“Ntiense Akpanikọ ke Ikpa-Enyọn̄”

MME ewet uto ye mme ewet ikwọ ẹsitoro ọfiọn̄ nte ata ediye n̄kpọ. Ke uwụtn̄kpọ, ikwọ oro ẹkedade odudu spirit Abasi ẹwet etịn̄ aban̄a n̄wan oro ‘eyede nte ọfiọn̄.’ (Ikwọ Solomon 6:10) Ndien kiet ke otu mme andiwet psalm ama etịn̄ ke ido uto ete ke ọfiọn̄ edi “ntiense akpanikọ ke ikpa-enyọn̄.” (Psalm 89:37) Nso ke ikọ emi ọwọrọ?

Ọfiọn̄ isitreke ndisan̄a n̄kanade isọn̄ kpukpru usen 27 ye ubak. Mmọdo, ọfiọn̄ ndisisan̄a ntem n̄kanade ye unana edikpu owụt ke enye edi se ẹkemede ndiberi edem. Edi, ekeme ndidi andiwet psalm emi ama enyene akpan n̄kpọ en̄wen ke ekikere. Enye okokot ọfiọn̄ “ntiense akpanikọ” ke ikwọ oro enye ọkọkwọde aban̄a Obio Ubọn̄ oro Jesus ekekpepde mme mbet esie ete ẹbọn̄ akam ẹben̄e.—Matthew 6:9, 10.

Jehovah Abasi ama ananam ediomi Obio Ubọn̄ ye Edidem David eke Israel ke se ibede isua 3,000. (2 Samuel 7:12-16) Se ikanamde Abasi anam ediomi oro ekedi man owụt ke Jesus Christ, emi edide eyen David, enyene unen nditie ke ebekpo ke nsinsi. (Isaiah 9:7; Luke 1:32, 33) Andiwet psalm emi ama etịn̄ aban̄a ebekpo oro “mfri” m̀mê eyen David editiede, ete: “[Enye] ọyọsọn̄ọ ada nte ọfiọn̄ ke nsinsi, ye nte ntiense akpanikọ ke ikpa-enyọn̄.”—Psalm 89:36, 37.

Mmọdo, odot ẹda ọfiọn̄ emi ‘esinọde un̄wana ke okoneyo’ ẹtịn̄ ẹban̄a nte ukara Christ edibịghide ke nsinsi. (Genesis 1:16) Daniel 7:14 etịn̄ aban̄a ukara Obio Ubọn̄ oro ete: “Ubọn̄ esie edi nsinsi ubọn̄ eke mîdikụreke, itie-edidem esie idinyụn̄ ibiarake.” Ọfiọn̄ esiti nnyịn aban̄a Obio Ubọn̄ oro ye mme edidiọn̄ oro enye edidade ọsọk ubonowo.

[Ebiet Ẹdade Ndise Ẹto ke page 32]

Ọfiọn̄: Foto NASA