Ndinyene Ime Ntie Mbet Usen Jehovah
Ndinyene Ime Ntie Mbet Usen Jehovah
‘Ẹdian ime ke mbuọtidem mbufo.’—2 PETER 1:5, 6.
1, 2. Nso idi ime, ndien ntak emi oyomde mme Christian ẹme ime?
AKWA usen Jehovah enen̄ede ekpere. (Joel 1:15; Zephaniah 1:14) Sia idide mme Christian oro ẹbierede ndisọn̄ọ nda ye Abasi, nnyịn itetie ibet ini oro ẹdiwụtde ke Jehovah enyene unen ndikara. Edi idahaemi, mbuọtidem nnyịn anam mme owo ẹsua, ẹsuene, ẹkọbọ, ẹnyụn̄ ẹwot nnyịn. (Matthew 5:10-12; 10:22; Ediyarade 2:10) Ntre, oyom ime, oro edi ukeme ndiyọ n̄kpọ. Apostle Peter eteme nnyịn ete: ‘Ẹdian ime ke mbuọtidem mbufo.’ (2 Peter 1:5, 6) Oyom ime ime m̀mê iyọyọ koro Jesus ọkọdọhọ ke “ẹyenyan̄a owo eke ediyọde tutu esịm utịt.”—Matthew 24:13.
2 Nnyịn n̄ko imesidọn̄ọ, ifụhọ n̄kpa owo nnyịn, inyụn̄ isobo mme idomo eken. Satan ekpenem esịt didie ntem ndikụt nte iwụrede ke mbuọtidem! (Luke 22:31, 32) Jehovah ekeme ndin̄wam nnyịn iyọ nsio nsio idomo. (1 Peter 5:6-11) Kere ban̄a mme ata ifiọk n̄kpọntịbe oro ẹwụtde ke imekeme ndinyene ime ye ọkpọsọn̄ mbuọtidem ntie mbet usen Jehovah.
Udọn̄ọ Ikpanke Mmọ
3, 4. Nọ uwụtn̄kpọ oro owụtde ke nnyịn imekeme ndika iso nnam n̄kpọ Jehovah kpa ye udọn̄ọ.
3 Abasi isikọkke udọn̄ọ nnyịn idahaemi ke utịbe utịbe usụn̄, edi enye esinọ nnyịn ukeme ndiyọ. (Psalm 41:1-3) Sharon ọkọdọhọ ete: “Adan̄a nte n̄kemede nditi, n̄kpọitie mbon n̄kpọnnam ekesidi nsan̄a mi kpukpru ini. Ọtọn̄ọde ke emana aka iso, udọn̄ọ ebietde akpauben̄ ama ọbọ mi idara ini uyen.” Ndikpep n̄kpọ mban̄a Jehovah ye mme un̄wọn̄ọ esie ẹma ẹnam Sharon enyene idotenyịn. Okposụkedi esisọn̄de enye nditịn̄ ikọ m̀mê ndisan̄a isan̄, enye esikop inemesịt ke ini anamde mme utom Christian. Kop se enye eketịn̄de ke n̄kpọ nte isua 15 emi ẹkebede: “Idem mi ekeme ndikaiso ndiọk, edi mbuọtidem mi ke Abasi ye itie ebuana mi ye enye ẹmụm mi ẹkama. N̄kop inemesịt didie ntem ndidu ke otu ikọt Jehovah nnyụn̄ nnyene un̄wam esie oro mîkpụho!”
4 Apostle Paul ama esịn udọn̄ ọnọ mme Christian ke Thessalonica ete: “Ẹtịn̄ ikọ ẹsọn̄ọ ukpọn̄ eke ofụhọde esịt.” (1 Thessalonica 5:14) Unana idotenyịn edi kiet ke otu mme n̄kpọ oro ẹkemede ndinam owo ofụhọ. Sharon ekewet ke 1993 ete: “Ke etiede nte mmokpu ofụri ofụri, mma . . . n̄kodụk akamba mfụhọ ke isua ita. . . . Mbiowo ẹma ẹnọ ndọn̄esịt ye item. . . . Ebede ke Enyọn̄-Ukpeme, Jehovah sụn̄sụn̄ ama ọnọ mbufiọk kaban̄a ọkpọsọn̄ mfụhọ. Ih, enye ekere aban̄a ikọt esie onyụn̄ ọdiọn̄ọ mme ntụk nnyịn.” (1 Peter 5:6, 7) Sharon osụk ananam n̄kpọ Abasi tutu esịm emi, ke onyụn̄ enyene ime etie ebet usen Jehovah.
5. Nso iwụt ke mme Christian ẹkeme ndikop ọkpọsọn̄ editịmede esịt?
5 Mme n̄kpọ oro ẹketịbede ẹnọ ndusụk Christian ẹsinam mmọ ẹnen̄ede ẹkop editịmede esịt. Harley ama okụt nte ẹkenen̄erede ẹduọk iyịp owo ke ini akpa ekọn̄ ererimbot, ndien ekikere un̄wana ekọn̄ ama esitịmede enye. Idem ke ini Harley edede idap ke okoneyo, enye ama esifiori ke ndap ete: “Kpeme-o! Mme asua ke ẹdi-o!” Enye ama edemede, ibibiak esida enye idem. Nte ededi, enye ama ọtọn̄ọ ndinam n̄kpọ Abasi, ndien nte ini akakade, enye ikesinen̄ekede idaba mme utọ ndap oro aba.
6. Didie ke udọn̄ọ ibuot akafịna Christian kiet?
6 Ikememke utom inọ Christian kiet oro ọkọdọn̄ọde udọn̄ọ ibuot ndisikwọrọ ikọ to ke enyịnusụn̄ sịm enyịnusụn̄. Nte ededi, enye ama esịn idem ọkwọrọ ikọ koro enye ama ọfiọk ke utom ukwọrọikọ ayanyan̄a imọ ye mbon oro ẹkopde uyo imọ. (1 Timothy 4:16) Ndusụk ini, enye ikesikam ikemeke ndikọkọn̄ enyịnusụn̄ ufọk owo. Enye ọdọhọ ete: “Ke esisịt ini ebede, nyekeme ndikara mme ntụk mi, n̄ka enyịnusụn̄ efen, nnyụn̄ mfiak ndomo. Ebede ke ndika iso mbuana ke utom ukwọrọikọ, mma mmụm nsọn̄idem eke spirit n̄kama, ndien oro ama anam mi nnyene ukeme efen efen ndiyọ.” Ikememke utom n̄ko ndisidụk mme mbono esop, edi eyenete emi ama enen̄ede ọdiọn̄ọ ufọn mbono esop. Oro ama anam enye enen̄ede esịn ukeme man esidụk.—Mme Hebrew 10:24, 25.
7. Didie ke ndusụk owo ẹyọ okposụkedi emi mmọ ẹsikopde ndịk nditịn̄ ikọ ke otuowo m̀mê ndidụk mbono esop?
7 Ọkpọsọn̄ ndịk esinam ndusụk Christian. Ke uwụtn̄kpọ, nditịn̄ ikọ ke otuowo m̀mê ndidụk mbono esop esinam mmọ ndịk. Kam kere nte esisọn̄de utọ mbon oro ndibọrọ mbụme ke mbono esop m̀mê ndinọ utịn̄ikọ ke Ufọkn̄wed Utom Ukara Abasi! Edi oro ikpanke mmọ ndidụk mme mbono emi, ndien nnyịn imenen̄ede ikọm mmọ ke ndisidụk nnyụn̄ ntiene mbuana ke mme mbono emi.
8. Nso idi mfọnn̄kan n̄kpọ oro ikpanamde ke ini iyọde mfịghe?
8 Ndinen̄ede nduọk odudu nnyụn̄ nde idap ẹkeme ndin̄wam owo ọyọ mfịghe. Ọkpọfọn ẹyom un̄wam ẹto mbiausọbọ. Nte ededi, mfọnn̄kan n̄kpọ edi ndibọn̄ akam nnyụn̄ mbuọt idem ye Abasi. Psalm 55:22 ọdọhọ ete: “Top mbiomo fo nọ Jehovah, ndien enye ayakama fi: enye idiyakke edinen owo esehede ke nsinsi.” Ntre, nen̄ede “buọt idem fo ye Jehovah ke ofụri esịt fo.”—Mme N̄ke 3:5, 6.
Ndiyọ ke Ini Owo Nnyịn Akpade
9-11. (a) Nso ikeme ndin̄wam nnyịn iyọ mfụhọ ke ini owo nnyịn akpade? (b) Didie ke uwụtn̄kpọ Anna ekeme ndin̄wam nnyịn iyọ ke ini owo nnyịn akpade?
9 Ke ini n̄kpa adianarede mbonubon, utọ akwa ntakurua oro ekeme ndinam owo enen̄ede ofụhọ. Abraham ama atua ke ini Sarah edima n̄wan esie akakpade. (Genesis 23:2) Idem Jesus emi edide mfọnmma owo ama “atua” ke ini Lazarus ufan esie akakpade. (John 11:35) Ntre edi ndammana n̄kpọ ndifụhọ ke ini owo oro afo amade akpade. Edi, mme Christian ẹdiọn̄ọ ke mme akpan̄kpa ẹyeset. (Utom 24:15) Ntre, mmọ ‘isifụhọke nte mbon oro mînyeneke idotenyịn.’—1 Thessalonica 4:13.
10 Didie ke nnyịn ikeme ndiyọ ke ini owo nnyịn akpade? Yak ida uwụtn̄kpọ inam mbụme emi an̄wan̄a. Nnyịn isinen̄ekede ifụhọ ke ini ufan nnyịn akade isan̄ sia imọfiọk ke iyafiak ikụt enye ke ini enye edinyọn̄de edi. Ndida n̄kpa Christian oro anamde akpanikọ ntre ekeme ndinam ikûnen̄ede ifụhọ sia imọfiọk ke ẹyenam enye eset.—Ecclesiastes 7:1.
11 Ndinyene ọyọhọ mbuọtidem ke “Abasi kpukpru ndọn̄esịt” ayan̄wam nnyịn iyọ ke ini owo nnyịn akpade. (2 Corinth 1:3, 4) Ndikere mban̄a se Anna emi ekedide ebeakpa ke akpa isua ikie akanamde ayan̄wam nnyịn n̄ko iyọ. Ebe esie akakpa ọkpọn̄ enye ke mmọ ẹma ẹkedọ ndọ ke isua itiaba kpọt. Edi Anna okosụk ananam n̄kpọ Abasi ke temple idem ke ini enye ekedide isua 84. (Luke 2:36-38) Ndisịn idem nnam n̄kpọ Abasi ikayakke mfụhọ ye ndobo ẹmen enye ẹmen. Ndisitiene nnam mme utom Christian kpukpru ini, esịnede edikwọrọ Obio Ubọn̄ ẹkeme ndin̄wam nnyịn iyọ ke ini owo nnyịn akpade.
Ndiyọ Nsio Nsio Idomo
12. Nso idi mfịna ubon oro ndusụk Christian ẹyọde?
12 Ndusụk Christian ẹyọ mme mfịna ubon. Ke uwụtn̄kpọ, edieke nsan̄a ndọ esịnde efịbe, oro esinam uwem ọsọn̄ ye ubon esie. Ọkpọsọn̄ ndịk ye mfụhọ ẹkeme ndinam nsan̄a ndọ oro mîduehe ataba idap atua eyet eyet. Ndinam n̄kpri utom ekeme ndidi ata ọkpọsọn̄ n̄kpọ, ndien ke ntak emi, enye ekeme ndinam ndudue m̀mê akam ada unan. Nsan̄a ndọ oro mîduehe ekeme nditre udia, idem ekeme ndiwọrọ enye, ndien ekikere ekeme ndisiaha enye iba. Nditiene mbuana ke mme edinam Christian ekeme ndidi ọkpọsọn̄ n̄kpọ. Emi ekeme ndinen̄ede mfịna nditọ mmọ!
13, 14. (a) Didie ke akam oro Solomon ọkọbọn̄de ọnọ Jehovah ke ini ẹkeyakde temple ẹnọ, ọdọn̄ fi esịt? (b) Ntak emi ikpọbọn̄de akam iyom edisana spirit?
13 Jehovah esinọ un̄wam oro iyomde ke ini isobode mme utọ mfịna oro. (Psalm 94:19) Akam oro Edidem Solomon ọkọbọn̄de ọnọ Jehovah ke ini ẹkeyakde temple Jehovah ẹnọ owụt ke Abasi esikop akam ikọt esie. Solomon ekeben̄e Abasi ete: “Kpukpru akam, ye kpukpru n̄kpe ubọk eke kpukpru owo, ye kpukpru ikọt fo Israel ẹdikpede, emi ẹdifiọkde ufen esịt mmọ, ẹdinyụn̄ ẹmenerede ubọk mmọ ke enyọn̄ ẹnọ ufọk emi: afo tie ndien ke enyọn̄, ebiet idụn̄ fo, kop, nyụn̄ dahado, nyụn̄ nam, nyụn̄ nọ owo emi afo ọfiọkde esịt esie, nte kpukpru usụn̄ esie ẹdide: koro afo ikpọn̄ ọfiọkde esịt kpukpru nditọ Adam; kpan̄ mmọ ẹkpebak fi kpukpru usen eke mmọ ẹdidude ke iso isọn̄ emi afo ọkọnọde mme ete nnyịn.”—1 Ndidem 8:38-40.
14 Ata mfọnn̄kan n̄kpọ edi ndika iso mbọn̄ akam mben̄e edisana spirit. (Matthew 7:7-11) Mbun̄wụm spirit esịne mme utọ edu nte idatesịt ye emem. (Galatia 5:22, 23) Esinem nnyịn didie ntem ke idem ke ini Ete nnyịn eke heaven ọbọrọde akam nnyịn, anamde ikop idatesịt utu ke mfụhọ, inyụn̄ inyene emem utu ke editịmede esịt!
15. Mme itie N̄wed Abasi ewe ẹkeme ndin̄wam nnyịn itre nditịmede esịt?
15 Edi akpanikọ ke imekeme ndikop editịmede esịt ke ini ikopde ọkpọsọn̄ mfịghe. Nte ededi, imekeme ndisụhọde ọkpọsọn̄ editịmede esịt edieke ikerede iban̄a ikọ Jesus emi: “Ẹtre nditịmede esịt mban̄a ukpọn̄ mbufo ẹte ididia nso m̀mê idin̄wọn̄ nso, m̀mê ẹban̄a ikpọkidem mbufo ẹte idisịne nso. . . . Ẹka iso, ndien, ndibem iso nyom obio ubọn̄ ye edinen ido [Abasi], ndien ẹyedian kpukpru n̄kpọ eken ẹnọ mbufo.” (Matthew 6:25, 33, 34) Apostle Peter eteme nnyịn ete ‘itop kpukpru editịmede esịt nnyịn idori Abasi ke idem, koro enye ekere aban̄a nnyịn.’ (1 Peter 5:6, 7) Ọfọn ndidomo ndikọk mfịna. Nte ededi, ke ima ikodomo ofụri ukeme nnyịn, ufọn idụhe nditịmede esịt koro oro idin̄wamke nnyịn ikọk mfịna oro nte akam akpan̄wamde. Andiwet psalm ọkọkwọ ete: “Kpat usụn̄ fo nọ Jehovah, nyụn̄ buọt idem fo ye enye, ndien enye ayanam.”—Psalm 37:5.
16, 17. (a) Ntak emi nnyịn mîkemeke nditre editịmede esịt ofụri ofụri? (b) Nso ke idinyene edieke inamde se Philippi 4:6, 7 ọdọhọde?
16 Paul ekewet ete: “Ẹkûtịmede esịt ke baba n̄kpọ kiet, edi ke kpukpru n̄kpọ ẹda akam ye n̄kpeubọk ọkọrọ ye ekọm ẹsian Abasi eben̄e mbufo; ndien emem Abasi emi akande kpukpru ekikere eyekpeme esịt mbufo ye ukeme ukeren̄kpọ mbufo ke Christ Jesus.” (Philippi 4:6, 7) Mme anana-mfọnmma nditọ Adam ikemeke nditre editịmede esịt ofụri ofụri. (Rome 5:12) Nditọ iban Hittite oro Esau ọkọdọde ẹma ‘ẹsiyat Isaac ye Rebekah esịt.’ (Genesis 26:34, 35) Anaedi Timothy ye Trophimus emi ẹkedide mme Christian ẹma ẹsikop editịmede esịt ke ntak udọn̄ọ. (1 Timothy 5:23; 2 Timothy 4:20) Paul ama esitịmede esịt ke ntak nditọete esie. (2 Corinth 11:28) Edi enye “emi okopde akam” esin̄wam mbon oro ẹmade enye.—Psalm 65:2.
17 Nte itiede ibet usen Jehovah, “Abasi emem” ayan̄wam onyụn̄ ọdọn̄ nnyịn esịt. (Philippi 4:9) Jehovah ‘atua owo mbọm onyụn̄ ọfọn ido,’ enye ‘ọfọn onyụn̄ ama ndidahado m̀mê ndifen nnọ owo’; enye “emeti ete ke nnyịn idi ntan.” (Exodus 34:6; Psalm 86:5; 103:13, 14) Ntre, ẹyak ‘isian enye eben̄e nnyịn,’ koro emi ayanam inyene ‘emem esie’ emi akande ekikere owo.
18. Nte ẹtịn̄de ke Job 42:5, didie ke ikeme ‘ndikụt’ Abasi?
18 Ke ini Abasi ọbọrọde akam nnyịn, nnyịn imesifiọk ke enye odu ye nnyịn. Ke Job ama ọkọyọ mme idomo esie, enye ama ọdọhọ ete: “N̄kokop mban̄a fi [Jehovah] nte utọn̄ okopde: edi ke emi enyịn mi okụt fi.” (Job 42:5) Nnyịn imekeme ndida enyịn ikike nnyịn, mbuọtidem, ye esịtekọm oro inyenede inen̄ede ‘ikụt’ mme n̄kpọ oro Abasi anamde. Utọ n̄kpet n̄kpet itie ebuana oro ekeme ndinam esịt ye ekikere nnyịn ẹna sụn̄!
19. Nso iditịbe edieke ‘itopde kpukpru editịmede esịt nnyịn idori Jehovah ke idem’?
19 ‘Nditop kpukpru editịmede esịt nnyịn ndori Jehovah ke idem’ ekeme ndin̄wam nnyịn iyọ idomo, onyụn̄ ekpeme esịt ye ekikere nnyịn. Ndamban̄a ọwọn̄esịt nnyịn ayana sụn̄, nnyịn idinyụn̄ ikopke ndịk. Ekikere idisiahake nnyịn iba.
20, 21. (a) Didie ke se iketịbede inọ Stephen owụt ke imekeme ndimụm idem n̄kama ke ini idomo? (b) Nọ uwụtn̄kpọ oro owụtde ke imekeme ndimụm idem n̄kama mfịn ke ini idomo.
20 Mbet oro Stephen ama omụm idem akama ke ini oro enye okosobode ọkpọsọn̄ idomo oro okoyomde ndibiat mbuọtidem esie. Mbemiso enye ọkọnọde akpatre ikọ ntiense, kpukpru owo ke Sanhedrin ẹma “ẹkụt ẹte iso esie ebiet iso angel.” (Utom 6:15) Iso esie eketie emem emem, nte iso angel, kpa asan̄autom Abasi. Ke Stephen ama ọkọdọhọ ke mme ebiereikpe oro ẹma ẹnyene ubọk ke n̄kpa Jesus, mmọ ẹma “ẹkop ubiak ke esịt ẹnyụn̄ ẹtọn̄ọ ndita edet nse enye.” Stephen “ọyọhọ ye edisana spirit, owụk enyịn ese enyọn̄ onyụn̄ ada okụt ubọn̄ Abasi ye Jesus nte adade ke ubọk nnasia Abasi.” N̄kukụt oro ama anam Stephen ọsọn̄ọ ada anam akpanikọ tutu esịm n̄kpa. (Utom 7:52-60) Okposụkedi Abasi mîdinamke nnyịn ikụt n̄kukụt, enye ekeme ndinọ nnyịn emem esie ke ini ukọbọ.
21 Kam kop se ndusụk Christian oro mbon Nazi ẹkewotde ẹketịn̄de mbemiso ẹkewotde mmọ ke ini udiana ekọn̄ ererimbot. Kiet ke otu mmọ ama etịn̄ se iketịbede inọ enye ke esop ete: “Ẹma ẹbiere ikpe n̄kpa mi. Ami mma nnọ n̄kpan̄utọn̄, ndien do ke mma n̄ketịn̄ mme ikọ oro ‘Nam akpanikọ tutu osịm n̄kpa’ ye mme ikọ Ọbọn̄ nnyịn ifan̄ efen, ini ama edikem. Edi idahaemi ẹkûkere. Ami mmenyene orụk emem oro, orụk ifụre oro, kpa enyeemi mbufo mîkemeke-keme ndikere mban̄a!” Uyen Christian oro ẹkeyomde ndisịbe ibuot ama ewet leta ọnọ ete ye eka esie ete: “Ufọt okoneyo emebe. Ami ke nsụk nyene ini ndikpụhọde ekikere mi. Ah! nte nyefiak n̄kop inemesịt ke ererimbot emi ke mma n̄kakan̄ Ọbọn̄ nnyịn? Ke akpanikọ ndikopke! Edi kemi mbufo ẹmenyene mbuọtidem nte ke n̄kpọn̄ ererimbot emi ke inemesịt ye emem.” Nte eyịghe mîdụhe, Jehovah esin̄wam mme anam-akpanikọ asan̄autom esie.
Afo Emekeme Ndiyọ!
22, 23. Nte enyenede ime etie ebet usen Jehovah, nso ke akpana ọfiọk?
22 Ekeme ndidi afo usoboke ndusụk mfịna oro inemede mi. Edi Job ama enen ke ini ọkọdọhọde ke “owo eke n̄wan amande omụhọ usen, onyụn̄ oyụhọ ukụt.” (Job 14:1) Ekeme ndidi afo edi ete m̀mê eka oro odomode ndinọ nditọ fo ndausụn̄ ke n̄kan̄ eke spirit. Ana mmọ ẹyọ idomo ke ufọkn̄wed, mmọn̄ọ ndi esịt isinemke fi ndikụt nte mmọ ẹsọn̄ọde ẹda ẹnam n̄kpọ Jehovah ẹnyụn̄ ẹtienede ndinen edumbet esie? Ekeme ndidi omosobo idomo, n̄kpọ onyụn̄ ọsọn̄ ye afo ke itieutom. Afo emekeme ndiyọ mme utọ n̄kpọ emi ye mmọ eken koro ‘Jehovah esinyan̄a fi emen mbiomo fo ke kpukpru usen.’—Psalm 68:19.
23 Afo emekeme ndise idemfo ke ukem usụn̄ oro mbon en̄wen ẹsede fi, edi ti ete ke tutu amama Jehovah idifreke utom ye ima oro afo owụtde aban̄a edisana enyịn̄ esie. (Mme Hebrew 6:10) Enye ekeme ndin̄wam fi ọyọ idomo. Ntre, sịn edinam uduak Abasi ye akam ke ndutịm fo. Edieke anamde oro, Jehovah iditreke ndidiọn̄ fi nnyụn̄ n̄n̄wam fi enyene ime etie ebet usen esie.
Didie ke Afo Ọkpọbọrọ?
• Ntak emi oyomde mme Christian ẹme ime?
• Nso ikeme ndin̄wam nnyịn iyọ ke ini udọn̄ọ ye ke ini owo nnyịn akpade?
• Didie ke akam ekeme ndin̄wam nnyịn iyọ mme idomo?
• Nso ikeme ndin̄wam nnyịn inyene ime itie ibet usen Jehovah?
[Mme Mbụme Ukpepn̄kpọ]
[Ndise ke page 29]
Ndikọn̄ mbuọtidem ke Jehovah ayanam iyọ ke ini owo nnyịn akpade
[Ndise ke page 31]
Ndibọn̄ akam ke ofụri esịt esin̄wam nnyịn iyọ mme idomo oro ẹyomde ndibiat mbuọtidem nnyịn