“Utịben̄kpọ” Iba ke Akamba Mbono Kiet ke Georgia

ODU se ẹkenamde ke Georgia ke 2006 emi owo mîdifreke, ndien do ke “utịben̄kpọ” iba ẹketịbe. Mme Ntiense Jehovah ẹma ẹnịm Mbono District “Edinyan̄a Emekpere!” emi ekedide usen ita—ke July 7 esịm July 9—ke itie itiokiet ke idụt oro. Se ibede owo 17,000 ẹkedụk usọrọ eke spirit oro.

Ẹma ẹsịn ukeme ke January 2006 ẹyom eti itie ndida nnịm mbono oro ediwak tọsịn owo ẹdidụkde ke Tbilisi emi edide akpan obio mbono ye ibuot obio idụt Georgia. Ẹma ẹda urụk ukopikọ ẹnam mme owo ke mme itie en̄wen oro ẹkenịmde mbono ẹkop se ẹketịn̄de.

Ẹnọ ifụre utuakibuot nsịtnsịt ke Georgia ke ediwak isua emi ẹbede. Ntem, kpa ye edide ẹma ẹsinen̄ede ẹbiọn̄ọ Mme Ntiense ke mme isua oro ẹkebede, mmọ ẹma ẹka iso ke ndinam ndutịm mmọ, ẹnen̄ede ẹnịm ke iyokụt itie ida inịm mbono ke ibuot obio idụt oro. Mbon Georgia ẹsitie ufan ufan ẹnyụn̄ ẹtat ubọk. Edi, ndusụk mbon ukara ẹnen̄ede ẹsua ido ukpono en̄wen. Nte usua emi ayayak mmọ ẹnọ Mme Ntiense itie ẹda ẹnịm mbono?

Nditọete oro ẹkenamde Kọmiti Mbono ẹma ẹka nsio nsio an̄wambre ye ikpọ ufọkmbre mbuba. Mme andise mban̄a mme itie oro ẹma ẹdọhọ ke iyọnọ itie oro ẹda ẹnịm mbono, edi ke ini ẹkesiakde usen mbono oro, mmọ ikenyịmeke aba. Ntre, ama akpa mbon kọmiti oro idem ke ini mme andise mban̄a akwa ufọk kọnsat ke Tbilisi ẹkenyịmede ndinọ Mme Ntiense Jehovah itie oro ẹda ẹnịm mbono. Ufọk kọnsat oro odu ke ufọt obio oro, kpa ebiet emi ẹsidade ẹnam ikpọ edinam.

Sia kọmiti oro ẹkekerede ke ukeme oro mmimọ isịnde ọwọrọ usụn̄, mmọ ẹma ẹtọn̄ọ  ndinam ndutịm mban̄a mbono oro ke Tbilisi, ẹnyụn̄ ẹnam ẹban̄a mbono ke n̄kpri ye ikpọ obio ke ofụri idụt oro, esịnede Tsnori, Kutaisi, Zugdidi, Kaspi, ye Gori. Ẹma ẹnen̄ede ẹnam ndutịm man ẹkpeda urụk ukopikọ ẹnam mme owo ke itie mbono eken ẹkop mme edinam mbono ke ukem ini. Ẹma ẹnam ndutịm ẹma. Ekem ke mbuari, urua kiet kpọt mbemiso mbono ọtọn̄ọde, mme andise n̄kpọ mban̄a ufọk kọnsat oro ke Tbilisi ẹma ẹdọhọ ke mmimọ idinọhọ aba ebiet oro. Mmọ iketịn̄ke ntak.

Akpa “Utịben̄kpọ”

Nso ke nditọete emi ẹkpekenam ke usen ama ekekem do ama? N̄kukụre se mmọ ẹkenyenede ndinam ekedi ndika Marneuli, kpa obio in̄wan̄ emi edide kilomita 40 ọtọn̄ọde ke Tbilisi. Ẹsinịm mbono do ke isọn̄ emi ubon oro ẹdide Mme Ntiense Jehovah ẹnyenede. Ebiet oro ekesidi akamba in̄wan̄. Ke se ibede isua duop idahaemi, ebiet oro edi n̄kukụre itie oro mme esop ke Tbilisi ẹkekemede ndida nnịm ikpọ mbono. Nte ededi, Marneuli edi ebiet emi mbon ntịme ẹsinen̄erede ẹfiomo Mme Ntiense Jehovah.

Kiet ke otu mfiomo emi ekedi ke September 16, 2000. Bodisi obio Marneuli ẹma ẹfiọk usụn̄ mbak Mme Ntiense ẹdibe ẹkesịm itiembono. Ekem mbon ntịme ye Vasili Mkalavishvili, emi ẹma ẹkesio nte oku ido ukpono Orthodox, ẹma ẹsan̄a ke bọs ẹdi. Mmọ ẹma ẹnam mme ubomisọn̄ oro ẹkewatde ẹka mbono ke Marneuli ẹtuak ẹda, ẹdụri ediwak mme aka mbono ẹsion̄o ke mme n̄kpọisan̄ oro, ẹnen̄ede ẹtịm mmọ ẹnyụn̄ ẹbọ mbon eken inyene mmọ, esịnede mme Bible ye mme n̄wed ukpep Bible.

N̄kpọ nte mbon ntịme 60 ẹma ẹkesịn ntịme ke itie mbono ke Marneuli. Ẹma ẹnọ n̄kpọ nte Mme Ntiense 40 unan. Ẹma ẹda ikwa ẹkịm eyenete kiet esịt. Ndusụk mbon ntịme oro ẹma ẹsion̄o mbio ikan̄ ẹfụn̄ ẹnyụn̄ ẹtop ke enyọn̄. Kiet ke otu mmọ ama anyan n̄wan oro ekenyenede ebiet oro ikan̄ onyụn̄ ọdọhọ enye ọnọ imọ okụk ye n̄kpọmbana esie. Mbon ntịme oro ẹma ẹsuan kpukpru n̄kpọ ke ufọk esie, emi okodude ke utịt itie mbono oro, ẹnyụn̄ ẹyịp inyene esie. Ke ẹma ẹkebom kpukpru window ke ufọk oro, mmọ ẹma ẹfọp mme n̄wed Bible ye nnyan n̄kpọitie oro ẹkenamde man ẹda ẹnịm mbono. Ẹma ẹbiat ata ediwak n̄wed. Mme bodisi oro ẹkedude do ẹma ẹtiene ẹtịm Mme  Ntiense utu ke ndikpakpan ntịme oro. *

Kọmiti Mbono oro ẹkenyene ndikere m̀mê nso ke ẹdinam edieke mbon ntịme ẹdide ye se ẹdinamde man itie oro esidụkde owo 2,500 ekeme ndidụk owo 5,000. Didie ke ẹkese ẹban̄a mfịna emi ke ibio ini oro mmọ ẹkenyenede? Eketie nte utịben̄kpọ ke ini mme andinyene in̄wan̄ iba oro ẹkedianade do ẹkedọhọde ẹdikpe mmimọ okụk ẹda itie oro ẹnịm mbono.

Ikememke utom ndinam in̄wan̄ oro ẹdi se ẹdade ẹnịm mbono. Edịm ama edep ofụri urua oro mbemiso mbono, ntre emi ama anam etetịm ọsọn̄ nditịm ebiet oro. Ẹkenyene ndidọk bia mbakara oro ẹketọde ke mme in̄wan̄ oro. Akpa, nditọete ẹma ẹnọ idem unyịme unyịme ẹnyụn̄ ẹdụk ẹdọk bia mbakara oro kpa ye oro edịm ekedepde. Ẹma ẹdịbede mme eto ọkọ ẹnyụn̄ ẹtuak ataya mbak eyo ye edịm. Ama oyom ẹkọn̄ nnyan n̄kpọitie efen efen, ẹnyụn̄ ẹyịri mme ukwak utịn̄ikọ efen efen. Ẹma ẹnam utom uwemeyo ye okoneyo, ndusụk owo ẹkam ẹtre ndide idap man ẹyọk eto, ẹkọn̄, enyụn̄ ẹtịbi ndudu.

Kpukpru owo ẹma ẹkere ẹte: “Nso ke idinam edieke edịm akade iso edep ke ini mbono? Ndi mme odụk mbono ẹyebụhọ ke okpụk?” Ẹma ẹdep nsat nyanyan̄a man ẹda ẹfụk isọn̄ oro eketiede okpụk okpụk. Ke akpatre, eyo ama ada! Ke usen mbono ita oro, eyo ama ada ediye ediye anam isọn̄ oro asat.

Mme andidụk mbono ẹkedi ẹdikụt ata ediye itie mbono ke ini ẹkedide ẹdisịm. Nte ebiet oro eketiede ifụre ifụre ama anam ẹti nte obufa ererimbot editiede. Itie oro ama enem mme andidụk mbono nditie, ndien mme eto fig ye mme eto mfri eken ẹma ẹkenade mmọ ẹkụk, ọkọrọ ye mme in̄wan̄ ibokpot ye tomato. Eto vine ẹkeyọyọhọ edem mbot utịn̄ikọ. Ke ini ke ini nte ẹsụk ẹnọde utịn̄ikọ, otuowo ẹma ẹsikop ekikọ ẹkpọkde ye nte eka unen ẹkwahade ke ini ẹketan̄de nsen mmọ. Ẹma ẹkop mme uyom en̄wen oro ẹsikopde ke mme obio-in̄wan̄, edi emi ekenenem mme andidụk mbono oro. Otuowo ikayakke oro ọwọn̄ọde ntịn̄enyịn mmọ, utu ke oro, mmọ ẹkekam ẹnen̄ede ẹkpan̄ utọn̄ ẹnọ inem inem utịn̄ikọ a-Bible oro ẹkenọde. Nte ededi, idịghe emi kpọt ke ẹkeme nditi mban̄a mbono emi.

Ọyọhọ “Utịben̄kpọ” Iba

Ke utịt edinam usenubọk Friday, ama akpa mme andidụk mbono idem ke ini Geoffrey Jackson emi edide owo Otu Ukara Mme  Ntiense Jehovah, ọkọtọtde ke ẹsio ofụri New World Translation of the Holy Scriptures ke usem Georgian. * Mmọn̄eyet ama asiaha ediwak owo ke ntak n̄kpaidem. Ubon kiet ẹma ẹtịn̄ idara idara ẹte: “Nnyịn ikemeke nditre ndiwụt esịtekọm ke utịben̄kpọ emi—Jehovah anam utịben̄kpọ emi. Nso akwa utom ke ẹnam ntem ẹkụre ke ata esisịt ini!”

Eyenete an̄wan kiet emi otode Tsalendjikha, emi okodụkde mbono ke itie mbono oro ẹketiede-tie ẹkop mme utịn̄ikọ ke urụk ukopikọ, ọkọdọhọ ete: “N̄kemeke nditịn̄ nte ekenemde mi eketre ke ini ikọbọde ofụri Bible. Nyom ndikọm mbufo ke n̄wọrọnda mbono usen ita emi. Enye ekedi enịm-mbụk mbono.” Ubon kiet ke esop oro odude ke edem usoputịn Georgia, ke mbọhọ Obubịt Inyan̄, ẹkọdọhọ ẹte: “Nnyịn ikenyene Bible kiet kpọt ke ubon nnyịn, edi idahaemi kpukpru nnyịn owo inan̄ imenyene New World Translation. Idahaemi nnyịn owo kiet kiet imekeme ndikpep Bible ọkpọkpọ.”

Nte ededi, otuowo ikọfiọkke ke odu mme n̄kpọ oro mîkasan̄ake nte ẹketịmde. Ke uwụtn̄kpọ, okposụkedi oro ẹma ẹkekabade ofụri New World Translation ẹnyụn̄ ẹmịn̄ ẹnọ ẹka Georgia mbemiso ini mbono, ikpọ owo ukara emi ẹnamde utom ke Itieutom Ukpeme N̄kpọmbet ikayakke ẹda enye ẹdụk Georgia. Nditọete ẹma ẹtọt ẹnọ itieutom emi ẹsikopde eseme mme owo ke ini mbon ukara ẹfịkde mmọ. Adaibuot ke itieutom oro ama anam ẹsana Bible oro ẹyak esisịt ini mbemiso mbono oro ọtọn̄ọ. Enye ama akam ọnọ udiana esie aka mbono oro ke Marneuli ọkọbọ idem obufa Bible oro ifan̄ man ẹkpebon ke itieutom mmimọ.

Ẹnen̄ede Ẹdara Esenowo ke Ido Mbon Georgia

Ntak en̄wen oro akanamde akamba mbono ke Marneuli edi n̄wọrọnda ọnọ Mme Ntiense Jehovah edi koro owo Otu Ukara Mme Ntiense Jehovah ama etiene ọnọ utịn̄ikọ. Kpukpru owo ke mbono oro ẹma ẹnen̄ede ẹkop inemesịt tutu mmọ owo kiet kiet ẹyom ndikọm enye ke ido mmọ. Brọda Jackson ekenyene ndidada n̄kọm nditọete ke ediwak hour, edi ama enem enye ndinam ntre.

Ke mbono kiet ama akasuana ko ke eset ke 1903, eyenete kiet ama ọdọhọ ete: “Okposụkedi oro ndide ubuene, n̄kpọbọhọ tọsịn dollar kiet utu ke ufọn oro mbọde ke mbono emi.” Ke se ikande isua ikie ẹma ẹkebe, eketie Mme Ntiense oro ẹkedụkde n̄wọrọnda mbono emi ke ndaeyo 2006 ke Georgia kpasụk ntre.

[Mme Ikọ idakisọn̄]

[Ekebe ke page 19]

‘Ekpri Amakabade Edi Tọsịn’

Isaiah 60:22 osu ke Georgia; itie oro ọdọhọ ete: “Ekpri ayakabade edi tọsịn, esisịt oyonyụn̄ akabade edi ọkpọsọn̄ idụt: ami Jehovah nyanam enye awara ke ekem ini esie.” Ke se isụhọrede ikan isua 20, mme asuanetop Obio Ubọn̄ ke Georgia oro mîkesịmke owo 100 ẹmewak ẹsịm n̄kpọ nte owo 16,000. Mme ifịk ifịk asan̄autom emi ẹkpepde mme owo Ikọ Abasi mi ke ẹkpep n̄kpọ nte owo 8,000 Bible kpukpru urua—ndien emi ọnọ ata eti idotenyịn ke Georgia eyenyene n̄kọri efen efen.

[Ndise/Ndise obio ke page 16]

(Ama oyom ndikụt nte enye enen̄erede etie, se n̄wed)

IDỤT RUSSIA

GEORGIA

⇨ Zugdidi

⇨ Kutaisi

Marneuli ⇨ Gori

⇨ Kaspi

⇨ Tsnori

TBILISI

TURKEY

ARMENIA

AZERBAIJAN

[Ebiet Ẹdade N̄kpọ Ẹto]

Ekondo: Ẹda ẹto NASA/Visible Earth imagery

[Ndise ke page 16]

Mbiet ke Tbilisi

[Mme ndise ke page 17]

Ẹkeda urụk ukopikọ ẹnam mme owo ke itie ition eken ẹkop mme utịn̄ikọ oro ẹkenọde ke mbono ke Marneuli

[Mme ndise ke page 18]

Ama adat mme andidụk mbono esịt ke ini ẹkesiode ofụri “New World Translation” ke usem Georgian