Mme Mbụme Ẹtode Mme Andikot
Mme Mbụme Ẹtode Mme Andikot
Ntak emi Edidem Saul okobụpde David ke enye ama okowot Goliath ete, “Akparawa, afo edi eyen anie owo?” ke ini edide Saul ama ọdọdọhọ ẹda enye edinam n̄kpọ ọnọ imọ?—1 Samuel 16:22; 17:58.
Mmemmem ibọrọ edi ke Saul ekefefre David koro enye iketiehe ye David ibịghi akpa ini oro mmọ ẹkesobode. Nte ededi, etie nte ibọrọ emi inenke, sia 1 Samuel 16:18-23 owụt ke Edidem Saul ọkọdọn̄ ke idemesie ete ẹkeda David ẹsọk imọ, ndien ama edinen̄ede ama David, onyụn̄ anam enye edi andibiom n̄kpọekọn̄ esie. Enyene ndidi Saul ama enen̄ede emehe ye David.
Ndusụk nditọ ukpepn̄kpọ Bible ẹkere ke 1 Samuel 17:12-31 ye 17:55–18:5 ikesịneke ke akpasarade N̄wed Abasi sia mmọ mîdụhe ke ndusụk nsiondi Septuagint usem Greek, kpa edikabade N̄wed Abasi Usem Hebrew oro ẹkekabarede ẹkụre ke ọyọhọ isua ikie iba M.E.N. Nte ededi, iwụtke ifiọk ndida se ẹwetde ke ndusụk nsiondi oro kpọt mbiere oro, sia mme itien̄wed emi ẹdu ke uwetn̄kpọ N̄wed Abasi Usem Hebrew oro ẹnyịmede. *
Etie nte Saul ndikebem iso mbụp Abner m̀mê David edi eyen anie, ekem edibụp David ke idemesie owụt ke Saul ikoyomke ndifiọk sụk enyịn̄ ete David. David ndikakan Goliath ama anam Saul ọfiọk ke enye enen̄ede enyene mbuọtidem ye uko, ntre Saul ama oyom ndifiọk orụk owo emi okobonde enye. Etie nte Saul okoyom ndida Jesse ete David m̀mê mbonubon esie eken nsịn ke udịmekọn̄ esie, sia ekemede ndidi mmọ n̄ko ẹyenyene ukem uko oro David ekenyenede.
Okposụkedi 1 Samuel 17:58 etịn̄de ibio ibio ibọrọ David kpọt, ete, “Ami ndi eyen owo fo Jesse a-Bethlehem,” se itienede owụt ke etie nte nneme oro iketreke do. Se se C. F. Keil ye F. Delitzsch ẹtịn̄de ẹban̄a emi: “Se idude ke [1 Samuel 18:1] enen̄ede owụt ‘ke David ama ọkọbọrọ Saul mbụme esie,’ ke Saul ama aka iso eneme nneme ye enye aban̄a ubon mmọ, koro itien̄wed emi owụt ke mmọ ẹma ẹneme nneme ẹbịghi.”
Ke ikerede iban̄a kpukpru emi, nnyịn imekeme ndidọhọ ke Saul ndikobụp David, “Akparawa, afo edi eyen anie owo?” ke Saul ikoyomke n̄kukụre ndifiọk n̄kpọ mban̄a David, emi enye ama ọkọfọfiọk, edi okoyom ndifiọk n̄ko mban̄a ubon David.
[Ikọ idakisọn̄]
^ ikp. 4 Ke oyomde ndifiọk m̀mê mme ufan̄ikọ oro ẹsiode ẹfep ke Septuagint enen, se Insight on the Scriptures, Eboho 2, page 855, emi Mme Ntiense Jehovah ẹsiode.
[Ndise ke page 31]
Ntak emi Saul okobụpde David m̀mê enye edi eyen anie owo?