ama esịn udọn̄ ọnọ nditọ ufọkn̄wed oro ete ẹkpebe uwụtn̄kpọ Jesus ke nte mmọ ẹtịn̄de ikọ. Ke mme mbet Jesus ẹma ẹkekpan̄ utọn̄ ẹnọ enye ini kiet, mmọ ẹma ẹdọhọ ẹte: “Nte esịt ikofiopke nnyịn . . . nte enye akatatde N̄wed Abasi ọnọ nnyịn ọyọhọ ọyọhọ?” (Luke 24:32) Brọda Herd ama ọdọhọ ete: “Edieke ikọ mbufo ọbọpde-bọp, mmọ ẹyetụk esịt nditọete mbufo ke efakutom mbufo.”

Ke oro ebede, ẹma ẹnọ mme andikụre ukpep emi n̄weditoro. Ekem, ẹma ẹkot leta esịtekọm oro nditọ ufọkn̄wed emi ẹkewetde. Leta oro ama ọdọhọ ete: “Nnyịn imọfiọk ke enen̄ede obiomo nnyịn ndida se ikpepde nnam utom isụn̄utom nnyịn ke ofụri esịt. Nte iben̄ede idem ndika nsio nsio ebiet ke ererimbot, nnyịn ibọn̄ akam ite yak ukeme oro isịnde ada akwa itoro ọsọk Akwa Anditeme nnyịn, kpa Jehovah Abasi.” Otuowo ẹma ẹnen̄ede ẹkwak ubọk. Ke akpanikọ, edinam ukụre ukpep emi ama ọsọn̄ọ mbuọtidem kpukpru mme andidụk.

[Se Ẹwetde ke Ikpọ Abisi ke page 17]

“Edieke ikọ mbufo ọbọpde-bọp, mmọ ẹyetụk esịt nditọete mbufo ke efakutom mbufo”

[Ekebe ke page 15]

IDAHA OTU

Ibat idụt oro ẹtode: 9

Ibat idụt oro ẹnọde ẹka: 26

Ofụri ibat nditọ ufọkn̄wed: 56

Isua emana mmọ ke ẹbaharede ukem ukem: 33.4

Isua oro ẹdude ke akpanikọ ke ẹbaharede ukem ukem: 16.8

Isua oro ẹnamde utom uyọhọ ini ke ẹbaharede ukem ukem: 13

[Ndise ke page 16]

Ọyọhọ Otu 122 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead

Ke udịm enyịn̄ oro ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.