Nso Iwụt ke Afo Amama N̄kpọ Eke Spirit?

APOSTLE PAUL ekewet ete ke “edikere n̄kpọ obụkidem ọwọrọ n̄kpa, edi edikere n̄kpọ spirit ọwọrọ uwem ye emem.” (Rome 8:6) Enye eketịn̄ emi ndiwụt ke ndikere n̄kpọ eke spirit idịghe n̄kpọ emi owo ọdọhọde ikpama imọ inam. Enye enen̄ede edi n̄kpọ n̄kpa ye uwem. Edi didie ke owo oro ekerede n̄kpọ eke spirit enyene “uwem ye emem”? Bible ọdọhọ ke utọ owo oro eyenyene emem idahaemi onyụn̄ etie ke emem ye Abasi, oyonyụn̄ enyene nsinsi uwem ke ini iso. (Rome 6:23; Philippi 4:7) Eyịghe idụhe emi Jesus ọkọdọhọde ete: “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit”!—Matthew 5:3.

Afo ndikot magazine emi owụt ke amama n̄kpọ eke spirit—ndien owụt ifiọk ndinam oro. Edi mme owo ẹnyene nsio nsio ekikere ẹban̄a se ndima n̄kpọ eke spirit ọwọrọde, ntre afo emekeme ndibụp ete: ‘Nso ke ndima n̄kpọ eke spirit enen̄ede ọwọrọ? Ndien didie ke owo ekeme ndima n̄kpọ eke spirit?’

“Ekikere Christ”

Apostle Paul ama owụt ke ọfọn ndima n̄kpọ eke spirit onyụn̄ etịn̄ ekese aban̄a se ndima n̄kpọ eke spirit ọwọrọde. Paul ama asian mme Christian ke Corinth eset ukpụhọde oro odude ke ufọt owo obụkidem m̀mê owo emi amade n̄kpọ obụkidem, ye owo eke enyenede spirit Abasi, m̀mê owo emi amade n̄kpọ eke spirit. Paul ekewet ete: “Owo obụkidem ibọhọ mme n̄kpọ eke spirit Abasi, koro mmọ ẹdi ndisịme ẹnọ enye.” Edi Paul ama anam an̄wan̄a ke se ẹdade ẹdiọn̄ọ owo emi enyenede spirit Abasi edi enye ‘ndinyene ekikere Christ.’—1 Corinth 2:14-16.

‘Ndinyene ekikere Christ’ ọwọrọ ndinyene “edu ukere n̄kpọ oro Christ Jesus ekenyenede.” (Rome 15:5; Philippi 2:5) Ke nditịn̄ ke usụn̄ en̄wen, owo emi enyenede spirit Abasi ekere n̄kpọ nte Jesus onyụn̄ asan̄a ke nde ikpat Esie. (1 Peter 2:21; 4:1) Adan̄a nte ekikere owo ebietde eke Christ, ntre ke enye edinen̄ede ama n̄kpọ eke spirit, onyụn̄ enen̄ede odori enyịn ndinyene “uwem ye emem.”—Rome 13:14.

Nte Ẹkemede Ndifiọk “Ekikere Christ”

Nte ededi, man owo enyene ekikere Christ, enye enyene ndibem iso mfiọk ekikere Christ. Mmọdo, akpa n̄kpọ oro owo enyenede ndinam man ọtọn̄ọ ndima n̄kpọ eke spirit edi ndifiọk nte Jesus esikerede n̄kpọ. Edi afo edinam didie ọfiọk ekikere owo emi okodude uwem ke isọn̄ ke isua 2,000 emi ẹkebede? Ọfọn, afo akasan̄a didie ọfiọk mbon idụt mbufo oro ẹkedude uwem ke eset? Ekeme ndidi okokot ke n̄wed. Kpasụk ntre, ndikot mbụk oro aban̄ade Jesus edi akpan usụn̄ ndida mfiọk ekikere Christ.—John 17:3.

Mbụk oro aban̄ade Jesus odu ke mme Gospel, emi Matthew, Mark, Luke, ye John ẹkewetde. Nditịn̄ enyịn n̄kot mbụk emi ayan̄wam fi ọfiọk ekikere Jesus ye nte n̄kpọ ekesitụkde enye, ye se ikesinamde enye anam n̄kpọ. Ke ini adade ini etie ekere se okotde aban̄a Jesus, afo oyokụt ke enyịn ikike fo utọ owo oro enye ekedide. Idem edieke afo ekerede ke imọ idi anditiene Christ, ndikot mme Gospel emi nnyụn̄ ntie n̄kere mmọ ayanam fi ‘aka iso ọkọri ke mfọnido oro owo mîdotke ye ifiọk Ọbọn̄ ye Andinyan̄a nnyịn Jesus Christ.’—2 Peter 3:18.

Ye emi ke ekikere, ẹyak idụn̄ọde ndusụk itie ke mme Gospel man ikụt se ikanamde Jesus enen̄ede ama n̄kpọ eke spirit ntre. Ekem bụp idemfo m̀mê emekeme ndikpebe uwụtn̄kpọ oro enye ekenịmde.—John 13:15.

 Edima N̄kpọ Eke Spirit ye Edinyene “Mbun̄wụm Spirit”

Luke emi eketienede ewet Gospel ọkọdọhọ ke ẹma ẹn̄wan̄a edisana spirit Abasi ẹduọk Jesus ke idem ke enye ama akana baptism ye nte ke Jesus ọkọyọhọ “ye edisana spirit.” (Luke 3:21, 22; 4:1) Jesus n̄ko ama anam mme anditiene enye ẹfiọk ufọn ediyak edisana spirit Abasi ada mmọ usụn̄. (Genesis 1:2; Luke 11:9-13) Ntak ọfọnde ndiyak spirit Abasi ada nnyịn usụn̄? Koro spirit Abasi enyene odudu ndinam owo akabade esịt, onyụn̄ anam ekikere owo ọtọn̄ọ ndibiet eke Christ. (Rome 12:1, 2) Edisana spirit anam owo enyene utọ edu nte “ima, idatesịt, emem, anyanime, mfọnido, eti ido, mbuọtidem, ifụre ifụre ido, mfara ke idem.” Mme edu emi—kpa se Bible okotde “mbun̄wụm spirit”—ke ẹda ẹdiọn̄ọ owo emi enen̄erede ama n̄kpọ eke spirit. (Galatia 5:22, 23) Ke nditịn̄ ibio ibio, owo emi amade n̄kpọ eke spirit edi owo emi ayakde spirit Abasi ada imọ usụn̄.

Jesus ama owụt ke imọ imenyene mbun̄wụm spirit ke ofụri ini oro enye ọkọkwọrọde ikọ ke isọn̄. Nte enye akanamde n̄kpọ ye mbon oro ẹkedade nte mme usụhọde owo ama owụt ke enye ama ima, ọfọn ido, onyụn̄ enyene eti ido. (Matthew 9:36) Da n̄kpọntịbe emi John ekewetde ke uwụtn̄kpọ. Enye ekewet ete: “Nte [Jesus] asan̄ade ebe enye okụt owo emi edide nnan toto ke emana.” Mme mbet Jesus ẹma ẹtiene ẹkụt owo oro, edi mmọ ẹkeda enye nte anamidiọk. Ntre, mmọ ẹma ẹbụp Jesus ẹte: “Anie akanam idiọkn̄kpọ, ndi owo emi m̀mê ete ye eka esie?” Mbọhọidụn̄ esie ẹma ẹnyụn̄ ẹkụt enye, edi mmọ ẹkefiọk enye nte eben̄e eben̄e. Mmọ ẹma ẹbụp ẹte: “Nte idịghe owo emi ekesitiede eben̄e eben̄e edi emi?” Edi Jesus akada nnan oro nte owo emi okoyomde un̄wam. Jesus ama enyene nneme ye enye onyụn̄ anam enye okụt usụn̄.—John 9:1-8.

Nso ke n̄kpọntịbe emi ekpep fi aban̄a ekikere Christ? Akpa, Jesus ikesifụmike mme usụhọde owo, edi ama esinen̄ede atua mmọ mbọm. Ọyọhọ iba, enye ama esin̄wam mme owo. Ndi afo emetiene uwụtn̄kpọ oro Jesus ekenịmde mi? Nte emesida mme owo nte Jesus akadade, ọnọ mmọ un̄wam oro mmọ ẹyomde man uwem mmọ amana ọfọn onyụn̄ anam mmọ ẹfiak ẹnyene idotenyịn? Mîdịghe, ndi esikam ọfọn mfọn ye mbon oro ẹwọrọde iso onyụn̄ ofụmi mme usụhọde owo? Edieke esinamde se ikebemde iso itịn̄, ọwọrọ amanam ọfọn ke nditiene uwụtn̄kpọ Jesus.—Psalm 72:12-14.

Edima N̄kpọ Eke Spirit ye Edibọn̄ Akam

Se ẹwetde ke mme Gospel ẹwụt ke Jesus ama esiwak ndibọn̄ akam nnọ Abasi. (Mark 1:35; Luke 5:16; 22:41) Ke ini Jesus akanamde utom ukwọrọikọ ke isọn̄, enye ama esisio ini enịm ọbọn̄ akam. Matthew mbet esie ekewet ete: “Ke ama ọkọnọ otuowo ẹnyọn̄ọ, [Jesus] ọdọk  ke obot ikpọn̄ ndikọbọn̄ akam.” (Matthew 14:23) Jesus ndikesitie ikpọn̄ mbọn̄ akam nnọ Ete esie eke heaven ama esinọ enye odudu. (Matthew 26:36-44) Mfịn, mbon oro ẹnen̄erede ẹma n̄kpọ eke spirit ẹsifak ifet ẹbọn̄ akam ẹnọ Abasi, sia ẹfiọkde ke emi ọyọsọn̄ọ itie ebuana mmimọ ye Andibot onyụn̄ an̄wam mmimọ inyene ekikere Christ.

Jesus ama esiwak ndibọn̄ akam mbịghi. (John 17:1-26) Ke uwụtn̄kpọ, mbemiso enye ekemekde owo 12 oro ẹkenyenede ndikabade ndi mme apostle esie, Jesus ama “ọdọk ke obot ndibọn̄ akam, onyụn̄ ada ofụri okoneyo ọbọn̄ akam ọnọ Abasi.” (Luke 6:12) Mbon oro ẹmade n̄kpọ eke spirit ẹtiene uwụtn̄kpọ Jesus, okposụkedi mmọ mîdibọn̄ke akam ofụri okoneyo. Mbemiso mmọ ẹnamde ikpọ ubiere, mmọ ẹsida ini ẹbọn̄ akam ẹnọ Abasi ẹyom edisana spirit ọnọ mmimọ ndausụn̄ man inam ubiere oro edinamde itie ebuana mmimọ ye Abasi enen̄ede ọfọn.

Jesus n̄ko ama owụt nte ikpọbọn̄de akam ke ofụri esịt ke akam oro enye ọkọbọn̄de. Kop se Luke ekewetde aban̄a nte Jesus ọkọbọn̄de akam mbubịteyo oro mbemiso ẹkewotde enye. “Enye odu ke ọkpọsọn̄ ubiak onyụn̄ ọdọdiọn̄ esịn ifịk ọbọn̄ akam; ndien ibibiak esie akabade etie nte mme ntọi iyịp eke ẹtọide ke isọn̄.” (Luke 22:44) Jesus ama esisesịn ifịk ọbọn̄ akam, edi ke emi enye okosobode ata ọkpọsọn̄ idomo mi ke isọn̄, enye ama “ọdọdiọn̄ esịn ifịk” ọbọn̄ akam—ndien ẹma ẹbọrọ akam esie. (Mme Hebrew 5:7) Mbon oro ẹmade n̄kpọ eke spirit ẹtiene uwụtn̄kpọ Jesus. Ke ini ẹsobode ata ọkpọsọn̄ idomo, mmọ ‘ẹsidọdiọn̄ ẹsịn ifịk’ ẹbọn̄ akam ẹben̄e Abasi ẹte ọnọ mmimọ edisana spirit, ndausụn̄, ye un̄wam.

Sia Jesus ekesinen̄erede ama ndibọn̄ akam, ikpaha owo idem nte mme mbet esie ẹkeyomde ndikpebe enye ke afan̄ emi. Mmọdo, mmọ ẹma ẹdọhọ enye ẹte: “Ọbọn̄, kpep nnyịn ndibọn̄ akam.” (Luke 11:1) Kpasụk ntre, mbon oro ẹnen̄erede ẹma n̄kpọ eke spirit, oro ẹnyụn̄ ẹyomde edisana spirit Abasi ada mmimọ usụn̄, ẹtiene uwụtn̄kpọ Jesus ke nte mmọ ẹbọn̄de akam ẹnọ Abasi. Owo oro enen̄erede ama n̄kpọ eke spirit enyene ndidi owo emi esimade ndibọn̄ akam.

Edima N̄kpọ Eke Spirit ye Edikwọrọ Eti Mbụk

Ke Gospel Mark, nnyịn imokụt mbụk aban̄ade nte Jesus ọkọkọkde ediwak mbon udọn̄ọ tutu eyo okụt. Ke ini enye okosụk ọbọn̄de akam tụhi-tụhi usenubọk ke ndan̄nsiere, mme apostle esie ẹma ẹdi ẹdidọhọ enye ke ediwak owo ke ẹyom enye, eyedi man ẹkọk mmọ udọn̄ọ. Nte ededi, Jesus ama ọdọhọ mme apostle esie ete: “Ẹyak nnyịn ika ebiet en̄wen, ikodụk ke mme obio oro ẹdude ẹkpere, man n̄kwọrọ ikọ do n̄ko.” Ekem Jesus ama asian mmọ ntak imọ idọhọde ntre, ete: “Koro n̄kọwọrọ ndi kaban̄a uduak emi.” (Mark 1:32-38; Luke 4:43) Okposụkedi ukọkudọn̄ọ ekedide akpan n̄kpọ ọnọ Jesus, edikwọrọ eti mbụk Obio Ubọn̄ Abasi ekenen̄ede edi akpan utom esie.—Mark 1:14, 15.

Mfịn, ndikwọrọ etop Obio Ubọn̄ Abasi nnọ mme owo osụk edi usụn̄ kiet oro ẹdade ẹdiọn̄ọ mbon oro ẹnyenede ekikere Christ. Jesus ọkọnọ mbon oro ẹyomde ndidi mme anditiene enye ewụhọ emi: “Mmọdo ẹka ẹkenam mme owo ke kpukpru idụt ẹdi mbet mi, . . . ẹkpep mmọ ẹnam kpukpru n̄kpọ  eke n̄ketemede mbufo.” (Matthew 28:19, 20) Jesus ama etịn̄ ntịn̄nnịm ikọ emi n̄ko ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.” (Matthew 24:14) Sia Ikọ Abasi ọdọhọde ke ẹda odudu edisana spirit ẹnam utom ukwọrọikọ, ndinen̄ede nsịn idem ke utom emi owụt ke owo enen̄ede ama n̄kpọ eke spirit.—Utom 1:8.

Edikwọrọ etop Obio Ubọn̄ nnọ mme owo ke ofụri ererimbot edi utom emi oyomde ata ediwak owo ẹdian ubọk ẹnam. (John 17:20, 21) Ke adianade ye ndima n̄kpọ eke spirit, mbon oro ẹnamde utom emi ke ofụri ererimbot ẹnyene ndinen̄ede nnam enye ntiene ndutịm. Nte emekeme ndisiak mbon oro ẹtienede nde ikpat Christ ẹnyụn̄ ẹkwọrọde eti mbụk Obio Ubọn̄ ke ofụri ererimbot?

Nte Amanam Se Inemede Emi?

Nte ededi, odu mme n̄kpọ en̄wen oro ẹnamde ẹfiọk owo oro enen̄erede ama n̄kpọ eke spirit, edi nte afo amanam mmọ oro inemede mi? Man ọfiọk ibọrọ mbụme emi, bụp idemfo ete: ‘Ndi mmesikot Ikọ Abasi, kpa Bible, kpukpru ini, nnyụn̄ ntie n̄kere se n̄kotde? Ndi mmowụt ke mmenyene mbun̄wụm spirit Abasi? Ndi mmesibọn̄ akam kpukpru ini? Ndi mmama ndibuana ye mbon oro ẹnamde utom edikwọrọ eti mbụk Obio Ubọn̄ Abasi ke ofụri ererimbot?’

Ndinen̄ede ndụn̄ọde idemfo ayanam fi ọfiọk m̀mê emenen̄ede ama n̄kpọ eke spirit. Nnyịn imesịn udọn̄ inọ fi ite anam se ẹyomde idahaemi man ekeme ndinyene “uwem ye emem.”—Rome 8:6; Matthew 7:13, 14; 2 Peter 1:5-11.

[Ekebe/Mme ndise ke page 7]

SE ẸDADE ẸDIỌN̄Ọ OWO ORO AMADE N̄KPỌ EKE SPIRIT

◆ Enyene ndima Ikọ Abasi

◆ Owụt ke imenyene mbun̄wụm spirit Abasi

◆ Ọbọn̄ akam ke ofụri esịt ọnọ Abasi kpukpru ini

◆ Abuana eti mbụk Obio Ubọn̄ ye mme owo

[Ndise ke page 5]

Bible ekeme ndin̄wam fi ọfiọk “ekikere Christ”