Mme Mbụme Ẹtode Mme Andikot

Sia ẹkewụkde mme Jew ẹte “ẹkûta baba uyo eke leaven esịnede” ke ini Passover, ntak emi Jesus akadade wine—kpa n̄kpọ emi ẹsidade mmọn̄ mfri emi ama okofụt ẹnam—ke ini enye ọkọtọn̄ọde Editi n̄kpa esie?—Exodus 12:20; Luke 22:7, 8, 14-20.

Ẹketọn̄ọ Passover, emi ẹkesidade ẹti ini emi nditọ Israel ẹkewọn̄ọde ke Egypt, ke isua 1513 M.E.N. Ke ini Jehovah ọkọnọde ewụhọ aban̄a usọrọ emi, enye ọkọdọhọ ete: “Mbufo ẹkûta baba uyo eke leaven esịnede; ẹta uyo eke leaven mîdụhe, ke kpukpru ebiet idụn̄ mbufo.” (Exodus 12:11, 20) Ewụhọ emi Abasi ọkọnọde mi akaban̄a orụk uyo oro ẹkpetade ke Passover. Owo iketịn̄ke n̄kpọ iban̄a wine.

Akpan ntak emi ẹkenọde ewụhọ emi edi sia nditọ Israel ẹkekpọn̄ Egypt itọk itọk. Exodus 12:34 ọdọhọ ete: “Mbio oro ẹmen ebok ndisi uyo mmọ, ke mîka-ifụtke kan̄a, ẹda ẹdisịne-n̄kpọ mmọ ẹbọp ke n̄kpọ-unuak-uyo mmọ, ẹbiom ke afara mmọ.” Nditre ndidia udia oro ẹsịnde leaven ke ini Passover oro ẹketienede ekedi man ẹti mme emana ini iso akpan n̄kpọ emi.

Nte ini akakade, ẹkesiwak ndise leaven nte idiọn̄ọ idiọkn̄kpọ m̀mê mbiara. Ke uwụtn̄kpọ, ke ini apostle Paul eketịn̄de aban̄a oburobụt owo ke esịt esop Christian, enye okobụp ete: “Nte mbufo ifiọkke ite ekpri leaven ananam ofụri ebok uyo ofụt?” Ekem ọdọhọ ete: “Ẹsio akani leaven ẹduọk, man mbufo ẹkpedi obufa ebok uyo, sia mîkpanaha mbiara odu mbufo ke esịt. Koro, ke akpanikọ, ẹma ẹwawa Christ, passover nnyịn. Mmọdo ẹyak nnyịn ikûda akani leaven inịm usọrọ, ikûnyụn̄ ida leaven idiọkn̄kpọ ye idiọkido inịm, edi ida uyo edisana ido ye eke akpanikọ emi leaven mîdụhe inịm.” (1 Corinth 5:6-8) Uyo emi owo mîsịnke leaven odot ndida mban̄a mfọnmma ikpọkidem Jesus.—Mme Hebrew 7:26.

Mme Jew ẹkedian wine ke usọrọ Passover nte ini akakade. Etie nte mmọ ẹkedian emi ke ini ẹketode ntan̄mfep ke Babylon ẹdi. Bible idọhọke ke ẹma ẹkpan ndinam ntre, mmọdo ikakwan̄ake Jesus ndida wine nnịm usọrọ Passover. Nte ededi, nte wine ekesifụtde ke idemesie ke eset ikedịghe ukem ye nte uyo ekesifụtde. Ẹkenyene ndisịn leaven mbemiso ndomuyo ofụtde. Edi owo ikesisịnke n̄kpọ ke wine emi ẹdade grape ẹnam man ofụt. Grape enyenyene n̄kpọ oro esinamde enye ofụt ke idem esiemmọ. Ikpîkpu mmọn̄ grape ikpodụhe ke ini Passover koro enye ikpanaha toto ke ini idọk idisịm Passover ke ini utọ, edi ifụtke.

Mmọdo, Jesus ndikada wine nte idiọn̄ọ Editi ituahake ye mme ewụhọ Passover ke baba usụn̄ kiet. Odot ẹda ndatndat wine ekededi emi owo mîsịnke-sịn inịn̄e, emi owo mîdianke n̄kpọ man okop odudu, m̀mê emi owo mîdianke n̄kpọ man ẹnam enye enem inua, nte ndamban̄a “ọsọn̄urua iyịp” Christ.—1 Peter 1:19.