Mme Mbụme Ẹtode Mme Andikot

Nso ke ikọ Jesus ọkọwọrọ ke ini enye ọkọdọhọde ke ofụn esie emi anamde akpanikọ eyenyene “ọniọn̄”?

Jesus ama obụp ete: “Anie enen̄ede edi ofụn emi anamde akpanikọ onyụn̄ enyenede ọniọn̄ emi eteufọk esie ekemekde ete ese aban̄a mbonufọk imọ, onyụn̄ ọnọ mmọ udia ke edikem ini?” (Matthew 24:45) “Ofụn” oro ọnọde “udia” eke spirit edi esop mme Christian oro ẹyetde aran. Ntak emi Jesus ọkọdọhọde ke ofụn emi enyene ọniọn̄? *

Se Jesus ekekpepde ekeme ndinam nnyịn itịm ifiọk se “ọniọn̄” oro enye eketịn̄de aban̄a ọwọrọde. Ke uwụtn̄kpọ, ke ini Jesus eketịn̄de aban̄a “ofụn emi anamde akpanikọ onyụn̄ enyenede ọniọn̄,” enye ama otop n̄ke kiet abana nditọiban duop oro ẹketiede ẹbet ebendọ. Nditọiban emi ẹti nnyịn nte mme Christian oro ẹyetde aran ẹkenen̄erede ẹtie ẹbet akwa Ebendọ, kpa Jesus Christ, mbemiso 1914. Ke otu nditọiban duop oro, ition ikenyeneke aranikan̄ awak ekem ke ini ebendọ ekedide edisịm, ntre mmọ ikodụkke usọrọ ndọ oro. Ition eken ẹma ẹnyene ọniọn̄. Mmọ ẹma ẹnen̄ede ẹben̄e idem, ẹkama ediwak aranikan̄, man mmọ ẹkpekeme ndika iso nyama ke ini ebendọ ekedide edisịm, ẹma ẹnyụn̄ ẹyak mmọ ẹdụk usọrọ ndọ.—Matthew 25:10-12.

Ke ini ẹkeyaride Jesus ntinya nte Edidem Obio Ubọn̄ ke 1914, ediwak mme Christian oro ẹyetde aran ẹkedori enyịn nditiene enye ke ndondo oro n̄ka heaven. Nte ededi, ekese utom okosụk ododu ọnọ mmọ mi ke isọn̄, ndien ndusụk mmọ ikeben̄eke idem ndinam utom oro. Kpa nte ndisịme nditọiban oro, mmọ ikebemke iso isọn̄ọ idemmọ ke n̄kan̄ eke spirit, ntre mmọ ikeben̄eke idem ndika iso nnam utom nte mme ọnọ un̄wana. Ata ekese ke otu mmọ ẹma ẹda ọniọn̄ ye ikike ẹnam n̄kpọ, ẹnyụn̄ ẹben̄e idem ke n̄kan̄ eke spirit. Ke ini mmọ ẹkefiọkde ke imenyene ekese utom ndinam, mmọ ẹma ẹtọn̄ọ utom emi ke idatesịt. Emi ama owụt ke mmọ ẹdi “ofụn emi anamde akpanikọ onyụn̄ enyenede ọniọn̄.”

Kere n̄ko ban̄a nte Jesus etịn̄de aban̄a “ọniọn̄” ke Matthew 7:24. Jesus ọkọdọhọ ete: “Ẹyemen kpukpru owo eke ẹkopde ẹnyụn̄ ẹnamde mme ikọ mi emi ẹdomo ye owo ọniọn̄, emi ọkọbọpde ufọk esie odori ke enyọn̄ akamba itiat.” Owo emi enyenede ọniọn̄ esibọp ufọk esiemmọ enen̄ede ọsọn̄ mbak ofụm ediberi ọduọk. Edi ndisịme owo esibọp esie odori ke utan, ndien ufọk oro oyowụre. Mmọdo, owo ọniọn̄ emi etienede Jesus enyene ndidi owo emi ọsọpde okụt ndiọi utịp editiene ọniọn̄ owo. Asian ye ikike esie ẹnam enye ayak mbuọtidem, edinam, ye se enye ekpepde ẹnen̄ede ekekem ye se Jesus ekekpepde. Se “ofụn emi anamde akpanikọ onyụn̄ enyenede ọniọn̄” anamde edi oro.

Se n̄ko nte ẹtịn̄de ẹban̄a “ọniọn̄” ke nsio nsio itie ke N̄wed Abasi Usem Hebrew. Ke uwụtn̄kpọ, Pharaoh ama emek Joseph esenyịn udia ke Egypt. Emi ekedi ndutịm oro Jehovah akanamde man ọnọ ikọt esiemmọ udia. Edi ntak emi ẹkemekde Joseph nte esenyịn udia? Pharaoh ọkọdọhọ enye ete: ‘Owo eke enyenede ikike [m̀mê ọniọn̄] ye ifiọk nte afo idụhe.’ (Genesis 41:33-39; 45:5) Kpasụk ntre, Bible ọdọhọ ke Abigail ama enyene “eti ibuot” m̀mê ọniọn̄. Enye ama ada udia ọsọk David, kpa enye oro Jehovah ekeyetde aran, onyụn̄ ọnọ ikọt David n̄ko. (1 Samuel 25:3, 11, 18) Ẹkekot Joseph ye Abigail mbon ikike ye mbon eti ibuot, m̀mê ọniọn̄, koro mmọ ẹma ẹfiọk uduak Abasi ẹnyụn̄ ẹda eti ibuot ye ikike ẹnam n̄kpọ.

Mmọdo, ke ini Jesus ọkọdọhọde ke ofụn emi anamde akpanikọ enyene ọniọn̄, enye okowụt ke otu ofụn emi ẹdinam n̄kpọ ke ifiọk, ikike, ye asian, koro mmọ ẹdiyakde mbuọtidem, edinam, ye se mmọ ẹkpepde ẹnen̄ede ekekem ye Ikọ Abasi emi edide akpanikọ.

[Ikọ idakisọn̄]