Nte Enyịn Abasi ke Ese Fi?

NTE Jehovah, kpa Akwa Andibot, ekeme ndikụt n̄kpọ? Ke akpanikọ esikụt! Bible obụp ete: “Nte andibot enyịn idikwe n̄kpọ?” (Psalm 94:9) Owo ikemeke-keme ndikụt n̄kpọ nte Jehovah. Enye okụt nte owo etiede onyụn̄ “odomo esịt owo.” (Mme N̄ke 17:3; 21:2) Ih, enye ekeme ndifiọk ekikere, uduak, ye udọn̄ nnyịn.

Jehovah ọfiọk se ifịnade nnyịn, esinyụn̄ okop eben̄e nnyịn. Andiwet psalm ekewet ete: “Enyịn Jehovah ese mbon eti ido, utọn̄ esie onyụn̄ ọbiọn̄ọ ọnọ eseme mmọ. Jehovah emekpere mmọ eke esịt obụn̄ọde mmọ; onyụn̄ anyan̄a mmọ eke esịt ọduọde.” (Psalm 34:15, 18) Edi n̄kpọ ndọn̄esịt didie ntem ndifiọk ke Jehovah ọfiọk mme idaha nnyịn onyụn̄ esikop eben̄e ofụri esịt nnyịn!

Jehovah Abasi okụt se ẹnamde idem ke ata makmak ekịm. Ke akpanikọ, “kpukpru n̄kpọ ẹna iferi ẹnyụn̄ ẹyarade ẹna in̄wan̄-in̄wan̄ ke enyịn enye emi nnyịn inyenede ndinam ibat nnọ.” (Mme Hebrew 4:13) Ntre, edide se inamde edi eti m̀mê idiọk, Abasi okụt kpukpru oro. (Mme N̄ke 15:3) Ke uwụtn̄kpọ, Genesis 6:8, 9 ọdọhọ ke Noah ama “okụt mfọn ke iso Jehovah” ye nte ke enye ama “asan̄a ye Abasi.” Ih, Noah ama enyene mfọn ye edidiọn̄ Jehovah sia enye ama okop uyo Abasi onyụn̄ enịm ndinen edumbet esie. (Genesis 6:22) Edi mme owo ke eyo Noah ẹkedi mbon afai ye mme oburobụt owo. Abasi ama okụt kpukpru oro. Enye ama “okụt idiọkn̄kpọ owo nte okponde ke isọn̄, kpukpru n̄kpọ ke ekikere esịt esie ẹnyụn̄ ẹsụk ẹdi idiọk kpukpru ini.” Ke akpatre, Jehovah ama osobo mme idiọkowo onyụn̄ enịm Noah ye ubon esie uwem.—Genesis 6:5; 7:23.

Nte Jehovah ayama fi ke ini esede fi? Ke akpanikọ, ‘enyịn Jehovah ẹsan̄a ke ofụri ererimbot, ete isọn̄ọ imụm mmọ eke ofụri esịt mmọ ẹdude ye enye ikama.’ (2 Chronicles 16:9) Enye ayafiak osobo mme idiọkowo efep ke isọn̄ ke mîbịghike, onyụn̄ anyan̄a mbon oro ẹnen̄erede ẹsụk idem.—Psalm 37:10, 11.