“Ẹyesụk Ẹkọri ke Usọn̄”

EDIWAK owo emi ẹdụn̄de ke mme idụt Mediterranean ẹsitọ eyop emi ẹkotde date palm ke okụre mmọ. Eyop emi ẹsinen̄ede ẹye ẹnyụn̄ ẹnen̄ede ẹnem. Akan oro, mmọ ẹsisụk ẹsesehe idem ke ẹma ẹkebe isua ikie.

Edidem Solomon ke Israel eset ama etịn̄ ke ido uto aban̄a idaha ediye eyenan̄wan Shunem ete ke ebiet eyop. (Ikwọ Solomon 7:7) N̄wed oro Plants of the Bible ọdọhọ ete: “Ẹkot eyop emi ke usem Hebrew, ‘tàmâr.’ . . . Nte ini akakade, enye ama akabade ikọ Hebrew emi akadade aban̄a uyai ye uku, ndien ẹkewak ndida enye nsio nditọiban.” Ke uwụtn̄kpọ, ẹkesio ediye eyenete Solomon, Tamar. (2 Samuel 13:1) Mme ete ye eka ẹsụk ẹsosio nditọiban mmọ enyịn̄ oro.

Idịghe ndiye iban kpọt ke ẹda ẹdomo ye eyop. Andiwet psalm ọkọkwọ ete: “Edinen owo ayasiaha nte eyop: onyụn̄ ọkọri nte cedar ke Lebanon. Ẹmetọ mmọ ke ufọk Jehovah; mmọ ẹyesiaha ke okụre Abasi nnyịn. Ẹyesụk ẹkọri ke usọn̄, ẹyesehe ẹnyụn̄ ẹsiak ikọn̄.”—Psalm 92:12-14.

Mbon oro ẹsọn̄ọde ẹda ẹnam n̄kpọ Abasi ke eyo usọn̄ ẹbiet ediye eyop emi. Bible ọdọhọ ete: “Iwat edi anyanya ubọn̄, ke usụn̄ eti ido ke ẹdikụt enye.” (Mme N̄ke 16:31) Okposụkedi n̄kani owo mînen̄ekede inyene odudu aba ke ntak usọn̄, mmọ ẹkeme ndisụk nnyene odudu ke n̄kan̄ eke spirit ebe ke ndikpep Ikọ Abasi, kpa Bible, kpukpru ini. (Psalm 1:1-3; Jeremiah 17:7, 8) Ke ntak ndinem ikọ ye nti uwụtn̄kpọ mmọ, n̄kani owo emi ẹnamde akpanikọ ẹsinen̄ede ẹsịn udọn̄ ẹnọ mbon en̄wen ẹnyụn̄ ẹn̄wụm mfri ke isua ke isua. (Titus 2:2-5; Mme Hebrew 13:15, 16) N̄kani owo ẹkeme ndika iso n̄kọri ke usọn̄ ukem nte eyop emi.