Nte Afo Emeti?

Nte afo ama ọbọ ufọn ndikot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:

• Ewe usụn̄ inan̄ ke N̄wed Abasi Christian Usem Greek etịn̄ aban̄a “esop”?

Ata akpan usụn̄ edi ofụri otu mme Christian oro ẹyetde aran (ẹsịn Christ ke ndusụk itien̄wed). Ke mme ini en̄wen, “esop Abasi” esida aban̄a mme Christian oro ẹdude uwem ke akpan ini. Ọyọhọ usụn̄ ita aban̄a kpukpru mme Christian ke akpan ebiet. Ọyọhọ usụn̄ inan̄ aban̄a mme Christian oro ẹdude ke esop kiet kiet ke n̄kann̄kụk.—4/15, page 21-23.

• Ini ewe ke ẹtre ndimek mme Christian oro ẹdikade heaven?

Bible inọhọ akpan ibọrọ. Ẹketọn̄ọ ndimek mme owo emi ke isua 33 E.N. tutu esịm eyomfịn. Ke 1935 ama ekebe, akpan uduak utom unam mbet ekedi editan̄ akwa otuowo mbok. Spirit etie ntiense ọnọ ndusụk owo oro ẹkenade baptism ke 1935 ama ekebe ete ke mmọ ẹnyene idotenyịn uka heaven, ntre nnyịn ikemeke nditịn̄ akpan usenọfiọn̄ oro ẹtrede ndimek mme Christian oro ẹdikade heaven. Ata mbon oro ẹyetde aran inyeneke spirit Abasi ikan mme erọn̄ en̄wen, inyụn̄ iyomke mbon en̄wen ẹdụk ufụn ẹnọ mmimọ. Mme Christian ẹnyene ndinam akpanikọ nnyụn̄ n̄ka iso nnam uduak Abasi, inamke n̄kpọ m̀mê mmọ ẹdori enyịn ndika heaven m̀mê ndidu ke isọn̄.—5/1, page 30-31.

• Ke ini Jephthah akanamde akan̄a, ndi enye ekenen̄ede oyom ndiwa adiaha esie nte edifọp uwa nnọ Abasi?

N̄wan̄ansa-o! Se Jephthah eketịn̄de ọkọwọrọ ke iyayak owo ekededi oro ediwọrọde edisobo ye imọ inọ man anam n̄kpọ Abasi ọyọhọ ọyọhọ, kpa se Ibet Moses ekenyịmede. (1 Samuel 2:22) Man osu akan̄a ete esie, adiaha Jephthah ama aka iso anam utom ke ataya, ndien oro ekedi ata akamba n̄waidem sia ọkọwọrọ ke enye ididọhọ ebe tutu amama.—5/15, page 9-10.

• Nso ufọn ke n̄wed eset ekenyene ọnọ akpa mme Christian?

Etie nte mme Christian ẹkesikama ikpan̄wed tutu ke utịt akpa isua ikie E.N. ke nsụhọde n̄kaha. Ke ọyọhọ isua ikie iba E.N., mbon oro ẹkemade n̄wed eset ẹma ẹsifan̄a ye mbon oro ẹkemade ikpan̄wed ẹban̄a enye oro ọfọnde akan. Ntaifiọk ẹnịm ke mme Christian ndikada mme n̄wed eset nnam n̄kpọ ama enen̄ede etịp esịn ke mme owo ndima enye.—6/1, page 14-15.

• Nso idi N̄wed Usenọfiọn̄ Gezer?

Enye edi ekpri itiatn̄wed oro ẹkefiọhọde ke 1908 ke obio Gezer. Ediwak owo ẹkere ke eyen ufọkn̄wed ekewet itiatn̄wed emi nte ubak utomufọk esie. Ẹwet mme ini utọ ye mme ini idọk ke itiatn̄wed emi, ọtọn̄ọde ke idọk ọfiọn̄ emi ọtọn̄ọde ke ufọt ufọt ọfiọn̄ September esịm ufọt ufọt ọfiọn̄ October, ẹnyụn̄ ẹwet ẹban̄a nsio nsio mfri ye utom oro ẹkesinamde ke in̄wan̄.—6/15, page 8.

• Nso ke ọwọrọ ndinam idiọkn̄kpọ ndian edisana spirit?

Ẹkeme ndinam idiọkn̄kpọ ndian edisana spirit Jehovah, kpa idiọkn̄kpọ oro Abasi mîdifenke. (Matthew 12:31) Abasi ebiere m̀mê nnyịn imanam idiọkn̄kpọ oro imọ mîdifenke, ndien enye ekeme ndibọ nnyịn spirit esie. (Psalm 51:11) Edieke nnyịn inen̄erede ifụhọ iban̄a idiọkn̄kpọ oro ikanamde, enen̄ede etie nte ke imenen̄ede ikabade esịt ndien ke ntre inamke idiọkn̄kpọ idian edisana spirit.—7/15, page 16-17.

• Ntak emi Edidem Saul okobụpde m̀mê David edi eyen anie ke ini edide enye ama ọdọdiọn̄ọ David mbemiso ini oro? (1 Samuel 16:22; 17:58)

Saul ikoyomke ndifiọk sụk enyịn̄ ete David. David ndikakan Goliath ama anam Saul ọfiọk ke enye enen̄erede enyene mbuọtidem ye uko, ntre Saul ama oyom ndifiọk orụk owo emi okobonde enye. Etie nte Saul okoyom ndida Jesse m̀mê mbonubon esie eken nsịn ke udịmekọn̄ esie.—8/1, page 31.